Rari Ḇepyum Kaku Ḇeḇemaeja Syadi ro Berlian

Haykanush, inḇesrar ḇemanḇaryas ḇebaptis ḇaim ro Armenia, isrow paspor oso ro moḇ ḇefanam kuker rum ḇyedi. Ro paspor ya dori, kartu debit ḇeḇeso ma pipi nabor naisya. Ikofenḇadir roi ine ḇe swari, i kako manḇaryas ḇebaptis ḇaim.

Inḇeswa suine susmai roi ḇesamswen kuker kumpanya ma suna nyaki. Ḇape, suyun snemuk fa suḇuk kaḇer pipi ansi. Ḇena paspor ma kina ḇyesi sikandor kaku. Haykanush ma swari sukofenḇair snar sufrur roi ḇenapes snaro susouser rosai sufarkor kwar ro Refo ya. Ramnai, suḇuk swaf ani fa sukofenḇair kuker Saksi-Saksi Yahwe ma suḇuk syap ḇeḇeso ḇe kina ani.

Kina ani skokofen kasumasa kuker sḇuk pipi faro Haykanush i. Ḇape, pyampum na. Meser ya, ḇena paspor ya swari ryama ḇe Haykanush ma swari. Idif Haykanush i fa dun cincin berlian ḇyukna ḇe hadiah.

Imnis kina ani, snonkaku ḇebor sya kako sskandor snar snonkaku ḇefrur roi ḇenapes sisya kaker, imnis Haykanush ma swari. Ḇape, na Yahwe I kako kyandor ke? Rariso Allah mamam ḇyedi kuker roi ḇenapes sufrur na? Snaro sufrur roi ḇenapes na susma fainda ke?

RARI-RARI ḆEMAEJA SYADI RO ḆAḆEARASAI NA

Fakfuken nane nasamswenḇa fa sisma kankarem ya. Rosai ḇefnai ya? Snaro Allah manfamyan ḇyesi sifawi snar Allah imarisen insama sfarari rari Ḇyena. Faro I, inema roi ḇemaeja syadi ro berlian, brawen, ḇaido roi ebor ḇesena. Inja nasnaibos kaku snar rosai Yahwe myam ḇe roi ḇemaeja iḇesebur kuker mamam snonkaku sya. (Yes. 55:8, 9) Ma, Yahwe manfamyan ḇyesi smam ḇaḇesasewar fa sfarari Yahwe rari ḇyena ima roi ḇemaeja ḇaido ḇefandun kaku rirya.

Amsal 3:13-15 ikofen, ”Aski faro snonkaku ḇena fawawi nanem ma snonkaku ḇesma mamam ḇe ḇarpon, snaro sna i ḇe roi nana ipyum syadi buro sna perak ḇe nana ma sna i ḇe ḇaḇyak ipyum syadi ro ḇrawen. Ḇyemaeja syadi ro koral, ma marasrisen bena ḇesenakam namnis kuker i ḇa.” Ro Yahwe mamam ḇyedi, daya pengamatan ma fawawi nanem myam na ḇe roi ḇemaeja kaku syadi buro arasai ya.

Inja, rariso kuker roi ḇenapes kofrur na?

Yahwe mankundi inapes. Ima ”ipok isrer ḇa”. (Tit. 1:2) Fyarkin manwawan Paulus fa fyas faro snonkaku Kristen Ibrani ro abad randak, ”Mkonadiwarek ḇesya kwar faro nko; snar nkokyar nkosnesna nasren, snar nkomarisen nkofrur roi ḇenapes ḇesya kwar.”​—Ibr. 13:18.

Yesus Kristus ḇyuk farari ḇepyum snaro ifrur roi ḇenapes. Imnis raris, rofyor Imam Ḇeba Kayafas ikofen, ”Kuker snonsnon Allah ḇekenem, wakofen faro nko, Auryake Wairek, Rumkun Allah iso Auke roḇa.” Yesus ikofen kuker kakaku snar ima Mesias dirya. Ifawi rosai nari ismana rariryano, ikofen roi ḇenapes. Sanhedrin na skursofi snar donef Allah ma na ismai samamyai marmar ya.​—Mat. 26:63-67.

Rariso kuker ko rai? Imnis raris, swaf ya isya fa kosma nana nabor ḇape fandun fa kofrowes snonkaku sya ḇaido kofadwer roi ḇekaku ḇeḇeso. Na kofrur roi ḇenapes ya pdef ke?

ROI ḆEDWAREK KO FA KOFRUR ROI ḆENAPES

Ro ras-ras ḇepupes, snonkaku ḇebor sya nari ”siswar mankunsi ḇardi ma sewomen faro pipi”. Inja, sifrur roi ḇenapes ima roi ḇesamswen kaku. (2 Tim. 3:2) Rofyor sisma roi ḇesamswen kuker pipi ḇaido samswen fa sisma fararur ḇa, snonkaku ḇebor sya skara snar bisa fa skarawraw, sankarkar, ḇaido sifrur roi ḇenapes ḇa. Snonkaku sya sna karkara ḇeradine. Skara ḇo sobe nari sisma nana nabor rofyor sifrur roi ḇenapes ḇa. Iba syadiwer snonkaku Kristen ḇeḇeso sifrur snemuk ḇepyum ḇa. Ma snaro simarisen sisma nana nabor kuker sifrur roi ḇenapes ḇa, inja sna snonsnon ḇepyum werḇa ro sidang.​—1 Tim. 3:8; Tit. 1:7.

Ḇape, snonkaku Kristen ḇebor sya sfarari Yesus i. Sḇaḇir snar sna rari-rari ḇepyum Yahwe imarisenna ima roi ḇefandun kaku ro ḇaḇearasai ḇaido roi ḇesena kam. Iso ḇefnai fa romawa babo Kristen sya simewer senyontek fa sna nilai ḇepyum. (Ams. 20:23) Na kosma ḇaḇyakḇa snaro kofrur roi ḇenapes, imnis Haykanush ismana. Ḇape, Yahwe imarisen insama kofrur roi ḇenapes ḇesya kwar. Rarirya ido, sneuser koḇena na nasren ma nane roi ḇemaeja kaku.

Ine komam ro Gagik fawar ḇyedi. Ikofen, ”Yaḇe Saksi ḇaime, yafararur ro perusahaan ḇeba. Ḇena ya imewer ḇyak som kuker ikofenḇair monda nana kermkun ro perusahaan ya. Snaro yaḇe direktur, fandun fa ’yafararur kayam’ kuker ḇeyor som sya kuk’r yaḇak si. Inja, smambir aya ḇe snonkaku ḇefrur roi ḇenapes ḇa. Yafarkor Refo ramnai, sḇak aya kuker ḇaḇyak ḇeba kaku rariryano, yamewer yafrur rarirya wer. Ḇarpurya, yafrur perusahaan ro mankundaya. Yafas ḇeri perusahaan ayedi ma yaḇak som nakam.”​—2 Kor. 8:21.

Gagik ikofen, ”Pipi yasmana kermkun monda inja samswen fa yafasos fandandun ro kina ayesi. Ḇape, kirine yamarisen syadi wer. Yana sneuser ḇesren. Yaḇuk farari ḇepyum faro romawa yesuya. Aya kako yasma fakamaman ro sidang. Kirine, ḇeyor som sya ma min fararur ayesi smambir aya ḇe snonkaku ḇefrur roi ḇenapes.”

YAHWE IFNOḆEK KO

Yahwe iswar snonkaku ḇesandik I kuker sifarari rari-rari Ḇyena, oser ya iso napnapes. (Tit. 2:10) Kosewar kaku fa kofrur roi ḇenapes ido, ḇyeasas nari ifnoḇek ko. Yahwe fyarkin Raja Daud i fa ikofen, ”Fyor iwara yaḇe snonkbor, kirine yaḇe mansar kwar, imbape yamam snonkaku ḇenapes sya srir si ḇaḇeri, ḇaido kpu ḇyesya sfararyor mamami.”​—Mz. 37:25.

Rut farfyar ḇyedi nefasna kaku roi ine. Ḇyarek pdef kuker Naomi, inbanyo ḇesinan kwar, ma imewer iburi. Rut rya fa ḇyarek ro Israel ma ro diwa na isyom Allah ḇenapes ya. (Rut 1:16, 17) Inapes ma fyararur marḇak fa iryur afuf ker-kerna, imnis kuker Allah sasoser ḇyedi fyasos kwar faro snonkaku ḇesaḇarar sya. Imnis raris rosai Daud ismana ro ras ḇerama ya, Yahwe pok fa ryir Rut ma Naomi su ḇaḇeri. (Rut 2:2-18) Fyasos fandandun suḇena ro ras ḇe ras monda ḇa, ḇape kyinfir rut i ḇe up ro Raja Daud i ma Mesias i kako!​—Rut 4:13-17; Mat. 1:5, 16.

Ḇeḇeso ro manfamyan Yahwe ḇyesi sismai roi ḇesamswen fa sfamfom fandandun rasras sena. Ḇape, sisewar nyan ḇepyan ḇa kuker nyan ḇenapesḇa. Sfararur marḇak ma simyaren. Inja rarirya, smam snar Allah rari-rari ḇyena, raris napnapes, ima ḇyemaeja syadi ro nana arasai nakam.​—Ams. 12:24; Ef. 4:28.

Raris Rut i, snonkaku Kristen ro supswan ḇesiper sikyar snar Yahwe nari ifnoḇek si. Sikyar kaku faro Mankun ḇeasas, ”Nari yarir aw ḇa ma nari yabur aw ḇa.” (Ibr. 13:5) Yahwe fyasna ker snar syambraḇ ma imarisen ifnoḇek snonkaku ḇenapes sya. Ifrur kaku asas ḇyena fa fyasos fandandun rasras na ro manfamyan ḇyesi.​—Mat. 6:33.

Snonkaku sya smam ḇerlian ma arasai sena nefandun kaku. Ḇape, na kokyar snar Kma koḇedi ro nanki myam napnapes ma rari-rari ḇepyum ḇesena nḇemaeja syadi ro permata nakame!