Manfamyan Sya Sismai Rur Ḇesren

Ras risamfur fafisu Yesus kyaḇer ḇe nanki kwar, manfamyan ḇyesya sismai rur ḇesren. Fafisu ani taun 33 M, ma ro Yerusalem snonkaku sibor srama ro moḇ ḇese fa siso ras Pentakosta ya. Manfamyan ri 120 siryur ro sim ḇero bo rum oso. Fyoro ḇa ido, roi oso ḇefrur kanandor ḇyejadi. Rakrok imnis wam doḇer isya ro rum ani bori. Ramnai, roi oso ḇemnis ra for nkain ro manfamyan ansya sibrusna, ma fafisu anya ḇeri sawos ro wos-wos ḇeḇeso.

Snonkaku ro moḇ ḇese ḇerama ḇe Yerusalem sya sakrower rakrok ani. Simbran fasaw ḇe rum ani ma sakmam rosai ḇejadi ya. Sikandor kaku fyor srower manfamyan ansi sawos ro wos sena. Sikofen, ’Snonkaku ansine srama ker Galilea. Rosai ḇefnai fa sfawi sawos ro wos koḇena oser-oser?’

Ramnai, Petrus ma manfamyan ḇesesya sores ro ḇarpon snonkaku ansi. Petrus ikofenḇair ḇe si smun Yesus i, ḇape Yahwe ḇyawes kaḇer i kwar. Petrus ikofen, ’Kirine Yesus isya ro nanki, ro ḇar raku Allah Ḇyedi. Yesus ḇyuk rur ḇesren ḇyeasas kwar ani. Iso ḇefnai fa mkomam ma mkorower mujisat ro ras ine ya.’

Snonkaku sya simnaf kaku rosai Petrus ikofen na, ma sifuken i, ”Rosaiso nari nkofrur ya?” Kyarem ḇo doḇe, ’Mkombror ro sasar mkoḇena, ma fandun kaku mkoḇebaptis ro snonsnon Yesus i. Mko kako nari mkosmai rur ḇesren ya.’ Ras anya, indokada snonkaku ri 3000 sebaptis. Inja fafisu ani Yesus manfamyan ḇyesi ro Yerusalem sibor fasaw kaku. Snar fafnoḇek ro rur ḇesren, manfamyan sya sifrur sidang jemaat nabor syadi wer, insama sḇuk farkarkor ḇe manfamyan sya faro rosai Yesus iwan faro si na.