ḆAR ḆEḆE 3
Nyan fa Mufrur Mnis Farmbroḇ ya
”Mkoswaryae mko kaku ḇeri, snar saswarya ikawef sasar nabor kaku.”—1 Petrus 4:8
Rofyor muḇe snon ma binswa kwar, nari farmbroḇ na nasya. Ine ndarirya snaro, karkara muḇena, sneḇaḇir muḇena, ma moḇ sfadurumu fa muba namnis kam ḇa. Farmbroḇ ya na ryama kako ro snonkaku ḇese rofyor mukara ḇaim na.
Na kokara kofrarḇur ro farmbroḇ ya, ḇape Refo ya ḇyuk ananun ḇe ko fa kowawos ma kofrur mnis farmbroḇ koḇena. (Matius 5:23, 24) Nari mufawi nyan ḇepyum fa mufrur mnis farmbroḇ ya snar muso mnis wos farkankin ḇero Refo ya.
1 MUWAWOS MNIS FARMBROḆ NA
ROSAI REFO IKOFEN YA: ”Ono . . . oras isya fa kowawos.” (Pengkhotbah 3:1, 7) Fandun fa musmai oras fa muwawos mnis farmbroḇ muḇena. Mukofen rosai ro sne ma karkara muḇena kuker kakaku. ’Mukofen kakaku ya’ pdef. (Efesus 4:25) Ḇape sne muḇena nefafayaf ido, mupampumna ma murakrok awer. Wawos myaren ido nari farmbroḇ ḇemaken’m ḇa nafnai fa mupakpik ḇa.—Amsal 15:4; 26:20.
Musmai karkara oser ḇa rariryano, muna rari ma kenem ḇepyum pdef, muswar ma muḇesyowiyaemu. (Kolose 4:6) Muwaf kawan awer mboi mufrur mnis ḇeri farmbroḇ muḇena, ma muḇefasis awer.—Efesus 4:26.
NA ROSAI WAFRUR NA:
Kwinfir oras ḇemnis fa wawos farmbroḇ anna
Inja rofyor oras Ḇena fa rwower ido, wawoswarek awer i. Nari oras Ḇedi isya fa wakawose ido, insape wawos
2 WAMNAF MA WAFAWI MNIS NA
ROSAI REFO IKOFEN YA: ”Mkoswar yae mko oser ḇe oser imnis manbekanaek ro kina oser, ma iḇyekada oser-oser iwarpon min ḇyedi ro ḇaḇearooya.” (Roma 12:10) Rariso wamnaf rai inema roi ḇefandun kaku. Swewar fa wafawi karkara ḇyena kuker ”snebabir oser . . . ma sne ḇerun”. (1 Petrus 3:8; Yakobus 1:19) Rofyor wamnaf ido wamnaf kaku. Rofyor wafararur ido, wamnai bo rwower swa Ḇedi resari. Ḇaido, wakof’n ḇe i na insape muwawosna. Imnis raris muḇores ro wai oser, fandun fa muḇores kayam, oser ya ibores oser ya fyara. Pok fa musmai karkara ḇesisye ma murakrok awer. Rarirya kako, ro farḇakḇuk muḇena pok fa mam swa Ḇedi ḇe mbroḇ, rarirya ido na mumasasor fasawsaw ḇa.—Pengkhotbah 7:9.
NA ROSAI WAFRUR NA:
Rosai rwowerna wamarisen ḇa na rariryano, fandun fa wamnaf kuk’r karkara ḇemnis
Swewar fa wafawi rosai dawos na. Mam mnis mka ḇyeja ḇyerari, irmomen ke, ḇyesneso ke, ma rariso mkarem ḇyedi
3 MUFRUR WOS OSER MUSMAI KWAR NA
ROSAI REFO IKOFEN YA: ”Kuker kandera nakame nana isya, ḇape wos ro swardip monda na nun roi oḇa.” (Amsal 14:23) Rofyor muwawos ma musmai kwar nyan fa musae bur ro farmbroḇ ya monda ima namnis ḇaime. Fandun fa mufrur mnis na kada. Inema nefandun fararur marḇak ma sasewar, ḇape mukyar snar roi nane kam mufrur na ido nari nun fainda. (Amsal 10:4) Imnis sarḇer ro ḇoya, mufararur kayam ido nari fararur muḇena nun bon ḇepyum.—Pengkhotbah 4:9.
NA ROSAI WAFRUR NA:
Mufawi resari rosai nari mufrur oser-oser fa mufrur mnis farmbroḇ ya
Ro ras ḇe ras, mumam kaḇer rosai musmai kwar na