Karajan Oso Nari Ḇeḇepoik ro Supswan Ḇesiper

Kirine, nari kofarkor kuker karajan oso. Wafawi Karajan sairirya ke?— Imbo, Karajan Allah. Karajan ine nari ifrur supswan ine ḇye firdaus. Wamarisen wafarkor nabor kuker Karajan ine ke?—

Snonkaku ḇepoik ro karajan oso ido, sap i be raja. Ima ḇyepoik faro snonkakusya kam ḇero sup ḇyena. Wafawi manseiso raja ro Allah Karajan Ḇyedi ke?— I iso Yesus Kristus. Yesus ḇyarek ro nanki. Fioro werba, nari ḇye Raja faro snonkakusya kam ḇero supswan ine! Karkara bedi ido, ro fafisu nari Yesus ḇye Raja ro supswan ine ido, nari kankenem koḇena nafo kuk’r aski ke?—

Kaku beri, nari kenem koḇena neaski! Ro Firdaus, snonkaku sya nari smamunmun werba. Nari snonkakusya kam siswaryae si. Ono nari siduf ma simar werba. Snonkaku ḇepraf sya nari s’mamwer ma snonkaku bena kneram ḇeproi nari srowerwer. Snonkaku ḇemanis sya, nari sifrar ma soper. Snonkakusya kam nari sismai roḇean nabor kaku. Aiwansya kam nari sikenem kayamyam. Nari sarek par koba. Snonkaku ḇemarsya nari sikenemwer. Rarirya kako kuker snonkaku ḇeḇeso kofarkor kwar sya imnis raris Ribka, Rakhab, Daud, ma Elia. Si kako nari sikenemwer! Wamarisen wasrow kuker si ke?—

Yahwe iswar au kaku. Imarisen fa wasmai aski. Rofyor wafarkor pdef kuker Yahwe marisen Ḇyena ma wasoasuser I pdef ido, nari wakenem isof fioro-fioro ro firdaus ḇepyum kaku! Wamarisen wakenem ro Firdaus ke?—