Moḇsa Insama Nadi Yena Neḇekarem Rai?
Manseren Yahwe ima ”Manḇerower nadi.” (Mazmur 65:2) Bisa koḇenadi ro moḇ sarirya kam ma ro fafisu nakam, kuker mgarem ḇaido ro kosnesna. Yahwe imarisen kor I ḇe ”Kma”, ma ima Kma ḇefrurpyum kaku dirya. (Matius 6:9) Fyarkor pyum ko moḇsa kakḇenadi rai.
KOḆENADI YOḆ ALLAH KUKER SNONSNON YESUS
’Roi ḇeḇor kam mgor faro Mami kuker snonsnon ayedi nari ḇyukna faro mgo.’—Yohanes 16:23.
Yesus wos ḇyenane nfasnai Yahwe imarisen koḇenadi ḇe I roro snonsnon Yesus Kristus, koḇenadi roro amfyanir, santo, malaikat, ḇaido sinan ḇepon ḇemar kwar sya ḇa. Inja koḇenadi roro snonsnon Yesus ido, kofasnai koḇesyowi rosai Yesus ifrur faro ko kwar na. Yesus doḇe, ’Snonggaku oso ḇaḇeri ḇerama faro Mami, rofyor imbranuk ro ayaḇa.’—Yohanes 14:6.
KOḆENADI KAKU KUKER SNE ḆESIPER
”Mgokofenḇair roi ḇero mgosnemna ḇe I.”—Mazmur 62:8.
Yahwe ima imnis kma oso ḇeswar ko. Inja fyor koḇenadi ido, nari kokofenbos roi ḇero kosnesna ḇe I ma kokofenna kuker syowi. Nari kap kaḇkaḇer ker wos koḇena ḇa ḇaido kap monda wos sfas ro syap ḇeser nadi.
KOḆENADI IMNIS KUKER ALLAH MARISEN ḆYEDI
”Kokyar imnaf fararyor koḇena, rofyor kor rosairya wer imnis kuker marisen ḇyedi.”—1 Yohanes 5:14.
Komarisen Allah imnaf nadi koḇena ido, koḇenadi kaku ”imnis marisen ḇyedi”. Ro Refo, Manseren Yahwe ikofenḇair rosai imarisenna ma rosai nari ifrur maro konya. Inja, kofarkor kaku Refoya samaido kakmambir I. Kofrur na ido, nadi koḇena na nafrur imarisen.
ROSAI KOḆENADI NA?
Fandandun Koḇena. Koḇenadi kako insama Manseren ḇyuk roi kofandun ro rasras na, imnis ra roḇean, sansun, ma moḇ koḇarek rona. Kor kako Manseren ifnoḇek ko fa kun snemuk ḇepyum ma kofarmgu rofyor kosmai samswen. Ono wer ido, koḇenadi insama Allah ifnoḇek ko fa kona kakyar ma ipyos sasar koḇena.—Lukas 11:3, 4, 13; Yakobus 1:5, 17.
Snonggaku Ḇesesya. Rofyor sinan smam romawa sesya siswaryae si ido, na simarisen. Yahwe myam koḇe romawa Ḇyesi kako. Imarisen insama kokame koswaryae ko ma ’ko nadiwarekyae ko’.—Yakobus 5:16.
Kafkofen Kasumasa. Refo ikofen Manḇedaw koḇedi ’Fyasnai maggundi kuker frur pyum nabor, isoine ḇyuk mekem ro nanggi ma wampasi wambarek ḇeḇuksur pyum rokaker ḇe ko. Ḇyuk sneprei faro ko kuker nanan ma raryaḇ.’ (Farfyar 14:17) Kokarauser roi nabor Manseren ḇyuk kwar ḇe ko naido, nari komarisen koḇenadi faro I fa kokofen kasumasa koḇena.—Kolose 3:15
KOḆEKAḆAḆAḆ MA KOḆENADI ḆESYA KWAR
Fyorno ido na koḇesneso rofyor koḇenadi kuker sne ḇesiper ḇoi nadi koḇena neḇekarem ḇeri ḇa. Nane nfasnai Allah fyandun ko ḇa ke? Rarirya ḇa. Kofawi Allah fyandun kaku ko, inja koḇenadi sambraḇ ḇesya kwar. Nari komam contoh ro fawar ḇeḇeso nane.
Steve, ḇeḇeyap randak ro majalah ine doḇe, ”Randakya yakara na yaksmai aski wer ḇa. Ḇoi nadi ifnoḇek aya.” Steve fyarkor Refo, inja ifawi ḇefandun iso ḇyenadi ḇesya kwar. Fyawar ḇo doḇe, ”Yasmai fafnoḇek nabor ro bati ḇeswar ayansya. Yakofen kasumasa nabor naba ḇe Manseren faro roi yasmai nane. Kirine, yaḇeaski kaku.”
Moḇsa kuker Jenny i? Randak iwara ḇyaḇir daksyus fa ḇyenadi ḇe Allah ḇa. Ikofen ḇo doḇe, ”Fyor yabor famfnom rosai imbe yafrur kaku ya, yor ḇe Manseren ifnoḇek aya insama yafawi rosai ḇefrur kaku aya fa yaḇaḇir radine.” Rosai yasmai ya? Jenny ikofen wer ḇo doḇo, ”Yawos ḇe Allah raposa ido, sape kakara yena napyum ma namnis. Yakara yasyus ḇa snar sasar ayena ro ḇepon iwara, mboi Allah ima dakkara rarirya ḇa. Oso wer ido, yaḇenadi ker inja yafawi Manseren Yahwe ima isya kaku. Ima Kma ma Bati ḇeswar kaku aya. Ifnoḇek ker aya fyor yafrur roi dor ro ayanna.”
Fyor Isabel myam romawa ḇyedi ḇyecacat raryano ismai raryaḇ ro kankenem ḇyedi, ikofen ḇo doḇe, ”Yakyar kaku Gerard ima kankarem ro fararyor nadi yenairi.”
Mam kako Isabel farfyar ḇyena. Fafisu fyardores anya, dokter doḇe nari romawa ḇyedi ḇyecacat. Isabel ḇyesneso fafayaḇa. Sino wer soḇe syae romawa ḇyedi mura. Doḇe, ”Yaḇesneso fafayara, yaḇaḇir yaḇe yamar kero. Inja, yaḇenadi ma yor ḇesya kwar insama Manseren ifnoḇek aya. Ifawi Allah kyarem nadi ḇyenane ke? Ḇarpur fyor nya romawa ḇyedi, romana ani ḇyecacat, ḇoi Isabel doḇe, ”Kirine, romawa yedi Gerard, ḇyeumur 14 kwar. Yamam ḇyecacat ḇoi ro kankenem ḇyedi iryaḇ kaku. Inja, yakyar kaku ima kankarem ro fararyor nadi ayena. Ima barakas ḇepyum kaku Yahwe ḇyuk ḇe ayandiri.
Fawar ḇebor insanja anna nfasnaiḇair wos ḇero Refo ine kyaku: ”Fararyor snonggaku ḇena sne ḇemayar sya nari warower si, sye Yahwe. Nari swambraḇser sne sena ma mam si.” (Mazmur 10:17) Iḇye kada asas ḇepyum kaku ine idif ko fa koḇenadi ḇesya kwar!
Yesus nadi ḇebor ḇyena sfas na ro Refo. Nadi oser sfawi kaku iso nadi fyarkor ḇe manfamyan ḇyesi. Rosai na kofarkor ro nadi anine?