FARKARKOR 51
Nyan Insama Roi Kawos ḇe Snonggaku Ḇesesya Nafrur fa Yahwe Imarisen
Rofyor Yahwe ifrur snonggaku koine, byuk ḇe ko samambraḇ fa kofawi kawose. Rarirya, komam pyum moḇ kawos raya insama nafrur fa imarisen. (Kowasya Yakobus 1:26.) Inja, moḇsa na kobuk samambraḇ fa kawos ine insama Yahwe imarisen rai?
1. Moḇsa na kobuk samambraḇ Yahwe byuk ḇe ko ine rai?
Refo ya doḇe, ”Rarirya mkanunyae mko ma mkosonemyae mko.” (1 Tesalonika 5:11) Kwara ido sia sfandun wos anun ḇebuk samarawraw ke? Rosai nari wafrur insama sismai sneprei? Wakofenḇair ḇe si snar Auma waswar si. Wakofen yoḇ si bo woḇe wamanen rari ḇepyum sfasnai kwar na. Waswarepen mnuk ro Refo nari ḇesambraḇser snonggaku wafawi kwar oso ke? Mnuk na naisya nabor bisa kwinfir ro manggundaw. Oso wer ido, befnder awer moḇ wawos raya kako na nafrur fa snonggaku ḇese sisambraḇ. Inja, swewar fa wawos pyum ma wawos myaren.—Amsal 15:1.
2. Wos ḇerariso kawos awer na?
Refo ya doḇe, ”Wawos ḇemamas nasasyar awer ro mkosḇamna.” (Kowasya Efesus 4:29.) Inja kawos awer wos ḇeḇye ḇa, ḇaido wos nari ḇefrur fa snonggaku sya sisnesna naduf. Oso wer ido, komewer kanonef ma kawos pampam roi ḇepyum ḇa ḇekur snonggaku ḇese.—Kowasya Amsal 16:28.
3. Rosai na ḇefnoḇek ko fa kawos roi ḇebuk samarawraw faro snonggaku ḇese?
Ras ono ido, roi kawos na nfasnai roi kokram ro kosnesna ma roi kokara na. (Lukas 6:45) Inja, kosewar kaku fa kokara mura ro roi ḇepyum na, isoine roi ḇekaku, ḇesren, ḇeyun saswar, ma ḇeyun sanandik. (Filipi 4:8) Insama kokara mura ḇe roi ḇepyum nane, fandun fa kokinfir pyum hiburan ma bati koḇesya. (Amsal 13:20) Oso wer ido, kokara ḇepon resari insape kawose. Kwarapan roi wawos na nari nafrur fa snonggaku ḇese sisambraḇ ke roḇa. Refo ya doḇe, ”Wos skara ḇa na namnis ra wawanggir ro sumber, mboi ramar ro snonggaku ḇefawinanem byuk pararei.”—Amsal 12:18.
SWEWAR KAKU WER
Nari kawos rosai na wakfrur kaku wer insama wos Bena nafrur fa Yahwe imarisen ma nafrur fa snonggaku ḇese sisambraḇ.
4. Kokara pyum roi kawos na
Ras ono ido, kokame kofafko faro rosai kawos ḇepon kwar. (Yakobus 3:2) Kowasya Galatia 5:22, 23, raimnai kawos fakfuken suine:
Wor ro nadi ḇe Yahwe I insama isaramper Au fa wakfasnai rari ḇepyum anna. Rari risai na ḇefnoḇek Au fa kwara pyum roi wawos na? Rosai ḇefnai fa woḇe rari anya na ifnoḇek Au?
Kowasya 1 Korintus 15:33, raimnai kawos fakfuken ine:
Rariso bati Besya ma hiburan kwinfir na bisa nawyae moḇ wawos raya?
Roi ḇefnai fa wawos pyum ke wawos pyum ḇa ine ryamuma ro?
Kowasya Pengkhotbah 3:1, 7, raimnai kawos fakfuken ine:
Fafisu risai ipyum fa kawos awer ḇaido kowaf swaf ḇesrow insape kawose?
5. Kawos roi ḇepyum monda ḇekur snonggaku ḇesesya
Rosai na kofrur insama kawos awer roi ḇeḇye ḇa ḇaido roi ḇefrur fa snonggaku ḇese sisnesna naduf? Komam VIDIO, raimnai kawos fakfuken na.
Rosai ḇefnai fa mambesrar ani imarisen fyadwer moḇ dawos snonggaku ḇesesya?
Moḇsa fyadwer kenem ḇyena rai?
Kowasya Pengkhotbah 7:16, raimnai kawos fakfuken ine:
Rosai na koswarepen kaku fafisu imbe kawos roi ḇeḇye ḇa ḇekur snonggaku oso?
Kowasya Pengkhotbah 7:21, 22, raimnai kawos fakfuken ine:
Rariso mnuk suine sufnoḇek Au insama wafafayaf ḇa fafisu snonggaku oso dawos roi ḇeḇye ḇa ḇekur Au?
6. Wawos pyum ḇe kina Bedi
Yahwe imarisen insama kawos kuker nyan ḇepyum ma sawarwar ḇe kina koḇesya. Komam VIDIO, raimnai kawos fakfuken na.
Rosai na ḇefnoḇek Au fa wawos pyum ḇe kina Bedi?
Kowasya Efesus 4:31, 32, raimnai kawos fakfuken ine:
Wos ḇerariso na kawos ḇe kina koḇesya insama sifawi koswar si?
Yahwe ikofen snai kaku ima iswar Roma Ḇyedi, Yesus i. Kowasya Matius 17:5, raimnai kawos fakfuken ine:
Moḇsa na wakfrur ra Yahwe I fafisu wawos kuker kina Bansya?
Swewar swaf fa wamanen snonggaku ḇese
SIA SOḆE: ”Ayama imbe yawos ido, na yawos bos ḇeri kada. Yakara snonggaku sya ḇa.”
Wakkara rarirya kako ke? Kwarem rarirya kukro?
FARKARKOR ḆYENA
Roi kawos na bisa nafrur fa snonggaku ḇese sisnesna naprei ḇaido naduf. Inja fandun fa kokara pyum rosai imbe kawos na, fafisu risai insape kawose, ma moḇ kawos raya.
Waswarepen Kaḇer
Ro nyan risai monda na kofrur fa snonggaku ḇese sisambraḇ kuker wos koḇena?
Wos ḇerariso wawos awer na?
Rosai na ḇefnoḇek ko fa kawos pyum ma nafrur fa snonggaku ḇese sisnesna naprei?
SWEWAR NABOR WER
Wawasya roi na ḇefnoḇek Au fa wawos roi ḇeḇye ḇa na awer.
”Kofyak Ima Roi Ḇepyum Ḇa Dirya Ke?” (Fasfas ro situs jw.org)
Rosai na wakfrur fa wakfawar pampam awer roi ḇekaku ḇa na?
Wawasya fawar ro snon oso. Yahwe ifnoḇek i kwar fa imnai dawos roi ḇeḇye ḇa na.
”Insape Yakara Kaku Nyan Kenem Ayedine” (Syap Baryas 1 Agustus 2013)