Yosia ma Bati Ḇefrur Pyum Ḇyesi

Fafisu oso wasmai samswen fa wafrur rosai ḇepyum ke?— Snonkaku bebor sya samswen fa sifrur roi ḇepyum. Refo ya fyawar romawa oser snori Yosia dakbabir samswen kaku fa ifrur roi ḇepyum. Imbape, ismai bati ḇefnoḇ’k i. Rwama kumam fafyar kuk’r Yosia ma bati ḇyesi.

Yosia ima, raja Amon ḇero Yehuda roma ḇyedi. Amon ima raja ḇeḇarḇor rirya. Isyom faro amfyanir. Rofyor Amon imar, Yosia fyadwer kmari fa ḇye raja ro Yehuda. Ḇape, fafisu ani Yosia umur ḇyeja taun riwar! Karkara bedi ido, ikako dakḇe ḇarḇor raris kmari ke?— Rarirya ba!

Yosia ima isoasuser faro Yahwe, rofyor ibaba kaker. Inja, imarisen ḇyebati kuker snonkaku ḇeswar faro Yahwe I. Ma bati ḇyesi sifnoḇ’k i fa ifrur roi ḇepyum. Manseisirya monda Yosia bati ḇyesi?

Oserya iso Zefanya i. Ima nabi rirya. Ḇyuk swarapepen faro snonkaku sya fa sisyom faro amfyanir awer. Rarirya ido, nari sismai roi bemun ba. Yosia imarisen ryower Zefanya i. Inja, isyom faro Yahwe ma imewer isyom faro amfyanir.

Yosia bati ḇyedi osower ido snori Yeremia. Umur suḇena namnis fanam, ma rum suḇena fanamyae. Suḇebati fanam kaku. Rofyor Yosia imar, Yeremia ifrur doya fa iswarepen Yosia i. Yeremia ma Yosia sufnoḇekyae su fa sufrur roi ḇepyum ma susoasuser faro Yahwe I.

Rosai bisa fa wafarari ro Yosia i?— Rofyor ibaba kaker, imarisen isoasuser faro Yahwe I. Imarisen ḇyebati monda kuker snonkaku ḇeswar faro Yahwe I. Inja, kwinfir bati ḇeswar faro Yahwe I ido, nari ifnoḇ’k au fa wafrur roi ḇepyum!