Nyan fa Farkarkor Refo Bena Napyum ma Nun Marasrisen Syadi Wer

Yosua iwasya Sasoser; ayar karui ḇero Yerikho nasapi ma Rakhab rum ḇyedi dores pdef; Yosua ikanow ḇrasi ḇe farsyos ma ḇyenadi

YOSUA na fyarkin er Israel sya fa sisun ḇe Sup Ḇaḇeasas ya. Ima fararur ḇesamswen kaku nairi. Ḇape, Yahwe ifnoḇek ma syambraḇser i kuker ikofen, ”Fandun fa ḇebri ma swambraḇ kaku.” Ikofen ḇe Yosua i, rofyor iwasya ma isouser faro Sasoser anna ido, nari ifrur snemuk kuker fawinanem ma ismai bon ḇepyum.—Yosua 1:7, 8.

Koisya kokenem ro ’ras ḇepupes nari ḇerama kuker kandera nabor’, inja kankenem koḇena na nsamswen syadi wer. (2 Timotius 3:1) Komarisen kosmai bon ḇepyum raris Yosua ido, fandun kaku fa koso pyum anun Yahwe ḇyuk ḇe ko na. Fandun fa kowasya Refo ras ḇe ras ma koḇuk roi kofarkor kwar na fa kofrur snemuk ḇepyum.

Imbude kofawi ḇa nyan rariso kofarkor Refo rai, ḇaido kosmai marasrisen ḇa ro farkarkor koḇena. Ḇape, farkarkor Refo ro mankunko ima roi ḇefandun kaku. Rofyor mam ro kotak ”Wafrurpan Anun Nane”, nari wasrow nyan ḇepyandam ḇefnoḇek Au fa wasmai fainda ro farkarkor Bena, ma nari wasmai marasrisen syadi.

Manḇefas mazmur idisen, ”Farkin aya fa yasouser parenta Bena, snar iso yamarisen faro na.” (Mazmur 119:35) Na waksmai marisen kako rofyor wafarkor Allah Wos Ḇyena. Nari wasmai farkarkor ḇepyum nabor rofyor wafarkor pdef Refoya.

Wakfarkin er oso raris Yosua i ḇa, mboi na waksmai samswen kako. Inja, raris Yosua i, fandun fa wafarkor ma wasouser faro Allah Wos Ḇyena. Wafrur na ido, na wun snemuk kuker fawinanem ma wasmai bon ḇepyum.

WAFRURPAN ANUN NANE

Benadi rofyor wafarkor ḇaim. Refo iser Allah kakara Ḇyena, ma neḇefas fa nbuk fainda ḇe Au. Inja rofyor wawasya na, wor Yahwe I fa ifnoḇek Au fa wafawi rosai wawasya na, waswarepen na, ma buk na fa wafrur snemuk ḇepyum ro kankenem Bena.—Ezra 7:10
Wafuken ro mankundaw rofyor wawasya Refo ma publikasi ḇeknam ro Refo na. Raris: ’Rosai yafarkor ro Yahwe I ro rosai yawasya nane? Rariso roi ine nefesepen kuker tema ro Refoya rai? Rariso na yunna fa yaḇukifnoḇek snonkaku ḇesesya rai?’
Kwarauser roi wafarkor anna. Wamnai koper, ma kwarauser roi insape wawasya na. Wafuken ro mankundaw: ’Moḇsa yaḇaḇir roi ine rai? Rosai ḇefnai fa yaḇaḇir radirya? Rariso roi ine nya fasfesepen kuker roi ḇekur aya ro fafisu iwara, ro kirine, ḇaido nari ḇekur aya ro ras ḇarpon iyama? Rariso na yaso wos farkin ḇaido ananun ro Refo nane ro kankenem yedi fa namnis?’ (Ayub 23:5; Mazmur 49:3) Rofyor kwarauser ido, kwarapan rosai ḇefnai fa Yahwe ikofen ḇe kawasa Ḇyesi fa sḇinkwanbur fararur ono. Ḇaido, kwarapan roi ḇesamswen ḇekur si snar sisouser Allah I ḇa.—Ulangan 32:28, 29.
Wawasenpan rosai wawasya na. Raris, rofyor wawasya Yusuf eba ḇyesi sḇoḇ i faro snonkaku Ismael sya, bisa wawasen fafisu anya ke? (Kejadian 37:18-28) Rosai mam, rwower, ma wamnasen na? Wawasenpan Auso snonkaku ḇero farfyar ani. Rosai kyara ma ḇyaḇir ya? Buk waswasen Bena kada, farkarkor Bena na nun fainda nabor syadi.
Buk roieḇor fa ḇukifarkor organisasi fyasos kwar na. Nane nafnoḇek Au fa wamarisen wafrur riset. Farkor fa wafawi moḇsa buk roi ḇeḇefasos ro wos Bedi rai, ḇeḇe elektronik ma ḇeḇe cetak na. Wamai awer fa wor snonkaku ḇese fa ifnoḇek Au insama wafawi nyan fa buk pyum roieḇor anna. Imnis raris, Indeks Publikasi Menara Pengawal ḇaido Panduan Riset untuk Saksi-Saksi Yehuwa na ḇefnoḇek Au fa wasmai roi ḇeḇefas kwar faro awawos oso ma wafawi knam ro mnuk-mnuk ḇero Refo na. Naisya ro wos Beja kwar ido, buk lampiran ḇero Kitab Suci Terjemahan Dunia Baru. Lampiran nane naser roi ḇefnoḇek Au raris peta, urutan waktu, satuan berat, panjang, ma ḇesena.
Fasepen farkarkor ḇefandun kaku na. Ine nafnoḇek Au fa waswarepen rosai wafarkor babo na. Ḇape ḇepyum syadi ya, fawar rosai wafarkor kwar anna ḇe snonkaku ḇesesya. Buk na kako ro ḇaḇeḇaryas Bedi. Wafrur rarirya ido, nari waswarepen pdef farkarkor ḇefandun kaku na, ma snonkaku ḇese sakna fainda kako ro farkarkor Bena.