Bewaira Ḇe Dunya Ineḇa

1. Rariso na kosouser Allah ma ḇaḇesasoser ro snonkaku sya?

REFO ya fyarkor ḇeko fa kosouser faro ḇaḇesasoser ro snonkaku sya, ḇape Refoya fyarkor kako snar fandun fa kosouser pdef faro Allah syadi buro snonkaku sya. (Kis. 5:29; Titus 3:1) Roi ine nḇesisyeyae ke? Yesus ḇyuk wos ḇefarkin ḇefnoḇek ko fa kofawi manseiso kaku fandun fa kosouser ya. Yesus ikofen snar fandun fa ”Mkoḇuk faro Kaisar rosai Kaisar dor ro mko, ma mkoḇuk faro Allah rosai Allah dor ro mko.”^[1] (Mam fasfas ḇepupes.) (Mat. 22:21) Koḇak kaḇer ’Faro Kaisar rosai Kaisar dor ro ko’ rofyor kosouser sasoser ro snonkaku ḇepoik sya, koḇesyowi si, ma koḇak som. (Rm. 13:7) Ḇape rofyor ḇepoik ko sya siwan ko fa kofrur rosai Allah imarisen ḇa na, fandun fa kopampum na, ḇape kuker nyan ḇepyum.

2. Rariso kofasna snar kosonemḇa faro polotik ḇero dunya ine?

² Nyan oser fa koḇak kaḇer faro ”Allah rosai Allah dor ro ko” isoine kosonemḇa faro polotik ḇero dunya ine. Kowaira awer faro roi nane. (Yesaya 2:4) Snaro Yahwe ryirwararu ḇaḇesasoser snonkaku sya fa sḇepoik, pok fa kopampum awer si. Ko kako pok fa koso awer ro fararur ḇefasnaḇair fararyaḇ nasionalisme raris kosyom kapkop ḇaido barbar ro er sya. (Rm. 13:1, 2) Pok fa koḇensewar kaku fa kofadwer ḇaḇesasoser ya ḇaido kawyaye ḇeḇarara ro polotik sya, ma kokinfir siḇa ro pemilu ya ḇaido koso ro polotik ya.

3. Rosai ḇefnai fandun fa kowaira awer ḇe dunya ine?

³ Roi ḇeḇeso naisya ḇeḇefnai fa Allah dor ko fa kowaira be dunya ine awer. Oser ya iso snar kosofarari Yesus i, ḇekofen, ”Supswan ine nya ayaḇa.” Pok fa daksoḇa ro polotik ḇaido mamamun ya. (Yoh. 6:15; 17:16) Roi ḇesewer ya iso snar kosonem Allah Karajan ḇyedi. Snaro kosonem ḇaḇesasoser snonkaku ḇa, kona sneuser ḇesren rofyor koḇaryas snar Karajan Allah monda nari ḇepyos roi ḇesamswen nakam ro snonkaku sya. Agama ḇekakuḇa siso ro polotik ya, ine ḇefnai fa kawasa sesya ssḇesisyeyae. Ḇape snar koso ro polotik ya ḇa, inja koḇeoser kuker naek srar ḇero supswan ḇesiper.​—1 Ptr. 2:17.

4. (a) Rariso kofawi snar na nasamswen syadiwer fa kowaira ḇe dunya ineḇa? (b) Rosai ḇefnai fandun fa kofasos mankunko ro kirine fa kowaira awer ḇe dunya ine?

⁴ Imbude koḇarek fanam kuker snonkaku ḇemarisen ḇa ḇemam koso ro polotik ya ḇa. Ḇape snar kofanam kwar ḇe papupes ro sistem Setan ine, nari samswen syadiwer ḇeko fa kowaira ḇe dunya ineḇa. Fafisu ine snonkaku sya ”simarisen sna wos oserḇa” ma ”bukor sena npakrek,” ma seḇesisyeyae syadiwer. (2 Tim. 3:3, 4, NW) Ḇaḇefararwe polotik ro sup sḇarek rona nawyae naek srar ḇeḇeso sya. Iso ḇefnai fandun fa kofasos mankun ko ro kirine fa kowaira ḇe dunya ine awer ro fafisu ḇesamswen. Mkorama komam roi rifyak na ḇefnoḇek ko fa kofasos mankunko.

KOMAM ḆAḆESASOSER SNONKAKU IMNIS YAHWE MAMAM ḆYEDI

5. Rosai Yahwe mamam ḇyedi kuker ḇaḇesasoser snonkaku?

⁵ Nyan oser fa kofasos mankun ko ro kirine fa kowaira ḇe dunya ine awer iso komam ḇaḇesasoser snonkaku imnis Yahwe mamam ḇyedi. Rofyor Yahwe ifrur snonkaku, Ḇyuk hak ḇesi ḇa fa sḇepoik ro mankunsi. (Yeremia 10:23) Myam snonkaku syakam ḇe kina oser. Ḇape ḇaḇesasoser snonkaku sifrur fa snonkaku sya sḇesisyeyae kuker sikofen er sena napyum syadi. Syadiwer rofyor ḇaḇesasoser sena komamna napyum, pok fa sifrur mnaiḇa roi ḇesamswen nakam. Ma si kako sḇembroḇ faro Karajan Allah, ḇeḇepoik ro taun 1914. Kero monda Karajan ani nari kyakok ḇaḇesasoser snonkaku nakam.​—Wasya Mazmur 2:2, 7-9.

6. Rariso na komam snonkaku ḇena papoik ro ḇaḇesasoser ya rai?

⁶ Allah ryirwararu fa ḇaḇesasoser sḇepoik fa sfasos kawasa sya insama skain pyum. Ine nafnoḇek ko fa koḇaryas ankankinem ḇeḇye Karajan Allah kuker payamyum. (Rm. 13:3, 4) Syadiwer Allah iwan ko fa koḇenadi kuker ḇaḇesasoser ya insama kofrur ḇaḇesamsyom koḇena kuker payamyum. (1 Tim. 2:1, 2) Rofyor sifrur mnis koḇa na kor farfnoḇek ḇe snonkaku ḇena papoik sya, imnis raris rosai Paulus ifrurna. (Kis. 25:11) Refoya ikofen snar Setan fyara ḇaḇesasoser snonkaku sya, ḇape Refo ikofenḇadir ḇa snar fyara snonkaku ḇena papoik oser-oser ro ḇaḇesasoser ya. (Luk. 4:5, 6) Inja, pok fa kofrur awer snonkaku ḇese sya skara snar Ibiris fyara ḇebarara oso. Refoya iwan ko ḇa fa kokoryae snonkaku ḇese sya.​—Tit. 3:1, 2.

7. Kakara rosai fandun fa kopampumna?

⁷ Kosouser Allah kuker koḇuk sansonemḇa faro snonkaku ḇena papoik oso ḇaido partai politik nakam, syadiwer rofyor koḇaḇir aw ḇaido karkara sena nun fainda ḇeko. Fafisu oso, koḇaḇir samswen ḇeko fa kowaira ḇe dunya ineḇa. Imnis raris, kowasen kada kawasa ḇeḇembroḇ faro ḇaḇesasoser oso nafrur fa snonkaku ḇebor sekandera, Saksi-Saksi Yahwe sya kako. Kaku ḇae nari wamewer waryur kuker si. Ḇape, na wakara snar ḇeḇembroḇ ansi sifrur roi ḇenapes ma komarisen insama sisma bon ḇepyum ke? (Ef. 2:2) Komarisen fa kosoḇa ro roi ḇeradine ido, fandun fa kokara awer snar ḇar oso iso ḇenapes ḇaido ḇepyum syadi buro ḇese sya. Ine iso ḇeḇeḇair ro rosai kokofen ma kofrurna.

’MKOḆESASOR’ ḆAPE ’MKOḆENAPES’

8. Rofyor samswen ḇeko fa kowaira ḇe dunya ineḇa, rariso na ’kosasor’ ḇape ’konapes’ ya?

⁸ Nyan ḇesuru kofasna kowaira ḇe dunya ineḇa iso ’mkoḇesasor imnis ikak ma mkonapes imnis manjawa’. (Wasya Matius 10:16, 17, NW) ’Kosasor ko’ kuker kokara ḇepon roi ḇesamswen nari kosmana. Ma ’konapes’ kuker kopampum ḇaido kowairaḇa rofyor fafisu ḇesamswen ani. Mkorama kowawos fafisu ḇeḇeso ma nyan rariso kofasna kowaira ḇe dunya ineḇa.

9. Rariso na kosasor ko rofyor kowawos kuker snonkaku ḇese sya?

⁹ Wawawos. Fandun fa kosasor ko rofyor ono sisya sawawos kuker polotik ya. Imnis raris, fafisu koḇaryas kuker Karajan Allah, nari pok fa kokofen snar komarisen kaku ḇaido komarisen ḇa faro karkara ro partai ma manfarkin polotik oso. Pok fa kowawos awer rosai snonkaku sya sifrurna fa sifrur mnai roi ḇesamswen. Ḇape, kofasna ro Refoya snar Karajan Allah iso na ḇefrur mnai roi nakam fa namnis. Rofyor ono sisya simarisen sfamfaḇri kuker topik oso, raris farḇakḇuk snon kuker snon ma bin kuker bin ḇaido aborsi, kofasna ḇesi rosai Refoya ikofen ma rariso koḇensewar fa koso pyum ananun anna. Rofyor snonkaku oso ikofen sasoser ḇeḇeso fandun fa sipyosna ḇaido sifadwerna, pok fa kokofen snar komewer ḇaido kopampum karkara ḇyena, ma kodif awer snonkaku ani fyadwer karkara ḇyena.

10. Rosai fandun fa kofrur ya insama abar komam ro televisi ma korower ro radio nawyaye awer ko fa kowaira ḇe ḇar oser?

¹⁰ Abar ro media. Fafisu oso, korower abar oso sikofen na kuker nyan ḇefasnaḇair smarḇak ḇe ḇar oser monda. Ibasyadi ro sup ḇeba ḇaḇesasoser sena sefara abar sikofenna ro media raris radio ma televisi. Rofyor televisi, radio ḇaido wartawan sya sisonem ḇe ḇar oser ido, fandun fa kosasor ko insama sawyae ko ḇa. Raris wafuken ro mankundaw, ’Yamarisen yarower abar ro wartawan oso snaro yamarisen karkara ḇyedi kuker polotik ya ke?’ Insama wawaira ḇe dunya ineḇa ido, pok fa mam ḇaido wawasya laporan ḇewoswarek ḇe ḇar oser. Swewarpan laporan ḇemarḇak ḇe ḇar oser ḇa. Ma kokara mnis resari rosai korowerna kuker ’fasasna faro farkarkor ḇeḇye’ ḇero Refoya.​—2 Tim. 1:13.

11. Rosai ḇefnai fa samswen ḇeko fa kowaira ḇe dunya ineḇa rofyor kokara pipi ma arasai ḇe roi ḇefandun syadi ya?

¹¹ Saswar faro pipi ma arasai. Rofyor kokara pipi ma arasai koḇena ḇe roi ḇefandun syadi ḇeko ido, na samswen ḇeko fa kowaira ḇe dunya ineḇa. Taun 1970 ramnai, Saksi Yahwe ḇebor ḇero Malawi arasai senakam napromes snaro simewer fa siso ro raryur polotik oso. Ḇape faḇye, Saksi ḇeḇeso simarisen sikenem kuker payamyum. Inḇesrar oser snori Ruth iwasen mura ḇo ikofen, ”Saksi ḇeḇeso ḇeḇeyun ḇe moḇ ḇese kuker inko ḇarpur ya siso ro partai polotik ansi ma skaḇer ḇe rum sena snaro simewer sekandera ro moḇ pengungsi na.” Ḇape ḇar ḇeba ro Yahwe kawasa ḇyesi simnis rariryaḇa. Siwaira ḇe dunya ineḇa, syadiwer rofyor pipi ma arasai sena napromesbur si.​—Ibr. 10:34.

12, 13. (a) Rariso Yahwe mamam ḇyedi kuker snonkaku sya? (b) Rosai na ḇeḇeḇair kararer syadi faro sup koḇedi?

¹² Ararer. Snonkaku sibor simarisen sawawow ma sararer si snaro ras, keret, budaya, mnu ḇeba ḇaido sup srama ya. Ḇape, Yahwe kyaraḇa snar snonkaku oso ḇaido raryur oso ipyum syadibur ḇese sya. Faro Yahwe I, kokam komnis. Kaku ḇae Yahwe ifrur ko oser-oser koḇesebur ro snonkaku ḇese sya. Kosma marasrisen ma komanen faro roi ḇeḇese nane. Imewer komai snaro budaya koḇena. Ḇape, I kako imarisen ḇa fa kokara snar kopyum syadi buro snonkaku ḇese sya.​—Rm. 10:12.

¹³ Kopok fa kararer sup ḇaido er koḇedi ḇefrur fa kokara snar kopyum syadi. Roi anna nari nḇuk samswen ḇeko fa kowaira ḇe dunya ineḇa. Ine roi ḇeḇejadi ro awar randak ya. Naek Ibrani ḇeḇeso sifrur mnis ḇa faro inḇesrar kabom ḇero Yunani sya. (Kis. 6:1) Rosai ḇeḇair snar kofasna kenem ḇemnis radine? Rofyor naek ḇaido srar oso ḇerama ro moḇ ḇese ḇyuk ananun ḇeko, na wapampum ḇeri rosai ikofenna snaro kwara rari ro moḇ bedi ipyum syadi ke? Wafrur rarirya ido, waswarepen kaku anun ḇefandun kaku ine, ”Kuker randun sne mkomam min mkoḇesi sikaki syadi ro mankun mko”.​—Fil. 2:3.

YAHWE NARI IFNOḆEK AU

14. Rariso nadi na ifnoḇek ko rai, ma farfyar rosai ḇero Refo ḇefasnaḇair na?

¹⁴ Nyan ḇekyor fa koḇewaira ḇe dunya ineḇa iso kosnefer ḇe Yahwe I. Ḇenadi wor rur ḇesren Ḇyedi, insa ifnoḇek au fa ḇe kaḇaḇaḇ ma ḇefarmku mankun. Rari risuru ine nari nafnoḇek au ro fafisu ḇaḇesasoser ya ifrur roi oso ḇeankarkar ma ḇenapesḇa. Wor fawawi nanem ro Yahwe I fa waḇaḇir fafisu sairirya kam na nafrur samswen ḇe au fa ḇewaira ḇe dunya ineḇa. Ḇenadi wor farfnoḇek ro Yahwe I fa wafrur roi ḇenapes ro fafisu ani. (Yak. 1:5) Imbude na wasmai ro bui baido wasmai samamyai kuker nyan ḇese snaro wasouser pdef ḇe Yahwe. Rarirya ido, ḇenadi wor ḇaḇeḇri insama wafasnaḇair kaku ḇe snonkaku ḇese sya rosai ḇefnai fa wawaira ḇe dunya ineḇa. Wakyar kaku snar Yahwe nari ifnoḇek au fa wafarmkuepen.​—Wasya Farfyar 4:27-31.

15. Rariso Refoya ifnoḇek ko fa kowaira ḇe dunya ineḇa? (Mam kako kotak ”Allah Wos Ḇyena Nasambraḇser Snemuk Sena”.)

¹⁵ Yahwe ḇyuk Refo ḇeko fa syambraḇser ko. Wawasen mnuk-mnuk ḇero Refo nari ḇefnoḇek au fa wawaira ḇe dunya ineḇa. Wafarkor ma waswarepen mnuk-mnuk anna, snaro nari nafnoḇek au rofyor wana Refoya ḇa. Refoya kako na syambraḇser kakyar ḇena faro saneraro ḇepyum Allah ḇyeasas ro fafisu naiwama. Kofandun saneraro ine fa koḇar ḇaḇewayam kuker kaḇaḇaḇ. (Rm. 8:25) Kwinfir mnuk-mnuk ḇefasnaḇair rosai rirya monda wamarisen kaku fa wasma ro dunya babo ya, ma wawasen ausya ro diwa.

KOFARKOR RO MANFAMYAN ḆESOUSER YAHWE ḆYESYA

16, 17. Rosai na kofarkor ro farari ḇepyum ro Allah manfamyan ḇesouser ḇyesi ḇewaira ḇe dunya ineḇa? (Mam sonin ro randak artikel.)

¹⁶ Nyan ḇefyak ḇefnoḇek ko fa koḇewaira ḇe dunya ineḇa iso kowasen mura ro farari ro manfamyan ḇesouser Yahwe ḇyesi. Ro awar Refoya, manfamyan ḇebor Allah ḇyesi sḇebri ma sun snemuk ḇepyum insama nafnoḇek si fa siwaira ḇe dunya ineḇa. Kwarapan farari ro Sadrak, Mesak ma Abednego, rofyor spampum fa sisyom ḇe amfyainir ḇeḇekapkop faro ḇaḇesasoser Babilon ya. (Wasya Daniel 3:16-18.) Farfyar ḇero Refo ine nafnoḇek Saksi ḇebor ro kirine fa seḇebri fa spampum samsyom ḇe barbar ḇekapkop faro er moḇ sḇarek ya. Yesus isoḇa ro polotik ḇaido roi ḇesamswen ḇefrur snonkaku sya sḇesisyeyae. Ifawi snar farari ḇyena nari nafnoḇek manfamyan ḇyesi. Ikofen, ”Mkosambraḇser mkosnemna, snar yakafyo supswan ine kwar”.​—Yoh. 16:33.

¹⁷ Saksi ḇebor ro fafisu koḇedine sfasna sisouser faro Yahwe I ma siwaira ḇe dunya ineḇa. Ḇeḇeso ro si sewayam si, sismai ro bui ma ono sisya smunsi snaro sisoasuser pdef ḇe Yahwe I. Farari sena na nafnoḇek ko fa koḇebri. Naek oso ḇerakero Turki ikofen, ”Naek romawa babo oso ḇenir ḇe Franz Reiter ismai samamyai marmar snaro imewer iso ro Hitler sordade ḇyesi. Fyas syapram ḇe snari ro roḇ rofyor imar ḇaim, fyasna kakakyar ḇyedi ma kakyar ḇesambraḇ kaku ḇe Yahwe I. Yamarisen yaso mnis farari ḇyedi rofyor yasma fafisu ḇeradine”.^[2]—Mam fasfas ḇepupes.

18, 19. (a) Rariso naek srar ḇero sidang sifnoḇek au fa wawaira ḇe dunya ineḇa? (b) Rosai snemuk bedi?

¹⁸ Naek ma srar ro sidang bedi na sifnoḇek au fa wawaira ḇe dunya ineḇa. Wor farfnoḇek ro penatua sya rofyor wasma fafisu ḇesamswen. Na sḇuk ananun ḇepyum ḇero Refo ya. Osower ido, rofyor naek srar sifawi fafisu ḇesamswen wasmana, na sisambraḇser au. Wor ḇesi fa senadi ḇe au. Ḇape ko kako, fandun fa kosonem naek srar sya ma koḇenadi ḇesi. (Mat. 7:12) Infa wafawi snonsnon ro naek srar ḇesmai ro bui sya, wawasya artikel ”Saksi-Saksi Yehuwa yang Dipenjarakan Karena Iman Mereka—Menurut Lokasi” ro jw.org, ḇero ḇar RUANG BERITA > BERITA HUKUM. Kwinfir snonsnon ḇeḇeso, ma wor ḇe Yahwe fa ifnoḇek si fa sḇebri ma sisoasuser pdef ḇe Yahwe I.​—Ef. 6:19, 20.

¹⁹ Snar kofanam kwar ḇe papupes dunya ine, ḇaḇesasoser ro snonkaku na sifrowes ma sedif ko fa kowaira ḇe ḇar oser. Inja, fandun fa kofasos mankun ko ro kirine insama kowaira ḇe dunya ḇeḇesisyeyae ineḇa!