Rosai Ḇefrur fa Allah Kyarem Nadi Nakam Ḇa?
Kma koḇedi ro nanggi, Allah Yahwe I, imarisen ryower nadi koḇena rofyor kor kuker sne ḇesiper. Mboi, kyarem nadi koḇena kam ḇa. Kukro? Mgorama komam kankarem ḇyena ro Refo ya. Nari kofawi rosai monda kofrur awer na fafisu koḇenadi.
’Rofyor mgoḇenadi mgo kaḇkaḇer awer imnis raris snonggaku ḇefawi Allahḇa sya.’—Matius 6:7.
Fyor bati bedi dap kaḇkaḇer ker rosai ikofen kwar ḇe au na ido, moḇsa ḇaḇir rai? Na wamarisen ḇa. Snonggaku oso nya bati ido, na ikram roi ḇero sneri ḇe bati ḇyedi ḇa ma dawos monda roi ḇyaḇir na. Yahwe I kako, imarisen ḇa rofyor koḇenadi ḇo kap kaḇkaḇer ker roi kokofen kwar na ḇaido koḇenadi imnis wos sfas ro syap ḇeser nadi. Yahwe imarisen samaido roi kokofenna nsae ro kosnesna. Ine nfasnai komam I ḇe Bati koḇedi.
’Roḇa mgoḇenadi kako, ḇape mgosma roi oso ḇa, snar mgonadi sasar, snar roi mgorna faro marisen manggun mgo ḇardi.’—Yakobus 4:3.
Fyor koḇenadi ḇo kor roi Allah imarisen ḇana ido, nari kyarem nadi koḇena ḇa. Imnis ra, Refo doḇe Allah imarisen ḇa koḇe snonggaku ḇenambri ma imewer kokyar faro ḇaḇeuntung. (Yesaya 65:11; Lukas 12:15) Oso ḇyenadi ḇo dor insama ḇyemenang judi ido, Allah na kyarem nadi ḇyena ke? Oroḇa! Insama Allah kyarem nadi koḇena ido, kor imnis kuker marisen Ḇyena.
”Snonggaku ḇemewer ḇerower sasoser, nadi ḇyena kako nafrur ayin kaku.”—Amsal 28:9.
Ro fafisu iwara, snonggaku ḇesouser ḇa sya Allah kyarem nadi sena ḇa. (Yesaya 1:15, 16) Baboine ifrur radirya kaker. (Maleakhi 3:6) Insama Allah kyarem nadi koḇena ido, kosouser kaku parenta Ḇyena. Ḇoi, ḇepon iwara kaksouser parenta Ḇyena ḇa ido rarso? Na Allah imewer ryower nadi koḇena wer ke? Rarya ḇa! Kombror kaku kwar ma kofrur Allah imarisen ido, nari ḇyuk ampun ḇe ko.—Farfyar 3:19.