Rosai Na Ḇebuk Payamyum ḇe Ko faro Ras Ḇarpon Iyama?

Raris kawos ro farkarkor ḇepon na, ḇebor sya sikyar kenem sena oso ḇyeatur na kwar, sisewar farkarkor ḇekaki ma pipi, ma sifrur pyum ido nari nbuk aski syadi ro ras ḇarpon iyama. Ḇape kakuya, roi sifrur anna namnis ra sikyar faro peta ḇesasar insa sraḇe moḇ oso simarisen na. Rarirya ido, roi ḇebuk aski ro fafisu iyama isya ke? Imbo isya!

KNAM RO ANUN ḆEPYUM KAKU

Fyor kofandun wos anun, na kofuken faro snonggaku ḇesinan syadi ma ḇefawinanem ro konsya. Mankun oso ḇesinan syadi ma ḇefawinanem na ḇebuk wos anun ḇepyum kaku ḇe ko. Wos anun ani isya ro syap oso ḇeḇefas indokada taun 3.500 naiwara. Syap ani iso Refoya.

Rosai ḇefnai fa kokyar Refoya? Snar ndrama ro Mankun ḇesinan syadi ma ḇefawinanem ro supswan farsyos. Refo dap I ḇe ”Ḇesinan Syadi” iso ”Allah ḇesya isof fyoro-fyoro, ḇena awar ḇa, ḇena papupes ḇa”. (Daniel 7:9; Mazmur 90:2, Bahasa Indonesia Masa Kini-LAI) Ima ”Ḇefrur farsyos, Allah ḇekaku, Ḇefrur supswan”. (Yesaya 45:18) Ikofenḇair snonsnon Ḇyedi ḇe ko kako, isoine Yahwe I.—Mazmur 83:18.

Snar Refo ndrama ro Allah ḇefrur snonggaku syakam, inja roi ḇeḇefas ro dorina myanen budaya ḇaido er oso ipyum syadi ro ḇesesya ḇa. Wos anun ḇyena namnis ro fafisu ine kako ma napyum faro snonggaku syakam. Refo iso syap ḇebor seterjemahkan na ma ḇeḇerwas nabor kaku.a Inja, snonggaku syakam bisa siwasya ma sismai payamyum ro syap ine. Roi ine kam namnis kuker wos ḇero Refo ine:

”Allah myam rarwas snonkaku ḇa. Snonkaku oser-oser ro er rosairya kaker, ḇeyararyof ma ḇeḇesyowi Allah kuker napnapes imarisen si.”—FARFYAR 10:34, 35.

Imnis raris sinan ḇeswar ma ḇemarisen ḇefnoḇek romawa ḇyedi, Allah Yahwe kako iswar ma imarisen ifnoḇek ko ro Refo, ḇeser wos Ḇyena. (2 Timotius 3:16) Iso ḇefrur konya, ma ifawi rosai ḇepyum faro ko. Inja, bisa kokyar rosai ikofen ḇe ko roro Refoya.

ANUN ḆERO REFO BISA KOKYAR NA

Refo iser anun ḇefrur kokyar faro ras ḇarpon iyama. Rosai ḇefasnai kakuya? Indokada taun 2.000 naiwara, Refo fyas kwar sarisa sarirya monda ma kenem ro snonggaku komam ro kirine sya.

SARISA:

”Er oso nari ḇyembroḇ ma isampum er ḇese ma ḇaḇesasoser oso nari ḇyembroḇ ḇaḇesasoser ḇeseya, ma rim ḇeba kaku nari myun ma ro moḇ nabor dafduf kapyowi ma basbiser isya.” —LUKAS 21:10, 11.

KENEM SNONGGAKU SYA:

”Mkofawi mboi ro ras ḇepupesna nari ndama kuker kandera nabor. Snonkakusya nari siswar mankunsi ḇardi ma sewomen faro pipi. Nari sḇemandaw ma simarares mankunsi, sanonef, nari sisampum sinansya ma sifawi sikofen kasumasa ḇa, sfandun ḇar rurya ḇa, sifawi saswar ḇa, simewer ḇaḇeaskiya, simarisen skoryae snonkaku, sfarmkuepen mankunsi ḇa, siḇarḇor, simewer roi ḇeḇyena, simarisen sḇoḇ min sesi, skara nakwan ba ma simarares si, siso syadi rmomen-nafsu sena ro siso Allah.”—2 TIMOTIUS 3:1-4.

Kwara ido moḇsa na Refo ikofenḇair roi ḇeḇejadi ro kirine mnis kaku? Na nwa kakara ḇemnis kuker Leung, ḇeḇarek ro Hong Kong. Doḇe, ”Roi Refo ikofenḇair neḇefas kwar ro fyor iwara. Ma ndarirya kam imnis kaku. Snonggaku osoḇaḇeri bisa ḇekofenḇair radine. Inja, Refo ndrama ro Mankun ḇesambraḇ syadi ro ko.”

Refo ikofenḇair roi ḇeḇejadi naisya neutin syaran kwar.b Ine nfasnai kaku wos Refo nggaku ndramuma ro Allah. Yahwe ikofen, ”Aya iso Allah, na oso isya ḇaḇeri ḇemnis ra Aya. Ro randak ya yakofenḇair kwar roi ḇeḇejadi na.” (Yesaya 46:9, 10) Inja, bisa wakyar kuker rosai Refo ikofen kuker ras ḇarpon iyama.

ANUN FARO KIRINE MA FYORO-FYORO

Wos anun ḇepyum nasya nabor ro Refo. Fyor wasona ido, nari wasmai payamyum nabore. Mampan wos anun ḇeuser nane:

MAMAM ḆEKAKU KUKER PIPI MA FARARUR

”Ipyum syadi mnaisu kermkun ḇardibur ro fararur marḇak kuker ḇramin risuru ma sasewar wam ya.”—PENGKHOTBAH 4:6, fasfas kasun.

KANKENEM RO KINA

”Rariso wer kako snon mko oser-oser: iswar swari imnis iswar mankundi ma bin oser-oser iḇye kada ḇyesyowi swa ḇyedi.”—EFESUS 5:33.

KOKAIN PYUM KUKER SNONGGAKU ḆESE

”Waḇinkwanbur masasor ma wabur rarmomen ya; sne bena nadosam awer fa wafrur roi ḇeḇarḇor.”—MAZMUR 37:8.

Wos anun ro Refo bisa nafrur kokenem kuker aski ro kirine ma ras ḇarpon iyama. Refo kako naser Allah asas Ḇyena kuker fafisu ḇepyum kaku, imnis ra:

SNONGGAKU SIKENEM KUKER ASKI MA PAYAMYUM

”Snonggaku nari sismai kaku marasrisen ḇeba snar aski ḇebor.”—MAZMUR 37:11.

RUM ḆEPDUK MA ROḆEAN NABORE

”Nari sḇawes rum ma sḇarek ro na; na sifrur yaf anggur ma san bon na.”—YESAYA 65:21.

DAFDUF ROḆA MARMAR NASYAḆA KAKO

”Marmarya isyaḇa kwar; sne ḇefafardun, kankanes, roḇa dafduf naisyaḇa kako.” —FASASNA 21:4.

Rosai na wafrur kaku insa wasmai aski ro ras ḇarpon iyama ḇemnis radine? Kankarem ḇyena nasya ro farkarkor ḇeuser ya.

a Imbe wafawi nabor syadi wer ḇekur penerjemahan ma ḇaḇerarwas Refo ido, mam ro www.jw.org/id, ma kwinfir ḇar AJARAN ALKITAB > SEJARAH DAN ALKITAB.

b Imbe wafawi nabor syadi wer, mam syap Alkitab—Firman dari Allah atau dari Manusia?, fasal 9. Ḇefrur syap ine iso Saksi-Saksi Yahwe ma naisya ro internet. Imbe wawasya syap ine ido, mam ro www.jw.org/id, ma kwinfir ḇar PERPUSTAKAAN > BUKU & BROSUR.