FAKFUKEN ḆEKUR REFO NEḆEKAREM

Yahwe nari byuk ampun faro sasar koḇena ke?

Refo doḇe snonggaku syakam sisapi ro sasar ya. Sasar ro Adam ma Eva idup faro snonggaku koine kam. Iso eḇedari fyorno ido kofrur sasar bo ḇarpur mura insape kofafko. Allah Rumgun Ḇyedi, Yesus Kristus, imarwarek sasar koḇena kwar ma ḇyas nyan insama kosmai ampun ro Allah. Inema syowi ḇeba kaku nairi.​—Wasya Roma 3:23, 24.

Snonggaku ono sisya sifrur sasar ḇeba kaku, ma sikyar kuf ḇa Allah nari byuk ampun ḇe si ke roḇa. Kokofen kasumasa, kukro Refo doḇe, ”Allah Rumkun ḇyedi, Yesus rik ḇyena, nfasren sasar ḇeḇor koḇena kam.” (1 Yohanes 1:7) Yahwe imarisen byuk ampun ḇe ko, ḇesyadi fyor kofrur sasar ḇeba mboi kofasnai kombror kuker kakaku.​—Wasya Yesaya 1:​18.

Rosai fandun fa kofrur ya insama kosmai ampun faro sasar koḇena?

Komarisen Allah Yahwe byuk ampun faro ko ido, fandun fa kofarkor fa komamḇir pyum I isoine kofawi mnis nyan kakara Ḇyena, wos ananun byuk na, ma roi imarisen na. (Yohanes 17:3) Yahwe fyasnai snemura kuker byuk ampun faro snonggaku ḇembror sya ma ḇesewar kaku fa fyadwer kenem ḇyena.​—Wasya Farfyar 3:19.

Allah kyaremso Ḇyena ima roi bisa kosmai na ḇae. Yahwe ifawi mnis raryarḇa koḇena. Ima isawarwar ma ifrurpyum. Roi nane nadif Au fa swewar kaku insama wafrur imarisen.​—Wasya Mazmur 103:13, 14.