Yahwe Ḇyefnder Yusuf I Ḇaḇeri

Fafisu Yusuf ryo bui, raja ḇero sup Masir ḇenir ḇe Firaun, ismai mafafu. Mboi, snonkaku osoḇaḇeri ḇefawi ḇekofenḇair knam ro mafafu ḇyena. Firaun manfyan ḇyedi oso doḇe Yusuf i mande fyawi knam ro mafafu anna. Mura, Firaun dor Yusuf i ḇeri.

Firaun ikofen ḇe Yusuf i, ’Fasnaiḇairpan knam ro mafafu ayena.’ Yusuf doḇe, ’Ro Masir nari roḇean nabor naisya ro swaf taun rifik, raposa nari basbiser ya myun ro swaf taun rifik wer. Kwinfir snonkaku ḇefawinanem oso fa ikram roḇean na, insama kawasa bansi nari sibiser ḇa.’ Firaun doḇe, ’Yakinfir au! Auso nari ḇe snonkaku ḇesuru ḇepoik ro sup Masir ine!’ Moḇsariso Yusuf ifawi mnis knam ro Firaun mafafu ḇyena rai? Yahwe iso ḇefnoḇek i.

Fafisu swaf taun rifik, Yusuf iryur roḇean na. Mura, basbiser ya myun ro supswan ine ḇesiper, raris moḇ Yusuf ikofen ndraya. Kawasa ḇeramaker moḇ ḇebor srama skoḇes roḇean ro Yusuf i. Kmari, Yakub i, ryower roḇean naisya ro sup Masir. Inja, iwan roma risamfur ḇyesi fa sra skoḇes roḇean ro diwa.

Yakub roma ḇyesi sra sisrow Yusuf i. Smamḇaḇir Yusuf i ḇaḇeri, mboi Yusuf ima fyawi si ḇeri. Sḇansuba faro i, raris Yusuf mafafu ḇyena ro fafisu byabo kaker anya. Yusuf imbe dakfawi ḇeba ḇyansine sḇarḇor kaker ke roḇa. Inja, ikofen yoḇ si, ’Mkoine manpaf si mko. Mkorama fa mkofawi sup nkoḇedine nsambraḇ ke roḇa.’ Soḇe, ’Oroḇa! Nkoine nkoḇe manbekanaek ri 12, ma nkoramaker sup Kanaan muma. Ḇedar kasun oso nkoḇedi imar kwar, ma ḇekasun syadi ya isya ḇyarekus kma nkoḇedi.’ Mura Yusuf doḇe, ’Mkora mkun ḇedar kasun mkobani ḇedine resari kada, insape yakyar mko.’ Inja, sibur ḇe rum seja.

Rofyor roḇean na nabro kwar, Yakub iwan roma ḇyesi fa sraḇe Masir wer. Kirine sun ḇedar kasun sedi, Benyamin i, fa iso si. Yusuf ifrowespan ḇeba ḇyesi. Ryir sek aninem sarak ḇyeja ro Benyamin inoken ḇyana, mura doḇe siso ḇekaraw sek aninem anya. Fafisu Yusuf manfyan ḇyedi isrow sek aninem anya ro Benyamin inoken ḇyeja, ḇeba ḇyansine sikandor kaku. Sor kaku ḇe Yusuf i fa ḇyuk samamyai awer ḇe Benyamin i mboi si mura.

Kirine, Yusuf fyawi ḇeba ḇyansine sfadwer kenem sena kwar. Yusuf ipok fyarmku sneri ḇa kwar. Kyanes ḇeri ḇo doḇe, ’Ayaine Yusuf ḇedar kasun mkobani. Mansar isya kaker ke?’ Sikandor fafayaḇa. Mura ikofen yoḇ si, ’Mkoḇuk sasar faro mankun mko awer kuker rosai mkofrur kwar ḇe aya na. Allah iwan aya ḇe dine insama yafaspar kankenem mkoḇena. Mkora mkun fasaw mansar i muma.’

Sibur ḇo sranda sikofenḇair Yusuf i ḇe kma sedi ma sun i ḇe sup Masir. Swaf taun ḇe taun ḇenande kwar, insape Yusuf isrow kaḇer kuker kmari.