Ḇeyek Kuda Rifyak ma Au

Rakrok karadu ḇeba fafayaḇa isya ryok! Ḇeyek kuda rifyak sisya sifrar. Fasasna nane nafrur kanandor kaku, inja koḇaḇir ḇeyek kuda ansine rya sro ḇarpon komkasna! Kuda ḇerandakya isnai ḇepyoper ma ḇeyekiya iso raja ḇeḇeryem babo. Ḇeuserya iso kuda ḇerik ḇesak, ḇeyekiya iso mankun ḇeyun ḇaḇeaski nakam bur supswan. Kuda ḇekyor isnai ḇepaisem kaku ma dun warnkyara risuru. Ma mkaren oso isya ḇekofen snar nari basbiser ya isya. Kuda ḇefyak irwai ḇaido ḇyepucat, ḇefasnaiḇair dafduf nabor ro baboine ma dafduf ḇeḇabo nari ḇeramaya. Ḇeyek roiya snoriso Marmar. Mun Aiḇui ḇaido Kubir duserfaku ro dokor ḇyedi, kubir ani dun marmar ro snonkaku ḇebor kaku!​—Wahyu 6:1-8.

”Randak fyor yawasya ḇeyek kuda rifyak ansya, yamkak fafayaḇa. Yakara ras mankara ryama kwar mboi yafasos mankundaya ḇaime. Yakara mboi nari yasma fasaspar yaḇa.”​—Crystal.

”Yamanen kaku kuker ḇeyek kuda rifyak ansya ma sananai ḇesyae ro kuda ansya. Rofyor yafawi kakaku ro kuda rifyak ansya, insape fasasna ani nasnaibos faro aya.”​—Ed.

Au ido rarso? Wakḇaḇir raris Crystal ma Ed kuker ḇeyek kuda rifyak ansya ke? Wamkak ke roḇa, fasasna kuker ḇeyek kuda rifyak ansya ima fasasna oser ḇesnaibos kaku ḇero syap Wahyu, iso syap ḇepupes ro Refoya. Fainda rosai nari wasmai rofyor wafawi pyum fasasna ine? Nyan ya rariso? Allah ḇyeasas nari wasmai aski kuker wawasya, wafarkor, ma wakenem imnis kuker rosai ḇeḇefas ro syap Wahyu ine.​—Wahyu 1:1-3.

Imbude snonkaku ḇeḇeso sya simkak faro fasasna anine, ḇape ḇekakuya fasasna ine sfas na fa nafrur makakak faro ko ḇa. Snaro snonkaku syaran risyaran kakyar sena nsambraḇ kaku rofyor sifawi kakaku ro fasasna anine. Iba syadiwer, sismai saneraro ḇepyum ro fafisu iyama. Wemir bisa wakḇaḇir rarirya! Wawasya pdef artikel ine.