Wafrur Mnis Kaḇer Ḇaḇebati Bena kuker Yahwe

RO TAUN ḇe taun, Yahwe domba ḇemaeja Ḇyesi skaḇer ḇe sidang. Wawasen kada nari ”raryaḇ syadi ro boiyaswa” fyor snonggaku ansi skaḇer ḇe sidang! (Luk. 15:7, 10) Kwaḇer ḇe sidang kwar ido, wakyar snar Yesus, malaikat sya, ma Yahwe nari simarisen kaku. Kirine, ḇebati kaḇer kuker Yahwe. Ḇape, imbude wasmai samswen ḇeḇeso. Rosai monda samswen wasmai na, ma rosai na ḇefnoḇek Au ya?

SAMSWEN ROSAI WASMAI NA?

Ḇebor ḇekaḇer ḇe sidang sḇaḇir sesanekar. Imbude na wakfawi roi Raja Daud daksmai na. Ismai ampun ro sasar ḇyena kwar raryano, ikofen kaker, ”Sasar ayena nabor kaku.” (Mz. 40:12; 65:3) Rofyor snonggaku oso kyaḇer ḇe Yahwe kwar, imbude na kyara ker sasar ḇyena ḇaido na imai ro taun ḇe taun. Isabel,a sisasyar i syadi ro taun swaf ri 20, ikofen, ”Samswen kaku snar Yahwe bisa byuk ampun ḇe aya.” Ḇaḇir wafafko ido, bisa wasambraḇ ḇa ro rur ya. (Ams. 24:10) Besewar fa roi ani ḇyejadi awer.

Ono sisya kako simgakwarek nari jadi fa sifrur roi nakam ḇa fa sḇebati kaḇer kuker Yahwe I. Fyor kyaḇer ḇe sidang ya kwar, Anton doḇe, ”Roi yafarkor ro ḇepondina ma fararur ḇesren yaḇefnder na kwar.” Snar, naek srar ḇeḇeso sakḇaḇir rarirya, inja sisewar ḇa fa sbuk roi ḇepyum ḇe Yahwe I.

Kwara pan wos sarḇer ine: Snonggaku oso rum ḇyedi imkok snar wamdoḇer, kyara na ipok ḇa fyor iwasen moḇsa ḇyawes kaḇer rum ḇyedi wer. Imnis rarirya, ḇaḇebati Bena kuker Yahwe napyum ḇa snar wafrur sasar ḇeba kwar ido, na wamgakwarek snar wafawi wafandun swaf nabor ma swewar fa wafrur mnis kaḇer wis ani. Ḇape, na besewar ro manggundaw ḇa.

Yahwe doḇe, ”Mgorama kawos asuser parkara ro fandu ko.” (Yes. 1:18) Ḇesewar marḇak kwar fa wafrur roi ani. Yahwe ḇyesyowi kaku sasewar Bena! Snar kwaḇer ḇe Yahwe, na ḇye Au fa byukifasnaiḇair snar Setan anonef ḇyena kam nsasar.—Ams. 27:11.

Kwaḇer ḇe Yahwe kwar ido, nfasnai fanam ḇe I kwar. Ma Yahwe ḇyeasas nari fyanam faro Au. (Yak. 4:8) Kirine, naek srar smam snar kwaḇer fa wakro sidang yadori kwar, ma ine napyum kaku. Ḇape, roi ḇese fandun fa wafrur wer. Isoine swambraḇser kakyar Bena faro Kma ma Bati Bedi, Yahwe I. Moḇsa wafrur na rai?

WAFRUR ROI BISA WAFRUR NA

Besewar fa wafrur roi bisa wafrur na. Imbude na waswarepen kaker knam ro roi wafarkor ḇekur Yahwe ma asas Ḇyena faro Firdaus. Ḇape, kirine ḇesewar fa wafrur fararur ḇesren ya wer, imnis ra wabaryas ḇesya kwar, waso fananjur ari, ma ḇebati kuker naek srar sya. Mam pan roi ḇeḇeso bisa wafrur na.

Benadi faro Yahwe I ḇesya kwar. Yahwe fyawi kaku snar sneḇaḇir ḇesasar na bisa nafrur samswen ḇe ko fa koḇenadi faro I. (Rm. 8:26) Rarirya, fandun fa ḇenadi kuker kaḇaḇaḇ. Wakofen ḇe Yahwe snar wamarisen kaku wakḇe bati Ḇyedi. (Rm. 12:12) Andre fyaware, ”Ro fafisu ya, yaḇaḇir yasasar kaku ma yamai. Ḇape fyor yaḇenadi ya, roi yaḇaḇir na yakara ker na ḇa. Nafrur yaknon.” Wafawi rosai imbe ḇenadi ya ḇa ido, mam Raja Daud nadi ḇyena fyor imbror kwar ro Mazmur 51 ma 65.

Farkor Refo ya ḇesya kwar. Ine nari nafrur kakyar Bena nako syadi ma nafnoḇek Au fa waswar syadi Yahwe I. (Mz. 19:7-11) Felipe doḇe, ”Randakya, snar yawasya ma yafarkor Refo ker ḇa, yasambraḇ ḇa ma yafrur Yahwe fyafko. Yamewer yafrur Yahwe sneri duf wer. Inja ro kirine, yafrur farkarkor manggun yedi ḇesya kwar.” Bisa wakfrur roi ḇemnis kako. Wafawi roi imbe farkor na ḇa ido, wor min Kristen ḇemas oso fa ifnoḇek pyan Au.

Ḇebati fanam kuker naek srar sya. Snonggaku ḇeḇeso ḇekaḇer ḇe sidang simgakwarek nari naek srar ro sidang skara sasar si. Larissa doḇe, ”Yamai kaku ra. Yaḇaḇir yafrur naek srar sya sfafko kwar. Roi yaḇaḇir ine nakyaren ker aya, ma samswen fa nabur aya.” Iso roi wakḇaḇir ido, wakyar snar penatua ma naek srar sya simarisen sifnoḇek Au fa kwaḇer ḇe Yahwe. (Mam kotak ”Rosai Na Penatua Sifrur Na?”) Simarisen kukro kwaḇer kwar, ma simarisen smam waryaḇ!—Ams. 17:17.

Rariso ḇebati fanam kuker naek srar ro sidang sya? Waso fananjur ari nakam, ma wabaryas ḇesya kwar kuker naek srar sya. Rosai fainda wasmai na fyor wafrur roi anna? Felix doḇe, ”Naek srar siwaf kaku aya fa yakaḇer ḇe sidang. Yaḇaḇir siswar aya kaku. Sikame sifnoḇek aya fa yamam snar yakro sidang yadori wer. Sifnoḇek aya kako fa yamam Yahwe byuk ampun ḇe aya kwar ma bisa yuffarmyan I ḇesya kwar.”—Mam kotak ”Rosai Na Wafrur Ya?”

WASUSU AWER!

Setan nari fyarem ”wamdoḇer” nabor fa ḇyukifrur ḇaḇebati Bedi kuker Yahwe syambraḇ ḇa. (Luk. 4:13) Insama fasos Au ḇeri fa pampum roi Setan ifrur na, ro kirine ḇeri swambraḇser wis Bena kuker Yahwe I.

Yahwe ḇyeasas, ”[Domba-domba Ayesi] ḇeḇor sya nari yasewar si, ḇeḇyor sya nari yun sibur, ḇepar sya nari yapanggun si, ma ḇesambraḇ ḇa sya nari yafrur si fa sisambraḇ.” (Yeh. 34:16) Yahwe ifnoḇek snonggaku ḇebor sya fa sḇebati kaḇer kuker I. Inja, wakyar snar Yahwe nari ifnoḇek Au kako.

Rosai Na Penatua Sifrur Na?

Penatua sya sna fararur ḇefandun isoine sifnoḇek snonggaku sya fa skaḇer ḇe sidang fa sḇebati kaḇer wer kuker Yahwe I. Mgomam rosai monda na penatua sya sifrur na.

Mgobuk wos sneprei ḇe si. Manwawan Paulus ifawi snar snonggaku oso ḇekaḇer ḇe Yahwe I kwar, bisa fyafardun snar ”fafardun ḇyedi myarḇak mankenem”. (2 Kor. 2:7) Snonggaku ani imbude ḇyaḇir syasar kwar ḇaido ḇyaḇir ḇyesanekar ker. Inja, Manwawan Paulus danun faro naek srar ro sidang doḇo, ”Buk payasyos faroi ma wadifi wer.” Snonggaku ḇekaḇer ḇe sidang iḇye kada kobuk kakyar ḇe si snar Yahwe ma naek srar sya siswar kaku si. Penatua sya kako fandun fa sbuk wos sandik, ma sifnoḇek snonggaku ḇerarirya ansya. Ine nari nafnoḇek si, insama sisanekar ḇa.

Mgoḇenadi fnoḇek si. ”Nadi ro snonkaku ḇenapes, rofyor senadi kuker snekin, nadi ani papoik ḇyedi iba kaku.” (Yak. 5:16) Larissa, ḇeyap ḇepon ani, ikofen radine, ”Yakofen ḇe penatua sya faro roi yaḇeḇirḇar na. Mura, sḇenadi faro aya. Insape yafawi snar simsor aya ḇa. Imbe sifnoḇek aya fa yaḇebati kaḇer kuker Yahwe I wer.” Theo doḇe, ”Nadi ro penatua ansya nafrur yakyar snar Yahwe iswar aya kaku ma fyawi sasar yena raryano, myamo roi ḇepyum ro kenem yena.”

Mgoḇebati kuker si. Snonggaku ḇekaḇer sine sfandun bati ro sidang. Penatua oso snori Justin ikofen ḇo doḇe, ”Kor si fa kobaryas kayam ḇesya kwar, ma komamfar si ro rum sena. Fandun fa koḇe bati faro si kaku.” Penatua oso wer snori Henry ikofen ḇo doḇe, ”Rofyor naek srar ro sidang smam penatua sya sḇebati kuker snonggaku ḇekaḇer sya, nari sakḇesewar fa sakfrur roi ḇemnis.”

Mgofnoḇek si fa sakfrur farkarkor ro manggunsi. Min Kristen ḇemas oso bisa ifnoḇek snonggaku ḇekaḇer ḇe sidang ani fa dakfrur farkarkor manggun ḇyena ḇesya kwar. Penatua oso ḇenir ḇe Darko ikofen ḇo doḇe, ”Yabuk ker arasai rur yasrow na fyor yafrur farkarkor manggun, ma yafasnai snar yasmai marisen ro farkarkor Refo manggun yedi. Yor si kako fa kofarkor kayam roi ḇeḇeso.” Penatua ḇese ḇenir ḇe Clayton doḇo, ”Yanun ḇe si fa sfarkor fawar ro snonggaku ḇero Refo sya bena fawar ḇemnis kuker si na.”

Mgofarandows si. Snonggaku ḇekaḇer ḇe sidang smam kwar snar penatua sinema sna fakamamar ḇe mankara. Kirine, fandun smam penatua sfararur ḇe manfarandows. (Yer. 23:4) Wakḇe penatua ido, fandun fa warower pyum ma wasandik si. Wawos kuker si ḇesya kwar. Mam rosai penatua oso ḇenir ḇe Marcus ifrur na fyor ifrur kunjungan penggembalaan: ”Nggawos mnuk Refo ḇeḇeso ma nggobuk wos sandik faro si. Ma nggofrur sikyar snar sḇesewar kaku kwar fa skaḇer ḇe sidang, nggomanen si kaku, ma Yahwe I kako na myanen si. Nggoḇe penggembalaan ra imnai, nggokofen ḇeri rosai na nggofrur ro penggembalaan ḇerama ya wer.”

a Snonsnon ro farkarkor ine sfadwer na kwar.