Yamnis Roi Ḇebor faro Snonkaku Syakam

ROI ine ḇeḇejadi ḇaim, yamarisen faro napnapes ya kwar. Awin ismai publikasi Refoya kwar, ma yamarisen publikasi anna. Yamarisen kaku sonin ḇyena. Kamam imewer awini fyawar ḇe aya kuker rosai fyarkor kwarna. Ḇape, yamarisen fa yafawi ma yafuken, inja awin fyarkor aya rofyor kamam isya ro rum ḇa. Bon ya iso, aya kako yamarisen yaḇuk kankenem yedi fa yafarmyan ḇe Yahwe I. Yaḇebaptis ro Blackpool, Inggris, ro 1943 fyor yaḇeumur taun samfur kaker.

RANDAK YAFARMYAN ḆE YAHWE I

Ro fafisu ya, aya ma awin nubaryas kayam ker. Fafisuya, nubuk fonograf fa nubaryas. Fonograf ani iba ma myarbak, marbak ḇyeja fyanam ḇe kilogram peser difyak. Mkokarapan, yaḇaḇa kaker, ḇape yasewar fa yun fonograf ani!

Rofyor yaḇeumur taun ri 14, yamarisen yaḇe perintis. Awin doḇe yawos resari faro manfamyan faro naek srar sya (kirine sap siḇe pengawas keliling). Naek ani ikofen ḇe aya fa yafarkor ḇaḇekir oso fa nafnoḇek aya ro fararur perintis ya. Inja yafrurna beri. Yafararur taun risuru ramnai, yafuken ḇe pengawas wilayah ḇesesya kuker fararur perintis. Ma doḇe, ”Wafrurna mura!”

Inja, ro paik April 1949, aya ma awin nuyun roi ebor nuḇena ma nuraḇe Middleton, fanam ḇe Manchester fa nubarek rodiwa, nuḇemerintis wer. Paik rifyak ramnai, yor naek oso fa nuḇemerintis kayam. Kantor cabang dor nu fa nuraḇe sidang ḇebabo ro Irlam. Awin yedi ḇyeperintis kuker srar oso ro sidang ḇesena.

Fafisu ya, insape yaḇeumur taun ri 17, ḇape aya kuker bati yedi nuiso ḇefarkin fananjur snar rodiwa naek ḇena fakamaman ro sidang siborḇa ro sidang ḇebabo ani. Barpur ya, yaraḇe sidang Buxton snar rodiwa manbaryas siborḇa ma sifandun farfnoḇek. Pengalaman nane nafnoḇek aya faro fararur ro fafisu iyama.

Ro taun 1951, yaser formulir Sekolah Alkitab Gilead Menara Pengawal. Ramnai, ro paik Desember 1952, Sor aya fa yasun ro dinas militer. Yor fa yaso ro fararur ine awer snar aya ine manbaryas ro oras nakam. Ḇape, pengadilan srower ayaḇa ma sisun aya ro bui paik ri wonem. Rodiwa, yasmai undangan fa yakso ro Sekolah Gilead kelas ḇeḇe 22. Ro paik Juli 1953, rofyor yasae kwar, yaso wai ḇeba ḇeniro Georgic ma yaraḇe New York.

Fyor yasabu kwar, ro taun ani kako yaso Munara Kebaktian Kawasa Dunya Babo. Ramnai yaso kereta ḇe South Lansing, New York, moḇ sifrur farkarkor ani. Yado ro kereta ramnai yek wer ro bis ḇe South Lansing. Snar yasae babo ro penjara, pipi yena kermkun monda. Ine nafnai fa yor pipi ro penumpang ḇesesya fa yaḇuki ḇyak bis ani.

FARARUR ḆE SUP ḆESE

Ro Sekolah Gilead nkona farkarkor ḇefnoḇek nko fa ’nkomnis roi ḇeḇor faro snonkakusya kam’. (1 Korintus 9:22) Paul Bruun, Raymond Leach, ma aya siwan nko ḇe Filipina, ḇape nkowaf visa nkoḇedi paik ḇeḇeso wer. Ramnai nkayun ḇe Rotterdam, Belanda. Ramnai nkayun nuk Soren Fadu, Terusan Suez, ma Soren Pasifik India ḇe Malaysia ramnai Hong Kong. Nkayun ras ri 47 ramnai nkofyafer ro Manila ro 19 November 1954.

Rodiwa, nkofarkor budaya ḇeḇabo, sup ḇeḇabo ma wos ḇeḇabo. Randak ya, nkoḇekyor siwan nkoḇe sidang Quezon City. Rodiwa snonkaku sya sawos wos Inggris. Inja paik riwonem ramnai, nkofawi wos Tagalog mnuk-mnuk monda. Ḇape, ro moḇ fararur ḇese nkorama werya, fandun kaku fa nkofarkor wos ani.

Ras oso ro paik Mei 1955, fyor nkobur ro ḇaḇebaryas ḇerum, aya ma Naek Leach numam syapram ḇeḇeso ro sim nkoḇena. Ḇekofenḇair nari nusma tugas ḇe Pengawas Keliling. Insape yaḇeumur taun ri 22. Ḇape, fararur ine nafnoḇek aya fa yafarkor nyan ḇebabo insama ”yamnis roi ḇeḇor faro snonkakusya kam”.

Imnis raris, yun faya Refo faro kawasakam ḇerandak yena ḇe pengawas keliling ro ḇarpon toko oso ḇero mnu oso. Ro Filipina fafisu ani faya faro kawasakam sawosna ro moḇ kawasa sya sibor! Ro fararur keliling, yamamfar sidang-sidang ḇeḇese yun faya ro moḇ kawasakam skankain rona, ro pasar, sampak, lapangan basket, taman, ma ro snur nyan ḇero kota na. Ras oso ro Kota San Pablo, jadi fa yawos faya yediḇa snar ro pasar mekem ya iḇa kaku. Inja, yakofenbadir ḇe penatua infa yawos faya ani ro Balai Karajan. Fananjur ya ramnai, penatua sya sifuken bisa kokor naḇe fananjur faro kawasakam ke roḇa, snaro faya ani sawos naro moḇ ḇekawasakam ḇa!

Yabarek ro naek srar ḇeḇeso rum sena. Rum sena napyum mankunḇa, ḇape nasren. Fyorno ido, yenef ro yar ḇeḇaḇa ro sop. Moḇ fa smasi nasya ro bandi rum ya, ma snonkaku sya bisa smam aya. Inja, yamasi kuker sansun. Yara ḇe moḇ ḇese kuker bis ma fyorno ido, yek wai ḇe myos-myos ḇesena. Ro fararmyan yena ḇesiper, yakna oto ḇa.

Yaso kursus wos Tagalog ḇa. Yafarkor wos ine kuker yarower naek ma srar ro ḇaḇebaryas ma fananjur. Naek srar smarisen sifnoḇek aya. Yakofen kasumasa snar sḇekaḇaḇaḇ ma simarisen sikofenḇair rofyor yawos sasar.

Fafisu ḇenande ramnai, yafrur fararwe nabor snaro fararur ḇebabo yasmana. Ro taun 1956, fyor Naek Nathan Knorr ryama, nkofrur kebaktian ḇeba. Siwan aya fa yawos kuker media masa. Yakirḇa ro roi ine ḇape ḇesesya sifnoḇek aya fa yafarkorna. Taun oser ḇaim, nkofrur kebaktian ḇeba ḇesenawer, ma yafararur ḇe pengawas kebaktian. Fyor Naek Frederick Franz iso ḇeramuma ro kantor pusat, ma yafarkor nabor ro i. Rofyor dawos faya faro kawasakam syansun barong Tagalog, Filipina sansun tradisional sena. Ine nafrur naek srar ro moḇ ani simarisen kaku, ine nbuk farkarkor ḇe aya fa yafrur fararwe kuker snonkaku ḇero moḇ ya.

Yafrur fararwe wer fyor yaḇe pengawas distrik. Ro ras ani, nkofasnai felem The Happiness of the New World Society (Ḇaḇeaski Ro Kawasa Dunya Babo). Nkofasnai naker ro bubes, inja roḇeyarek sibor rodia. Simarisen sananai ro proyektor ma sisun ro proyektor ani. Fasasna ya ramnai, nkoḇensren marbak kaku proyektor ani! Nkofasos munara ani roi ḇepyan ḇa. Ḇape, nun raryaḇ kaku fyor nkomam snonkaku sibor srama sfarkor kuker Yahwe organisasi ḇyeja ḇero supswan ḇesiper.

Imam Katolik ḇeḇeso ro moḇya sidwarek pamarinta sya insama sḇuk ijin awer fa nkofrur kebaktian. Snuk lonceng gereja rofyor nkoḇuk faya fanam ḇe gereja sena insama kawasa ḇeramasya srower awer faya. Sifrur rariryano, snonkaku sya sifarkor napnapes ya pdef, ma ḇebor ro moḇ ani sisyom faro Yahwe ro kirine.

FARARUR BABO, FARARWE ḆEBABO WER

Ro taun 1959, yafarmyan ro kantor cabang. Yafarkor nabor rodiwa. Fafisu ḇeḇeso ramnai, sor aya fa yara ḇe sup ḇeḇa ḇesena. Ro sup oso marandan yedi yasrow kuker Janet Dumond, ima misionaris oso ro Thailand. Ro swaf ḇeḇeso nufaremyae syapram ma barpurya nufarḇuk. Ro fafisu taun ri 51 nufarmyan kayam ḇe Yahwe I kuker raryaḇ.

Yamarisen yamamfar Yahwe kawasa ḇyesi ro sup ri 33. Yakofen kasumasa kako faro fararmyan yena snar nafnoḇek aya fyor yasrow kuker snonkaku ḇerama ro budaya ma latar belakang ḇesena! Marandan yeja ḇe moḇ ḇesena nafnoḇek aya fa yamam snar Yahwe iswar snonkaku syakam.​—Farfyar 10:34, 35.

NUFANDUN FARARWE KAKER

Aya ma Janet nuraryaḇ kaku fa nufarmyan kayam kuker naek srar ro Filipina. Nufarmyan kaker ro Kantor Cabang ro Quezon City. Manbaryas ro kirine siḇor syadi kali risamfur ro fafisu yafarmyan randak 60 taun aniwara. Taun-taun ḇyenande kwar raryano, yafandun kaker fa yafrur fararwe kuker rosai Yahwe dorna. Imnis raris, baboine organisasi ifrur fararwe. Inja fandun fa nufrur fararwe naborwer.

Nuḇensewar kwar fa nuso Yahwe akurfasna ḇyena, ma inema nyan ḇeyun raryaḇ kaku ro kankenem nuḇena. Nukako nusewar fa nufrur fararwe rosai monda ḇefandun insa nufarmyan ḇe naek srar sya kuker payamyum. Inja, fyor Yahwe imarisen fa nufarmyan kaker ḇe I numarisen ”numnis roi ḇeḇor faro snonkakusya kam”.