Rofyor Waduf Marḇak

”Rofyor dokter doḇe yaduf kanker paru-paru ma usus besar, yafawi monda nari yamar. Mboi, rofyor yabur ḇe rum, yawos ro mankundaya ḇo yoḇe ’Yamewer yasmai dafduf ḇeradine, mboi yasewar nyan fa yasambraḇ ḇesya kwar.’”—Linda, umur ḇyeja taun ri 71.

”Yaduf dafduf saraf ḇefrur fa ḇar rasar ro yamkasna nasware ma samswen fa namarmer. Fafisu ono, nasyur kaku rawo yaḇor famfnom kaku. Yakara ker yaḇero mankundaya, inja yaḇe yamun mankundaya.”—Elise, umur ḇyeja taun ri 49.

MANKUNDAW ḇaido snonkaku waswar ya iduf marḇak ido, na waḇor famfnom kaku. Ine monda ḇa, ḇeduf ani ḇaido mankundaw imbude na mumsor fasawsaw. Rofyor koraḇe dokter indo na komkak kaku. Ono wer ido, samswen fa kosrow dokter i ma ḇaḇyak na neke, ḇaido kofawi ḇa aryawin kinem anna narow ke roḇa. Roi nane kam nkur ko ido, na nafrur fa koḇor famfnom kaku.

Na kor fafnoḇek roryo? Sibor sismai sneprei fafisu senadi sor ḇe Manseren Allah ma siwasya mnuk-mnuk ro Refo na. Fafnoḇek ḇesena ndramuma ro kina koḇansi ma wos samarawraw ḇeramuma ro bati koḇesya.

ANUN INSAMA SWAMBRAḆ

Robert ḇena umur taun ri 58, doḇe, ”Wakyar kaku faro Manseren Allah kada, na swambraḇ ro dafduf ḇekur au na. Benadi wor ḇe Yahwe I. Wakofenḇair roi wakara na. Wor fa Sinan ḇyuk rur ḇesren ma samambraḇ insama waknon, ma kina Bansi kako sisambraḇ.”

Robert fyawar wer ḇo doḇe, ”Kina bansi sisya ḇesya kwar fa sifnoḇek au kada, na swambraḇ kaku. Ras nakam sino sisya setelfon aya ḇo sifuken, ’Be rariso?’ Bati ayesi ḇeḇarek ro moḇ ḇeḇinkwan kako sḇuk wos samarawraw ḇe aya. Ine nafrur fa yaknon kaku ma yana karkara ḇepyum.”

Ausya mamfar snonkaku ḇeduf sya ido, Linda isya ḇyuk anun ḇepyum ḇe Au. Doḇe, ”Snonkaku ḇeduf sya simarisen kofrur pyum si raris snonkaku ḇeduf ḇa sya. Simewer sawos ker dafduf sena monda. Inja, wawos monda roi ḇesena.”

Kuker samambraḇ ro Manseren Allah, wos sneprei ro Refo ya, ma fafnoḇek ro kina ma bati koḇansi, na kokyar kaku koduf dafduf ḇemarḇak kakono, payamyum ya isya kaker ro kenem ine.

Mnuk ro Refo Ḇefnoḇek Au

Wakyar faro Manseren Allah.

”Yaḇenadi yor ḇe Yahwe I ma kyarem aya. Imkei aya ro makakak ayena kam. Snonkaku ḇekasun ine dor, ma Yahwe ryower.”—Mazmur 34:4, 6.

Linda ro ḇepon ani doḇe, ”Ayama yakḇenadi ro swaf oso ḇaḇeri, ’Yaknon syadi.’ Yaḇenadi ker, ’Yor fa wafnoḇek aya insama yasambraḇ ma yores nako yamam dafduf ayenane.’”

Wawasya Wos Refo insama swambraḇ.

”Ḇeḇarek ro diansya nari oso ḇaḇeri ikofen: ’Yadufe.’” —Yesaya 33:24.

Kwarauser Manseren Allah asas Ḇyena ḇekur ḇe ras ḇarpon iyama insama nwa saneraro ma swambraḇ ro kenem Bena.

Wor fa bati ma kina karyer Bansi sifnoḇek Au.

”Bati ḇekaku isawarwar ro fafisu nakam, ma ḇye naek rofyor samswen isya.”—Amsal 17:17.

Elise ḇeḇeyap ro ḇepon ani doḇe, ”Kwain ro mankundaw awer. Mam fa bati bansi sifnoḇek au. Fafisu ono, imbude kwara rya wemir monda ma Manseren Allah ryower fararyor bena ḇa. Mboi, kwain ro mankundaw awer, ḇinkwan awer ro ḇesesya.”