”Waswar Syadi Aya ro Roi Nane Ke?”

1, 2. Ro roḇ smun pam ramnai, farkarkor rosai Petrus ismana?

RO roḇ oser Yesus manfamyan rifik ḇyesya sisewar in ro Danosen Galilea. Ḇape smun ino ḇaḇeri. Fafisu arwo kwar, Yesus ḇeḇebawes kwar ani dores ro danosen andir ma myam si. Ramnai ikofen farosi, ”’Mko nap pam mkoḇedi ro waya ḇar rakuya, ma nari mkosma in ono.’ Raimnai snap pam ani ma ssambraḇ fa spaw pam aniḇa snar insya sibor mankenem”.​—Yohanes 21:1-6.

² Yesus ḇyuk mamami ma in ḇe manfamyan ḇyesya fa san ro arwoya. Ramnai myam ḇe Petrus ma ikofen, ”Simon, Yohanes mandaḇen ḇyedi, waswar syadi [aya ro roi nane ke]?” Yesus ifawi Petrus imarisen kaku myun pame. Imbude Yesus ifuken ḇe Petrus i, iswar Yesus ma farkarkor ḇyukna iba syadi ro saswar ḇyedi faro fararur ḇe mandaswan ine. Petrus kyarem faro Yesus i bo dobo, ”O Manseren, wafawi, mboi yaswar aw.” (Yohanes 21:15) Ro fafisu anya, Petrus ifrurḇeri rosai ikofenna. Fyasnaḇair saswar ḇyeja faro Kristus kuker imyaren ro fararur ḇaḇebaryas, ma ḇyenaek ḇefandun ro sidang Kristen.

3. Faro rosai snonkaku Kristen fandun fa sisasor si?

³ Rosai kofarkor ro Yesus wos ḇyena faro Petrus i? Fandun fa kosasor ko insama saswar koḇena faro Kristus syambraḇ pdef. Yesus ifawi kankenem koḇena ro ras ḇepupes ine nafo kuker kandera ma nari kosmai makakwarek ma roi ḇedwarek. Ro sarḇer Yesus ḇyeja kuker mor, Yesus ikofen nari snonkaku ḇeḇeso ḇemnaf ”wos ḇekur ḇaḇesasoser boiyaswa” randak ya nari siraryaḇ. Ḇape ḇarpurya, ”araryof ananjar awar kirai ine ma sne ḇero nana nepen epen wos anna”, inja snonkaku ansya sisma raryaḇ werḇa. (Matius 13:19-22; Markus 4:19) Kosasor ko ḇa ido, makakwarek ro ras-ras koḇena nari nawyaye fararmyan koḇena ḇe Yahwe I. Inja Yesus ḇyuk swarapepen ḇe manfamyan ḇyesya, ”Mkowaren mankun mko, insa mkosnemna nafo awer kuker swaruser munara ma masaser ma fandun-fandun ro kankenem mkoḇena.”​—Lukas 21:34.

4. Fakfuken rosai ḇefnoḇek ko fa kofawi saswar koḇena faro Kristus syambraḇ? (Mam sonin ro randak artikel ine.)

⁴ Raris Petrus i, bisa kofasnaḇair koswar Kristus i kuker korir ro ḇarpon fararur ḇaḇebaryas ro kankenem koḇena. Rariso kokyar nari kofrur roi ine ḇesya kwar? Bisa kofuken mankun ko, ’Rosai yaswar syadi ro kankenem yedina? Raryaḇ yasmana ndramuma ro fararmyan yena ḇe Yahwe I ḇaido fararur ḇesena ke?’ Insama kosma kankaremya, mkorama komam ḇar rikyor ro kankenem koḇena ḇefruro saswar koḇena faro Kristus syambraḇ werḇa. Isoine, fararur koḇena, rekreasi ma ḇaḇearasai na.

KOSEWAR FARARUR ḆEDWAREK FARARMYAN KOḆENA ḆA

5. Ḇeḇukor ro kina sya rosai fakamamar sena?

⁵ Faro Petrus i, fararur ḇe mandaswan ima fararur imarisen mondaḇa. Ḇape fararur ani ḇyuki fnoḇek kako kina ḇyesya. Kirine kako, Yahwe ḇyuk fakamamar faro ḇeḇukor ro kina sya fa sifnoḇek kina sesya. (1 Timotius 5:8) Iso ḇefnai fa sifararur marḇak kaku. Ro ras-ras ḇepupes, fararur koḇena nari nun samswen nabore.

6. Rosai ḇefnai fa fararur koḇena nafrur samswen ko?

⁶ Fyorno ido snonkaku sya sfandun fararurwer ḇape kakuya fararurna nasya kwar. Iso ḇefnai sḇensewar fa sisma fararur. Ḇebor sya sisma ḇaḇyak kermkun monda raryano, sḇensewar fa sifararur nabor syadiwer. Bena perusahaan sya sifrur roiebor nabor syadiwer, ḇape ḇefararur sya sibor ḇa imnis ro randak ya. Inja ḇefararur sya sḇestres, simbrus, ma sidufe. Ḇebor sya simkak nari sisma fararur werḇa, inja sifrur rosai riryakam ḇena fararur ya dorna.

7, 8. (a) Faro mansei fandun fa kosouser syadi ya? (b) Farkarkor rosai kun ro naek oso ḇero Thailand kuker fararur ḇyena?

⁷ Snonkaku Kristen koine, kosouser syadi ḇe Yahwe I ro mansei monda, imbude bos koḇedi kako. (Lukas 10:27) Fararur koḇena iso nyan fa koḇuki fnoḇek fandun ras-ras koḇena ma koḇuki saramper fararmyan koḇena. Ḇape kosasor ko ḇa ido, fararur koḇena na nafrur kobinkwanbur farsamsyom koḇena. Bisa kofarkor ro fawar naek oso ro Thailand. Dobe, ”Fararur yedi fa yafrurmnis komputer ima fararur ḇepyum kaku, ḇape yaḇuk oras nabor kaku faro fararur yena. Inja nafnai yana oras nabor ḇa faro roi ḇefandun syadi ro rur ya. Yaḇaḇir insama yarir ro ḇarpon fandandun Karajan, fandun fa yafadwer fararur yena.” Rosai naek ine ifrur ya?

⁸ Ikofen, ”Yafrur fasasos taun rioser ramnai, yun snemuk fa yabaḇoḇ ro nyan ma yaḇoḇ es krim. Randak ya, yana samswen ro kumpanna ma nane nafrur yararyaḇ ḇa. Rofyor yasrow kuker bati fararur yesya simbrif aya ma sifuken sai ḇefnai yaḇoḇ es krim, ipyum syadi fararur komputer ro moḇ beḇe-AC ani. Yaḇenadi ḇe Yahwe yor fafnoḇek ḇyeja insama yana oras nabor faro fararur rur ya. Fyoroḇa ramnai, bisa yafrurmnisna. Ḇarpur ya, yafawimnis kaku rosai simarisenna ma yaḇekir syadi fa yafrur es krim. Inja, yaḇoḇ es krim ro ras ḇe ras. Kakuḇae, yana kumpan ḇesrow syadi ro fararur ḇefrurmnis komputer ani. Yamarisen kaku snar yaḇestres ma yaḇeḇirḇar ḇa kuker fararur ḇepon yedi. Ḇefandun syadi ya, kirine yafanam ḇe Yahwe I.”​—Wasya Matius 5:3, 6.

9. Rariso kona mamam ḇekaku kuker fararur koḇena?

⁹ Yahwe ḇyesyowi kaku rofyor kofararur marḇak. Fararur marḇak ima barakas rirya. (Amsal 12:14) Ḇape koswarepen, fararur koḇena nefandun syadi awer ro fararmyan koḇena ḇe Yahwe I. Kuker fandandun ras-ras koḇena, Yesus ikofen, ”Inja mkosewar bepon Ḇaḇesasoser Allah ma napnapes ḇyedi, nari nakaem neḇeḇuk fnoḇek faro mko.” (Matius 6:33) Rariso kofawi kona mamam ḇekaku kuker fararur koḇena? Bisa kofuken mankunko, ’Yamam fararur yena napyum syadi ro fararmyan yena ḇe Allah ke?’ Kokara pyum fakfuken ine ido, nari nafnoḇek ko fa kofawimnis mansei koswar kakuya.

10. Farkarkor ḇefandun rosai Yesus ḇyukna?

¹⁰ Yesus fyarkor ko rosai fandun fa korir ro ḇarpon ro kankenem koḇena. Ras oso, ḇyedakam ḇe imbesrar risuru rum suḇedi, isoine Maria ma Marta. Fafisuya ḇeri, Marta fyasos robean faroi, ḇape Maria kyain fanam Yesus wemin ḇyesuya ma imnaf naḇye farkarkor ḇyena. Marta imsor snar Maria ifnoḇek i ḇa. Yesus ikofen faro Marta, ”Maria kyinfir kwar rarwas ḇeḇye syadi, isoine roi oso ipok duni buriḇa.” (Lukas 10:38-42) Rodine Yesus ḇyuk farkarkor ḇefandun kaku. Insama fandandun koḇena ro ras ḇe ras nawyaye awer saswar koḇena faro Kristus, fandun fa kokinfir ”rarwas ḇeḇye syadi”. Ine kyurfasna fasfesepen koḇena kuker Yahwe ima roi ḇefandun kaku ro kankenem koḇena.

MAMAM KOḆENA KUKER REKREASI MA HIBURAN

11. Rosai Refo ikofen kuker fafisu fa komnaisu resari?

¹¹ Kakuḇae, kofararur nabor kaku ro ras ḇe ras kwar, inja fyorno ido fandun fa komnaisu resari. Refo ikofen, ”Roi oso ḇaḇeri ḇepyum syadi faro snonkaku sya ro sanan ma sinem ma sisma raryaḇ faro fararur marḇak sena.” (Pengkhotbah 2:24) Yesus ifawi fandun fa manfamyan ḇyesya simnaisu resari. Imnis raris, rofyor sifararur marḇak kwar ro fararur ḇaḇebaryas, Yesus ikofen besi, ”Mkorama kosewar moḇ ḇeḇeursḇa insa kemir ma komnaisu ko resari.”​—Markus 6:31, 32.

12. Rosai ḇefnai fandun kosasor ko kuker rekreasi ma hiburanna? Buk contoh.

¹² Rekreasi ma hiburan nafrur komarisen. Ḇape koswarepen insama marisen mankun koḇena nefandun syadi awer ro kankenem koḇena. Ro abad randak snonkaku ḇeḇor skara iḇye syadi, ”Mkorama kankinem ma koryaḇ, snar nari meser komar.” (1 Korintus 15:32) Kenem ḇemnis radine nasya kako ro fafisu ine. Imnis raris, snonkḇor oso ro Eropa Barat ryama ro fananjur Kristen. Ḇape imarisen syadi faro hiburanna, inja imnai iryur kuker Saksi-saksi Yahwe sya. Barpur mura, ḇyaḇir marisen ḇyena faro hiburanna nafnai fa ismai samswen nabore. Inja fyarkor Refo wer, ma iso ro fafarur ḇaḇebaryas ankankinem ḇeḇye yawer. Rofyor ḇyebaptis kwar ikofen, ”Yafafko kaku snar oras yena nabor napromes kwar insape yaḇaḇir fararmyan ḇe Yahwe nun marisen syadi ro yasewar marisen faro hiburan dunya ine byukna.”

13. (a) Buk sarber oso ḇefasnaḇair rekreasi ma hiburan ḇesyadina ima roi ḇepyumḇa. (b) Rosai ḇefnoḇek ko fa kofawi kona mamam ḇekaku kuker rekreasi ma hiburanna?

¹³ Rekreasi fandun fa nun marisen ma nafrur kosambraḇ kaḇer. Inja oras ribeso na koḇuk faro rekreasina? Insama kosma kankaremya, kokarapan sarber ine. Snonkaku ḇebor sya simarisen san kukis ma permen. Ḇape rofyor kanna ro ras-ras ido, nari kodufe. Komewer koduf ido, na kan robean ḇepyum faro baken koḇena. Rarirya kako, rofyor koḇuk oras nabor faro rekreasi ma hiburanna, nari nawyaye fasfesepen koḇena kuker Yahwe I. Rosai ḇefnoḇek ko fa kofawi kona mamam ḇekaku kuker rekreasina? Nyan oser ya, bisa kokinfir minggu oser ma kofas oras ribeso koḇuk faro fararmyan ḇe Yahwe I, raris fananjur Kristen, fararur ḇaḇebaryas ma farkarkor Refo. Ramnai, kofaswer oras ribeso ro swaf minggu oser koḇuk faro rekreasina. Raris olahraga, komam televisi ḇaido kofnak vidio game. Rofyor komam fasfas suine, rosai nari kokarana? Bisa kofrur fararwe ke?​—Wasya Efesus 5:15, 16.

14. Rosai ḇefnoḇek ko fa kokinfir rekreasi ma hiburan ḇepyumna?

¹⁴ Yahwe ḇyuk kankinfir ḇeko ro rekreasina, ma ḇeḇukor ro kina sya bisa skinfir rekreasi faro kina sesya. Ro Refo Yahwe ḇyuk ḇeko wos ḇefarkin ḇefasnaḇair nyan kakara ḇyena. Wos ḇefarkin anna nafnoḇek ko fa kofrur snemuk ḇepyum.a (Mam fas-fas kasun ro sop.) Rekreasi ḇepyum ima ”ndrama ro Allah”. (Pengkhotbah 3:12, 13) Kakuḇae, snonkaku manseirya simarisen hiburan ḇeḇeseyaye. (Galatia 6:4, 5) Ḇape, hiburan rosai monda kokinfirna, fandun fa kosasor ko. Yesus ikofen, ”Ro moḇ [arasai] ḇena naisya roya, ro dia snembri isya kako.” (Matius 6:21) Saswar koḇena faro Raja koḇedi, Yesus i, nadif ko fa kokara, kawos ma kofrur rosai riryakam ḇefasnaḇair Karajan ima ḇyefandun kaku ro rosai riryakame.​—Filipi 1:9, 10.

KOPAMPUM MARISEN ḆESYADI FARO MATERIALISME

15, 16. (a) Rariso materialisme ḇyedenem ḇeko? (b) Anun ḇepyum rosai Yesus ḇyuk kuker ḇaḇearasaina?

¹⁵ Snonkaku ḇebor ro kirine skara fandun fa sisma sansun ḇesae babo, handphone, komputer ma ḇesena. Materialisme, isoine kenem ḇefasnaḇair ḇaḇearasai ma pipi nama roi ḇefandun syadi ro rosai riryakam nawyaye si kwar. Auma snonkaku Kristen ido, rosai ḇefandun syadi faro Au ya? Wafuken mankundaw, ’Yaḇuk oras yena nabor fa yakara oto ḇaido sansun ḇebabona ro yafrur fasasos faro fananjur ro sidang ke? Snar yafararur nabor ro ras ras, inja yana oras kermkun monda fa yaḇenadi ḇaido yawasya Refo ke?’ Kosasor ko ḇa ido, saswar koḇena faro ḇaḇearasai bisa nefandun syadi ro saswar koḇena ḇe Kristus. Fandun fa kokara Yesus wos ḇyena, ”Mkowaren ma mkosasor mko ro mnuk rmomenya.” (Lukas 12:15) Sai ḇefnai ikofen wos ine?

¹⁶ Yesus ikofen ”Snonkaku oser ipok duf farmyan tuan risuruḇa”. Ikofenwer, ”Mkopok mkoḇe manfyan faro Allah ma faro [arasai] ba.” Jadiḇa fa koḇuk roi ḇepyum ḇe Yahwe I, ḇape ro fafisu yakako kosewar syadi ḇaḇearasaiya. Yesus fyasnaḇair nari kokinfir oso ro su, ’kayin oso ma koswar suminya’ ḇaido ’koḇeuser faro oso ḇoi suminya kofandun i ḇa’. (Matius 6:24) Snar koine konapesḇa, inja fandun fa kopampum ”marisen baken koḇena”, raris materialisme kako.​—Efesus 2:3.

17. (a) Rosai ḇefnai samswen ḇe ḇeḇeso sya fa sisma mamam ḇekaku kuker ḇaḇearasaina? (b) Rosai ḇefnoḇek ko fa kopampum materialismena?

¹⁷ Snonkaku ḇebor sya sfandun faro marisen baken sena monda, inja samswen besi fa sisma mamam ḇekaku kuker ḇaḇearasaina. (Wasya 1 Korintus 2:14.) Snar skaramnisḇa, inja samswen fa smambir roi ḇekaku ma roi ḇesasar na. (Ibrani 5:11-14) Marisen sena faro ḇaḇearasai nasamḇraḇ syadi. Ma sisewar nabor syadiwer ido, nari roi simarisenna nabor syadiwer. (Pengkhotbah 5:10) Ḇape, roi oso isya ḇefnoḇek ko fa kopampum nyan kakara ḇeradirya. Wawasya Refo ro ras ḇe ras nari syambraḇser ko fa kopampum materialismena. (1 Petrus 2:2) Yesus kyarauser Yahwe fawawinanem ḇyena, nane nafnoḇek i fa pyampum Setan farawrowes ḇyena. (Matius 4:8-10) Kirine, fyor komarisen kopampum materialisme ido, fandun fa kofasnaḇair Yahwe fawawinanem ḇyena ro kankenem koḇena. Nane nfasnaḇair koswar syadi Yesus i ro ḇaḇearasaina.

18. Rosai snemuk imbe kofrurna?

¹⁸ Rofyor Yesus ifuken ḇe Petrus i, ”Waswar syadi aya ro roi nane ke?” fyarkor Petrus i, imbe fyarmyan ḇe Yahwe ido, fandun fa myam rosai ḇefandun syadi ro kankenem ḇyedi. Kofawi knam ro Petrus snonsnon ḇyedi iso ”Karui oso.” Rari ḇepyum Petrus ḇyena imnis raris karui oso. (Kisah 4:5-20) Kirine kokako komarisen saswar koḇena faro Kristus nako. Inja komam mnis insama fararur koḇena, rekreasi, ma ḇaḇearasaina korirna ro moḇ ḇekaku ro kankenem koḇena. Inja nari kokofen raris Petrus i, ḇekofen, ”O Manseren, wafawi, mboi yaswar aw.”