Raja Daud Ifrur Sasar

Fafisu Saul imar kwar, Daud fyadwer i ḇe raja. Fyor ya ḇyeumur taun ri 30. Taun ḇeḇeso ḇye raja kwar mura, Daud ifrur sasar ḇeba. Rob oso myam bin ḇepduk kaku oso ro istana ḇyedi bum ya. Daud insape ifawi bin ani snoriso Bat-syeba, sordade ḇenir ḇe Uria swa ḇyedirya. Daud iwan Bat-syeba fa ryama ḇe istana. Mura Daud denfusi, inja Bat-syeba fyadores. Daud syewar fa iyokef sasar ḇyenane. Ikofen ḇe mananir sordade ḇyesi infa iwan Uria fa iso mamamun ma dores ro ḇarpon ḇo sibur Uria i. Rofyor Uria imar ro mamamun ani, Daud fyarḇuk kuker Bat-syeba i.

Ḇape, Yahwe myam roi ḇeḇyeḇa nanekam. Rosai Yahwe ifrur ya? Yahwe iwan nabi Natan fa isrow Daud i. Natan ikofen, ’Snonkaku ḇenana oso nya domba sibor kaku, ma snonkaku ḇesabarar oso nya domba mkun oser monda iswar kakui. Mura, ḇenana ya dun ḇesabarar anya domba ḇyedi.’ Daud imsor ḇo ikofen, ’Ḇenana ani iḇye imar!’ Ramnai Natan ikofen yoḇ Daud, ’Auso snonkaku ḇenana anya!’ Daud ḇyesneso kaku, ma ikofenḇair sasar ḇyena ḇe Natan, ’Yafrur sasar faro Yahwe I kwar.’ Snar sasar ḇyedine, Daud ma kina ḇyesi sismai samswen nabore. Yahwe ḇyuk samamyai marmar ḇe i ḇa snar ikofen kakaku ma fyasnai sne ḇerun.

Daud imarisen ḇyawes bait faro Yahwe I, ḇape Yahwe kyinfir Daud romawa ḇyedi, Salomo, fa ḇyawes bait ani. Daud fyasos roieḇor Salomo fyandunna ma ikofen, ’Yahwe bait ḇyedine fandun fa isnai pyum. Salomo ḇyabo kaker, ḇape nari yafnoḇek i fa yafasospyan roi nakam.’ Daud ḇyuk pipi nabor ḇe farsarser faro ḇaḇawes bait ani. Syewar ḇefararur ḇekir sya sibore. Iryur brawen ma sarak, iwan kako snonkaku sya fa sun ai aras ro Tirus ma Sidon. Fanamnam imbe imar ya, Daud ḇyuk aw ifrur faro bait ani ḇe Salomo i. Doḇe, ’Yahwe iwan aya fa yafaspyan nanekam ḇe au. Yahwe nari ifnoḇek au. Wamkak awer. Fandun fa swambraḇ, ma ḇawes bait anya.’