Rosai Nari Karajan Allah Ifrur ya?

ROI KARAJAN ALLAH IFRUR KWAR NA

Ro farkarkor ḇepon ya, kawos kwar aḇyair Yesus dap anya. Aḇyair isoine sarisa riḇeso komam kwar anna nbeḇair Karajan Allah dores kwar ro nanki ma Yesus Kristus iso ḇe Raja ya.

Refo ikofenḇair fafisu Yesus ḇyepoik ro Karajan nanki kwar, isawen Setan ma malaikat ḇeso i sya bur nanki. Baboine, siso ḇefnai rosai ḇejadi ro supswan ine. Iso eḇedari komam ido ro taun 1914 ḇebo, dunya ine iḇyeḇa syadi wer.​—Fasasna 12:7, 9.

Kankenem ḇero dunya ine iḇyeḇa syadi, mboi Yesus, Raja ro Allah Karajan Ḇyedi, ifrur kwar roi nari ḇefnoḇek snonkaku ro supswan ine ḇesiper. Yesus ikofen ḇepon kwar ḇo doḇe nari snonkaku ḇebor sfarkor Refo ro supswan ine ḇesiper, ma siso na ro kenem sena ras ḇe ras. (Yesaya 2:2-4) Snonkaku riyuta sifawi kwar fararur ro rasras ima roi ḇefandun kaku ro kenem sena ḇa, smam fa kina sesi skain pyum syadi, ma sewomen faro nana arasai na ḇa. Snonkaku ḇeyakfarkor ansine sismai payamyum ro fafisu ine kwar ma nari sakḇe kawasa ro Allah Karajan Ḇyedi.

ROSAI NARI KARAJAN ALLAH IFRUR RO RAS IYAMA?

Yesus ḇyepoik ro nanki kwar, mboi pamarenta snonkaku sḇepoik kaker ro supswan ine. Imbape, Allah iwan Yesus i ḇo doḇe, ”Ḇepoik ro fandu mbroḇ bansi.” (Mazmur 110:2) Kero wer, nari Yesus myunpres mbroḇ ḇyesi ma ipyos samswen ḇekur snonkaku ḇesouser faro Allah sya.

Kero wer, Karajan Allah nari

• Imkokpres agama ḇekaku ḇa na. Agama-agama ḇeḇuk farkarkor ḇekaku ḇa ḇekur Allah ma ḇefnai kandera faro snonkaku sya, nari Allah imkokpres na. Refo doḇe agama ḇekaku ḇa ima imnis ra bin ḇefrur farḇuk. Snonkaku ḇebor nari skandor kaku fafisu Allah imkok agama ḇekaku ḇa na.​—Fasasna 17:15, 16.

• Kyakok pamarenta snonkaku sya. Karajan Allah nari kyakokpres pamarenta snonkaku sya kam.​—Fasasna 19:15, 17, 18.

• Myunpres snonkaku ḇeḇarḇor sya. Rosai nari ḇekur snonkaku ḇefrur roi ḇeḇyeḇa ma ḇemewer ḇesouser faro Allah? ”Nari snonkaku ḇeḇarḇor sya seḇepyosbur supswan ine.”​—Amsal 2:22.

• Idwarekepen Setan ma rur ḇeḇarḇor sya. Nari Setan ma rur ḇeḇarḇor sya sipok fa ’sankar er sya wer ḇa’.​—Fasasna 20:3, 10.

Roi nane nḇair snonkaku ḇesaramper Allah Karajan Ḇyedi rosai nari sismai na?

ROI NARI KARAJAN ALLAH IFRUR YA

Fafisu Yesus ḇyepoik ḇe Raja kwar, nari ifrur roi nabor syadi ro manḇepoik snonkaku sya. Snonkaku ri 144.000 seḇekinfir ro supswan ine, nari sek ḇe nanki fa sifnoḇek i. (Fasasna 5:9, 10; 14:1, 3) Na Yesus myam kaku insama Allah marisen Ḇyena ndarirya ro supswan ine. Rosai nari Karajan Allah ifrur faro snonkaku sya?

• Ipyos dafduf ma marmar ya. ”Snonkaku oso ḇaḇeri ḇeḇarek ro diwa nari ikofen, ’Yadufe,’” ma ’marmar ya isya ḇa kwar’.​—Yesaya 33:24; Fasasna 21:4.

• Ḇyuk marasrisen ma payamyum ḇekaku faro si. ”Nari sismai marasrisen ḇebor”, ma ”snonkaku oser-oser nari kyain ro rokaker anggur ma ara knam ḇyena baḇ ya; roi oso ḇaḇeri nari ḇefnai fa simkake”.​—Yesaya 54:13; Mikha 4:4.

• Ḇyuk fararur ḇefrur marisen. ”Snonkaku Yakinfir kwar sya nari sismai kaku marasrisen ro fararur sena. Nari sifararur marmar fa nefromo monda ḇa.”​—Yesaya 65:22, 23.

• Ifrur supswan ine fa ipyum kaḇer. ”Maper ḇekaryen ma saprop ḇesyor nari namarisen; moḇ ḇeursḇa nari naryaḇ ma nepampen raris safron.”​—Yesaya 35:1.

• Fyarkor snonkaku sya fa sismai kankenem fyoro. ”Kankenem ḇekain fyoroya, isoine mboi ssmambaḇir aw werer Allah [ḇekaku], ma ssmambaḇir Yesus Kristus wawan kwar ani.”​—Yohanes 17:3.

Allah imarisen insama waksmai roi ḇepyum nane. (Yesaya 48:18) Farkarkor ḇerama ine nari ikofenḇair rosai wafrur ro fafisu ine ḇeri insama waksmai kenem ḇepyum ro ras ḇarpon naiwama.