Farḇakḇuk Kristen Ḇesma Payamyum

1. Randak ya farḇakḇuk nafo kuker marasrisen, ḇape rosai nari ḇefarḇuk sya sismana? (Mam sonin ro randak artikel ine.)

ROFYOR snon ḇefakawin oso myam bin fakawin ḇyedi idoser kaku ro ras fakawin ya, raryaḇ suḇena rya namnai ḇa. Rofyor sufrur kabrai saswar kaker, saswar suḇena nasur pdef inja sumarisen fa sufarḇuk ma suḇeasas fa suḇeoser pdef. Ro ras fakawin suḇena ramnai, suḇerandak ras ro kayamyam suḇena, fandun fa sufrur fararwe ḇebor insama suḇeoser pdef. Yahwe, manḇeḇedaw farḇakḇuk ya, imarisen inbeswa sya sisma aski ma payamyum ro farḇakḇuk sena, inja ḇyuk ananun ḇepyum ro Wos ḇyena, Refoya. (Ams. 18:22) Rarirya ido, Refo ikofen snar farḇakḇuk ro snonkaku ḇemnis ḇa sya na sismai roi ḇesamswen, ḇaido ”sisrow kandera nabor.” (1 Kor. 7:28) Rariso inbeswa suḇensewar fa sufrur mnis roi ḇesamswen na? Ma rariso snonkaku Kristen sna farḇakḇuk ḇepyum ya rai?

2. Iḇye kada saswar ḇemnis rariso fandun fa snonkaku ḇefarḇuk sya sfasna na?

² Refoya fyarkor snar saswar ima rari ḇefandun kaku. Ḇape saswar ḇese ono naisya fandun fa inbeswa sya sifasnai na ro farḇakḇuk ya. Imnis raris, fandun fa sufasnai saswar ḇemyaren, iso saswar ḇefanam kaku rofandu su monda. Ma suna romawa ido, sufasnai saswar ro kina ima roi ḇefandun syadiwer. Ḇape saswar ḇeḇeknam ro farkankin ḇero Refoya iso, ḇefrur fa farḇakḇuk ya ismai payamyum. Manwawan Paulus fyasnaḇair saswar ḇemnis radine rofyor ikofen, ”Snon mko oser-oser: iswar swari imnis iswar mankundi ma bin oser-oser iḇye kada ḇyesyowi swa ḇyedi.”​—Ef. 5:33.

KOFAWI NABORWER KUKER FAKAMAMAR RO SNONKAKU ḆEFARḆUK SYA

3. Rosai ḇefnai fa saswar ḇesambraḇ ya nefandun kaku ro farḇakḇuk ya?

³ Paulus fyas, ”Ne, snon, waswar swambri imnis Kristus iswar jemaat kwar ma ḇyuk mankundi faḇyesom warek jemaat ani.” (Ef. 5:25) Snonkaku Kristen ro baboine sfarari Yesus i kuker siswaryaye si imnis raris Yesus iswar manfamyan ḇyesi. (Wasya Yohanes 13:34, 35; 15:12, 13.) Kaku ya inbeswa Kristen suswaryaye su inja sumarisen fa sumarwarek su. Ḇape rofyor roi ḇesamswen kaku naisya ro farḇakḇuk ya, imbude ḇeḇeso sya sḇaḇir sna saswar ḇesambraḇ werḇa. Rosai na ḇefnoḇek si? Saswar ḇeknam ro Refo, iso ”fyarmku roḇarpon ro roi ḇeḇor nakam ma imarisen ikyar roi ḇeḇye ro snonkaku oser-oser, rofafisu ḇerariso wer kako saswar ani kakyar ḇyedi ryobur iḇa ma ikḇaḇ iwaf roi ḇeborkam”. Saswar ḇemnis radine ”nari myarmarḇa”. (1 Kor. 13:7, 8) Inbeswa fandun fa suswarepen snar suḇeasas kwar fa suswaryayesu ma suḇekayamyam pdef. Suswarepen na ido nari nadif su fa susewar farfnoḇek ro Yahwe ma sufararur kayam fa sufrur mnis roi ḇesamswen susmaina.

4, 5. (a) Faro snonswa oso, fakamamar rosai isma ḇe ḇebukor ro kina yadori? (b) Iḇye kada rariso binswa myam ḇebukor ro kina ya rai? (c) Fararwe rosai fandun fa inbeswa oso sufrurna?

⁴ Paulus fyasnaḇair fakamamar ro inbeswa sya rofyor ikofen, ”Ne, bin, kwunem faro swambri imnis kwunem faro Manseren, snar swambri ḇyebru faro aw imnis raris Kristus ḇyebru ro jemaat.” (Ef. 5:22, 23) Ine kyurfasna ḇa snar snonswa oso ipyum syadi ro swari. Yahwe ikofen kuker fararur ḇesyowi ro binswa oso rofyor ikofen, ”Ipyumḇa fa snonkaku ya demir monda pdef. Nari yafrur snonkaku oso fa ifnoḇek i.” (Kej. 2:18) Binswa oso fandun fa ifnoḇek swari fa ḇyebukor kuker payamyum ro kina. Ma snonswa oso fandun fa fyarari nyan ḇesaswar ro Yesus i, isoine ”ḇyebru ro jemaat.” Rofyor snonswa oso ifrur radine ido, nari swari sne ḇyedi iknon ma nari napyan ḇe i fa ḇyesyowi ma fyararur kayam kuker i.

⁵ Cathy, fyarḇuk kuker Fred, doḇe, ”Rofyor yafarḇuk ḇaim, yamkei fa yamam monda mankundaya. Farḇakḇuk ya nafrur fa yafadwer kenem ayedi imnis ra yafarkor fa yakyar faro swa yedi. Inema napyan ḇa, ḇape nuḇensewar fa nufanamyae syadi ḇe inbeswa kuker nufrur roi nakam imnis Yahwe marisen ḇyena.”^[1] (Mam fasfas ḇepupes.) Fred doḇe, ”Yafrur snemuk inema roi ḇepyan risyaḇa. Ro farḇakḇuk ya, snonkaku risuru imbe suna wos oser inema roi ḇesamswen kaku. Ḇape kuker nuḇenadi nuyor farkankin ro Yahwe I ma yarower mnis kaku rosai swa yedi ikofen na, nane napyan syadi ḇe nu ro ras ḇe ras. Nuḇaḇir snar numa nuḇe tim oser!”

6. Rariso saswar ya ”ḇekaḇrai ḇefesepen ḇaḇeoser ma ḇaḇemanasnisya” rofyor roi ḇesamswen naisya ro farḇakḇuk ya?

⁶ Fasfes ro farḇakḇuk ya na nsambraḇ kaku rofyor inbeswa ’sukḇaḇyae su ma suḇuk ampunyae’. Snaro suma snonkaku ḇemnis ḇa kaker, nari sufrur sasar. Rofyor roi nane ḇeḇejadi ido, na sufarkor ro sasar rosai sufrurna, sufarkor fa suḇuk ampunyaye, ma sufasna saswar ḇeknam ro Refoya. Ine iso saswar ”ḇekaḇrai ḇefesepen ḇaḇeoser ma ḇaḇemanasnisya.” (Kol. 3:13, 14) Inbeswa na sufasna saswar ine kuker sukaḇaḇaḇ ma suḇenaḇye ma supok ’sukram masasorḇa’. (1 Kor. 13:4, 5) Rofyor suna wos oser ḇa ido, inbeswa suine fandun fa sufrur mnis fasaw na, rofyor ras ya ḇyenande ḇaim. (Ef. 4:26, 27) Sufandun sne ḇerun ma sukofen kaku ”Yor mafe snaro yafrur snembri iduf kwar”, sufrur rarirya ido na nafnoḇek su fa sufrur mnis roi ḇesamswen suḇena ma sufanam syadi wer.

FAFISU ḆEFANDUN FA SUFASNA MAYARYAR

7, 8. (a) Ananun rosai Refo ḇyukna kuker anenef fasfus ro farḇakḇuk ya? (b) Rosai ḇefnai fandun fa inbeswa sufasna mayaryar ya?

⁷ Refoya ḇyuk ananun ḇepyum insa nafnoḇek inbeswa fa suna mamam ḇemnis kuker seks ro farḇakḇuk ya. (Wasya 1 Korintus 7:3-5.) Fandun kaku faro snon ma binswa fa sukara mnis sneḇaḇir ma fandandun suḇena oser-oser. Rofyor snonswa ḇyemayaryar swari ḇa ido, nari samswen fa bin ya isma marisen ro anenef fasfus ya. Snonswa ya fandun fa ’ikenem kuker fawawi’ faro swari. (1 Ptr. 3:7) Fararur anenef fasfus nama neknam ro dafdif ḇa mboi ndrama ro sne ḇemarisen rofandu inbeswa ansuya. Snon ya na kyara samamberen ro bin ya. Ḇape ipyum syadi ya iso inbeswa suine suwaf fafisu ḇemnis.

⁸ Refo fyasnabos kaku ḇa nyan oser-oser fa inbeswa sufasna saswar suḇena rai. Ḇape Refo dapḇair nyan fasasna sawarwar ya. (Kid. 1:2; 2:6) Inbeswa Kristen fandun fa sufrur pyumyae su kuker mayaryar.

9. Rosai ḇefnai fa snonkaku ḇefarḇuk kwar mboi fyasna imarisen syadi wer faro snonkaku ḇese ima roi ḇesasar rirya?

⁹ Koswar kaku Yahwe I ma snonkaku ḇesesya ido, nari korir snonkaku oso ḇaido roi oso dawyaye farḇakḇuk koḇena ḇa. Snonkaku ḇeḇeso sifrur samswen ḇaido skakok farḇakḇuk sena kuker smam ker pornografi ḇaido sonin ḇeḇyeḇa. Fandun fa kopampum marasrisen faro pornografi ḇaido fararur farḇuk rmomen nafsu ḇeḇyeḇa. Iba syadiwer fandun fa kopampum rosai riryakam ḇefrur fa komarisen syadi faro snonkaku ḇese ḇe snonswa ḇaido binswa koḇedi ḇa snaro ima kona saswar ḇa. Koswarepen kaku snar Allah fyawi kaku rosai kokarana ma kofrurna. Ine na nafnoḇek ko fa komarisen kaku kofrur sne Ḇyedi imarisen ma kokain pdef kuker swa koḇedi.​—Wasya Matius 5:27, 28; Ibrani 4:13.

ROFYOR ROI ḆESAMSWEN NAISYA RO FARḆAKḆUK YA

10, 11. (a) Rosai ḇefasnaḇair snar ro fasfes farḇakḇuk ḇebor speremuk na? (b) Rosai Refo ikofenna kuker ḇaḇesisye ya? (c) Rosai na ḇefnoḇek inbeswa insama suḇesisye fasawsaw ḇa?

¹⁰ Rofyor sismai roi ḇesamswen kaku, inbeswa ḇeḇeso sya sifrur snemuk fa sḇesisye ḇaido sifrur fasfesepen farḇakḇuk sena namuk. Ro sup ḇeba ḇeḇeso, snonkaku ḇebor befarḇuk kwar sya speremuk farḇakḇuk sena. Kaku ḇeri, inema kenem ro snonkaku ḇero sidang Kristen risyaḇa. Imbape, inbeswa Kristen sibor kaku sna roi ḇesamswen ro farḇakḇuk sena kako.

¹¹ Refoya ḇyuk wos farkankin ine, ”Bin ḇefakawin kwar oso ibur awer swari. Ḇape rofyor ḇyeḇefaspar kwar, ipok ḇyeswa werḇa faswef, roḇa kyaḇer faro swari. Ma snon ḇefakawin oso ipok fyaspar awer swari.” (1 Kor. 7:10, 11) Befakawin kwar ḇeḇeso sya sḇaḇir roi ḇesamswen sismana nmarḇak kaku inja skara fandun fa sḇesisye. Imbape, Yesus fyasna snar ḇaḇesisye inema roi ḇepyan ḇa rofyor dap kaḇer rosai Allah ikofen ro randak kuker farḇakḇuk ya ma ikofen wer, ”Rosai Allah ḇyefa ḇeḇeoser kwar, snonkaku sipok sfaspar i ḇa.” (Mat. 19:3-6; Kej. 2:24) Inja Yahwe imarisen insama snonswa ma binswa suḇekayamyam pdef. (1 Kor. 7:39) Fandun fa koswarepen snar na kokarem ḇe Yahwe rosai kofrurna. Ine na nafnoḇek ko fa kofrur mnis fasaw roi ḇesamswen na insama nesamswen syadi awer.

12. Rosai na ḇefnai fa inbeswa suna kakara fa suḇesisye?

¹² Rosai ḇefnai fa inbeswa ḇeḇeso sna roi ḇesamswen kaku? Faro ḇeḇeso sya, farḇakḇuk sena imnis kuker rosai simarisen ro randakya ḇa inja sifafko ḇaido sifafayaf. Fyorno ido, roi ḇesamswen naisya snar moḇ siḇa rona ḇaido nyan sifasnai sneḇaḇir sena neḇesisye. Sna wos oser ḇa kuker manbanyo ḇaido inbanyo sesya ḇaido nyan fa sḇuk kumpan sena ḇaido nyan fa sfaduru romawa sesya, nane kako na nun samswen. Imbape, komarisen kaku komam inbeswa Kristen ḇebor sna nyan ḇesae ro roi ḇesamswen sismaina snaro sisouser Allah farkankin ḇyena.

13. Roi ḇeḇeknam kaku rosai na ḇefrur fa inbeswa suḇesisye?

¹³ Roi ḇeḇeknam kaku naisya ḇefrur fa inbeswa suḇesisye. Fafisu ḇesamswen kaku raris snonswa imewer fyamfon fandandun ro kina ḇa, ḇyewayam swari kuker rarmomen, ma idwarek kaku swari ro ḇaḇesamsyom Kristen ḇyedi, iso ḇeḇefnai fa ḇefakawin ḇeḇeso sya skinfir fa sḇesisye. Rofyor roi ḇesamswen kaku naisya, fandun fa inbeswa suyor farfnoḇek ro penatua sya. Naek sine sna fawawi nabor kwar ma na sifnoḇek inbeswa fa susouser Allah ananun ḇyena ro kankenem suḇena. Rofyor inbeswa suḇenadi fa suyor Yahwe rur ḇesren ḇyedi ido, ine na nafnoḇek su fa suso mnis wos ḇefarkin ro Refo ma sufasnai rari-rari ro snonkaku Kristen. (Gal. 5:22, 23)^[2]—Mam fasfas ḇepupes.

14. Rosai Refo ikofen faro snonkaku Kristen ḇefarḇuk kwar mboi swari daksyom Yahwe I ḇa?

¹⁴ Refo fyasnai snar ipyum kaku ḇe inbeswa fa suḇekayamyam pdef iba syadi rofyor oser ya isyom ḇe Yahwe I ḇa. (Wasya 1 Korintus 7:12-14.) Swa ḇekyar ḇa ani nari ’ḇyeḇefasren’ snaro fyakawin kuker Allah manfamyan ḇyedi. Nari romawa ro inbeswa suya kako sisren ma sisya ro ḇaḇ fadadiren Allah ḇyedi. Paulus danun ḇe min Kristen ḇyesi, ”Snar imbesrar wamnis bin ḇekyar kwar faro Manseren rariso imbesrar wafawi kaku mboi nari wapok buk aski faro swambri? Rarirya kako naik ḇeḇe swa Kristen rariso naek wafawi kaku mboi nari wapok buk aski faro swambri?” (1 Kor. 7:16) Farari ḇepyum nabor nasya ro snonswa ma binswa Kristen ḇefnoḇek kwar swa sesya fa sakḇe manfamyan ḇe Yahwe I.

15, 16. (a) Refo ḇyuk ananun rosai faro binswa Kristen ḇena snonswa ḇefarmyan ḇe Yahwe I ḇa sya? (b) Rosai na snonkaku Kristen oso ifrur ya rofyor swari ḇekyarḇa kyinfir fa ḇyesisye?

¹⁵ Manwawan Petrus danun ḇe binswa Kristen sya fa sikunem faro swa sesya, ’insa ono ro si seuser Allah wos ḇyedi ḇa, sikofen roi oso faro si awer mboi rari sena nafrur fa sikyar kako, rofyor smam, kankenem ḇekaku ma ḇesren ro swa sesi.’ Ipyum syadi binswa oso dawosker awer kakyar ḇyeja, mboi ifnoḇek swari fa dakfarkor napnapes kuker fyasnai ”rur ḇefafir ma ḇeknon, ḇeḇemaeja kaku ro Allah mamam ḇyedi.”​—1 Ptr. 3:1-4.

¹⁶ Mboi rariso rofyor swa ḇekyar ḇa kyinfir fa ḇyesisye ḇaido fyaspar swari? Refoya doḇe, ”Rofyor snonkaku ḇekyarḇa ani imarisen fyaspar swari ḇeḇe Kristen kwar, mkodwarek aweri. Rarirya ido naek roḇa srar ani imoḇes, snar Allah imarisen insa mkokenem kuker aski.” (1 Kor. 7:15) Imbude ḇaḇesisye na nun sneprei kermkun faro i, mboi ro mamam Refoya swa Kristen oso na ipok fa fyarḇuk werḇa. Mboi na fandun ḇa fa idif swari insa ḇyarek kuker i ker. Na ro fafisuya, swa ḇekyarḇa ani dun snemuk fa kyaḇer wer, fa ifrur mnis kaḇer farḇakḇuk suḇena. Ma ro fafisu iyama insape, swa ḇekyarḇa ani dakfarmyan ḇe Yahwe I.

ROI ḆEFANDUN KAKU ROSAI ḆERO FARḆAKḆUK KOḆENA?

17. Rosai ḇe roi ḇefandun kaku faro inbeswa Kristen sya?

¹⁷ Snaro kokenem ro ḇar papupes ro ”ras ḇepupesna”, na kosmai ”kandera nabor.” (2 Tim. 3:1-5) Iso ḇefnai fa kofandun fadadiren kuker kona fasfesepen ḇesambraḇ kaku kuker Yahwe I. Paulus fyas, ”Kosma fafisu ḇeḇor werḇa. Randak ro baboine, snonkaku oso ḇefakawin kwar ikenem imnis fyakawin ḇaim, . . . ma snonkaku sne ḇero roi ḇero supswan ine, iḇye ikenem raris ḇyefandun naḇa.” (1 Kor. 7:29-31) Paulus kyurfasna ḇa snar ḇefarḇuk kwar sya sfandun ḇa faro swa sesi. Mboi snar kokenem ro ras ḇepupes inja, fandun ḇeko fa komam ḇaḇesamsyom koḇena ḇe Yahwe I ḇe roi ḇefandun kaku.​—Mat. 6:33.

18. Rosai ḇefnai fa snonkaku Kristen koine kokyar nari kosma aski ma payamyum ro farḇakḇuk koḇena?

¹⁸ Ro fafisu ḇesamswen ine, komam ḇefarḇuk sya sisma payamyum ro farḇakḇuk sena ḇa. Na bisa kona aski ma payamyum ro farḇakḇuk ya ke? Imbo, rofyor kofanam pdef ḇe Yahwe I ma kawasa ḇyesi, koso mnis wos farkankin ro Refo, ma komarisen Yahwe rur ḇesren ḇyedi fyarkin ko. Kofrur rarirya ido, koḇesyowi ”rosai Allah fyesepen kwar.”​—Mrk. 10:9.