Koryaḇ Syadi fa Kofrur Fararur Koḇena!

WASMAI surat ḇepyum ḇeraker bati ḇeswar Au ido na moḇsa ḇaḇir rai? Manfamyan Timotius daksmai surat ḇeradine ro Manwawan Paulus i. Baboine, surat ḇyanane kofawi na ḇe 2 Timotius. Inja kokyar nari Timotius imarisen kaku syewar moḇ ḇepyum fa iwasya fasaw na. Imbude na kyara radine: ’Paulus isya ipyum monda ke? Anun fyarem ro surat anine dangginem fa yamam pyum fararur ḇesren ayena ke? Angginem ḇyenane na naksaramper aya fa fararmyan ayena nambran pyum ma yasaramper pyum snonggaku ḇesesya ke?’ Raris kero na kofarkor, Timotius isrow kankarem faro fakfuken-fakfuken nane ma fakfuken ḇebor ḇese wer ro surat ḇepyum kaku ine. Imbape, rwama komam monda resari faro roi ḇefandun kaku ro anun ḇepyum ḇero surat anine.

’YAKBAḆ ḆO YAḆAR NA KAM’

Fafisu Timotius myam wos ḇerandak ro surat anya, imbude na kyara mura ro wis ḇefanam suḇena. Paulus dap myaren i ḇe ’romawa karyer ḇyedi’. (2 Tim. 1:2) Rya ro taun 65 M iso Timotius ismai surat ro Paulus ine, ma ḇyeumur taun ri 30 kwar. Ima ifarmyan ḇe penatua ḇekir kwar kako kukro ḇyebati kuker Paulus i ro swaf taun risamfur syadi, inja na fyarkor nabor ro i.

Timotius na syambraḇ kaku fafisu ryower Paulus imku fa kyamar samswen ḇekur i na, isoine seborgol i ro bui ro Roma ma imbe smun i. (2 Tim. 1:15, 16; 4:6-8) Timotius ifawi Paulus imgak ḇa kukro Paulus doḇe, ”Yakbaḇ ḇo yaḇarna kam.” (2 Tim. 2:8-13) Komnis ra Timotius i, kaksmai samambraḇ ro fawar ḇepyum ḇekur Paulus farmkuepen ḇyenane.

’WARYAḆ FA BARYAS FAKAMAMAN RO ALLAH’

Paulus dor kaku faro Timotius i fa myam fararur ḇesren ḇyena ḇe roi ḇefarfnak ḇa. Paulus imarisen Timotius iryaḇ fa byaryas fakamaman ro Allah. (2 Tim. 1:6) Paulus byuk wos Yunani faro ”fakamaman” ine ḇe khaʹri·sma. Wos Yunani ḇyenane kyur faro roi sbuk kuker sor ḇaḇyak ḇa, roi sisyus fa sifrur nairi. Timotius ismai fakamaman ine fafisu ismai fararur ḇesren ḇekur sidang anya.​—1 Tim. 4:14.

Moḇsa Timotius myam fakamaman ismai ine rai? Rofyor iwasya wos ’waryaḇ fa baryas fakamaman ro Allah’, imbude na kyara mura ro for ḇesak ro fondes ḇefafar ḇero rum na. Fondes anya kyain rawo na isam ḇa ma imbrer, inja kopambarbar na wer insama for ya isak wer ma isam syadi wer. Kamus oso doḇe wos Yunani (a·na·zo·py·reʹo) Paulus dap ine, kyur faro ”kofrur na fa nasnai kaḇer, nasak kaḇer, kowuf fondes na fa nasak”. Inja roi ine kyur ḇe ”koryaḇ kaḇer fa kofrur fararur koḇena”. Baboine ryariri, koryaḇ syadi fa kofrur fararur ḇesren koḇena.

”FADURU ARASAI ḆEḆYE, SIKYAR KWARMA ḆEKO”

Timotius iwasya pdef Paulus surat ḇyena, mura isrow anun ḇepyum wer insama fararur ḇesren ḇyena napyum syadi. Paulus fyas radine, ”Faduru arasai ḇeḇye, sikyar kwarma ḇeko, ro Rur Ḇesren ḇekain ro kosnesna.” (2 Tim. 1:14) Arasai sairiri? Ro mnuk ḇepon ya, Paulus ikofen na ḇe ”farkarkor ḇeḇye” isoine kakaku ḇero Refo ya dori. (2 Tim. 1:13) Timotius ima manbaryas Kristen dirya, inja fandun fa rya ikofenḇair kakaku ine faro snonggaku ḇero sidang ya dori ma kawasa ḇero bondi sya. (2 Tim. 4:1-5) Oso wer ido, skanow i kwar ḇe penatua fa fyarandows Allah domba nai Ḇyesi. (1 Ptr. 5:2) Fandun fa Timotius dor ker fafnoḇek ro Allah rur ḇesren Ḇyedi ma iwasya Wos Refo ya insama bisa fyaduru arasai ine pdef, isoine kakaku sikyar kwar fa ikofenḇair na.​—2 Tim. 3:14-17.

Fafisu ine, kaksmai kakaku fa korwas na faro snonggaku ḇesesya. (Mat. 28:19, 20) Bisa koḇesyowi kako kakaku ine kuker konadi ker ma kofarkor myaren Refo ya ḇesya kwar. (Rm. 12:11, 12; 1 Tim. 4:13, 15, 16) Imbude kaksmai fararur ḇesren ḇewarpu wer raris penatua ma perintis. Arasai ḇeradine ipyum ya, nafrur fa korun kosnesna rarirya kwar ma kokyar faro Allah. Inja, kofaduru ḇaido kokadaunwarek arasai koḇenane kuker koḇesyowi na pdef ma kor fafnoḇek ro Yahwe I fa korir kobur na ḇa.

’FARKOR NA FARO SNONGGAKU WAKYAR SYA’

Fararur Timotius ismai anya, ifrur na ro manggundi ḇa. Naiso ḇefnai fa Paulus dor kaku Timotius i ḇo doḇe, ”Rosai wamnaf ro aya kwar . . .  farkorna kada faro snonkaku wakyarsya, ma sifawinanem kako sakfarkor snonkaku ḇese.” (2 Tim. 2:2) Inja, fandun fa roi Timotius fyarkor kwar nakam, dakfarkor na faro min Kristen ḇyesi. Inema roi ḇefandun kako faro naek ḇemamwarek sidang sakfrur na. Penatua ḇena kenem ḇepyum na ikram fawawi ḇyena ro ḇesesya ḇa. Imbape, nari imarisen fyarkor si fa sifawi suf fararur anna. Kyara ḇa fyarkor si kwar ido, nari sifawi syadi ro i oroḇaido sifrur na fa napyum syadi ro i. Rarirya, nari fyarkor snonggaku ḇesesya roi kermgun monda ḇa. Imarisen isaramper si fa sna mamam ḇepyum faro fararur sena ma sna kakara ḇepyum ḇekur sarsur ro rur ine. Ifrur radine kada, snonggaku ḇekyar sya sismai farkarkor kwar fa sbuk payamyum ḇeba syadi faro naek srar sya.

Kokyar na Timotius ikofen kasumasa faro surat ismai ro Paulus i. Koswarepen, na myam kaḇer ker anun anya ma kyarauser moḇsa na iso pyum na ro fararur ḇesren ḇyena rai.

Komarisen kakfrur ra Timotius i. Moḇsa kofrur na rai? Kosewar kaku fa kokram awer fakamaman kosmai kwar na, kofaduru arasai kosmai kwar na, kofarkor snonggaku ḇesesya kako. Rarirya ido, raris rosai Paulus ikofen ḇe Timotius i, na kosambraḇ fa ’kofrur posa afuffarmyan koḇena’.​—2 Tim. 4:5.