Rosai Ḇefnai Fandun Fa Koso ro Fananjur Ya?

1-3. (a) Rariso snonkaku Kristen sifasnai simarisen kaku siso kayam ro fananjur ya? (Mam sonin ro randak artikel.) (b)  Rosai na kowawos ro artikel ine?

ROFYOR Corinna ḇyeumur 17, sfor snari ma sun i ḇe kamp kerja paksa ro Soviet. Ḇarpur ya, Corinna i kako sun i ḇe Siberia moḇ ḇebinkwan kaku, kawanwan ya iso syaran ma syaran kilometer ro rum ḇyedi. Ro diwa fyararur ro yaf ma sifrur i ḇe women. Fafisu oso siwan i fa fyararur ro ḇandi rofyor sup ya ipnunek kaku ma kuker sansun ḇesrow ḇa. Rariryano Corinna ma inbesrar ḇese sya sun snemuk fa na sifrur rosai riryakam fa sra siso fananjur ya.

² Corinna ikofenḇadir, ”Nkobur moḇ ya ro roḇ ma nkombran swaf ri 25 km ḇe stasiun kereta api. Kereta ani ifrar ro oras suru arwo prim ya. Nkoso kereta ya swaf oras ri wonem ma rofyor nkado kwar nkombran wer ḇe moḇ fananjur ya kawanwan ya iso 10 km.” Marandan sena ine nefromo monda ke? Corinna iwasen mura, ”Ro fananjur ya, nkofarkor syap Baryas ma nkodisen doya Karajan. Inema sarisa ḇeyun samambraḇ ḇe inko.” Ras rikyor ramnai insape skaḇer ḇe moḇ fararur ya, ḇape mandor ḇero yaf ya ifawi ḇaḇeri rofyor Corinna ma bati ḇyedi sifrarḇur moḇ ya.

³ Yahwe kawasa ḇyesi simarisen sifanjur kayam kuker naek srar ḇese sya. Imnis raris, snonkaku Kristen ro awar randak sya simarisen kaku fa sfanjur fa sisyom ḇe Yahwe I ma sfarkor naborwer kuker I. (Kis. 2:42) Kakuḇae au kako na wamarisen fa waso ro fananjur ya. Imnis raris naek srar syakam imbude na ḇaḇir samswen ḇe au fa waso ro fananjur ro minggu ḇe minggu. Imbude wafararur nabor ḇaido roi ḇebor ḇese naisya fa wafrurna ḇaido wamore. Inja, rosai nari ḇefnoḇek ko fa kofrur kaku ya insama koso ro fananjur ya?^[1] (Mam fasfas ḇepupes.) Rariso na kanun ḇe snonkaku ḇefarkor Refo kuker ko insya ma ḇese sya fa siso fananjur ya pdef? Artikel ine dawos rosai ḇefnai fa koso ro fananjur ya iso ine (1) nḇuk fainda ḇeko, (2) nafnoḇek ḇese sya, ma (3) nafrur Yahwe imarisen.^[2]—Mam fasfas ḇepupes.

FANANJUR YA ḆYUK FAINDA ḆEKO

4. Rariso koso kayam ro fananjur ya nafnoḇek ko fa kosma farkarkor kuker Yahwe I?

⁴ Fananjur fyarkor ko. Ro fananjur nakam nafnoḇek ko fa kofarkor naborwer kuker Yahwe I. Imnis raris, ro sidang ḇebor na sfarkor kwar syap Mendekatlah kepada Yehuwa ro Farkarkor Refo Ro Sidang. Rariso sneḇaḇir bedi rofyor kofarkor rari-rari Yahwe ḇyedi ma rofyor rwower kankarem ro naek srar sya? Roi ine na nafrur fa waswar kaku Yahwe I. Ro fananjur ya, ko kako kofarkor naborwer Refoya kuker korower fafaya, fasasna, ma wawasya Refo. (Nehemia 8:8) Ma kwarapan roi nabor naisya kosmana ro minggu ḇe minggu rofyor kofrur fasasos faro wawasya Refo ma korower kankarem naek srar ḇese sya ro fananjur.

5. Rariso fananjur ya nafnoḇek au fa waso mnis rosai wafarkor kwar ro Refoya ma wafrur fararur ḇaḇeḇaryas ya ipyum syadiwer?

⁵ Fananjur, raris Farkarkor Baryas nḇuk farkarkor ḇeko fa kofrur rosai kofarkor kwar ro Refoya ro kankenem koḇena. (1 Tes. 4: 9, 10) Imnis raris, waso kwar ke ro Farkarkor Baryas ḇefrur fa wamarisen wafrur naborwer ro fararmyan ḇe Yahwe I, nafrur fa nadi ḇena napyum syadiwer, ḇaido buk ampun faro naek ḇaido srar oso? Fananjur Kankenem ma Fararmyan Kristen koḇena nḇuk farkarkor ḇeko nyan rariso koḇaryas ma kofnoḇek snonkaku ḇese sya fa ssfawi napnapes ḇero Refo ya.​—Mat. 28:19, 20.

6. Rariso fananjur ya nafnoḇek ma nasambraḇser ko?

⁶ Fananjur ya syambraḇser ko. Dunya Setan ine ḇyensewar kaku fa ifrur kakyar koḇena nakower ḇa ma nafrur fa koḇestres ma koḇesanekar. Ḇape fananjur nḇuk anun ḇepyum ma nasambraḇser ko fa kofarmyan pdef ḇe Yahwe I. (Wasya Farfyar 15:30-32.) Ro fafisu nabor, kowawos rariso ḇardadi ḇero Refo ndarirya kwar. Ine nari nafnoḇek ko fa kokyar kaku asas-asas Yahwe ḇyena faro fafisu naiwama nari ndarirya kaku. Naek ma srar koḇesi ḇero sidang sanun ḇeko rofyor sḇuk fafaya Refo, sḇuk kankarem ma sidisen sisandik Yahwe kuker sne ḇesiper. (1 Kor. 14:26) Ma rofyor kofarfyar kuker si ro fafisu fananjur ya ḇyerak ḇaim ma fananjur ya posa, kona sneprei snar kona bati ḇeswar ko.​—1 Kor. 16:17, 18.

7. Rosai ḇefnai fandun fa koso kayam ro fananjur ya?

⁷ Ro fananjur ya, kosma farfnoḇek ro Allah rur ḇesren ḇyedi. Yesus ḇyuk rur ḇesren fa fyarkin sidang-sidang na. Kaku ya, ikofen ḇeko fandun fa ’korower rosai Allah rur ḇyedi ikofen faro jemaat-jemaat!’. (Fasasna Faro Yohanes 2:7) Rur ḇesren na ifnoḇek ko fa kopampum farawrowes ma koḇaryas kuker ḇaḇeḇri. Rur ḇesren ya kako na ifnoḇek ko fa kofrur snemuk ḇepyum. Iso ḇefnai fandun fa koḇensewar kaku fa koso kayam ro fananjur koḇena ma kosma farfnoḇek ro Allah rur ḇesren ḇyedi.

KOFNOḆEK SNONKAKU ḆESE SYA RO FANANJUR YA

8. Rofyor naek srar ḇero sidang smam koisya ro fananjur ya ma srower koḇuk kankarem ma kodisen, rariso ine nafnoḇek si rai? (Mam kako kotak ”Isma Sneprei Rofyor Fananjur Ya Posa”)

⁸ Ro fananjur ya, kona swaf fa kofasna ḇe naek ma srar koḇesi snar koswar si. Ḇebor ro naek ma srar koḇesi ro sidang sifarmku fa sḇar roi ḇesamswen. Manwawan Paulus fyas, ”Mkorama kokarayaye insa kodifyaeko.” (Ibr. 10:24, 25; fasfas kasun ro sop) Kofasna snar kofandun kaku naek srar koḇesi kuker koso kayam ro fananjur ya fa kanunyaeko. Rofyor koraḇe fananjur ya, kofasna snar komarisen koḇekayam kuker si, kofarfyar kuker si ma snaro komarisen kofawi rosai sḇaḇirna. Ko kako kanun ḇesi rofyor srower koḇuk kankarem ma kodisen kuker sne ḇesiper.​—Kol. 3:16.

9, 10. (a) Fasnaḇair rariso Yesus wos ḇyena ḇero syap Yohanes 10:16 nafnoḇek ko fa komam fananjur ya ḇe roi ḇefandun kaku. (b) Rofyor koso kayam ro fananjur ya pdef ido, rariso na kofnoḇek snonkaku oso ro sidang snar kina ḇyedi spampum i?

⁹ Rofyor koraḇe fananjur ya, kofnoḇek sidang ya fa ḇyeoser pdef. (Wasya Yohanes 10:16.) Yesus fyasnaḇair mankundi imnis raris manfarandows oso ma manfamyan ḇyesi simnis raryur ḇaido senai domba oso. Kwarapan roi ine: Rofyor domba risuru suisya ro urek, domba ḇese risuru ro wandow ḇar ya ma oser ya isya ro moḇ ḇese, na kokofen domba ririm ansya sḇe raryur ḇaido senai oser ke? Roba, snaro raryur domba oso fandun fa sḇarek kayam ma sisouser manfarandows ya. Rarirya kako, iḇyekada koḇinkwabur awer naek srar koḇesi kuker koramaḇa ro fananjur ya. Fandun fa koso kayam ro fananjur ya infa ’koḇenai oser’ ma kosouser ”manfarandows oser.”

¹⁰ Fananjur koḇena nafnoḇek ko fa koḇeoser ḇe kina ḇesaswar. (Mz. 133:1) Snonkaku ḇeḇeso ro sidang, kina sesi spampum si imnis raris sinan ḇaido srar ma naek sesi. Ḇape Yesus ḇyeasas na ḇyuk kina ḇesaswar ma ḇefaduru si. (Mrk. 10:29, 30) Waso kayam ro fananjur ya pdef ido, na wamnis raris ḇe kma, awin, srar ḇaido naek oso faro snonkaku oso ḇese ro sidang. Rofyor kokara rarirya ido, komarisen kofrur naborwer fa koso kayam ro fananjur nakam.

NARI KOFRUR YAHWE IMARISEN

11. Rofyor koso kayam ro fananjur ya rariso ine nafnoḇek ko fa koḇuk rosai fandun fa Yahwe Nya na?

¹¹ Ro fananjur ya, koḇuk rosai fandun fa Yahwe Nya na. Snaro Yahwe iso Manḇeḇedaw koḇedi, fandun fa kokofen kasusmasa ḇe I ma kosyom kosandik I. (Wasya Fasasna Faro Yohanes 7:12.) Na kofrur rarirya ro fananjur ya rofyor koḇenadi, kodisen ma kowawos roi nakam kuker I. Inema swaf ḇepyum kaku kosmana ro minggu ḇe minggu fa kosyom ḇe Yahwe I!

12. Rariso sneḇaḇir Yahwe ḇyedi rofyor kosouser parenta ḇyena fa koso kayam ro fananjur ya?

¹² Yahwe ifrur ko, ma fandun fa kosouser I. Iwan ko fa koso kayam ro fananjur ya pdef, ibasyadiwer snaro kofanam kwar ḇe papupes ya. Inja rofyor kosouser parenta ḇyenaine, kofrur Yahwe imarisen. (1 Yoh. 3:22) Myam snar komarisen kaku fa koso fananjur ma ḇyesyowi rosai kofrur na kwar fa koisya ro fananjur ya.​—Ibr. 6:10.

13, 14. Rariso na kofanam ḇe Yahwe ma Yesus su ro fananjur ya?

¹³ Rofyor koso ro fananjur ya, kofasna ḇe Yahwe I snar komarisen kofanam ḇe I ma Rumkun ḇyedi. Ro fananjur ya, kofarkor ro Refo ma Yahwe I rosai fandun fa kofrurna ma rariso kokenem pyum rai. (Yes. 30:20, 21) Syadiwer rofyor snonkaku ḇefarmyan ḇe Yahwe I ḇa srama ro fananjur ya, sḇaḇir snar Yahwe fyarkin ko. (1 Kor. 14:23-25) Yahwe fyarkin fananjur koḇena kuker rur ḇesren ḇyedi, ma rosai kofarkorna kam ndrama ro I. Inja rofyor koso ro fananjur ya, korower rosai Yahwe ikofen na, koḇaḇir ḇaḇa ro saswar Yahwe ḇyedi faro ko, ma kofanam syadi ḇe I.

¹⁴ Yesus, Ḇebukor ro sidang Kristen, ikofen, ”Snar ro moḇsai snonkaku risuru roḇa kyor siryur kuker Snori, ro moḇ ani Aya isya ro fandu si.” (Mat. 18:20) Refoya kako ikofen snar Yesus iso ”ḇembran ro fandu” sidang. (Why. 1:20–2:1) Inja rofyor koso kayam ro fananjur, Yahwe ma Yesus suisya rofandu ko fa susambraḇser ko. Karkara bedi ido, rariso sneḇaḇir Yahwe ḇyedi rofyor myam kofrur nabor kwar fa kofanam ḇe I ma Rumkun ḇyedi?

15. Rofyor koso ro fananjur ya, rariso na kofasna ḇe Yahwe snar komarisen kosouser I?

¹⁵ Rofyor koso ro fananjur ya, kofasna ḇe Yahwe I snar komarisen fa kosouser I. Yahwe idif ko ḇa fa kofrur mnis rosai ikofen na. (Yes. 43:23) Inja kokinfir fa kosouser parenta ḇyena fa korama ro fananjur ya ido, kofasna ḇe Yahwe I snar koswar I ma kokyar kaku snar Nya hak fa ikofen rosai fandun fa kofrurna. (Rm. 6:17) Imnis raris, rosai na kofrur ya rofyor bos koḇedi dor ko fa kofararur nabor wer inja na koso mnis fananjur ya ḇa? Imbude ḇena papoik ro moḇ koḇedi sikofen snar snonkaku ono sisya siso fananjur ido nari sḇak denda ḇaido sismai ro bui, ḇaido sismai samamyai ḇemarḇak kaku. Ḇaido fafisu ono kokinfir fa kofrur roi ḇese buro koso ro fananjur ya. Ro fafisu ḇeradine, fandun fa kun snemuk ro mankun ko rosai nari kofrurna. (Kis 5:29) Ḇape rofyor kokinfir fa kosouser Yahwe I, kofrur fa imarisen.​—Ams. 27:11.

KOSO RO FANANJUR YA PDEF

16, 17. (a) Rariso kofawi snar fananjur ya iso roi ḇefandun kaku faro snonkaku Kristen ro awar randak ya? (b) Rariso sneḇaḇir Naek George Gangas faro fananjur Kristen ya?

¹⁶ Rofyor sifanjur kayam ro ras Pentakosta taun 33 M, snonkaku Kristen sya ssfanjur kayam pdef fa sisyom ḇe Yahwe I. ”Sikam sisouser manwawan ansi farkarkor sena kuker ḇaḇeoser.” (Kis. 2:42) Ma simnai fa siso fananjur ḇa ibasyadiwer rofyor ḇaḇesasoser Roma ma manfarkin agama Yahudi sya sewayam si. Inema roi ḇepyanḇa rariryano, sḇensewar kaku fa siso kayam ro fananjur ya pdef.

¹⁷ Baboine kako, manfamyan Yahwe ḇyesi sesyowi kaku faro fananjur ya ma simarisen fa sisya ro dia. Naek George Gangas, oser ro anggota Badan Pimpinan ḇefararur ro fafisu swaf ri 22 taun, ikofen, ”Faro aya ḇardi, yaso kayam ro fananjur kuker naek srar sya ima marasrisen ḇeba kaku ḇe aya ma nasambraḇser aya. Bisa ido, yamarisen kaku fa yarama ḇepon ma yaḇur ro ḇarpur ya, yamarisen kaku yawos kuker naek srar sya. Rofyor ayaisya kuker si yaḇaḇir yaknon kaku, raris yakainus kuker kina ayesi, ro firdaus rohani”. Ikofenwer, ”Swaruser ma marisen ayena iso yarama ro fananjur ya.”

18. Rariso sneḇaḇir bedi kuker fananjur ya, ma rosai snemuk bedi?

¹⁸ Au kako nwa sneḇaḇir ḇeradine faro ḇaḇesamsyom ḇe Yahwe I ke? Rarirya ido, wafrur pdef rosai riryakam fa wasokayam ro fananjur ya kuker naek srar sya, syadiwer rofyor wasmai fafisu ḇesamswenna. Fasna ḇe Yahwe I snar waḇaḇir kaku raris Raja Daud, ḇekofen, ”Yahwe o, yaswar kaku rum moḇ kwain roiya.”​—Mz. 26:8.