Sfadwer Fasfas ro Refo ya Kwar Ke?

Snonggaku sisya sifakfuken ḇo soḇe fasfas ro Refo ya sfadwer na kwar. Imboi, Nabi Yesaya doḇe Allah Wos Ḇyena ”naisya pdef isof fyoro-fyoro”. (Yesaya 40:⁠8) Rosai ḇefnai fa ko­kyar faro roi sfas ro Refo ma Allah asas Ḇyena kako?

Manseren Allah syambraḇ fa myamwarek Refo ya insama isya pdef ma fasfas ḇero dori sfadwer na ḇa. Ro fafisu naiwara, nabi sya sfas Manseren anun Ḇyena mboi roi sḇukifas na napyan fa namuk. Inja insama angginem anna naisya pdef, snonggaku sia nari sfas pyum kaḇer na. Ḇefas kaḇer ansine nari smam ma skor mnis kaku insama sisun famfnom huruf ḇese ḇa, sfadwer na ḇa, ḇaido sipyos na ḇa. Rarirya mboi, ḇefas kaḇer Refo ansine sinapes ḇa kaker, inja na sifrur sasar kako.

ROSAI ḆEFNAI FA KOKYAR KAKU SFADWER REFO YA ḆA?

Soḇe fasfas risyaran naisya sisrow kaḇer na, isoine fasfas ḇekwar ro Refo na. Inja komam mboi fasfas oso iḇese ro fasfas ḇesena ido, na kofawi fasfas ḇekaku ya kuker komam ro fasfas besena.​—⁠Imbe wafawi nabor syadi wer ido, mam awawos ”Apakah Isi Alkitab Telah Diubah?” ro jw.org/id.

Kokarapan fawar oso ine. Ro taun 1947, snonggaku sor ḇe keret Badui ro Arab sisrow fasfas ḇekwar ro Refo ro abyaḇ ḇefanam Soren Ḇemar. Sap fasfas anna ḇe Syap Ḇeniw Soren Ḇemar ma sifrur na ro swaf taun 2.000 naiwara kwar. Manfawinanem sya smam syap ḇeniw ine kuker sḇukimam Refo kosmai ro baboine na. Inja rosai sismai ya?

Smam mboi fasfas ro Refo ḇero baboine ­imnis kuker fasfas ani.a Smam mnis kaku fasfas ḇekwar anna. Inja, kofawi Refo ya naser angginem ḇeramuma ro Manseren Allah manggundi. Myam mnis kaku insama Fasfas Ḇesren Ḇyena namnis kaker isof ro baboine.

Rarirya, fafisu kokain kowasya Refo ya, na kokyar kaku fasfas ḇero dori na, sfadwer na ḇa. Kofawi roi ine kwar, inja rwama kosewar fa kofawi rosai kofarkor ro Manseren Allah nabi Ḇyesya ro farkarkor ḇerama ine.