Snonggaku Ḇefrur Pyum Nari Seaski Ke?
Rofyor iwara, snonggaku ḇebor skara nari sismai aski kaku fyor sifrur pyum. Imnis ra, snonggaku ḇero Asia sya sikyar faro farkarkor ro guru ḇenir Konghucu (551-479 SM). Byuk farkarkor ḇo doḇe, ”Wafrur awer rosai wamewer snonggaku ḇese sifrur ḇe au na.”a
ROI SNONGGAKU ḆEBOR SIFRUR NA
Ḇebor sikyar kaker fyor sifrur pyum na kenem sena neaski pdef. Sḇesewar fa sesyowi snonggaku ḇese, sesopan si, sifawi ḇaḇeraryarḇa sena, ma sifrur roi na ḇekyaren sneuser ḇa. Bin oso ro Vietnam ḇenir Linh doḇe, ”Randak yakyar fyor yakofen kakaku ma yafrur roi ḇepyum ḇe snonggaku, nari kenem ayena neaski kaku.”
Sia wer sifrur pyum snar siso farkarkor ro agama sena. Snon oso ro Taiwan, ḇenir Hsu-Yun, fyawar ḇo doḇe, ”Randak iwara sfarkor aya snar roi snonggaku oso ifrur fafisu ikenem ya iso ḇefasnai nari ḇyeaski roḇaido ḇyekandera fyor imar kwar.”
ROSAI SISMAI NA?
Kakuḇae, nari kosmai payamyum nabore fyor kofrur pyum. Ḇape, snonggaku ḇefrur pyum ḇebor sia sikenem kuker aski ḇa. Bin oso ḇeḇarek ro Hong Kong ḇenir Shiu Ping, doḇe, ”Yafrur pyum ker ma yaḇensewar kaku fa yafaduru kina yedi ḇape swari ibur aya ma romawa ayedi. Inja, yakara ro manggundaya snar snonggaku ḇepyum na sikenem kuker payamyum ḇa.”
Osower, snonggaku ḇebor smam ro manggunsi snonggaku ḇemyaren ḇeari sima snonggaku ḇepyum sirya kam ḇa. Bin oso ro Jepang ḇenir Etsuko fyawar, ”Randak iwara yaso ker agama yedi. Yaḇe pengurus faro romawa babo sya. Ḇape yakandor kaku fyor yamam snonggaku ro organisasi agama yedi sifrur roi ḇeayayin, simarisen sna papoik, ma sepake pyum dana ro organisasi sena ḇa.”
”Yafrur pyum ker ma yaḇensewar kaku fa yafaduru kina yedi ḇape swari ibur aya ma romawa ayedi.”—SHIU PING, HONG KONG
Ono kako sfafko snar simyaren seari ma sifrur roi ḇepyum nabore, ḇoi roi ḇeḇyeḇa nkur ker si. Ine iso Van, bin oso ḇeraker Vietnam ḇyaḇir ya. Doḇe, ”Fyor iwara ras ḇe ras yafarser aibon, pampen, ma roḇean faro sinan apus ayesi ḇemar kwar sya. Yakara yafrur radine ido, na nafrur kenem ayena ro ras ḇarpon iyama nari napyum syadi. Aya kako yafrur pyum ker ma yafrur ker ritual ro agama yedi isof ro taun ḇe taun. Rariryano, swa ayedi iduf marḇak. Ramnai, inai yedi ḇefarkor ro sup bondi dakmar fyor byabo kaker.”
Inja, kofrur pyum ima nfasnai kenem koḇena na neaski ker ḇa. Rarirya ido, rosai na ḇebuk payamyum ḇe ko ro fafisu iyama? Infa kofawi kankarem ḇyena, fandun fa kofawi knam ḇekaku ḇyena ḇekofenḇair nyan insama kosmai aski ro fafisu iyama. Rodiso kosmai anun ḇepyum faro roi nane?
a Imbe wafawi nabor syadi wer ḇekur farkarkor Konghucu, mam syap Pencarian Manusia akan Allah, fasal 7, paragraf 31-35. Ḇefrur syap ine iso Saksi-Saksi Yahwe ma naisya ro www.jw.org/id.