Manpaf Ri Samfur Seser Risuru

Snonkaku Israel sibur Bon Sinai, mura simbranuk sup ḇeursḇa Paran ma sra ḇe Kades. Ro diwa Yahwe ikofen ḇe Moses, ’Wawan snon ri 12, oso ro keret oser-oser, fa smamfasis sup Kanaan. Sup ani nari yaḇuk ḇe snonkaku Israel sya.’ Inja Moses kyinfir snon ri 12 ma ikofen yoḇ si, ’Mkora ḇe sup Kanaan, ma mkosewar fa mkofawi saprop ani ḇyedufen ke roḇa. Mkomampan kawasa ansi sisambraḇ ke siryarḇa, ma sḇarek ro rum kruben ke kota.’ Mura manpaf ri 12 ansi, Yosua ma Kaleb su kako, sikame sra ḇe Kanaan.

Ras ri 40 ramnai, manpaf ansi skaḇer ḇo sun ara bon, delima ma anggur bon. Sikofen ḇo soḇe, ’Sup ani ipyum kaku. Ḇape snonkaku ḇero diansya sisambraḇ kaku ma ayar karui ḇero kota sena nakaki bose.’ Mura Kaleb doḇe, ’Na kofrur kafyo si. Indo kora beri ḇe diwa!’ Kakara bedi ido, rosai ḇefrur fa Kaleb imkak ḇa? Snaro i ma Yosua sukyar faro Yahwe I. Ḇape manpaf risamfur sya soḇe, ’Kora awer! Sima siba mantar ma smambri! Koma komnis mankampam monda.’

Snonkaku Israel simkake. Sisasurem ma sikofenyaye si, ’Kokinfir manfarkin ḇebabo mura ma kokaḇer ḇe Masir. Mansei ḇemarisen ḇemar waworek monda ro dinenya?’ Yosua ma Kaleb sukofen, ’Fandun fa kosouser faro Yahwe I. Komkak awer! Yahwe nari kyadaun warek ko.’ Ḇape snonkaku Israel simewer srowerndi. Iba syadiwer siḇe smun Yosua ma Kaleb su!

Rosai Yahwe ifrur ya? Ikofen ḇe Moses i ḇo doḇe, ’Yafrur roi nabor kwar faro snonkaku Israel mboi sisouser Aya ḇa. Inja, nari siro moḇ ḇeursḇa ro swaf taun ri 40, ma nari simar. Romawa sesya, Yosua ma Kaleb, siso monda nari sikenem ro sup yaḇeasas kwar ani.’