”Ine Iso Hadiah Ḇepyum Syadi Insape Yasmana”

Iso inaikir oso ḇyeumur 13 rosai ḇyaḇirna rofyor sḇuk makei ḇe i fa fyani. Bin ḇena fararur ḇepyum oso ikofen snar komputer oser kmari ḇyuk ḇe i fyor ryo SMA ya ima roi ḇeyun fararwe ro kankenem ḇyeja. Ma snon ḇefarḇuk babo oso ḇyaḇir rofyor swari ifrur ro mankundi kartu faro ulang taun ḇerandak fakawin suḇedi ima hadiah ḇepyum syadi insape ismana.

Ro taun ḇe taun, snonkaku ḇebor sisewar ma sḇuk oras nabor fa sisma hadiah ”ḇepyum syadi” infa sḇukna ḇe bati ma karyer sesya ro munara oso. Ma ḇebor sya na simarisen srower kankarem raris ḇeḇeyap ro boya. Au ido rariso? Wakmarisen kako fa buk ḇaido wasma hadiah sesyowi kaku na ke?

Swaf ḇeradinema ipyum kaku, snaro hadiah neḇebukna na nun fainda faro ḇesmaya monda ḇa ḇape faro ḇeḇukya sneḇaḇir ḇyedi kako. Syadiwer Refo doḇe, ”Ipyum syadi ro koḇuk ya ro kosma ya.” (Farfyar ro Manwawansya [Kisah] 20:35) Kakuḇae, ḇeḇukya na isma aski ḇeba syadi fyor ḇesmaya ḇyesyowi kaku hadiah ani.

Inja, rariso insama swaf fa buk hadiah na nun marisen ḇekaku ḇe Au ma ḇesma hadiah ya? Ma rofyor jadi ḇa fa buk hadiah ”ḇepyum syadi” ido, rosai na wafrur ya insama hadiah Bedi sesyowi kaku na?