ROSASER SYAP ONLINE Baryas
ROSASER SYAP ONLINE
Baryas
Biak
ḇ
  • ḇ
  • Ḇ
  • ë
  • REFO
  • ROBEBOR
  • FANANJUR ARI
  • w20 Mei ram 8-11
  • Raja Risuru Ḇefamfaḇri ro Awar Ḇepupes

Sasewar faro vidio ine isya ḇa.

Wamsor awer, vidio ine isasyar ḇa kukro sasar isya.

  • Raja Risuru Ḇefamfaḇri ro Awar Ḇepupes
  • Baryas Yahwe Karajan Byedi—2020
  • Roi Ḇemnis
  • Manseiso ”Raja Ḇar Wambrur” ro Awar Ḇepupes?
    Baryas Yahwe Karajan Byedi—2020
  • Manseiso ”Raja Ḇar Wambrur” ro Baboine?
    Baryas Yahwe Karajan Byedi—2020
Baryas Yahwe Karajan Byedi—2020
w20 Mei ram 8-11

Raja Risuru Ḇefamfaḇri ro Awar Ḇepupes

Ḇardadi ḇero sonin ine nfasnaiḇair sarisa ḇejadi ro swaf oso. Nane kam nfasnai kaku koisya kokenem ro ”awar ḇepupes” kwar.​—Dan. 12:4.

Sonin ḇefasnai ḇardadi ma manseiso raja ḇar wambrur ma raja ḇar wamires ro taun 1870 isof ro baboine.
  • Sonin ḇe 1 ro ḇar ri 4, ḇefasnai ḇardadi ḇekur ḇe awar ḇepupes ma fafisu taun 1870 isof ro 1918. Awar ḇepupes kyurfasnai ḇe taun-taun ro 1914 ḇebo. Ḇardadi 1: Aiwan ḇeyan ḇepek ḇena bukor rifik ḇyeḇemam ḇepon ro sonin. Fafisu Mamun Dunya I, bukor ḇefik ro aiwan ḇeyan ḇepek ani ḇyepar kaku. Ro taun 1917 ḇebo, bukor ḇefik iprei kaḇer, inja aiwan ḇeyan ḇepek ani syambraḇ wer. Ḇardadi 2: Smambir kwar manseiso raja ḇar wambrur ro taun 1871, ma smambir raja ḇar wamires ro taun 1870. Ro taun 1871, raja ḇar wambrur iso Jerman. Randak ya, raja ḇar wamires iso Inggris Raya, mboi taun 1917 ḇyeḇefadwer ḇe Kuasa Dunya Inggris-Amerika. Ḇardadi 3: Taun 1870 ḇebo, naek Charles T. Russell ma bati ḇyesi sḇe ”manwawan” fa sfasos nyan. Ro taun 1881 ḇebo, syap ’Zion’s Watch Tower’ danun faro ḇewasya fa sḇaryas abar ḇepyum. Ḇardadi 4: Ro taun 1914 ḇebo, iso fafisu afuf ya. Ampyampumber spas si bur gandum. Ḇardadi 5: Ro taun 1917 ḇebo, ḇar wapirew ḇe wempin ro manggarmom ma saprop ḇerik na. Fyasnai kako: Sarisa dunya ro taun 1914 isof ro 1918, Mamun Dunya I. Sarisa nane nun samswen ḇe Yahwe kawasa Ḇyesi: Ro 1914 isof ro 1918, sisun Siswa-Siswa Alkitab ḇero Inggris ma Jerman ḇe bui. Ro taun 1918, sisun naek ḇefarkin ro kantor pusat ḇero Amerika Serikat ḇe bui.
    Ḇardadi 1.

    Mnuk: Why. 11:7; 12:13, 17; 13:1-8, 12

    Ḇardadi: ’Aiwan ḇeyan ḇepek’ ḇyepoik snonggaku ro supswan ro swaf taun ri 3.000 syadi kwar. Ro awar ḇepupes, bukor ḇefik ḇyepar. Mura, bruri iprei kaḇer ma ”sup nakam” siso aiwan ani. Roro aiwan ani, Setan ”ḇye embroḇ romawa ḇese ro bin ani”.

    Ndarirya: Fabruḇ Ḇeba ro awar Nuh imnai raposa, insape pamarenta snonggaku ḇepampum Yahwe I sisya. Taun ri 3.000 nande mura, fafisu Mamun Dunya I, Karajan Inggris pamarenta ḇyeja dores nako ḇa. Syambraḇ kaḇer fyor Amerika Serikat isaramper i. Ḇepon syadi ro awar ḇepupes, Setan ḇye pamarenta ro supswan nakam fa sewayam Allah kawasa Ḇyesi.

  • Ḇardadi 2.

    Mnuk: Dan. 11:25-45

    Ḇardadi: Raja ḇar wambrur ma raja ḇar wamires sufamfaḇri ro awar ḇepupes.

    Ndarirya: Jerman ma Inggris-Amerika sufamfaḇri. Ro taun 1945 ya, Uni Soviet ma ḇesowarpu i sya sḇe raja ḇar wambrur. Ro taun 1991, Uni Soviet isapi, mura Rusia ma ḇesowarpu i sya sḇepoik fadwer i ḇe raja ḇar wambrur.

  • Ḇardadi 3.

    Mnuk: Yes. 61:1; Mal. 3:1; Luk. 4:18

    Ḇardadi: Yahwe iwan ”manwawan” fa ”fyasos nyan” fyor Karajan Mesias dores ḇaim. ”Manwawan” anine ’ḇyaryas angginem ḇepyum faro snonggaku ḇesaḇarar’.

    Ndarirya: Ro taun 1870 ḇebo, Naek C. T. Russell ma bati ḇyesi siryaḇ sfarkor Refo fa sikofenḇair kakaku ḇero dori na. Ro taun 1881, sifawi kaku Allah kawasa Ḇyesi fandun fa sra sḇaryas. Sifrur syap ”Sisewar manḇaryas ri 1.000” ma ”Sismai Ramrem fa Sḇaryas”, mura sirwas na.

  • Ḇardadi 4.

    Mnuk: Mat. 13:24-30, 36-43

    Ḇardadi: Snon oso kyekef gandum mor ro yaf ḇyedi. Mura, mbroḇ oso dakkekef ampyampumber mor ro yaf ani. Ampyampumber sisur fa skawef gandum ansi. Ro fafisu afuf ya, na spas ampyampumber bur gandum sya.

    Ndarirya: Ro taun 1870 ḇebo, nasnaibos kaku snonggaku Kristen ḇekaku siḇese ro ḇekaku ḇa sya. Ro awar ḇepupes, siryur snonggaku Kristen ḇekaku ro sidang fa sibur snonggaku Kristen ḇekaku ḇa sya.

  • Ḇardadi 5.

    Mnuk: Dan. 2:31-33, 41-43

    Ḇardadi: Amfyanir oso sifrur ro brawen, sarak, kansai, ma manggarmom. Ḇar wapirew ḇe wempin ro manggarmom saprop ḇerik.

    Ndarirya: Saprop ḇerik kyur ḇe kawasa ro baḇ Inggris ma Amerika Serikat, ḇepampum ḇaḇepapoik suḇena. Kawasa ansine sifrur fa pamarenta ansuya supok fa sumbran papoik suḇena ḇa.

  • Sonin ḇe 2 ro ḇar ri 4, ḇefasnai ḇardadi ḇekur ḇe awar ḇepupes ma fafisu taun 1919 isof ro 1945. Jerman iso ḇye raja ḇar wambrur isof ro taun 1945. Raja ḇar wamires iso Kuasa Dunya Inggris-Amerika. Ḇardadi 6: Ro 1919, snonggaku Kristen ḇesmai ramrem seḇeryur ro sidang ḇesren kwar. Ro 1919 ḇebo, fararur ḇaḇeḇaryas isur syadi wer. Ḇardadi 7: Ro 1920, sifrur Liga Bangsa-Bangsa ma isya pdef isof ro Mamun Dunya II. Fyasnai kako: Ḇardadi 1, aiwan ḇeyan ḇepek ḇena bukor rifik, isya pdef. Bardadi 5, ḇar wapirew ḇe wempin ro manggarmom ma saprop, isya pdef. Sarisa dunya ro taun 1939 isof ro 1945, Mamun Dunya II. Sarisa nane nun samswen ḇe Yahwe kawasa Ḇyesi: Ro Jerman taun 1933 isof ro 1945, Saksi sisyadi ro 11.000 sismai ro bui. Ro Inggris ro taun 1939 isof ro 1945, indokada Saksi ri 1.600 sismai bui. Ro Amerika Serikat ro taun 1940 isof ro 1944, sewayam Saksi sya rarwan ri 2.500 syadi.
    Ḇardadi 6.

    Mnuk: Mat. 13:30; 24:14, 45; 28:19, 20

    Ḇardadi: ”Gandum” seḇeryur fa sisun si ḇe ”sayar” ma women ḇesouser ma ḇefawinanem skur si fa smamwarek Allah kawasa Ḇyesi. Fararur ḇaḇeḇaryas abar ḇepyum Karajan, sifrur na ro supswan ine ḇesiper.

    Ndarirya: Ro taun 1919, women ḇesouser ansine skur si fa smamwarek Allah kawasa Ḇyesi. Ro fafisu ya, Siswa-Siswa Alkitab sifrur syadi fararur ḇaḇeḇaryas ya. Baboine, Saksi Yahwe sḇaryas ro sup ḇeba ri 200 syadi. Sifrur syap ma vidio ḇeknam ro Refo nasyadi ro wos ri 1.000 kwar.

  • Ḇardadi 7.

    Mnuk: Dan. 12:11; Why. 13:11, 14, 15

    Ḇardadi: Aiwan ḇeyan ḇepek ḇena knapur risuru iwan kawasa ḇero supswan ’fa sifrur amfyanir oso faro aiwan ḇeyan ḇepek ani’, ma ”ḇyuk kankenem faro amfyanir ani”.

    Ndarirya: Kuasa Dunya Inggris-Amerika suiso ḇekara ḇepon fa sufrur Liga Bangsa-Bangsa. Er-er ḇese saksaramper organisasi ine. Ro taun 1926 isof ro 1933, raja ḇar wambrur daksun ro LBB kako. Karajan Allah monda nari ḇeyun aski ro supswan ine kurḇei snonggaku sya sikyar LBB ine iso nari ḇeyun aski ro supswan ine. Snonggaku sya sikyar PBB kako iso na ḇefrur roi ine.

  • Sonin ḇe 3 ro ḇar ri 4, ḇefasnai ḇardadi ḇekur ḇe awar ḇepupes ma fafisu taun 1945 isof ro 1991. Raja ḇar wambrur iso Uni Soviet ma ḇesowarpu i sya isof ro taun 1991, mura ido Rusia ma ḇesowarpu i sya. Raja ḇar wamires iso Kuasa Dunya Inggris Amerika. Ḇardadi 8: Paw ḇeyek raris mandep fyor sisawen bom atom, fyasnaibos Kuasa Dunya Inggris-Amerika ifnai farmakakok ḇeba kaku. Ḇardadi 9: Sifrur Perserikatan Bangsa-Bangsa taun 1945, fyadwer Liga Bangsa-Bangsa. Fyasnai kako: Ḇardadi 1, aiwan ḇeyan ḇepek ḇena bukor rifik, isya pdef. Ḇardadi 5, ḇar wapirew ḇe wempin ro manggarmom ma saprop, isya pdef. Ḇardadi 6, ro taun 1945 manḇaryas sisyadi ro 156.000. Ro taun 1991, manḇaryas sisyadi ro 4.278.000. Samswen ḇekur Yahwe kawasa Ḇyesi: Ro Uni Soviet taun 1945 isof ro 1951, sisawen Saksi risyaran ḇe Siberia.
    Ḇardadi 8.

    Mnuk: Dan. 8:23, 24

    Ḇardadi: Raja ḇemam samsam ”ifnai farmakakok ḇeba kaku”.

    Ndarirya: Kuasa Dunya Inggris-Amerika myun snonggaku ḇebor ma kyakok moḇ nabor. Imnis raris, fafisu Mamun Dunya II, Amerika Serikat isawen bom atom ro sup ḇembroḇ Inggris-Amerika. Nafnai farmakakok ḇeba kaku raris ḇeḇejadi ḇepon ḇaim.

  • Ḇardadi 9.

    Mnuk: Dan. 11:31; Why. 17:3, 7-11

    Ḇardadi: ”Aiwan [ḇeyan ḇepek] ḇerik ḇesak” ḇena knapur risamfur ḇesasyar ro munaiḇui iso raja ḇewar. Rofyor Daniel dap ”roi ḇefrur ayin ḇeyun ḇe farmakakok”, kyur ḇe raja ine.

    Ndarirya: Fafisu Mamun Dunya II, Liga Bangsa-Bangsa jadi fa ifrur roi oḇa. Mamun anya raposa, sḇawes PBB wer. Raris PBB ya, sisandik kako LBB, roi ḇesyus fa sḇuk ḇe Karajan Allah monda. PBB nari myun agama na.

  • Sonin ḇe 4 ro ḇar ri 4, ḇefasnai ḇardadi ḇekur ḇe awar ḇepupes ma fafisu koḇedine isof ro Armagedon. Raja ḇar wambrur iso Rusia ma ḇesowarpu i sya. Raja ḇar wamires iso Kuasa Dunya Inggris-Amerika. Ḇardadi 10: Manfarkin dunya sikofen ’aski ma payamyum’. Ramnai, kandera ḇeba ya ḇyerak. Ḇardadi 11: Er-er sya smun agama ḇekaku ḇa. Ḇardadi 12: Pamarenta dunya siḇe smun Allah kawasa Ḇyesi. Ḇesmai ramrem sya sek fa seḇeryur ro nanggi. Ḇardadi 13: Armagedon. Ḇeyek kuda ḇepyoper kyafyo mbroḇ ḇyesi. Aiwan ḇeyan ḇepek ḇerik ḇesak ḇyeḇemunpres; ḇar wapirew ḇe wempin ro manggarmom ma saprop ro amfyanir ḇeba ani ḇyeḇekakok. Fyasnai kako: Ḇardadi 1, aiwan ḇeyan ḇepek ḇena bukor rifik, isya kaker isof ro Armagedon. Ḇardadi 5, ḇar wapirew ḇe wempin ro manggarmom ma saprop, isya kaker isof ro Armagedon. Ḇardadi 6, fafisu ine manḇaryas sisyadi ro 8.680.000. Samswen ḇekur Yahwe kawasa Ḇyesi: Ro taun 2017, pamarenta Rusia sisun Saksi sya ḇe bui ma sun kantor cabang koḇedi.
    Ḇardadi 10 ma 11.

    Mnuk: 1 Tes. 5:3; Why. 17:16

    Ḇardadi: Er-er sya sikofen ’aski ma payamyum’, ma ”knapur risamfur” ma ”aiwan [ḇeyan ḇepek] ḇerik ḇesak” smunbos ”[bin] ḇefrur farḇuk” ani. Ramnai, er-er sya seḇemunpres.

    Ndarirya: Er-er sya nari soḇe sun aski ma payamyum ro supswan ine kwar. Ramnai, er-er ḇesaramper PBB nari skakok agama ḇekaku ḇa nakam. Inema randak ro swaf kandera ḇeḇa ya. Kandera ḇeba nari imnai rofyor Yesus myunpres roi ḇedawer ro Setan dunya ḇyedi.

  • Ḇardadi 12.

    Mnuk: Yeh. 38:11, 14-17; Mat. 24:31

    Ḇardadi: Gog isun ḇe moḇ Allah kawasa Ḇyesi sisya ro ya. Mura, malaikat sya siryur ’snonggaku Allah kyinfir kwar sya’.

    Ndarirya: Raja ḇar wambrur fnoḇek pamarenta ḇesya kaker ro supswan ine seoser fa siḇe smun Allah kawasa Ḇyesi. Fyoro ḇa imbe sḇerak fa smun, ḇesmai ramrem sya nari sek fa seḇeryur ro nanggi.

  • Ḇardadi 13.

    Mnuk: Yeh. 38:18-23; Dan. 2:34, 35, 44, 45; Why. 6:2; 16:14, 16; 17:14; 19:20

    Ḇardadi: ’Ḇeyek kuda ḇepyoper’ kyafyo mbroḇ ḇyesi fyor kyakok Gog ma sordade ḇyesi fa sibro. ”Aiwan [ḇeyan ḇepek] ḇerik ḇesak” sisawen si ro ”soren for”, ma karui oso iplam amfyanir ḇeba ani.

    Ndarirya: Yesus ḇyepoik ḇe Raja ro Karajan Allah. Nari ryama fa fyaspar Allah kawasa Ḇyesi. Mura, Yesus fnoḇek 144.000 ḇepoik kayam kuker i ma sordade ro malaikat sya, nari skakok polotik nakam ḇero Setan dunya ḇyedine.

    Publikasi Bahasa Biak (2015-2022)
    Swae
    Swun
    • Biak
    • Warwas na
    • Farfrur Pyum
    • Copyright © 2025 Watch Tower Bible and Tract Society of Pennsylvania
    • Akurfasnai
    • Kebijakan Privasi
    • Pengaturan Privasi
    • JW.ORG
    • Swun
    Warwas na