’Mgofanam faro Allah, ma nari Allah fyanam faro mgo.’—Yakobus 4:8

Manseren Allah Ryower Nadi Koḇena Ke?

Snonggaku ḇebor sya senadi sor fafnoḇek ro Manseren Allah I, ḇape samswen sena naisya kaker. Inja nafrur fa sikyar manggunḇa, kaku Manseren na ryower nadi sena ke roḇa. Ausya ḇaḇir rarya kako ke? Refo ikofen ḇe ko snar Manseren Allah ryower nadi koḇena fyor koḇenadi imnis nyan imarisen na. Mam rosai Refo ikofen na.

**MANSEREN ALLAH RYOWER NADI.**

”Sye Manḇerower nadi, snonggaku sairirya kam nari srama faro Au.”—Mazmur 65:2.

Ono sisya senadi insama sneḇaḇir sena naknon syadi, imbape sikyar manggunḇa oso isya ḇerower nadi sena ke roḇa. Ḇape, nadi ima roi kofrur monda ḇa insa koknon ḇo samswen koḇena namnai ḇaido nabur ko. Refo ḇyuk kakakyar ḇe ko snar ”Yahwea fyanam faro ḇeyor faro I syakam, faro ḇeyor I kuker sne ḇesiper syakam. . . . ryower rofyor sor fafnoḇek.”—Mazmur 145:18, 19.

Kokyar kaku Manseren Allah ryower nadi ro kawasa Ḇyesi. Ikofen kwar ḇo doḇe, ”Nari mgor Aya ma mgorama fa mgoḇenadi ḇe Aya, ma nari yamnaf mgo.”—Yeremia 29:12.

**MANSEREN ALLAH IMARISEN BENADI FARO I.**

Kamam oso kyain ro ris inaimgun ḇyedi ḇesya ḇefnak robor ḇyena.

’Mgofarmgu ro nadiya.’—Roma 12:12.

Refo ḇyuk swarapepen ḇe ko fa ’koḇenadi ḇesya kwar’ ma ’koḇenadi ro fafisu nakam’. Inja, Manseren Yahwe ima imarisen fa koḇenadi faro I.—Matius 26:41; Efesus 6:18.

Rosai ḇefnai fa Manseren imarisen koḇenadi faro I? Kwarapan roi ine: Kamam oso nari imarisen kaku rofyor romamgun ḇyedi dor fafnoḇek ro i. Imbude ifawi kwar rosai romawa ḇyedi fyandun ma ḇyaḇir na. Ḇape, rofyor ryower romawa ḇyedi dor fafnoḇek, ifawi romawa ani ikyar i ma fyanam i. Rarya kako, rofyor koḇenadi faro Manseren Yahwe I, kofasnai kokyar ma komarisen kofanam faro I.—Amsal 15:8; Yakobus 4:8.

**MANSEREN IMA FYANDUN KAKU AU.**

Snon ḇeyuf bisnis oso kyain fasis ro tangga aidoram. Kotak ḇeser roiebor ḇero kantor na ryir ro ḇar ya.

’Mgoḇuk makakwarek mgoḇena kam faro Allah, snar I ḇefaduru mgo.’—1 Petrus 5:7.

Manseren Allah imarisen koḇenadi faro I snar fyandun ko ma iswar ko. Ifawi monda ḇa makakwarek ma samswen ḇekur kona kam, ḇape imbe ifnoḇek ko kako.

Ro Raja Daud kankenem ḇyedi, ḇyenadi ker faro Manseren Yahwe fa dor fafnoḇek. I kako fyawar roi kyara ma ḇyaḇir na. (Mazmur 23:1-6) Rarirya, Manseren Allah imarisen faro nadi ḇyena ke? Imbo! Manseren Allah iswar Daud i ma ryower nadi ḇyena. (Farfyar 13:22) Baboine kako, Manseren Allah ryower nadi koḇena snar fyandun ko ma iswar ko.

”YASWAR YAHWE I SNAR RYOWER MGAREM AYENA”

Wos anine isya ro mnuk oso ḇero Syap Mazmur. Manfasfas ani ikyar kaku Manseren ryower nadi ḇyena ma roi ine nafnoḇek i kako. Ḇyaḇir ifanam syadi kuker Manseren I ma syambraḇ rofyor ismai kandera ma ḇyesneso.—Mazmur 116:1-9.

Rofyor kokyar kaku Manseren I ryower nadi koḇena, nari komarisen koḇenadi ker faro I. Mampan Pedro ḇeraker ro Spanyol fawar ḇyena. Romawa ḇyedi ḇeḇeumur 19 ryoe snar oto na nafrar pum yae. Nafrur fa Pedro ikar kaku. Ras anya, ḇyenadi ikofen roi ḇero sneri nakam faro Manseren I. Ḇyenadi rarya kwar insama Manseren ḇyuk wos sneprei ma fafnoḇek ḇe i. Manseren ryower nadi ḇyena ke? Pedro doḇe, ”Yahwe kyarem nadi yena roro naek srar sya. Sbuk wos sneprei ḇe aya ma sifnoḇek aya ma swa yedi nu.”

Snon oso ḇesneso isya myam foto rofyor bati ḇyesi sbuk wos sneprei ḇe i. — Nadi koḇena neḇekarem roro wos sneprei ma fafnoḇek ro bati koḇesi ḇeswar konsya

Kaku, nadi na nafrur Pedro romawa ḇyedi ikenem kaḇer ḇa. Ḇape, nadi ifnoḇek Pedro ma kina ḇyesi kaku. Pedro swari, María Carmen, fyawar ḇo doḇe, ”Snar nadi nasambraḇser kaku aya. Rofyor yaḇenadi, yasmai sneprei kaku ma sne yedi iknon. Inja, yakyar kaku Allah Yahwe ifawi pyum kaku sneḇaḇir ayena.”

Ro Refo ma fawar ro snonggaku sya, nfasnai kaku Manseren I kyarem nadi koḇena. Ḇape, Manseren I kyarem nadi nakam ḇa. Rosai ḇefnai ya?

a Yahwe iso Manseren Allah snonsnon Ḇyedirya.—Mazmur 83:18.