Rosai Ḇefnai Fa Koḇe Mansar Binsar Mura Komar?
INEMA marisen Allah Ḇyena risyaḇa insama snonkaku sya simar. Sinan ḇerandak koḇesuya, Adam ma Eva, Allah ifrur su fa sumnis ro kakara ma baken suḇena; inja imarisen kaku sukenem isof ro baboine. Ine fyasnaiḇair ro rosai Yahwe ikofen ḇe Adam kuker aiknam oso ḇesur ro yaf Eden.
”Ro ras wan [bon ro aiknam]” ani, Allah dawos yoḇ Adam i, ”nari wamar beri”. (Kejadian 2:17) Rofyor Allah ifrur Adam fa ḇyemansar ma imar ido nari ḇyuk parenta anine ḇa. Adam ifawi rofyor dan aibon ro aiknam ani ḇa, nari imar ḇa.
MARMAR IMA ALLAH MARISEN ḆYENA RISYAḆA
Adam ma Eva sufandun ḇa fa suyan aibon ro aiknam ani insama nasonem kankenem suḇena, snar aiknam ḇebuk bon naisya nabor ro yaf ani. (Kejadian 2:9) Rofyor suyan aibon ro aiknam ani ḇa, ine nfasnai susouser faro Sinan ḇebuk kankenem ḇe su. Ine nfasnai kako sukarem hak Sinan I fa fyarkin nyan suḇena.
ROSAI ḆEFNAI FA ADAM MA EVA SUMAR
Insama kofawi rosai ḇefnai fa Adam ma Eva sumar, fandun fa komam kaku awawos ḇeyawyae kokam. Ibiris ḇyuk ikak oso fa dawos wos ankarkar ḇeḇyeḇa ḇyena. Fasfas ḇero Refo doḇe, ”Ikak iso aiwan ḇesasor kaku ro aiwan ḇeyan ḇepek nakam Allah Yahwe ifrur na. Ikak dawos ḇe bin ani, ’Kaku Allah doḇe snar mupok muyan awer aibon ro aiknam nakam ro yaf ine ke?’”—Kejadian 3:1.
Bin ani ikofen ḇe ikak ḇo doḇe, ”Nuyan aibon ro aiknam ro yaf ine. Mboi kuker aibon ro aiknam ro fadu yaf ya Allah doḇe ’Nupok nuyan awer na, nupok nupan ro na. Rofyor nufrur rarirya, nari numar.’” Ikak ya dawos ḇe bin ani ”Mupok na mumar ḇa. Allah ifawi kaku snar fyor muyan aibon ani, ras ani kako mumkasna nari nbas ma nari mumnis raris Allah, mufawi roi ḇeḇye ma ḇeḇyeḇa na.” Inja, Ibiris ikofen snar Yahwe ima dankarkar kuker idwarek roi ḇepyum ro sinan ḇerandak koḇedi.—Kejadian 3:2-5.
Eva ikyar rosai ryower na. Myam aiknam ani, nane nun marisen kaku! Isawar ḇramin ḇyedi fa pyir aibon ḇeḇeso ma dani. Refo doḇe, ”Mura, ḇyuk aibon ani ḇe swari fyor isya kuker i, ma dan i.”—Kejadian 3:6.
Allah dawos yoḇ Adam i, ”Ro ras wan i nari wamar beri.”—KEJADIAN 2:17
Allah na ḇyesneso kaku fyor myam romawa iswar kaku suya susouser faro parenta Ḇyena ḇa! Rosai ifrur ya? Yahwe ikofen ḇe Adam i, ”Na . . . kwaber be saprop, snar rwamuma ro dia. Auma saprop ma na kwaber ḇe saprop.” (Kejadian 3:17-19) Kaku, ”umur Adam ḇyena kam nasof ro 930 taun, ma imar.” (Kejadian 5:5) Adam ryaḇe nanki ḇa ḇaido munaibui. Isyaḇa rofyor Yahwe ifrur i ḇaim ro saprop. Inja fyor imar, ikenem wer ḇa imnis raris rofyor sifrur i ro saprop. Isyaḇa kwar. Nafrur sneso kaku!
ROSAI ḆEFNAI FA KOMNIS ḆA
Snar soasuser ḇa ro Adam ma Eva su, nafrur fa kankenem ḇemnis ya ma kankenem fyoro ipromes. Baken suḇena nfarwei; sunapes ḇa ma susapi ro sasar ya. Adam ma Eva sasar sufrur na snar soasuser ḇa suḇena nawyae mankunsu ḇa. Kpu up suḇesya kako sna sasar ya. Roma 5:12 ikofen, ”Snar snonkaku oser [Adam], ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar.”
Refo fyasnaiḇair sasar ma marmarya ḇe ”kruben ḇerup er syakam ma ḇesaswo bukor ḇekawef keret ma er syakam.” (Yesaya 25:7) Kruḇen ine irup snonkaku sya raris kamayow ḇemun ḇefrarbur moḇ ḇyena ḇa. Kakuḇae, ”snonkaku kam simar snar ḇaḇeoser kuker Adam.” (1 Korintus 15:22) Raris Manwawan Paulus ifuken ya, ”Mansei nari ḇemarisen ḇefaspar ayabur baken ine ḇeyun aya faro marmarya?” Na snonkaku sya sifrarbur marmarya ke?—Roma 7:24.