Nyan fa Korandak Awawos kuker Syapram

Ro paik Januari 2018 ḇe bo, siser awawos fa koḇukiḇaryas riḇeso ro ram ḇarpon Syapram Farkarkor Kankenem ma Fararmyan Kristen na. Fandun fa kosewar kaku insama koḇuk monda awer syap koḇena mboi kawawos resari. Inja, sfasos vidio ḇefasnai moḇsa kawos randak kuker koḇepake Refo monda insama nafnoḇek manḇaryas sya fa sakfrur na rofyor sḇaryas. Inja, koḇaryas ido kopok koḇepake awer syap na ke? Roḇa, rarirya ḇa! Kukro imnis radine, koḇepake syapram ido na napyan syadi fa kawos ḇe snonkaku sya. Nyan rifyak nane bisa koso na rofyor koḇepake syapram:

1. Buk fakfuken ma wakofen fa kyinfir kankarem ḇero ram ḇarponi.

2. Fasnai kankarem ro Refo ḇero ram ḇesuru bo ya. Mam mboi nasrow ido, muwasya ma muyawos farkarkor ḇero syapram ani.

3. Buk syapram anya ḇe ḇena rum ani, ma wanun fa nya swaf ido iwasya syapram ani.

4. Wambran ḇaime, fasnai fakfuken ḇero ḇar ”Infa Kokara” ma wakofen fa nari kwaḇer insape kwarem na.

Kwaḇer ido, kwarem fakfuken rwir ro randak anya, ramnai rwir fakfuken wer fa nari kwaḇer ḇo kwarem na. Mankundaw kwinfir fakfuken ḇero situs web koḇedi ḇaido syap sikofenḇair ro syapram ḇarpuri. Mam mboi nasrow ido, buk syap Ankankinem Ḇeḇye Ḇerama ro Allah! oroḇaido syap ḇese ro Roi fa Koḇukifarkor na.