Karajan Allah—Moḇsa Yesus Myam Na Rai

Ro awawos ḇepon ya, kofawi Yesus byuk kenem ḇyena nasiper fa ’ḇyaryas angginem ḇepyum ro Allah Karajan Ḇyedi’. (Lukas 8:1) Ḇyensewar fa imbran ro swaf ḇinggwan kaku ro sup Israel ḇesiper fa fyarkor snonggaku sya insama sakfawi Allah Karajan Ḇyedi. Sfasḇair fawar ro Yesus fararmyan ḇyena ro syap Injil ri fyak. Syap ri fyak nane naser fasfas ḇekur ḇe Karajan Allah nasyadi ro 100. Ḇebor ro fasfas nane iso roi Yesus ikofen na, mboi inema bar kermgun monda ro rosai Yesus ikofen ḇekur Allah Karajan Allah Ḇyedi!—Yohanes 21:25.

Ro fafisu Yesus isya ryo supswan ine kaker, rosai ḇefnai fa myam Karajan ine ḇe roi ḇefandun kaku? Roi oser ḇefnai ya iso, Yesus ifawi Manseren Allah kyinfir i kwar fa ḇyepoik ḇe Raja ro Karajan ine. (Yesaya 9:6; Lukas 22:28-30) Ḇape, Yesus kyara monda faro nasan ḇaido baba nari ismai ro manggundi ḇa. (Matius 11:29; Markus 10:17, 18) Kofawi fyaḇri manggundi ḇa kukro rya ikofenḇair Karajan ine faro snonggaku ḇesesya kako. Ro randak kaku isof ro fafisu ine, Yesus myam Karajan Allaha ḇe roi ḇefandun kaku kukro iswar Kmari ma snonggaku ḇeso i sya. Ifawi payamyum nari Karajan ani dun faro Kmari ro nanggi ma snonggaku ḇeso i sya.

ROI ḆEPYUM KARAJAN ALLAH NARI IFRUR FARO YESUS KMARI

Yesus iswar kaku Kmari ro nanggi. (Amsal 8:30; Yohanes 14:31) Myanen Kmari rari-rari ḇepyum Ḇyena raris saswar, sne ḇesawarwar, ma nanapes. (Ulangan 32:4; Yesaya 49:15; 1 Yohanes 4:8) Inja, Yesus na imewer kaku ryower sikofen roi ḇekaku ḇa ḇekur Kmari. Imnis ra soḇe Allah fyandun ḇa rofyor snonggaku sya sekandera ma imarisen koḇekandera. Roi oso ḇefrur fa Yesus iryaḇ kaku fa ḇyaryas ’angginem ḇepyum Karajan’ iso kukro ifawi ro fafisu ya, Karajan Allah nari fyasren Kmari snonsnon ḇesren Ḇyedi. (Matius 4:23; 6:9, 10) Moḇsa roi ine ndarirya rai?

Roro Karajan ine, Yahwe nari ifrur fararwe ḇeba kaku insama kina snonggaku sya sismai payamyum. ”Nari ipyos mkarui nakambur” snonggaku ḇesouser sya mga sena. Yahwe nari ipyos roi ḇefrur fa skanes, myam kaku insama ’marmar ya isya ḇa, sne ḇefafardun, kankanes, roḇa dafduf naisya ḇa kako’. (Fasasna [Wahyu] 21:3, 4) Roro Karajan ine, Allah nari ipyos snonggaku syakam kandera sena.b

Naiso ḇefrur fa Yesus iryaḇ kaku ikofenḇair Karajan Allah ine ḇe snonggaku sya! Ifawi Karajan ine nari fyasnai kaku Kmari papoik ma sawarwar Ḇyena. (Yakobus 5:11) Yesus ifawi kako Karajan ani nari dun payamyum faro snonggaku iswar sya, isoine snonggaku ḇesouser sya.

ROI ḆEPYUM KARAJAN ALLAH NARI IFRUR FARO SNONGGAKU ḆESOUSER SYA

Fafisu Yesus ryama ḇe supswan ine ḇaim, ḇyarekus Kmari ro nanggi kawan kaku kwar. Kma ine ḇye Roma Ḇyanine fa ifrur roi ḇebor kam. Ifrur farsyos iyaswa warpu mak ma galaksi ḇebor kaku isof ro supswan ḇepduk ine warpu ḇraur ḇero dori na. (Kolose 1:15, 16) Ḇape, ro roi ḇebor nane kam, roi Yesus ’imarisen syadi’ ya iso snonggaku koine.—Amsal 8:31.

Yesus ifrur fararur ḇesren ḇyena kukro iswar snonggaku koya. Ro randak kaku, Yesus doḇe ryama ḇe supswan ine fa byaryas abar ḇepyum faro snonggaku ḇefandun fafnoḇek sya. (Lukas 4:18) Yesus dawos monda ḇa moḇsa kofnoḇek snonggaku ḇese raya. Ḇape, fyasnai ker saswar faro snonggaku sya. Rupa ra, fafisu kawasa sya siryur fa srower Yesus farkarkor ḇyena, ’iswar si ḇo ḇyuk pararei faro ḇeduf sya’. (Matius 14:14) Rofyor snon oso iduf marḇak, ikyar Yesus syambraḇ fa byuk pararei ḇe i, saswar ya dek ro Yesus sneri. Yesus ḇye snon ani fa iprei, ma kuker sawarwar ikofen radine, ”Yamarisen insa wasren.” (Lukas 5:12, 13) Rofyor Yesus myam bati ḇyedi, Maria, kyanes kukro srar ḇyedi Lazarus imar, Yesus sneri iso ma dakkanes. (Yohanes 11:32-36) Mura, Yesus ifrur roi kawasa sya skara na ḇa. Lazarus imar ro ras ri fyak kwar, mboi Yesus ḇyawes i ro marmar ya fa ikenem wer!—Yohanes 11:38-44.

Yesus ifawi roi ḇeyun sneprei ifrur anya kyain fyoro ḇa. Ifawi kaku snonggaku ḇye fa siprei kwar ansya, nari siduf wer ma snonggaku ḇyawes ro marmar ya kwar nari simar wer. Ḇape, Yesus ifawi kako Allah Karajan Ḇyedi nari ḇye samswen nakam fa napromes isof fyoro. Naiso eḇedari Yesus ifrur mujisat monda ḇa, mboi iryaḇ kako fa ’byaryas angginem ḇepyum ro Karajan’ ya. (Matius 9:35) Mujisat ifrur na nḇeḇair kermgun ḇe roi kero nari Karajan Allah ifrur ro supswan ine ḇesiper. Kokara mura ro rosai Refo ikofen nari ḇejadi ro fafisu anya kada.

• Dafduf naisya wer ḇa.

  ”Ro fafisu anya, snonggaku ḇepraf sya mgamor sena nari smam, ma snonggaku ḇeproi sya kneram sena nari srower. Ro fafisu anya, snonggaku ḇepapipen sya nari soper raris rusa, ma snonggaku awer sya swadon sena nari sibras kuker raryaḇ.” Oso wer ido, ”Snonggaku oso ḇaḇeri ḇeḇarek ro diwa nari ikofen, ’Yadufe.’ ”—Yesaya 33:24; 35:5, 6.

• 

  Marmar ya isya ḇa.

  ”Snonggaku ḇenapes siso nari ḇena supswan, ma nari sḇarek ro na isof fyoro-fyoro.”—Mazmur 37:29.

  ”Nari doren marmar ya isof fyoro-fyoro, ma Tuan Ḇekaki Syadi Yahwe I nari ipyos mgarui ro snonggaku syakam simgasna.”—Yesaya 25:8.

• Ḇemar kwar sya nari sikenem wer.

  ”Snonkaku ḇeḇor ḇero ureren na dona nari simnaf mkaren ḇyedi, . . . nari siḇersi.”—Yohanes 5:28, 29.

  ”Nari aḇiḇer ya isya.”—Farfyar 24:15.

• 

  Snonggaku syakam nari sna rum ma fararur ḇepyum.

  ”Nari sḇawes rum ma sḇarek ro na; nari sifrur yaf anggur ma san bon ḇyena. Nari sḇawes rum bo snonggaku ḇese ḇeḇarek ro na ḇa, ḇaido skaker bo snonggaku ḇese ḇeyan na ḇa. . . . Snonggaku Yakinfir sya nari sismai kaku payamyum ro fararur sena.”—Yesaya 65:21, 22.



• Mamamun naisya wer ḇa.

  ”Na ḇye mamamun ro supswan ḇesiper fa namnai.”—Mazmur 46:9.

  ”Er oso nari kyanow sumber fa myun er ḇese ḇa, ma nari sfarkor fa smamun wer ḇa.”—Yesaya 2:4.

• 

  Snonggaku sya nari sibiser wer ḇa.

  ”Supswan nari byuk bon ḇepyum na, Allah, Allah koḇedi, nari ḇyebarakas ko.”—Mazmur 67:6.

  ”Mor na nari naisya nabor kaku ro supswan; nari nabor kaku ro bon na bo.”—Mazmur 72:16.

• Ḇekenem ro diwa na seananjar wer ḇa.

  ”Snonggaku ḇesaḇarar sya na ḇyefnder si isof fyoro-fyoro ḇa.”—Mazmur 9:18.

  ”Nari fyaspar snonggaku ḇesaḇarar ḇeyar naba fa ḇeyor fafnoḇek sya, snonggaku ḇena roi oḇa kako ma ḇesmai fafnoḇek ḇa sya. Nari iswar snonggaku ḇena roi oḇa ma ḇesaḇarar sya, ma nari fyaspar snonggaku ḇesaḇarar sya kenem sena.”—Mazmur 72:12, 13.

Fafisu kwarauser asas ro Refo ḇekofenḇair Karajan Allah anya, mam kwar roi ḇefnai fa Yesus myam Karajan ani ḇe roi ḇefandun kaku ke? Rofyor Yesus ryo supswan ine kaker, iryaḇ kaku fa ikofenḇair Karajan Allah faro snonggaku ḇemarisen ḇerower sya kukro ifawi Karajan ine nari ipyos samswen nakam ḇefrur fa snonggaku koine koḇekandera ya.

Wamarisen wafawi roi Refo ikofen ḇekur Karajan Allah anya ke? Wamarisen ido, rosai na wakfrur insama wafawi syadi Karajan anya wer? Ma, rosai na wakfrur kaku insama wasmai barakas ro Karajan ine? Awawos ḇepupes ro bar ine nari kyarem fakfuken anna.