Referensi faro Kankenem ma Fararmyan Kristen Koḇena
4-10 MEI
ARASAI ḆERO REFO | KEJADIAN 36-37
”Sifrur Mnis I Ḇa Snar Sisnesna Dosam I”
(Kejadian 37:3, 4) Israel iswar syadi Yusuf i ro romawa ḇyesikam, snar ḇyemansar kwar insape dakna Yusuf i. Israel ifrur sansun ḇepduk kaku faro i. 4 Naek ḇyesine smam ḇoi kma sedi iswar syadi i, mura simsori ma sawos myaren kuker i ḇa.
(Kejadian 37:5-9) Ro ras oso, Yusuf imafu ma fyawar naḇe naek ḇyesi, inja nafrur fa simsor syadi i wer. 6 Ikofen ḇe si ḇo doḇe, ”Mkakrower mafafu yena ine. 7 Kosya koyawek gandum ro yafe, fyoroḇa ido gandum bos yena nores muryas ma gandum bos mkoḇena nayarwarek gandum bos yena ma mkoḇena nkunem ro gandum bos ayena.” 8 Naek ḇyesi sikofen ḇe i, ”Rosai wakofeni, woḇe nari wakbe raja ma wasyadi ro inko ke?” Yusuf mafafu ḇyedine, nafrur simsor fafaya i ḇa. 9 Ramnai, ismai mafafu oso ḇese wer, ma fyawar naḇe naek ḇyesi, ikofen, ”Yamafu mafu oso wer. Ḇoi kirine ori, paik, ma mak ri 11 sikunem faro aya.”
(Kejadian 37:11) Inja naek ḇyansine sisnesna dosam i, infama kmari iswarepen ḇe wos ḇyenane.
(Kejadian 37:23, 24) Fyor Yusuf ryama kwar ḇe naek ḇyesi, ḇeba ḇyansine sper ḇeri sansun ḇepduk ḇyedi. 24 Ramnai suni ḇo sisawen i ḇe der iwarbaḇ. Fafisu anya, war nasya ro der ani dori ḇa.
(Kejadian 37:28) Fafisu snonkaku Midian ḇefarbaḇyan sya simbran fanam si, skanow Yusuf i ro der ani ma sboḇ i ḇe snonkaku Ismael sya kumpan sarak ri 20. Ramnai snonkaku ansine sun Yusuf i ḇe Masir.
Ḇaḇesasewar Arasai Rurya
(Kejadian 36:1) Naneiso Esau sarisa ḇyedi, isoine Edom i.
it-1-IN 624 ¶7
Edom
[Rik].
Edom iso snonsnon eḇese ḇaido apap sḇukidor Esau i, Yakub naek ḇesaper ḇyedi. (Kej 36:1) Sap i rarirya kukro ḇyoḇ kwar nasan romawa rawer ḇyedi snar roḇean ḇerik Yakub ikun na. (Kej 25:30-34) Esau baken ḇyena nasnai rakrik fyor ḇyeaḇen (Kej 25:25), ma saprop, karui, moḇ Esau ma kpu up ḇyesi sḇarek rona narik kako.
(Kejadian 37:29-32) Ramnai fafisu Ruben kyaḇer ḇe der ani myam ḇoi Yusuf isya ḇa kwar, mura pyansawek sansun ḇyedi. 30 Inja kyaḇer ḇe ḇeknik ḇyesi, ḇo ikofen, ”Romawa ani isne ḇa kwar! Na yaḇeraryo?” 31 Mura, sikok kambing snoman oser ma sisowen Yusuf sansun ḇyani ro rik anna. 32 Ramnai, sun sansun ani ḇe kma sedi ḇo soḇe, ”Nkosrow sansun ine. Mampan ari, romawa bani sansun ḇyedisine ke risyaḇa.”
it-2-IN 1052 ¶9-10
Ḇemamwarek Pyan
Rofyor manfarandows oso ikofen nari myamwarek rofanfan nai sya, ro sasoser ine fyasnai imarisen fa fyaduru ma myamwarek pyan aiwan sya. Ikofen ḇe ḇena rofanfan sya na ḇyuk anan ma myamwarek si ro ḇekarawraw sya, ḇaido sun na ido, nari ḇyak fadwer na. Ḇape, fakamamar ḇyeja na nakain fyoro ḇa, snar sasoser sap ro boyasne nbuk mkei ḇe snonkaku ryir rofanfan ansya ro fararur ḇyena, imnis ra imkei ro aiwan ḇeyan ḇepek. Ḇape, insa imkei ro fakamamar ḇyena fa myamwarek, fandun fa fyasnai kaku faro ḇena rofanfan sya, raris aiwan oso sarekbos ḇo ḇesnarem. Rofyor ḇena rofanfan sya myam roi ani ido, na fyas syap oso ḇefasnai ḇemamwarek ya isasar ḇa.
Sasoser ani imnis kako rarirya ro rosai monda srir fa smamwarek pyan na, syadi wer ro fasfes ro kina, imnis ra, romawa snon rawer [rak] siso na ḇena hak fa ḇemamwarek kasun ḇyesya, ḇeḇe snon ma bin sya. Inja, bisa kofawi roi Ruben ḇe romawa rawer ḇyeḇirḇar kuker Yusuf kankenem ḇyedi, raris ḇeḇefas ro Kejadian 37:18-30, rofyor naek ḇyesya sawos fa siḇe smun Yusuf i. ”Ikofen, ’Komun aweri.’ . . . ’Kosasyar awer rike. . . . kofrur susa aweri.’ Syewar fa skomun aweri insama dun kaḇer i ḇe kmari wer.” Fafisu Ruben myam ḇoi Yusuf isya ḇa kwar, imkak fafayaḇa inja ”pyansawek sansun ḇyedi” ḇo ikofen, ”Romawa ani isne ḇa kwar! Na yaḇeraryo?” ifawi na skara ḇo soḇe iso ḇefrur fa Yusuf iḇyor ya. Insama imkei ro safsof ya, naek ḇyesi sepande inja sifrur rya aiwan ḇeyan ḇepek oso myun i kwar. Sun Yusuf sansun ḇesrik ḇyedi ḇo sisoweni ro kambing rik ḇyena. Ramnai sfasnai ḇe kmari ma mankara ro kina skoḇedi, Yakub i, na ḇebuk ḇaḇemkei ḇe Ruben i faro fakamamar rosai monda snar myam Yusuf sansun ḇyedi ḇefo kuker rik na, inja Yakub na kyara aiwan ḇeyan ḇepek myun Yusuf i kwar.—Kej 37:31-33.
Ḇaḇewasya Refo
(Kejadian 36:1-19) Naneiso Esau sarisa ḇyedi, isoine Edom i. 2 Esau fyarḇuk kuker bin Kanaan susnosna Ada ma Oholibama. Ada iso Elon snon Het inai ḇyedi, mboi Oholibama ima Ana inai ḇyediri ma Zibeon snon Hewi inai kpu ḇyedi. 3 Esau dakfarḇuk kuker Basemat, Ismael inai ḇyani ma Nebayot srar ḇyedi. 4 Ada daḇen Elifaz faro Esau i, ma Basemat daḇen Reuel, 5 ma Oholibama daḇen Yeus, Yalam, ma Korah i. Siso Esau roma ḇyesirya ḇeḇeaben ro sup Kanaan. 6 Ḇarpur ya, Esau dun swa ḇyeskoya, roma ḇyesi, ma snonkaku ḇero rum ḇyedi kame, fnoḇek aiwan ḇyesi ma nana arasai iryur ro sup Kanaan anna, ramnai ibur kasun ḇyani Yakub i ḇe sup ḇese. 7 Sḇarek kayamyam wer ḇa snar nana arasai sena nabor mankenem ma moḇ sḇarek roroya namnis faro rofanfan sesya ḇa. 8 Inja Esau iburda ḇyarek ro moḇ ḇero bon Seir. Esau isoine Edom i. 9 Esau sarisa ḇyedi, isoine ḇyeḇe kma faro snonkaku Edom, ro moḇ ḇero bon Seir. 10 Esau roma ḇyesi siso: Elifaz isoine roma Esau nya ro Ada i; Reuel isoine roma Esau nya ro Basemat i. 11 Elifaz roma ḇyesi sisoine Teman, Omar, Zefo, Gatam, ma Kenaz i. 12 Esau roma ḇyedi Elifaz i dakna bin gundik snori Timna, nari ḇeyaḇen Amalek i. Sinema Esau swari Ada kpu ḇyesirya. 13 Reuel roma ḇyesi sisoine Nahat, Zerah, Syamah, ma Miza i. Sima Esau swari Basemat kpu ḇyesirya. 14 Romawa snon ro Oholibama Esau swari, Ana inai ḇyedi ma Zibeon kpu ḇyedi, sisoine: Yeus, Yalam, ma Korah i. 15 Ineiso ḇeḇe mananwir ro Esau syos ḇyedi, sisoine Elifaz roma ḇyesi, Esau roma rak ḇyedi: Teman, Omar, Zefo, Kenaz, 16 Korah, Gatam, ma Amalek i. Siso ḇeḇe mananwir ro Elifaz syos ḇyedi ro sup Edom. Sima Ada kpu ḇyesirya. 17 Esau roma ḇyedi Reuel i roma ḇyesi sisoine: Nahat, Zerah, Syamah, ma Miza i. Siso ḇeḇe mananwir ro Reuel syos ḇyedi ro sup Edom. Esau swari Basemat i kpu ḇyesirya. 18 Esau swari Oholibama i roma ḇyesi sisoine: Yeus, Yalam, ma Korah. Siso ḇeḇe mananwir ḇeḇesyos ro Oholibama Ana inai ḇyedi. 19 Siso Esau roma ḇyesi, isoine ḇeḇe mananwir sedi. Isoine Edom i.
11-17 MEI
ARASAI ḆERO REFO | KEJADIAN 38-39
”Yahwe Ibur Yusuf I Ḇaḇeri”
(Kejadian 39:1) Fafisu sun Yusuf ḇe Masir kwar, snon Masir snori Potifar, ḇebukor ro istana Firaun ma ḇebukor ro sordade sya, kyoḇes i ro snonkaku Ismael ḇeyuni mura sya.
(Kejadian 39:12-14) Mura ido bin ani damkepen Yusuf sansun ḇyedi ḇo doḇe, ”Wenef kuker aya!” Ḇape Yusuf ibur sansun ḇyedi ro bin ani ḇrasi ḇo ifrar ḇe bandi. 13 Fyor myam Yusuf sansun ḇyedi ḇyarek ro ḇrasi ma ifrar ḇe bondi, 14 bin ani dar naba ma dor manfyan ḇyesya ḇo doḇe, ”Mkomame! Snon Ibrani sun muma ani iḇe ifrur mamyai ko. Iḇe dembuk aya fa ḇyeraro aya, ḇoi yayuw naba.
(Kejadian 39:20) Amber ḇyani dun Yusuf ḇo isyun i ro bui, moḇ sisisen warek raja snonkaku ḇyesi, ma ro dia srir Yusuf i kako.
(Kejadian 39:21-23) Ḇape, Yahwe ryous Yusuf i ḇesya kwar ma fyasnai saswar soasuser faro i. Ifrur fa ḇebukor ro bui ani imarisen Yusuf i. 22 Inja ḇebukor ro bui ani iwan Yusuf i fa myamwarek ḇero bui ansya kam. Yusuf mankundiso nari ḇeḇuk fararur faro si na 23 Ḇebukor ro bui ani myamwarek wer ḇa rosai riryakam sikyar faro Yusuf i na, snar Yahwe ryous i ma ifrur Yusuf fararur ḇyena kam nambran pyum.
Ḇaḇesasewar Arasai Rurya
(Kejadian 38:9, 10) Ḇape Onan fyawi nari syos ani na smam naḇe syos ḇyeja ḇa. Injariso rofyor denefus bin kabom ḇeba ḇyani ido, isawen dur dadui ḇyedi ḇe saprop insamaido ḇeba ḇyani dakna syos awer. 10 Roi Onan ifrur nane nḇarḇor ro ḇarpon Yahwe I. Iso ḇefnai fa Yahwe myuni kako.
it-2-IN 250 ¶9
Onan
[Wos knam ro Onan kyurfasnai ”samambraḇ fa nya romawa; papoik ḇesren”].
Yehuda romawa ḇesuru ḇyedi nya ro bin Syua, snonkaku Kanaan. (Kej 38:2-4; 1Taw 2:3) Rofyor Onan ḇeba ḇyedi, Er imar, nya romawa ḇaim snar Yahwe myuni kuker ifrur sasar oso, inja Yehuda iwan Onan fyarḇuk sadwer kuker Tamar i, ḇekabom kwar ani. Rofyor suna romawa snon oso ido, romawa ani ima Onan romawa ḇyedi ḇa, ma warisan fa ḇyeromawa rawer nari isapi ḇe romawa ani ḇeḇe ahli waris ro Er; fyor ḇeḇefadwer kmari ro kina yadori noḇa, Onan iso na ḇena warisan nakam. Fama ras Onan denfus kuker Tamar i, ”isawen dur dadui ḇyedi ḇe saprop”, ḇyuk ḇe Tamar i ḇa. Ine fyasnai ḇa Onan isya ifarfnak rofmar ḇyedi, snar ro farfyar ani sap ”rofyor denefus kuker ḇeba ḇyedi swari”, isawen dur dadui ḇyedi. Ine fyasnai ”ifrur anenef fasfus ya ḇoi isof ismai marisen ya ḇa snar ifrur muk na” (coitus interruptus), Onan imewer ifrur roi ani insama dur dadui ro rofmar ḇyedi syun awer ro Tamar rofmar ḇyedi. Onan ifrur sasar faro baken ḇyedi ḇa, mboi roi ḇefnai Yahwe myun iso snar isouser faro kmari ḇa, i kako fyandun mankundi, ma imewer iso akurfasnai faro farḇakḇuk Allah dap kwar na. Onan mankundi nya romawa ḇa.—Kej 38:6-10; 46:12; Bil 26:19.
(Kejadian 38:15-18) Fafisu myami, Yehuda doḇerada bin ḇefamfnom dirya, snar ikawef mkasi. 16 Mura Yehuda fyanam i ro nyan andire ma ikofen ḇe i, ”Bisa yenefus au ke?” Fyawi ḇaḇeri bin ani ima imbikin ḇyedirya. Bin ani doḇe, ”Rosai nari Amber buk ḇe aya fa yenefus au?” 17 Yehuda kyarem ḇo doḇe, ”Na yafarem kambing mkun oso ḇe au.” Fama bin ani doḇe, ”Rosai Amber rwir fa ḇefasnai na farem na?” 18 Yehuda doḇe, ”Rosai nari yaḇuk ḇe au i?” Bin ani kyarem ḇo doḇe, ”Iwur kawin, kabrai, ma ankyon Amber wakif ya.” Yehuda ḇyuk nakam ḇe i ma denefusi, ḇarpur mura ido bin ani fyadores.
w04-IN 15/1 30 ¶4-5
Fakfuken ro Ḇewasya
Yehuda ifrur sasar kuker ḇyuk romawa ḇyedi Syela i ḇe Tamar i ḇa, imnis kuker asas ḇyena. syasar kako snar kyara bin ifrur farḇuk kuker i ima bin ḇefrur farḇuk famfnom ro bait dirya. Roi ine naḇese kuker marisen Allah Ḇyena, ḇewan snon oso na ifrur farḇuk monda fyor fyarḇuk kwar. (Kejadian 2:24) Ḇape, Yehuda ifrur farḇuk kuker bin ḇefrur farḇuk famfnom oso ḇa. Inja ifawi ḇa ḇo fyadwer romawa ḇyedi Syela i kwar fa fyarḇuk sadwer kuker imbikin ḇyedi ma iso kamam ḇekaku faro romawa ani.
Rarirya Tamar, ifrur farḇuk famfnom ḇa. Romawa ḇesaper ḇyesuya, suma nya su ro fararur farḇuk famfnom ḇa. Fafisu Boaz ḇerama ro Betlehem dun Rut i, bin Moab fa fyarḇuk sadweri, manfarkin ḇero Betlehem sya sawos roi ḇepyum kuker Perez, Tamar romawa ḇyedi kuker sikofen faro Boaz, ”Rarirya kina bedi na imnis Perez kina ḇyedi, ḇeaḇen ro Tamar faro Yehuda, iso ḇerama ro kpu up Yahwe na ḇyuk faro au ro inai bin ine.” (Rut 4:12) Perez i kako up ro Yesus Kristus.—Matius 1:1-3; Lukas 3:23-33.
Ḇaḇewasya Refo
(Kejadian 38:1-19) Ro fafisu ani, Yehuda ibur naek ḇyesi ma ḇyawes rum kruḇen fanam ro snon Adulam ḇenir Hira moḇ ḇyarek roya. 2 Ro diwa, Yehuda myam Syua, snon Kanaan inai ḇyani. Inja ḇyuk bin ani ma denefusi. 3 Bin ani fyadores ma daḇen romawa snon, ma Yehuda nyir i ḇe Er. 4 Swari fyardores wer ma daḇen roma snon wer, ma snir i ḇe Onan. 5 Daḇen roma snon wer ma nyir i ḇe Syela. Yehuda isya ro Akhzib fafisu roma ani ḇyeḇeaḇen. 6 Ḇarpur mura, Yehuda dun Er roma rak ḇyedi fa fyarḇuk kuker Tamar i. 7 Ḇape Er, Yehuda roma rak ḇyanine, ifrur ḇarḇor ro ḇarpon Yahwe I. Eḇedari, Yahwe myuni. 8 Inja Yehuda ikofen ḇe Onan i, ”Farḇuk kuker bin kabom ḇeba bani ma farḇuk sadwer ḇeba bani, samaido ḇeba bani dakna syos roro au.” 9 Ḇape Onan fyawi nari syos ani na smam naḇe syos ḇyeja ḇa. Injariso rofyor denefus bin kabom ḇeba ḇyani ido, isawen dur dadui ḇyedi ḇe saprop insamaido ḇeba ḇyani dakna syos awer. 10 Roi Onan ifrur nane nḇarḇor ro ḇarpon Yahwe I. Iso ḇefnai fa Yahwe myuni kako. 11 Yehuda ikofen ḇe Tamar imbikin ḇyanine, ”Wabur mura ḇarekus kmami ro rum ḇyani ma farḇuk awer isof roma yedi Syela iba.” Snar imkakburo, ’Na dakmar imnis ḇeba ḇyansuyandi.’ Tamar iburda ḇyarek ro kmari rum skoḇeja. 12 Fafisu ḇeḇeso mura, Yehuda swari, Syua inai ḇyani, imar. Ras kankanes ḇyena isyonde kwar ramnai, Yehuda ryaḇe Timnah ḇe moḇ skaruk domba bur na kuker bati ḇyedi Hira i, snon Adulam ani. 13 Sikofenḇadir ḇe Tamar i soḇe manbanyori isya imbran ḇe Timnah snar imbe kyaruk domba bur na. 14 Mura pyer sansun kabom ḇyedi ma isaswo srei ro ḇruri, dun srei fa ḇyuki dwarek i. Ramnai kyon ro kerwa ḇeba ḇero kota Enaim, ḇefanam sampak ḇeker ḇe Timnah, snar myam ḇoi Syela iba kwar fama sḇe i fa fyarḇuk kuker i ḇaim. 15 Fafisu myami, Yehuda doḇerada bin ḇefamfnom dirya, snar ikawef mkasi. 16 Mura Yehuda fyanam i ro nyan andire ma ikofen ḇe i, ”Bisa yenefus au ke?” Fyawi ḇaḇeri bin ani ima imbikin ḇyedirya. Bin ani doḇe, ”Rosai nari Amber buk ḇe aya fa yenefus au?” 17 Yehuda kyarem ḇo doḇe, ”Na yafarem kambing mkun oso ḇe au.” Fama bin ani doḇe, ”Rosai Amber rwir fa ḇefasnai na farem na?” 18 Yehuda doḇe, ”Rosai nari yaḇuk ḇe au i?” Bin ani kyarem ḇo doḇe, ”Iwur kawin, kabrai, ma ankyon Amber wakif ya.” Yehuda ḇyuk nakam ḇe i ma denefusi, ḇarpur mura ido bin ani fyadores. 19 Ramnai, Tamar ryamura pyer sansun srei ḇyani ma syansun sansun kabom ḇyedi wer.
18-24 MEI
ARASAI ḆERO REFO | KEJADIAN 40-41
”Yahwe Ifnoḇek Yusuf I”
(Kejadian 41:9-13) Mura ḇebukor ro ḇemamwarek aninem ikofen ḇe Firaun i, ”Ras ine imbe yakofenḇair sasar yena. 10 Ro ḇepon iwara Firaun wamsor aya ma ḇebukor ro ḇemamwarek mamami. Inja wasun nuḇe ḇui ḇero ḇebukor ro sordade rum ḇyedi. 11 Ro roḇ oso, numafu. Mafafu nuḇena knam ḇyena naḇesisye. 12 Ro dia, snon Ibrani oso isya, ḇebukor ro sordade manfyan ḇyedi. Rofyor nufawar mafafu nuḇena, ikofenḇair mafafu nuḇena oser-oser. 13 Rosai ikofen na nḇerarirya kaku, yana nasan yeja kaḇer, imbape ḇebukor ro ḇemamwarek mamami ani skafi.”
(Kejadian 41:16) Mura Yusuf kyarem ḇe Firaun i ḇo doḇe, ”Ayaḇa, Ambero! Allah nari ḇekofenḇair ankinem ḇepyum ine ḇe Firaun au.”
(Kejadian 41:29-32) ”Nari roḇean nabor kaku ro sup Masir ḇesiper ro swaf taun rifik. 30 Ḇape ḇarpur ido andoba nari myun ro swaf taun rifik. Andoba ani nari myun kaku sup Masir, inja roḇean ḇeborna nari sefanander na.31 Roḇean ḇebor ro sup ani na siswarepen na ḇa snar andoba ḇemun papur nane. 32 Firaun mam mafafu ani rarwan risuru snar Allah ḇenapes dun snemuk kwar faro roi ḇeḇesya ani, ma nari ifrur na ḇeri.
(Kejadian 41:38-40) Mura Firaun ikofen ḇe manfyan ḇyesi, ”Nari kosmai snonkaku ḇese ḇemnis radine ḇa ḇena papoik ro Allah.” 39 Inja Firaun ikofen ḇe Yusuf i, ”Snar Allah ikofenḇadir naḇe au kwar, oso isya ḇyepande syadi ma ifawinanem imnis au ḇa. 40 Au iso nari ḇemamwarek rum ayeja, ma kawasa yesi kam nari srower parenta ḇena kam. Ḇoi papoik yena naba syadi ro au snar raja risaya.”
Ḇaḇesasewar Arasai Rurya
(Kejadian 41:14) Inja Firaun iwan fa sor Yusuf i, ma sisasyar i ro ḇui ḇeri. Skapnik i, fyadwer sansun ḇyeja, ma ryamura isrow Firaun i.
(Kejadian 41:33) ”Inja ro rasine, Firaun swewar snon ḇepande ma ḇefawinanem oso, ma buk papoik ḇe i fa ḇyeprenta sup Masir.
w09-IN 15/11 28 ¶14
Fandun fa Allah Manfamyan Ḇyesi Sfasnai Syowi ya
14 Sinan ḇesouser fafisu iwara smam kaku insama romawa sesya sfarkor fa sfasnai syowi ro rum sena. Mam moḇsa Abraham nyan dawos pyum faro romawa ḇyedi Ishak i ro Kejadian 22:7. Farkarkor ḇepyum ro sinan sya kako nasnai ro Yusuf rari ḇepyum ḇyena. Rofyor ryo bui, fyasnai syowi faro min ḇesmai kuker i ro bui sya. (Kej. 40:8, 14) Wos ḇyena faro Firaun fyasnai ifawi nyan ḇepyum fa dawos ḇe snonkaku ḇena nasan ḇekaki sya.—Kej. 41:16, 33, 34.
Ḇaḇewasya Refo
(Kejadian 40:1-23) Ro swaf riḇeso ramnai, ḇebukor ro ḇemamwarek aninem ma ḇemamwarek mamami ro raja Masir sufrur sasar faro amber suḇedi, raja Masir i. 2 Firaun irmomen ḇebukor ḇyansuya, isoine ḇemamwarek aninem ma ḇemamwarek mamami, 3 inja isun suḇe bui ḇero ḇebukor ro sordade rum ḇyedi, moḇ Yusuf daksmairoya. 4 Ramnai ḇebukor ro sordade iwan Yusuf i fa ḇyarekus ma duffarmyan su, ma skosmai ro bui ro swaf riḇeso. 5 Ro roḇ oser, ḇemamwarek aninem ani ma ḇemamwarek mamami ro raja Masir ḇesmai ro bui ansuya sumafu. Knam ro mafafu suḇena oser-oser nasya. 6 Ro arwo ya, fyor Yusuf ryafa isrow sunido, myam su ḇoi sufrur saneso. 7 Inja ifuken ḇebarara ansuya ḇo doḇe, ”Rosai ḇefrur fa rasinema Amber muya mumam sanesori?” 8 Sukarem ḇo suyoḇe, ”Numafu, ḇoi nufawi mafafu nubenane knam ḇyena ḇa.” Yusuf doḇe, ”Allah mankundiso nari ḇefawi knam ḇyena. Mufawar na fa yakrower.” 9 Inja, ḇemamwarek aninem ani fyaware, ”Yamafu, anggur knam isya ryo ḇarpon aya. 10 Anggur knam anya snaw rikyor skosya. Rokaker ani isur, ḇyepampen, mura ḇyebon ma namku. 11 Aya isya yuf Firaun sek anggur ḇyedi, ramnai yun anggur bon anya ma yarames ro sek aninem ani. Ramnaido, sek anya yabuk ḇe Firaun i.” 12 Mura Yusuf ikofen ḇe i, ”Knam ḇyena isoine: Snaw rikyor anskoya skur ḇe ras rikyor. 13 Ras rikyor wer, Firaun nari isasyar Amber au ma ḇyuk kaḇer Amber nasan bedi ḇemamwarek aninem. Nari buk aninem wer ḇe Firaun i raris ro ḇepondi wafrur na. 14 Mboi, rofyor Amber au kwain kuker payamyum ido, wakswarepen aya. Fasnai saswar soasuser bena ḇe ayama wakofenḇadir aya faro Firaun i, samaido yaksasyar ro dine. 15 Sfor aya ro sup Ibrani, ma rodine yafrur sasar oḇaḇeri fa yaksmai ro bui.” 16 Snar dakrower kwar ḇati ḇyani mafafu ḇyena napyum, inja ḇemamwarek mamami ani dakfawar ḇe Yusuf i doḇe, ”Yakna mafafu kako. Yun aram rikyor ḇeser mamami ḇepyoper ro bukor yeja bori. 17 Rosaser aram ḇero boya, mamami rosai riryakam faro Firaun i, ma mansya san mamami ro aram ani.” 18 Inja Yusuf doḇe, ”Isoine knam ḇyena: Aram rikyor anskoya skur ḇe ras rikyor. 19 Ras rikyor wer, Firaun nari kyaruk Amber bukor beja ma kyaf Amber au ro adir, ma mansya nari san kraf beja.” 20 Ras rikyor ramnai, Firaun ras ulan taun ḇyedi. Ifrur munara faro manfyan ḇyesi kam. Mura isasyarbur ḇemamwarek aninem ani ro bui ma ḇemamwarek mamami ani sun i ḇe ḇarpon manfyan ḇyesi. 21 Firaun ḇyuk kaḇer fararur ro ḇemamwarek aninem i, ma imbran fararur aninem ḇyedi wer ḇe Firaun. 22 Imbape Firaun kyaf ḇemamwarek mamami ani, imnis raris rosai Yusuf ikofen kwar na. 23 Imbape, ḇemamawarek aninem ani dakswarepen Yusuf i ba, ḇoi ḇyefanander i.
25-31 MEI
ARASAI ḆERO REFO | KEJADIAN 42-43
”Yusuf Fyarmku Mankundi”
(Kejadian 42:5-7) Israel roma ḇyesi ma snonkaku ḇesesya sramura ḇe Masir fa sikoḇes roḇean, snar fafisu ani andoba myun ro sup Kanaan. 6 Yusuf dakḇe manfaker ro sup ani, ma iso ḇeḇow gandum faro er ḇero sup ḇesiper. Inja ḇeba ḇyansi srama sikunem ro ḇarpon ḇyedi. 7 Fyor Yusuf myam ḇeba ḇyansine ido, myambir si ḇeri, mboi imewer ikofenḇadir mankundi ḇe si. Dawos naba ḇo doḇe, ”Mkora ker yo?” Skarem ḇo soḇe, ”Nkorama ro sup Kanaan, nkoḇe nkokoḇes roḇean.”
(Kejadian 42:14-17) Ḇape Yusuf ikofen, ”Yakofen kwar mkoma mampaf si mko! 15 Imbe yamam mkokofen roi ḇekaku ke roḇa. Yasowar faro Firaun ḇekenem, kasun mkoḇedi mkuni muma resari roḇaido na mkopok mkoḇur ḇe sup mkoḇena ḇa. 16 Mkomindi ibur fa dun kasun mkoḇedi muma, mboi na yadwarek mko rodine. Rarirya insamaido, yafawi roi mkawos nane nkaku ke roḇa. Mboi mkankar ido, kaku mkoma mampaf si mko.” 17 Ramnai, isyun si ro bui ras rikyor.
(Kejadian 42:21, 22) Sikofen yae si ḇo soḇe, ”Inema samamyai rirya snar kofrur sasar faro kasun kobani kwar. Ḇyekandera ma dor kaku fa koswari infama kofandun i ḇa. Inja kirine kakḇekandera radine.” 22 Mura Ruben doḇe, ”Imbo yakofen kwar kofrur susa awer i. Mboi mkomewer mkorower ayandi. Kirine kokamar sasar koḇena snar kosḇawer rik ḇyena kwar.”
it-2-IN 1334 ¶1
Yusuf
Yusuf naek ḇyesi smam rosai ḇeḇejadi ya, inja skara Allah isya ḇyemankara si snar fyor iwara sḇoḇ Yusuf i kwar ḇe women. Ro ḇarpon naek ḇyesi, ḇemambir i ḇaim, sawos sasar sifrur ya. Rofyor ryower naek ḇyesya wos sena ḇefasnai marandor ya, Yusuf ḇyesneso inja ibur si ḇo kyanes ro mankundi. Fyor kyaḇer iwan insama Simeon sfor i isof skaḇer kuker skun kasun skoḇedi.—Kej 42:21-24.
Ḇaḇesasewar Arasai Rurya
(Kejadian 42:22) Mura Ruben doḇe, ”Imbo yakofen kwar kofrur susa awer i. Mboi mkomewer mkorower ayandi. Kirine kokamar sasar koḇena snar kosḇawer rik ḇyena kwar.”
(Kejadian 42:37) Ḇape Ruben ikofen ḇe kmari, ”Kamam yun kaḇer i muma ḇa ido mun roma snon ayesuya. Ayaiso na ḇemamwarek i, ma nari yun kaḇer i muma.”
it-2-IN 675 ¶8
Ruben
Ruben rari ḇepyum ḇeḇeso ḇyedi nfasnai fyor dor insama naek risiw ḇyesi smun awer Yusuf i mboi sisawen Yusuf i ḇe der ḇesyor yadori, snar ruben imarisen fa kyaḇer fasis ma isasyar Yusuf i ro der ḇaido sumur ani. (Kej 37:18-30) Syadi ro swaf taun ri 20 ramnai, rofyor siksof naek ḇyesi ḇe mampaf ro Masir skara ine ndarirya kukro roi ḇeḇyeḇa sifrur faro Yusuf anya, Ruben ikofen kwar ima dakso ro aw ḇeḇyeḇa sifrur faro Yusuf i na ḇa. (Kej 42:9-14, 21, 22) Osower ido, rofyor Yakub imewer ḇyuk Benyamin i fa iso naek ḇyesya ro marandan ḇesuru sena ḇe Masir, Ruben doḇe na ḇyuk romawa ḇyesuya fa smun fadwer su. Kuker doḇe ”Kamam yun kaḇer [Benyamin] muma ḇa ido mun roma snon ayesuya.”—Kej 42:37.
(Kejadian 43:32) Mura srir roḇean faro Yusuf i ro meja oso, ḇeba kasun ḇyansi ro meja ḇese, ma faro snonkaku Masir ḇero diansya sakna ro meja ḇese wer. Snonkaku Masir simewer sanan kayam kuker snonkaku Ibrani sya kukro roi anya nafrur ayin si.
w04-IN 15/1 29 ¶1
Farkarkor Ḇefandun ro Syap Kejadian—II
43:32—Rosai ḇewar fa snonkaku Masir simewer sanan kuker snonkaku Israel sya? Snar smam rarwas ro agama ḇaido sararer er sesya. Snonkaku Masir sayin faro manfarandows sya kako. (Kejadian 46:34) Rosai ḇefnai ya? Manfarandows sya imbude sro syos ḇe ḇarpur ro sistim kasta snonkaku Masir. Ḇaido moḇ sena nabaḇa fa skaker, inja snonkaku Masir sayin snonkaku ḇesewar moḇ ḇeabris faro rofanfan nai sena.
Ḇaḇewasya Refo
(Kejadian 42:1-20) Fafisu Yakub imnaf soḇe gandum nasya ro Masir, ikofen ḇe roma ḇyansi, ”Mkokain ro moḇ oser monda e?” 2 Ikofen wer, ”Yarower soḇo gandum nasya ro Masir. Mkoramura fa mkokoḇes kerno fa, samaido komar kobiser awer.” 3 Inja Yusuf ḇeba samfur ḇyesi sra ḇe Masir fa sikoḇes gandum. 4 Ḇape Yakub imewer Yusuf kasun ḇyani Benyamin dakso si, kukro imkakwarek nari Benyamin ismai roi ḇemun ma imardi. 5 Israel roma ḇyesi ma snonkaku ḇesesya sramura ḇe Masir fa sikoḇes roḇean, snar fafisu ani andoba myun ro sup Kanaan. 6 Yusuf dakḇe manfaker ro sup ani, ma iso ḇeḇow gandum faro er ḇero sup ḇesiper. Inja ḇeba ḇyansi srama sikunem ro ḇarpon ḇyedi. 7 Fyor Yusuf myam ḇeba ḇyansine ido, myambir si ḇeri, mboi imewer ikofenḇadir mankundi ḇe si. Dawos naba ḇo doḇe, ”Mkora ker yo?” Skarem ḇo soḇe, ”Nkorama ro sup Kanaan, nkoḇe nkokoḇes roḇean.” 8 Yusuf myambir si ḇesyaḇo sakmambir i ḇa. 9 Yusuf iswarepen mura ro mafafu ḇyena faro si, mura ikofen, ”Mkoinema mampaf si mko! Mkorama ḇe sup nkoḇedi fa mkosewar moḇ sidwarek ḇa na !” 10 Skarem ḇo soḇe, ”Aroḇa, Ambero, manfyan ḇesine nkorama nkoḇe nkokoḇes roḇean. 11 Nkoḇe manbekanaek. Kma nkoḇedi oser. Snonkaku ḇefrur pyum si nko. Manfyan ḇesine nkoma mampaf si nko ḇa.” 12 Ḇape ikofen ḇe si ḇo doḇe, ”Mkankar! Mkorama imbe mkosewar moḇ sidwarek ḇa na!” 13 Mura skarem, ”Manfyan ḇesine nkoḇe 12. Kma inkoḇedi isya ro sup Kanaan. Kasun nkoḇedi ḇepupes ro inko iso ḇekainus i, ḇoi sumin yawer isyaḇa kwar.” 14 Ḇape Yusuf ikofen, ”Yakofen kwar mkoma mampaf si mko! 15 Imbe yamam mkokofen roi ḇekaku ke roḇa. Yasowar faro Firaun ḇekenem, kasun mkoḇedi mkuni muma resari roḇaido na mkopok mkoḇur ḇe sup mkoḇena ḇa. 16 Mkomindi ibur fa dun kasun mkoḇedi muma, mboi na yadwarek mko rodine. Rarirya insamaido, yafawi roi mkawos nane nkaku ke roḇa. Mboi mkankar ido, kaku mkoma mampaf si mko.” 17 Ramnai, isyun si ro bui ras rikyor. 18 Ro ras ḇeḇekyor ya, Yusuf ikofen ḇe si, ”Yaḇesyowi Allah I. Inja mkofrur rosai yakofeni nari mkokenem pdef. 19 Mkawos kaku ido, iḇye kada naek mkoḇedi oso nkodwarek i ro dine, ḇape ḇese mkoya mkun gandum ḇo mkobur samaido kina mkoḇesi sibiser awer. 20 Ramnai mkun kasun mkoḇani ani ḇe aya, insa yafawi wos mkoḇena nkaku ma nari mkomar ḇa.” Sikam sna wos oser.