Yesus Fyan Snonkaku Syaran Sya

Ro ras Paskah taun 32 M ḇaim, Yesus manfamyan ḇyesi skaḇer ro fararur ḇaḇeḇaryas ya. Kirine simbrus kaku, inja Yesus ikofen fa skora ḇe Betsaida insama skomnaisu ro diwa. Ḇape fyor wai skoḇeja imbe ryande kwar ido, Yesus myam snonkaku sya sibor siwaf ro bande kwar. Fafisu ani Yesus ma manfamyan ḇyesi imbe simnaisu, rariryano myam ma ifrur pyum snonkaku ansya. Ḇyuk pararei ḇe snonkaku ḇeduf sya ma fyarkor si. Ro ras anya ḇesiper fyarkor Karajan Allah ḇe si. Fafisu imbe roḇ kwar, inja Yesus manfamyan ḇyesi sikofen ḇe i ḇo soḇo, ’Snonkaku sine na sibiser kwar. Wawan si fa sibur insama skoḇes roḇean fa san.’

Ḇape Yesus doḇe, ’Sibur awer. Mboi mkofan si ro dine. Manfamyan ḇyesi sifuken, ’Inja nkokoḇes mamami no wer ke?’ Manwawan Filipus doḇe, ’Kona pipi sibor daryano na kopok kokoḇes mamami faro snonkaku ḇebor ansine ḇa.’

Yesus ifuken si, ’Roḇean koḇena nabor ke?’ Andreas doḇe, ’Kona mamami ririm ma in mkun risuru monda. Inja na nasrow faro si ḇa.’ Yesus ikofen, ’Mkun mamami ma in anna muma.’ Ramnai Yesus iwan snonkaku ansi skain ro abris na. Siryur fa se 50, siya wer siryur fa se 100. Yesus dun mamami ririm ma in ansuya ramnai ḇyenadi. Raposa, ḇyuk roḇean anna ḇe manfamyan ḇyesya ma sirwas na wer ḇe snonkaku ansi. Inja, snon ri 5000, bin ma romawa sya, san rawo sarbor fafayaḇa. Ramnai manfamyan sya siryur ḇedawer na, inja sisawen na ḇa. Ḇedawer na inaḇen ri 12! Inema mujisat ḇefrur kanandor kaku.

Snonkaku ansi simarisen kaku, inja imbe sikanow Yesus i ḇe raja. Ḇape Yesus ifawi fafisu fa Yahwe ikanow i ḇe raja ryama ḇaime. Iwan snonkaku ansine fa sibur ḇesisye ma iwan manfamyan ḇyesi fa sraḇe Danosen Galilea. Sek ro wai anya, mboi Yesus ima ryaḇe bon fa inadi ḇe Kmari. Komam ro dine ido, Yesus nya fararur nabore ḇape fyasos pyum oras ḇyena fa inadi ḇesya kwar.