Snar Allah Saswar Ḇeba Ḇyedi Wasma Ḇaḇemkei

1, 2. Rosai fainda ro Roma 5:12 faro ko?

ROMA 5:12 ikofen, ”Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkaku syakam sifrur sasar kwar.” Kofawi pyum mnuk ani ma koḇukna ro ḇaḇebaryas koḇena rofyor kofarkor snonkaku sya kuker Refoya.

² Mnuk ine sḇukna ker ro syap Apa yang Sebenarnya Alkitab Ajarkan? ma Rosai Refo Fyarkor Ḇeko? Rofyor kofarkor ro fasal 3, 5, ma 6 kuker romawa koḇesi ma ḇesesya, nari kowasya Roma 5:12. Mnuk ani fyasnaḇair sai ḇewar fa supswan ine ḇyefirdaus werḇa ro kirine, sai ḇefnai fa kofandun fasaspar ya, ma sai ḇefnai fa komar ya. Ḇape, mnuk ine kako ifnoḇek kokam fa koḇesyowi kaku wer faro ḇaḇebati koḇena kuker Yahwe I. Osower ido, kofrur Yahwe imarisen syadiwer ma kowaf pdef rosai ḇyeasas kwar maro konya.

3. Rosai fandun fa koswarepen ro snonkaku koine?

³ Kokame snonkaku ḇesasar siko. Kofrur sasar ras ḇe ras. Ḇape, Yahwe ima isawarwar. Fyawi koine snonkaku ḇemnisḇa, ma imarisen ḇyuk ampun ḇeko. (Mazmur 103:13, 14) Yesus fyarkor ko fa kor ampun ro Allah. (Lukas 11:2-4) Inja, rofyor Yahwe ḇyuk ampun faro sasar koḇena, kopok fa kokara kosasar kaker. Kirine mkorama kofarkor rariso na Yahwe ḇyuk ampun ḇeko.

RARISO YAHWE ḆYUK AMPUN ḆEKO

4, 5. (a) Rosai ḇefnoḇek ko fa kofawipyum mnuk ḇero Roma 5:12 ya? (b) Rosai knam ro wos ”Allah saswar ḇeba ḇyedi” inenya?

⁴ Ro syap Roma, fasal ḇeḇe 6 ya, ifnoḇek ko fa kofawipyum rariso na Yahwe ḇyuk ampun faro sasar koḇena. Ro fasal ḇeḇe 3 ya, kofarkor snar ”snonkakusya sḇesasar kwar”. Ramnai Paulus fyasnabadirwer, ”Inja Allah saswar ḇyeja munda snonkakusya ḇaḇe oser sedi kuker Allah iḇye kaḇer; nyan ḇyedi isoine: Snonkakusya sisma ḇaḇemkei snar Yesus Kristus.” (Roma 3:23, 24) Wos Yunani sifarwena ḇe ”Allah saswar ḇyeja” ine kyurfasna kofrur roi oso snar kona sne ḇenaḇye ḇeba kaku. Kofrurna mboi kor ḇaḇyakḇa ma kofrurna ḇe snonkaku ḇesyus fa ḇesmanaḇa.

⁵ Sarjana oso ikofenḇadir wos Yunani ani nkur ḇe rosai Allah ma Yesus sufrurna fa sufaspar snonkaku ro sasar ma marmar. Inja Ḇaḇeasas Babo Wos Ḇyak ro Rasras fyarwe wos Yunani ine ḇe ”Allah saswar ḇyedi”. Nari kofarkor rosai Allah ifrur kwar faro ko ma rariso saswar ḇyedi ḇyuk fainda maro ko ro kirine ma ḇyuk saneraro ro fafisu iwama.

6. Mansei ḇena fainda ro Allah saswar ḇeba ḇyedi, ma rariso?

⁶ Snaro Adam ifrur sasar, inja snonkaku syakam sifrur sasar ma simar. Iso ḇewar fa Refoya doḇe ”Sasarya ssyunḇe supswan ine snar snonkaku oser, ma snar sasar ani, ifnai marmarya.” Ḇape, Yahwe fyasna saswar ḇeba kaku ma fyasos nyan fa fyaspar snonkaku syakam roro ”snonkaku oser ḇese, isoine Yesus Kristus”. (Roma 5:12, 15, 17) ”Rarirya kako nari snonkaku sibor sikenem imnis Allah marisen ḇyedi, snar snonkaku oser ḇeḇeyuser Allah marisen ḇyena.” Ma sisma saneraro faro kankenem fyoro-fyoroya snar Yesus Kristus.​—Roma 5:19, 21.

7. Sai ḇefnai fa farsarser fasaspar ima fasasna saswar ḇeba kaku rirya?

⁷ Kwarapan roi ine: Fandun ḇa fa Yahwe ḇyuk Rumkun ḇyedi ḇe farsarser fasasparya. Ḇape, fyasna saswar ḇeba ḇyedi kuker ḇyuk nyan ḇe ko fa kosma fasaspar ro sasar ma marmarya. Osoḇaḇeri na ḇenaḇyeḇa fa ḇesma rosai Allah ma Yesus sufrur kwar ḇeko na. Kokofen kasumasa nabor kaku snaro suḇuk nyan ḇeko fa kosma ampun ma kokenem fyoro-fyoro! Iḇyekada kofasna kasumasa ḇe Allah kuker moḇ kokenem raya.

KASUMASA FARO ALLAH SASWAR ḆEBA ḆYEDI

8. Kakara rosai kopampum kakuna?

⁸ Allah imarisen ḇyuk ampun faro sasar koḇena, syadiwer faro sasar ḇeba kako. Ḇape, na kopok kokara ḇa snar Allah saswar ḇyedine inja bisa kofrur sasar ma kokara ’Yahwe nari ḇyuk ampun ḇe ya.’ Ro abad randakya fafisu manwawan ḇeḇeso sisya kaker, snonkaku Kristen ḇeḇeso sya sna kakara ḇeradirya. (Wasya Yudas 4.) Ko kako fandun fa kosasor ko insama snonkaku ḇesesya sawyae koḇa ma fawawas kona kakara ḇeradirya.

9, 10. Rariso manwawan Paulus ma ḇesesya sḇemkei ro sasar ma marmarya?

⁹ Sino sisya skara sifrur sasarker raryano nari Allah ḇyuk ampun ḇesi. Paulus danun ḇesi fa spampum kakara ḇeradirya. Sai ḇefnai ya? Snaro ’sasarya nyasi werḇa’. (Wasya Roma 6:1, 2.) Rosai Paulus fyasnaḇair ya?

¹⁰ Roro fasasos fasaspar ine, Allah ḇyuk ampun faro sasar Paulus ma snonkaku Kristen ro abad randak sya. Yahwe ryem si kuker rur ḇesren fa sḇe romawa ḇyesi. Sisoasuser pdef ido, na sikenem ro nanki ma sḇepoik fnoḇek Kristus I. Fafisu sikenem kaker ro supswan, rariso ’sasarya nyasi werḇa’ rai? Paulus dap Yesus i ḇe contoh. Rofyor Yesus imar kwar, ikenem kaḇer ḇe mankun rur ḇesma marmar werḇa. Iso ḇefnai fa ”marmarya dufepen kankenem ḇyeja werḇa.” Rarirya kako, faro snonkaku Kristen ansi imnis raris simar kwar. Kankenem sena neḇefadwer kaku snaro marisen ḇesasar fyara si wer ḇa. Ro fafisu ya, sifrur roi ḇeḇye kaku ro kankenem sena fa sifrur Allah imarisen. Inja ’simar faro sasarya, ḇape sikenem ro ḇaḇeoser ḇedworen kuker Allah snar Kristus Yesus.’​—Roma 6:9, 11.

11. Rariso snonkaku Kristen ro kirine ’sasarya nya si werḇa’?

¹¹ Rariso kuker ko? Rariso ”sasarya nyako werḇa”? Fyor iwara, kofrur roi ḇeḇyeḇa ma kokaraḇa rariso Yahwe mamam ḇyedi faro rosai kofrurna. Koma ’koḇe women faro roi ḇemamas ma roi ḇeḇarḇor’, isoine, ’koḇe women faro sasarya’. (Roma 6:19, 20) Ḇape, rofyor kofarkor ro Refo moḇ Allah imarisen kokenem raya, kofrur fararwe ro kankenem koḇena, koḇuk farsamsyom ḇe I, ma koḇebaptis. Kona marisen ḇeba fa kosouser Yahwe ma kofrur imarisen. Inja, kosma ’ḇeḇemkei kwar ro sasar’, ma koḇe ’manfyan faro Allah marisen ḇyena’.​—Roma 6:17, 18.

12. Kankinfir rosai kosmana?

¹² Paulus doḇe, ”Mkoḇuk fa sasarya ḇyewayam kaker awer mko ro supswan ine, insa mkoso marisen ḇeḇarḇor ḇyena kaker awer.” (Roma 6:12) Kona kankinfir, imbe koso swaruser ma marisen koḇena fa kofrur sasar ke ḇaido kopampumna. Wafuken mankundaw, ’Yarir marisen ḇesasar yena nasambraḇ kaku inja yafrur roi ḇe sasar ke? Ḇaido yapampumna ḇeri ke?’ Kofasna kasumasa ḇeba koḇena faro Allah saswar ḇeba ḇyedi ido, nari koḇensewar fa kofrur imarisen.

SASARYA BISA WAPAMPUMNA

13. Sai ḇefnai fa kokyar na kofrur roi ḇeḇye?

¹³ Ro abad randak, snonkaku ḇeḇeso ro Korintus sima mankarawraw, snon ḇefarbuk kuker snon, snonkaku ḇefrur farbuk, ḇesyom amfyanir, ma ḇemasarser. Ḇape, rofyor sifawi ma siswar Yahwe, sifadwer kenem sena. Simai faro rosai sifrur kwar anna. (Roma 6:21; 1 Korintus 6:9-11) Snonkaku Kristen ro Roma sya sikako fandun sifrur fararwe ḇeradirya. Paulus dawos ḇesi, ”Rarirya kako naek buk awer kina ro baken bedi faro papoik sasarya fa ifrur roi ḇeḇarḇor kaker awer. Mboi buk baken beja faro Allah, raris snonkaku ḇebur marmarya faro kankenemya. Naek buk baken bedi ḇesiper faro Allah, insa Allah nya aw fa ifrur marisen ḇyena.” (Roma 6:13) Paulus ikyar na sifrur roi ḇeḇye ma sisma fainda raryakwar ro Allah saswar ḇeba ḇyedi.

14, 15. Fakfuken rosai fandun fa kokarauserna?

¹⁴ Naek srar koḇesi ḇeḇeso sya si kako sikenem imnis snonkaku ḇero Korintus sya. Ḇape, rofyor smamḇir Yahwe I kwar, sifadwer kenem sena. Sifrur rarirya rofyor ’seḇefasren kwar ro sasar na.’ Insama kofrur Yahwe imarisen, kokame fandun kofadwer kenem koḇena. Baboine kako, komarisen kofasna kasumasa faro Allah saswar ḇeba ḇyedi. Inja, kun snemuk fa kopampum marisen ḇesasarna ma koḇuk kankenem koḇena fa kofarmyan ḇe Yahwe I.

¹⁵ Kaku ḇae, kopok kofrur sasar ḇeba awer imnis snonkaku Kristen ḇeḇeso ro Korintus sifrurna. Na kofrur sasar ḇeba ker ḇa ramnai kokofen Allah nari fyasna saswar ḇyedi ma ḇyuk ampun ḇeko. Ḇape, rariso kuker sasar ḇesnai mankun ḇa? Na kun snemuk fa kosouser pyum Yahwe ro roi nakam ke?​—Roma 6:14, 17.

16. Rariso kofawi snar fandun fa kokrenbur sasar ḇese ḇeḇeyapḇa ro 1 Korintus 6:9-11?

¹⁶ Komam ro manwawan Paulus. Fyas, ”Snar aya ḇardi yafawi roi yafrurnaḇa. Snar roi yamarisen na yafrur naḇa, ḇape rosai yayin na, naiso yafrur na.” (Roma 7:14, 15) Ifrur sasar raris ḇeḇeyap ro 1 Korintus 6:9-11 yaḇa rariryano, Paulus ikofen ikako ifrur sasar. Snar ḇyensewar kaker fa pyampum roi smam ḇe sasar nane snaro imarisen ifrur Yahwe imarisen. (Wasya Roma 7:21-23.) Iḇyekada kofarari Paulus i ma koḇesewar fa kosouser kaku Yahwe I.

17. Sai ḇedar fa wamarisen ḇe snonkaku ḇekofen kakakuya?

¹⁷ Imnis raris, kofawi snar koḇe Yahwe kawasa ḇyesi ido kokofen roi ḇekakuya. (Wasya Amsal 14:5; Efesus 4:25.) Komewer komnis kuker Setan i, isoine ”kma ro ankarkar na kam.” Koswarepen kako Ananias ma swari sumar snaro suyankarkar. Inja, komewer kankarkar. (Yohanes 8:44; Farfyar 5:1-11) Ḇape, kokofen roi ḇekaku inema na kokofen roi nakam ḇa. Kokofen kasumasa kaku faro Yahwe saswar ḇeba ḇyedi ido, nari kokofen roi ḇekaku ro roi nakam.

18, 19. Rosai knam ro kokofen roi ḇekaku ya?

¹⁸ Snonkaku oso dankarkarḇa rariryano na bisa ikofen roi ḇekakuḇa. Imnis raris, Yahwe ikofen ḇe snonkaku Israel sya, ”Mkokarawraw awer, mkankarkar awer, ma manserirya kako rofandu mko ifrowes awer min ḇyesi.” Snaro? Yahwe doḇe, ”Fandun fa mkosren, snar Aya, Yahwe, Allah mkobedi, Yasren.” (Imamat 19:2, 11) Imbude na kankarkar ḇa, mboi kokofenbadir mnisḇa kuker roi oso ma snonkaku skara sasarna ido, ine kyurfasna kokofen roi ḇekakuḇa.

¹⁹ Imnis raris, snonkaku oso ikofenḇair ḇe bos ḇyedi ḇaido min fararur ḇyedi imbe ibur ḇepon snaro imbe ḇyeberobat. Ḇape kakuya, imbe ibur fasaw fa imbran farma. Wos ikofen ”ḇyeberobat” ima rya fasaw monda ḇe apotek ḇaido dun hasil rik ḇyedi. Inema ikofen roi ḇekaku ke? Ḇaido dankar. Ifrur snonkaku ḇesesya sikyar roi ḇekakuḇa. Fyorno ido, snonkaku sankarkar fa sisma rosai simarisen na ḇaido sikrenburo samamyai na. Ḇape, kosouser Yahwe ḇekofen, ”Mkankarkar awer.” Inja, komarisen kofrur rosai myam ḇe roi ḇekaku ma ḇesren.​—Roma 6:19.

20, 21. Kofasna kasumasa faro Allah saswar ḇeba ḇyedi ido, rosai kobinkwanbur kakuna?

²⁰ Kakuḇae, koḇinkwanbur fararur farḇuk, masarser, ma sasar ḇeba besena. Ḇape, kokako komarisen koḇinkwanbur ro rosai monda ḇefrur Yahwe imarisenḇa na. Imnis raris, na koḇinkwanbur fararur farḇukya monda ḇa ḇape, hiburan ḇe-amoral na kako. Komewer komasarser, ḇape na kinem rao imbe komser. Imbude na kosewar kaku fa kopampum roi ḇeradinena, ḇape na kosma fainda.

²¹ Komarisen fa kofarari Paulus ḇekofen, ”Mkoḇuk fa sasarya ḇyewayam kaker awer mko ro supswan ine, insa mkoso marisen ḇeḇarḇor ḇyena kaker awer.” (Roma 6:12; 7:18-20) Kakuḇae, na kofrur sasar kako. Ḇape, koḇensewar fa kopampum sasar ḇebor kam ido, kofasna kasumasa kaku faro Allah ma Kristus saswar ḇeba suḇena.

22. Kofasna kasumasa faro Yahwe saswar ḇeba ḇyedi ido, ḇarakas rosai nari kosmana?

²² Snaro Yahwe saswar ḇeba ḇyedi, ḇyuk ampun kwar faro sasar koḇena ma nari ifrur rarirya pdef. Na kokofen kasumasa nabor kaku ḇe I! Inja, mkorama kosewar kaku fa kofrur awer rosai snonkaku sya smamḇe sasarḇa, ḇape ima myam ḇe roi ḇesasar. Kofrur rarirya ido, barakas rosai nari kosmana? Paulus doḇe, ”Baboine mkosma ḇaḇemkei ro sasarna kwar, ma mkoḇe manfyan faro Allah. Fainda mkoḇedi isoine, naek srar mkokenem ḇardi faro Allah ma roi ḇeḇesya ani dun kankenem ḇekaku ma ḇekain fyoro-fyoro.”​—Roma 6:22.