Moses Kyinfir fa Fyarmyan faro Yahwe I

Ro sup Masir, sifawi Yakub kina ḇyesi ḇe snonkaku Israel. Fafisu Yakub ma Yusuf sumar mura, Firaun ḇebabo ḇyepoik ro sup Masir. Firaun imkak nari snonkaku Israel sya sisambraḇ syadi ro snonkaku Masir sya. Inja, ḇye snonkaku Israel sya fa sewomen. Idif si fa sifrur karui apyak ma sifararur marḇak ro yaf. Mboi, snonkaku Israel sya sibor syadi wer. Firaun imarisen ḇa, inja iwan fa smun kapira snon Israel syakam. Kwarapan kada, na snonkaku Israel sya simkak kaku!

Bin Israel oso ḇenir ḇe Yokhebed kyapar kapira snon ḇedoser kaku. Yokhebed imbe kyadaunwarek i, inja ryir i ro aram ma iyokef aram anya rofandu rokaker ḇero Warḇeki Nil. Kapira ani eba ḇyani, Miriam i, dores fanam fa myamwarek i.

Mura, Firaun inai ḇyani ryama ḇe warḇeki anya fa imbe imasi, mboi dek faro aram anya. Fyor myam mboi kapira ḇero aram anya kyanes, iswar i. Mura Miriam ifuken i, ’Yara yor bin oso fa isasus i ke?’ Firaun inai ḇyani imarisen. Inja, Miriam kyaḇer ma dun snari, Yokhebed i. Firaun inai ḇyani ikofen ḇe Yokhebed i, ’Wun kapira ine fa wasasus i. Na yaḇak au.’

Fafisu romawa ani iba kwar, Yokhebed dun i ḇe Firaun inai ḇyani. Nyir i ḇe Moses ma myam i raris romawa mankun kyapar diri. Moses iba muryas ḇe manfun ma ismai rosai monda imarisen na. Mboi, ḇyefnder Yahwe I ḇa. Ifawi ima snonkaku Masir risyaḇa mboi snonkaku Israel diri. Ma kyinfir fa fyarmyan faro Yahwe I.

Fafisu Moses ḇyeumur taun ri 40, imbe ifnoḇek snonkaku Israel sya. Rofyor Moses myam snonkaku Masir oso iprer women Israel oso, myun snonkaku Masir ani rawo imar. Ikram i ro karyen na dori. Fyor Firaun ifawi, syewar fa imbe myun Moses i. Mboi, Moses ifrar ḇe sup Midian. Ro diwa, Yahwe myamfaduru i.