Yefta Asas Ḇyedi

Snonkaku Israel sipampum Yahwe I wer ma sisyom allah-allah ḇekakuḇa. Fafisu snonkaku Ammon smun si, allah ḇekakuḇa ansi sipok fa sifnoḇek si ḇa. Ro fafisu taun ḇe taun, snonkaku Israel sekandera. Ḇarpur ya sikofen ḇe Yahwe, ’Nkosasar kwar. Nkor kaku insama faspar inko ro mbroḇ nkoḇesi.’ Snonkaku Israel skakok amfyanir sena ma skaḇer fa sisyom ḇe Yahwe I. Yahwe imarisen ḇa fa myam sekandera pdef.

Snon mambri oso snoriso Yefta ḇyeḇekinfir fa fyarkin kawasa Israel fa smamunmun snonkaku Ammon sya. Ikofen ḇe Yahwe, ’Wafnoḇek inko fa nkosmai payamyum ro mamamun ani ido, yaḇeasas faro Au, snonkaku ḇesae randak ro rum yedi fa isrow aya nari yaḇuk ḇe Au.’ Yahwe ryower Yefta nadi ḇyeja ma ifnoḇek i fa ismai payamyum ro mamamun ya.

Fafisu Yefta ibur ḇe rum, ḇesae randak fa isrow ya iso inai ḇyani, inai binjos ḇyedi. Inai ḇyanine ifyer ma ifnak rebana. Yefta iswarepen mura ḇe asas ḇyeja ḇo doḇe, ’Sye, inaikir yedi! Wafrur fa sne yedi ibor yaye. Yaḇeasas ḇe Yahwe I kwar. Yafrur imnis rosai yakofenna ido, na fandun fa yafarem au fa wafarmyan ro tabernakel ḇero Syilo.’ Ḇape inai ḇyedi ikofen ḇe i, ’Kamame, ḇeasas ḇe Yahwe I kwar ido, wafrur imnis wos bena. Ḇape, buk swaf ḇe aya resari fa yara ḇe bon fnoḇek bati yesi ro swaf paik risuru. Raposa na yara ḇe Syilo.’ Yefta inaikir ḇyedi fyarmyan kuker soasuser ro tabernakel ro ras kankenem ḇyedi ḇesiper. Ro taun nakam, bati ḇyesi sra ḇe Syilo fa smamfar i.