Ḇero Sidang Syakam Bisa Sifnoḇek Ḇefarkor Refo fa Isur ma Ḇyebaptis

1-2. Mansei na ḇefnoḇek ḇefarkor Refo oso fa isur ma ḇyebaptis ya?

AMY, ḇeḇarek ro Fiji, fyawar ḇo doḇo, ”Yakfarkor Refo ro ḇepondi anya, yamarisen kaku faro roi yafarkorna. Yafawi inema kakaku rirya. Ḇape randakya yakfrur fararwe ḇaime ma yamarisen ḇaim fa yaḇebaptis. Fafisu yaḇebati kuker naek srar sya insape yakfrur roi ani.” Ro Amy fawar ḇyenane, bisa kun farkarkor ḇefandun oso: ḇefarkor Refo kuker konsya imbude nari sismai dafdif fa sisur ma sebaptis fyor sismai fafnoḇek ro manbaryas ro sidang sya.

² Manbaryas syakam bisa sifnoḇek ḇefarkor Refo fa sakḇebaptis ma saksun ro sidang ya. (Ef. 4:16) Perintis oso snori Leilani, ḇyarek ro Vanuatu, ikofen wos sarḇer oso ḇo doḇe: ’Snonggaku ḇero mnu ansya kam na sfaduru romawa oso ra iba.’ Doḇe ine imnis kako faro ḇefarkor Refo sya. Fyorno ido, sfandun manbaryas ro sidang sya kam fa sifnoḇek ḇefarkor anya fa daksun ro kakaku ya. Imnis ra insa romawa oso bisa ḇyesnonggaku kuf na kina ḇyesi, bati ḇyesi, ma guru ro rumfarkor ḇyesi sifnoḇek i. Sifnoḇek romawa ani isoine sifrur ifa iryaḇ ma sfarkor roi ḇefandun na faro i. Rupa rairi, manbaryas ḇero sidang sya kam bisa sakfnoḇek ḇefarkor Refo anya fa daksur ma dakḇebaptis isoine sbuk wos anun, sifrur iryaḇ ma sfasnai nyan ḇepyum faro i—Ams. 15:22.

3. Farkarkor rosai wun ro Ana, Donny, ma Leilani wos skoḇena?

³ Insama ḇefarkor Refo oso imbe isur ma ḇyebaptis, rosai ḇefrur fa ḇebuk farkarkor Refo ya fyandun fanfnoḇek ro manbaryas ḇese sya? Ana, perintis istimewa ro Moldova, fyawar ḇo doḇe, ”Fafisu ḇefarkor Refo imbe isur ro ḇaḇerur ya, na fyandun fanfnoḇek nabore. Ḇebuk farkarkor Refo nari ismai samswen fyor demyer ifnoḇeki.” Donny,b perintis istimewa ro sup ani kako, dakkofen, ”Fyorno ido, manbaryas ḇese sikofen roi oso yakara ḇaḇeri na, ma wos sena nsun ro ḇefarkor Refo sya sisnesna.” Leilani dakkofen roi ḇesena wer, ”Ḇefarkor Refoya ḇyabir ismai sawarwar ma syowi ro naek srar sya ido, nari ḇyabir snar koma Yahwe kawasa Ḇyesi kaku ko.”​—Yoh. 13:35.

4. Rosai na kawos ro farkarkor ineni?

⁴ Imbude kwara radine, ’Ayaiso ḇebuk farkarkor Refo ḇe ḇefarkor Refo oso ḇa, ḇoi moḇsa na yafnoḇek i fa daksur rai?’ Ro farkarkor anine, nari kawos rosai na kofrur fyor manbaryas oso dor kofa kakso i ro farkarkor Refo ḇyena. Na kawos kako rosai na kofrur fafisu ḇefarkor Refo oso dakso fananjur kwar. Oso wer ido, na kawos moḇsa penatua sakfnoḇek ḇefarkor Refo ya fa daksur ma ḇyebaptis.

ROFYOR WAKSO RO FARKARKOR REFO YA

5. Ḇebuk farkarkor Refo oso iwan au fa wakso i ro farkarkor Refo ḇyena ido, rosai na wakfrur ya?

⁵ Rofyor farkarkor Refo ya imbrane, ḇena fakamamar kaku fa ḇefnoḇek ḇefarkor ani fa fyawi Allah wos Ḇyena isoine ḇebuk farkarkor Refo ya. Ḇebuk farkarkor Refo oso dor au fa wakso i ro farkarkor Refo ḇyena ido, roi wakfrur iso wakfnoḇek ḇebuk farkarkor Refo ya. (Pkh. 4:9, 10) Roi risai monda na wafrur fa wakfnoḇek i?

6. Rofyor wakso ro farkarkor Refo, rariso waso anun ḇero Amsal 20:18 rai?

⁶ Wafrur fasasos ḇepon. Ḇepon ya, wor ḇebuk farkarkor Refo ani fa ikofenḇair kermgun ḇekur ḇefarkor Refo kuker i ani. (Wasya Amsal 20:18.) Bisa wafuken radine, ”Rosai ikyar ya, umur ḇyeja fis ḇaido kina ḇyesi? Farkarkor rosai na kuyawos kuker i na? Roi risaiso imbe kofasnaibos ḇe i na? Rofyor farkarkor Refo imbrane, roi ono nasya imbe yafrur ḇaido yakofen ke? Roi ono nasya yapok fa yafrur ḇaido yakofen awer ke? Moḇsa na yafrur ḇefarkor Refo ani fa iryaḇ fa daksur ya?” Ḇebuk farkarkor Refo ani nari ikofenḇair kenem ro ḇefarkor Refo ani kam ḇa. Ḇape, roi ikofenḇair ḇe au na nun payamyum. Imbesrar ḇeyuffarmyan ḇe misionaris ḇenir ḇe Joy, fyorno ido nari dawos roi anine kuker ḇeso i ro farkarkor Refo ya. Doḇe, ”Awawos ḇeradine na nafrur ḇeso aya fa dakbuk fanfnoḇek ḇe ḇefarkor Refo ayedi. Ine kako nafnoḇek ifa fyawi rosai na ikofen ro farkarkor Refo ya.”

7. Rosai ḇefnai fa wakfrur fasasos faro roi nari mgofarkor na?

⁷ Fandun fa wakfrur fasasos faro roi nari mgawos ro farkarkor ani. (Ezr. 7:10) Donny, ḇeyap ḇepon kwar ani doḇe, ”Yamarisen ḇeso aya anya ifrur fasasos faro roi nari kofarkor na. Snar ifrur raryaido, bisa dakḇuk wos ḇeyun fainda.” Oso wer ido, ḇefarkor Refo anya myam mukam mufrur fasasos ḇepyum ido, nari nbe nyan ḇepyum faro i. Mboi ḇefnder wafrur fasasos ido, ḇesewar fa mam wos ḇeknam ḇyena.

8. Au ḇeyun nadi ro farkarkor Refo ya ido, rosai na wafrur insa nadi bena nun payamyum?

⁸ Nadi ima roi ḇefandun kaku ro farkarkor Refo ya. Inja sor au fa benadi ido, kwarauser ḇepon rosai nari imbe wakofen ro nadi ya. Rarirya, nadi bena nasrow faro ḇefarkor ya. (Mz. 141:2) Hanae, imbesrar oso ḇeḇarek ro Jepang, iswarepen kaker nadi ro imbesrar oso ḇeso ro farkarkor ḇyena. Doḇe, ”Yaḇaḇir fyanam kaku kuker Yahwe I, imbe yakmnis i. Ro fafisu dap snosnon yeja ro nadi ḇyena, nafrur yaḇaḇir siswar aya.”

9. Raris Yakobus 1:19 ikofen ya, moḇsa na wakḇe min nari ḇebuk fafnoḇek?

⁹ Wakfnoḇek ḇebuk farkarkor Refo ani fyor farkarkor ya imbrane. Omamuyovbi, imbesrar oso ḇeyuffarmyan ḇe perintis istimewa ro Nigeria, doḇe, ”Rofyor farkarkor imbrane nari ḇeso kayam kuker konsya myam pyum farkarkor na. Nari ḇyuk kako wos ḇebuk payamyum. Ḇape, na dawos nabor manggenem ḇa, snar fyawi iso ḇebuk farkarkor ani ḇa.” Inja, fafisu risai na wakawose, ma rosai imbe wawos na? (Ams. 25:11) Warower pyum kaku fafisu ḇebuk farkarkor Refo ma ḇefarkor ya suyawos kaker. (Wasya Yakobus 1:19.) Wafrur rarya ido, na bisa fa wakfnoḇek ḇeri fyor nasrow. Fyor wawos ḇaim, kwara ḇepon kaku resari. Imnis ra, mam pyum insama wasunuk awer ḇebuk farkarkor Refo ani fyor dawos kaker, wawos roi ḇese ḇa, ḇaido wawos kawan kaku. Wos na, sarber, ḇaido fakfuken ḇeknampu ḇefasnaibos rosai mgofarkor na. Fyorno ido, imbude ḇaḇir roi ono nasya nabor fa wakofenḇair na. Raryano, bisa manen ḇefarkor Refo ani ma fasnai syowi faro i. Wafrur roi anna ido, bisa wakfnoḇek ifa isur fasau ro rurya.

10. Fawar pengalaman bena ido, rosai fainda faro ḇefarkor Refo ani?

¹⁰ Fawar pengalaman bena. Ipyum ido, fawar kermgun pengalaman bena faro ḇefarkor Refo ani. Imnis ra, fawaro randak wakfarkor kakaku ya, samswen wasmai na, ḇaido fanfnoḇek wasmai ro Yahwe I. (Mz. 78:4, 7) Imbude, roi fawar ani nasrow kuker fandandun ro ḇefarkor ani. Fawar ani imbude nasambraḇser i ma bisa nafrur iryaḇ fa isur ma ḇyebaptis. Ma, imbude bisa nafnoḇek i ro samswen ḇyena. (1 Ptr. 5:9) Gabriel, perintis oso ḇeḇarek ro Brasil, ismai fainda ro pengalaman naek srar sya fyor fyarkor kaker Refo ya. Doḇe, ”Fyor yarower pengalaman naek srar sya, yafarkor snar Yahwe fyawi samswen yena. Ma naek srar bisa sifrur mnis samswen sena ido, aya kako bisa ḇae.”

FAFISU ḆEFARKOR REFO ANYA DAKSO FANANJUR

11-12. Fafisu ḇefarkor Refo anya dakso fananjur, rosai ḇefnai fa koser i kuker raryaḇ?

¹¹ Insa ḇefarkor Refo anya isur ma ḇyebaptis, fandun fa dakso fananjur ḇesya kwar. Ro fananjur ya, na ismai payamyum nabore. (Ibr. 10:24, 25) Ḇebuk farkarkor Refo ani dor i fa dakso fananjur ma ryama ḇe Balai Karajan ido, kokame bisa kofrur iryaḇ fa iso fananjur ḇesya kwar. Moḇsa kofrur na rai?

¹² Wasaser i kuker syowi. (Rm. 15:7) Fyor ḇefarkor Refo oso ḇyaḇir komarisen kosaser i ro fananjur ido, na imarisen fa ryama ker ro fananjur ya. Inja, wasaser i kuker syowi, ma wuni ḇe naek srar sya. Ḇape, wafrur awer ifa imai fyor ryodia. Wawos kuker i, snar ḇebuk farkarkor Refo kuker i imbude ryama ro fananjur ḇaime ḇaido isya ifrur fararur ro sidang. Rwower pyum rosai ḇefarkor Refo ani ikofen na, ma ḇesyowi i. Kosaser ḇefarkor Refo kuker syowi ido, moḇsa roi ine nafnoḇek si rai? Mamuser Dmitrii fawar ḇyedi, insape dakḇebaptis ro taun ḇeḇeso aniwara ma kirine dakuffarmyan ḇe hamba pelayanan. Fyawar roi ḇyaḇir fyor ryama randak ḇe fananjur ya: ”Ro ras ya, yores yawaf ro Balai Karajan bandi ḇoi yasyasen ra. Naek oso myam aya, ma kuker syowi dor aya ma nusun ḇe bandum. Naek srar ḇebor sya srama ma sawos kuker aya. Yakara ḇaḇeri siser pyum kaku aya. Yamarisen kaku. Nafrur fa imbe yafanjur ras nakam. Yaḇaḇir yaksmai roi ine ro ras oso ḇaime.”

13. Moḇsa rari ḇepyum bena nafnoḇek ḇefarkor Refo ya?

¹³ Fasnai kenem ḇepyum. Fasnai rari ḇepyum ido, ḇefarkor Refo ani bisa ikyar snar koma snonggaku Kristen ḇekaku. (Mat. 5:16) Vitalii, naek oso ḇeyuffarmyan ḇe perintis ro Moldova, doḇe, ”Yamam moḇ sikenem raya, kakara sena, ma rari sena ro sidang. Ine nbuk kakyar ḇe aya snar Saksi-Saksi Yahwe sima agama ḇekaku rirya.”

14. Rosai ḇefnai fa kenem ḇepyum bena bisa nafnoḇek ḇefarkor Refo fa isur pdef?

¹⁴ Insa dakḇebaptis, ḇefarkor Refo ani ifrur kaku rosai fyarkor kwar na. Fyorno ido napyan ḇa. Ḇape, myam fainda wasmai snar waso farkankin ḇero Refo ido, na nadif ifa dakso nyan bena. (1 Kor. 11:1) Hanae, ḇeyap ḇepon ani doḇo, ”Fafisu yafarkor roi fandun fa yafrurna, naek srar sya sifrur na kwar. Ro si, yafarkor moḇ yafasnai saswar, yabuk maf, ma yasambraḇser snonggaku ḇesesya. Siwos roi ḇeḇyeḇa faro snonggaku sya ḇa. Imbe yakso nyan sena.”

15. Raris Amsal 27:17 ikofen ya, rosai ḇefnai fa koḇebati kuker ḇefarkor Refo sya?

¹⁵ Bebati kuker ḇefarkor Refo ya. Fyor ḇefarkor ani iso fananjur ker ido, fasnai snar wafandun i. (Flp. 2:4) Ḇesewar fa mambir pyum kaku i. Buk wos manen snar ḇyesewar fa ifrur fararwe ḇepyum na. Wafuken kako roi fyarkor ro Refo ya, kina ḇyesi, ma fararur ḇyena. Ḇape, wafuken faḇye awer i. Ḇesewar fa mambir pyum i ido, bisa ḇebati fanam kuker i. Ine na nafnoḇek ifa isur ma ḇyebaptis. (Wasya Amsal 27:17.) Kirine Hanae duffarmyan ḇe perintis biasa. Fyawar randak dakso ro fananjur ya. Doḇe, ”Yaḇebati kuker naek srar ro sidang sya mura, nafrur imbe yaso ker fananjur na. Inoido yambrus kako Ḇoi, na yarama ro fananjur na. Yamarisen yaḇebati kuker bati ḇebabo ayesya ro sidang. Nane nafnoḇek aya fa yamnai yaḇebati kuker snonggaku ḇesyom Yahwe ḇa. Imbe yakḇebati fanam kuker Yahwe ma naek srar sya, inja yun snemuk fa yakḇebaptis.”

16. Rosai bisa wafrur insa ḇefarkor Refo ya ḇyabir dakro sidang yadori?

¹⁶ Fyor ḇefarkor Refo ifrur fararwe, wafrur fa ḇyabir dakro sidang yadori. Wafrur pyum i. (Ibr. 13:2, catatan kaki) Denis, naek oso ḇero Moldova, dakfawar fafisu fyarkor Refo kaker. Doḇe, ”Aya ma swa yedi sor nu kali riḇeso fa nufnak ḇe naek srar sya. Sfawar moḇsa Yahwe ifnoḇek si rai. Ine nasambraḇser kaku nu. Snar nuḇebati kuker si, inja nukyar snar kuffarmyan Yahwe ima nyan ḇepyum kaku dirya, nari ḇefrur kenem nuḇena neaski.” Fyor ḇefarkor Refo bisa fa dakḇe manbaryas ido, wor i fa mubaryas. Diego, naek oso ro Brasil, doḇe, ”Naek ḇebor sya sor aya fa nggobaryas. Ine nyan ḇepyum fa yakmambir si. Bisa yafarkor nabor ro si, ma ayano yaḇaḇir yafanam kuker Yahwe ma Yesus su.”

RARISO PENATUA SYA SAKFNOḆEK?

17. Rariso penatua sya sakfnoḇek ḇefarkor Refo sya?

¹⁷ Swewar swaf faro ḇefarkor Refo. Penatua mgoya, mgofasnai saswar ma mgofandun ḇefarkor Refo sya ido, na nafnoḇek si fa sisur ma sakbebaptis. Swewar swaf fa wawos kuker si fyor srama ro fananjur ya ke? Waswarepen sisnosna, fyor imbe sbuk randak kankarem ido, nari sḇaḇir ḇesyowi si. Oso wer ido, bisa fasos pyum jadwal insama wakso kuker manbaryas ḇebuk farkarkor Refo ke? Ine na nun fainda faro ḇefarkor Refo ya, syadi ro roi wakara na. Jackie, imbesrar ḇeyuffarmyan ḇe perintis ro Nigeria, doḇe, ”Bebor ḇefarkor Refo kuker ayansya skandor kaku fyor sfawi ḇeso aya ro farkarkor Refo ima penatua oso diri. Ḇefarkor Refo oso doḇe, ’Pastor yedi nari dakfrur raryaḇa. Na ryama ḇe rum snonggaku ḇena arasai ma sbak imande!’” Ḇefarkor Refo ani kirine iso fananjur ya kwar.

18. Rariso penatua sya bisa simbran fararur sena raris ḇeyap ro Farfyar 20:28?

¹⁸ Farkor ḇebuk farkarkor Refo sya, ma wafrur raryaḇ si. Penatua mgoya, mgona fakamamar ḇeba isoine mgofnoḇek manbaryas sya fa sekir syadi ro ḇaḇebaryas ma sbuk farkarkor. (Wasya Farfyar 20:28.) Inoido, manbaryas ono ikyar manggundi ḇa fyor ḇyuk farkarkor Refo fyor waso i. Rarya ido, wakofen ḇe i fa au ḇefarkin farkarkor ani. Jackie, ḇeyap ḇepon ani, doḇe, ”Inoido penatua sifuken ker ḇefarkor Refo ayesya. Fyor yasmai samwen ro yafarkin farkarkor Refo, sḇuk anun ḇepyum faro aya.” Imbo, penatua sya bisa sifrur roi nabore fa sifrur ḇebuk farkarkor Refo sya siryaḇ. (1 Tes. 5:11) Jackie ikofen wer, ”Fyor penatua sifrur yaryaḇ ma soḇe sesyowi kaku fararur marḇak yena, yamarisen bose. Wos sena nafrur doryaḇ. Rya yinem war ḇepnunek ro fafisu dares ya iḇa. Wos manen sḇuk nane nafrur yakyar manggundaya ma yaryaḇ fyor yafarkin farkarkor Refo ya.”​—Ams. 25:25.

19. Rosai ḇefrur fa kona raryaḇ?

¹⁹ Ro fafisu ine kobuk farkarkor Refo ḇayo, bisa kofnoḇek ḇefarkor Refo sine kaker fa sisur ro ḇaḇerur ya. Fafisu kakso ḇebuk farkarkor Refo oso ido, bisa kakbuk anun kofasos kwar na. Ḇefarkor Refo isya dakso fananjur ido, koḇesewar fa koḇebati kukeri ma koḇuk nyan ḇepyum faro i. Penatua sya bisa sifrur raryaḇ ḇefarkor Refo sya kuker sbuk swaf sena faro si. Penatua sya kako bisa sifrur raryaḇ ḇebuk farkarkor Refo kuker sfarkor si ma sbuk wos manen. Imbo, fafnoḇek koḇena naba ke kasun ke bisa kofnoḇek ḇefarkor Refo sya insama sakswar ma suffarmyan Yahwe I. Ine nari nafrur koryaḇ kaku!