Saksi-Saksi Yahwe Sna Refo ro Manggunsi Ke?
Refo sfarwei ro wos ḇebor na naisya nabore, ma Saksi-Saksi Yahwe sepake nakam fa sikfarkor Refo kwar. Imbape, Refo Terjemahan Dunia Baru naisya kwar ro wos koḇena ido, nggomarisen syadi nggoḇepake na kukro Refo ine iser Allah snonsnon Ḇyedi, imnis kaku, ma isnai.
Iser Allah snonsnon Ḇyedi. Snonggaku ḇesasyar Refo sia sisya sesyowi Manseren Allah ḇebuk Refo ine ḇa. Rupa ra, Refo oso isya sfasḇair snonggaku ḇeyakso fa ḇefrur na sisnosna, barbor seja sisyadi ri 70. Fama, Ḇena Kakara ro Refo anya, isoine Allah Yahwe I, sfasḇair snonsnon Ḇyeja oser oḇaḇeri!
Refo Terjemahan Dunia Baru ima iḇese kaku kukro Refo ine iser Manseren Allah snori ḇesasyar ro wos ḇekaku ḇyena barbor ya syaran. Ma, snonggaku ḇeyakso fa ḇefarwei Refo anine, sap sisnosna ḇa.
Imnis kaku. Refo nakam ḇa ḇekofenḇair angginem ro Manseren Allah fa namnis kaku. Rupa ra, sia sfarwei Refo ro mnuk ḇero Matius 7:13 fa ryok radine, ”Mgosun ro kedwa ḇefyos, kukro kedwa ma nyan ḇera ḇe for ḇembrer ḇa iba ma dawam, ma snonggaku ḇesun ro ya sibore.” Imbape, sepake wos ”ḇembrer ḇa” ro wos ḇekaku ḇyena ḇaḇeri, sepake monda wos ”marmar”. Manfarwei ḇefarwei Refo ine siser wos ”for ḇembrer ḇa” fa nakwarpu kukro sikyar snonggaku ḇeḇarḇor sya nari sismai wayam ro for ḇembrer ḇa isof fyoro-fyoro. Fama, Refo ya dakfarkor roi ḇeradine na ḇaḇeri. Rarirya, sfarwei mnuk ine ro Refo Terjemahan Dunia Baru fa namnis kaku radine, ”Mgosun ro kedwa ḇefyos, kukro kedwa ḇedawam ma nyan ḇeba dun ḇe marmar.”
Isnai. Fararwei wos ḇepyum ima imnis kaku monda ḇa, mboi isnai ma ipyan fa kofawi na. Mampan roi oser ine. Ro Matius 5:3 ya, Manseren Yesus dap wos apap ḇo doḇe ”snonkaku rur ḇesaḇarar sya ro Allah ḇarpon ḇyedi”. Apap ine korower na ro wos Ḇyak ido rya kofawi pyum na ḇa. Inja Refo Terjemahan Dunia Baru dap wos ine fa isnai, rarirya napyan fa kofawi na. Ikofen monda ”snonggaku ḇefawi sima sfandun farkankin ro Allah”.
Refo Terjemahan Dunia Baru ine iser Allah snonsnon Ḇyedi, imnis kaku, ma isnai monda ḇa mboi roi ḇepyum ḇese naisya wer: Sḇabow Refo ine ḇa, mboi sbuk na monda faro kawasa sya. Nane nafrur fa snonggaku yuta sya bisa siwasya Refo ro wos sena oser-oser, ma snonggaku ḇepok fa ḇekowes na ḇa kako bisa saksmai na.