KANKENEM KOḆENA ḆE SNONKAKU KRISTEN
Kamk Nako Yahwe Farkankin Moral Ḇyedi
Allah Yahwe ḇyuk farkankin moral faro snonkaku sya. Imnis raris, ikofenḇair farḇakḇukya iso fasfes ḇekain fyoro rofandu snon oser ma bin oser. (Mat 19:4-6, 9) Ifras fararur farḇuk ḇesasar nakam. (1Kor 6:9, 10) Ḇyuk kako wos ḇefarkin faro kawasa Ḇyesi moḇ sisansun si ma sfamankor si snar iso ḇefrur fa sisnai ḇese.—Ul 22:5; 1Tim 2:9, 10.
Ro baboine, snonkaku ḇebor spampum Yahwe farkankin Ḇyena. (Rm 1:18-32) Siso monda mamam snonkaku ḇebor sya sawyaye moḇ sisansun si, sfamankor si, ma moḇ sikenem raya. Snonkaku ḇebor smanen fararur ḇesasar sena ma sanonef snonkaku ḇena kenem ḇesnai ḇese kuker si.—1Ptr 4:3, 4.
Saksi Yahwe koine, komkak awer fa kamk nako farkankin moral Ḇyedi. (Rm 12:9) Rariso kofrurna rai? Fandun fa kofawi mnis rosai imarisen na. Ḇape fandun fa kofaduru kako farkankin ḇekaki Ḇyena ro kankenem koḇena. Rupa ra, rofyor kokinfir sansun imbe kosunna ma rariso kofamankor ko ido, kofuken ro mankunko, ’Roi yakinfir nane neknam ro Yahwe farkankin Ḇyena ke, dunya ine? Sansun ma moḇ yafamankor aya ine, fyasnaiḇair ayama snonkaku Kristen ḇemkak faro Allah I ke?’ Ḇaido rofyor kokinfir felem ḇaido roi imbe komam ro televisi ido, kofuken mankunko, ’Nari Yahwe imarisen roi yamam ine ke? Mansei farkankin moral ḇyedi sfasnai ro rosai yamam ine? Nari hiburan yakinfir ine bisa nafrur fa yamk nako faro farkankin moral ayedi werḇa ke? (Mz 101:3) Na koḇuk karui ḇekarkar ḇe kina koḇesi ḇaido snonkaku ḇesesya ke?’—1Kor 10:31-33.
Rosai ḇefnai fandun fa kamk nako Yahwe farkankin Ḇyena? Fyoro werḇa nari Kristus Yesus kyakok er syakam ma roi ḇeḇarḇor nakam. (Yeh 9:4-7) Snonkaku ḇefrur Allah marisen Ḇyena, siso monda nari ḇekenem pdef. (1Yoh 2:15-17) Mkorama, kokanowser Yahwe farkankin moral Ḇyedi, insama ḇemam fararur ḇeḇye koḇena nari sisandik Allah I.—1Ptr 2:11, 12.
Rariso moḇ yasansun aya ma moḇ yafamankor aya fyasnaiḇair farkankin moral ayedi?
MAM VIDIO MENJADI SAHABAT YEHUWA—SATU PRIA, SATU WANITA, MA RAMNAI WAWOS FAKFUKEN ḆEUSER NANE:
Rosai ḇefnai ipyum kaku fa kokenem imnis Yahwe farkankin Ḇyedi?
Rosai ḇefnai fandun fa sinan sya sfarkor romawa sesya kuker Yahwe farkankin moral Ḇyedi rofyor sibaḇa kaker?
Rariso ḇebabo sya ma sinan sya sifnoḇek snonkaku ḇesesya fa sismai fainda ro Allah ḇaḇye Ḇyena rai?