Kofaduru Pdef Ḇaḇefarmku Mankun

1, 2. (a) Snonkaku ḇefasna ḇaḇefarmku mankun ḇa, rosai nari sisma ya? (b) Rosai ḇefnai fandun kaku fa kofarkor kuker ḇaḇefarmku mankun?

ḆAḆEFARMKU mankun ima rari oser Allah Yahwe iwan fa kofaduru pdef na. (Galatia 5:22, 23) Yahwe ima fyasna mnis kaku ḇaḇefarmku mankun. Ḇape, snonkaku ḇenapesḇa koine na kakmnis I ḇa. Snar snonkaku sya sifasna pdef ḇa ḇaḇefarmku mankun, inja fafisu ine sisma samswen nabore. Imnis raris, snonkaku oso imbude ifrur fasawḇa fararur ḇyenaḇa ḇaido ifarkor myarenḇa ro rumfarkor ḇaido ifararur mnisḇa ro moḇ fyararur ya. Osower ido, snonkaku oso ḇefarmkuepen mankundi ḇa nari imasasor, fyanfadak, imasarser, ḇyekecanduan, nya nyaki nabore, ismai ro bui, ḇaḇemuk ro farḇakḇuk ḇyena, isma dafduf ḇepampam snar seks, ma imewer maraboi fyardores, ḇaido ḇyesanekar.​—Mazmur 34:11-14.

² Snonkaku ḇefarmku mankundi ḇa, dun samswen ḇe snonkaku ḇesesya. Fafisu iwara isof kirine, nasnaibos kaku snar snonkaku ḇebor sya sifarmku mankun pdef si ḇa. Kopok kokandor roi ine ḇa, snar Refo ikofenḇair kwar ”ro ras ḇepupesna” snonkaku sya nari sifasna ḇaḇefarmku mankun ḇa.​—2 Timotius 3:1-3.

3. Rosai ḇefnai fa kofarmku mankunko?

³ Rosai ḇefnai fa fandun kaku komkuepen mankun ko? Alasan risuru ḇefandun kaku nasya. Ḇeoserya, snonkaku ḇefarmku sneḇaḇir ma kakara sena sisma samswen nabor ḇa. Ine kako napyan ḇe si fa sisma ḇaḇebati ḇepyum ma seḇinkwanbur masasor, makakwarek, ḇaido stres na. Ḇesuruya, insama koḇebati kuker Allah, fandun fa kopampum farawrowes ma kofara marisen ḇesasar koḇena. Roi ine iso Adam ma Eva sufrur ḇa na. (Kejadian 3:6) Imnis raris su, snonkaku ḇebor ro kirine sisma samswen ḇebor snar sifarmku mankunsi ḇa.

4. Rosai na ḇeyun samambraḇ faro snonkaku bena samswen fa ḇefara marisen ḇesasar sena?

⁴ Yahwe ifawi snar koine snonkaku ḇenapesḇa, inja samswen ḇe ko fa komkuepen mankunko. Ḇape, Yahwe imarisen ifnoḇek ko fa kofara marisen ḇesasar koḇena. (1 Raja-Raja 8:46-50) Snar ima bati ḇesaswar kobedi, inja syambraḇser mansei monda ḇeḇaḇir samswen fa sfara sneḇaḇir ma marisen sena. Ro artikel ine, nari kofarkor farari ḇepyum ro Yahwe fyor fyasna ḇaḇefarmku mankun. Ko kako nari kofarkor contoh ḇero Refo ḇepyum ma ḇeḇyeḇa, ma nari komam ananun ḇepyan rosai nari ḇefnoḇek ko.

YAHWE FYASNA FARARI ḆEPYUM

5, 6. Farari ḇepyum rosai Yahwe ḇyuk ḇeko na?

⁵ Yahwe fyasna ḇaḇefarmku mankun ḇemnis kaku snaro nyan ḇyenakam inapes. (Ulangan 32:4) Ḇape, koine snonkaku ḇenapesḇa. Rariryano, bisa kofarkor ro nyan rariso Yahwe fyasna ḇaḇefarmku mankun, inja bisa kofarari pyum kaku I. Ine nari nafnoḇek ko fa kofawi rosai nari kofrurya rofyor sifrur kofafayaf. Mkorama kowawos contoh ḇeḇeso ḇefasnaḇair nyan Yahwe fyasna ḇaḇefarmku mankun.

⁶ Kwarapan rosai Yahwe ifrur rofyor Setan fyasna ḇaḇembroḇ ḇyeja ro Eden. Imbude, safsof Iblis ḇyeja nafnai fa malaikat ḇesouser syakam simsore ma sayin kaku i. Imbude ko kako koḇaḇir rarirya rofyor kokara kuker ḇaḇekandera nabor Setan ifrurna. Ḇape, fafisuya Yahwe imsor ḇeriḇa. Fyasna nyan ḇepyum faro Setan ḇaḇembroḇ ḇyena. Snar imasasor fasawḇa ma fyasna nanapes, inja ḇyuk swaf nabor fa ifrurmnis kaḇer ḇaḇembroḇ ani. (Keluaran 34:6; Ayub 2:2-6) Rosai ḇefnai ya? Snaro imarisen snonkaku oso ḇaḇeri imar, ḇape ”insa snonkaku kam simbror ma skaḇer”.​—2 Petrus 3:9.

7. Rosai na kofarkor ro Yahwe farari ḇepyum Ḇyena?

⁷ Farari ḇepyum Yahwe Ḇyeja nḇuk farkarkor ḇeko insama kokara pyum rosai kawos ma kofrurna resari. Inja, rofyor imbe kofrur snemuk ḇefandun kaku oso ido, koḇuk oras faro mankunko fa kokara ḇe ḇarpon ma fasawsawḇa. Koḇenadi kor fawawinanem insama kawos ḇaido kofrur roi ḇepyum. (Mazmur 141:3) Rofyor sifrur kofafayaf ido, nari napyan ḇeko fa komsore. Iso ḇefnai fa snonkaku ḇebor sya sfafko snar skaramnis ḇa rosai sawos ḇaido sifrurna!​—Amsal 14:29; 15:28; 19:2.

FARARI ḆEPYUM MA ḆEḆYEḆA

8. (a) Mansei contoh ḇepyum ro ḇaḇefarmku mankun? (b) Rosai ḇefnai fa Yusuf pyampum fafrowes rofyor Potifar swari dembuki? (Mam sonin ro randak artikel ine.)

⁸ Mansei contoh ḇero Refo ḇefasna ḇaḇefarmku mankun? Oser yaiso Yusuf i, Yakub romawa ḇyeja. Pyampum fafrowes rofyor fyararur ro Potifar rum ḇyeja, snon ḇebukor ro Firaun sordade ḇyesya. Potifar swari imarisen faro Yusuf i, snar idoser kaku. Ḇyensewar fa dembuki kali ḇeḇeso. Rosai ḇefnai fa Yusuf bisa pyampum fafrowes ani? Imbude iwasen kwar rosai bon ḇeḇyeḇa nari ḇeḇejadi rofyor iso monda bin ani embuk ḇyena. Inja, rofyor bin ani damk ma pyaw sansun ḇyeja, fyor yaḇeri Yusuf ifrar. Doḇe, ”Moḇsa na yafrur sasar ḇeba ine ma yafrur sasar faro Allah I?”​—Kejadian 39:6, 9; wasya Amsal 1:10.

9. Rariso nyan fa wapampum fafrowes ya?

⁹ Rosai na kofarkor ro Yusuf contoh ḇyeja? Rofyor imbe sifrowes ko fa koyuk Allah sasoser Ḇyedi, fandun fa kopampumna. Rofyor koḇe Saksi-Saksi Yahwe ḇaim, ḇeḇeso rofandu ko sḇensewar fa spampum marasrisen ro anan ḇesyadi, aninem ḇesyadi, anan tabaku, anan sasar narkoba, fararur farḇuk, ma ḇesena. Iba syadiwer rofyor sebaptis kwar, sino sisya sisma fafroweswer fa sifrur roi anna. Rofyor waksma roi ḇeradine ido, kwara pyum resari ḇaḇebati Bedi kuker Yahwe I. Kwara kako fafisu rosai bisa ḇefrur fa wasapi ro fafrowesna, ma ḇinkwanbur fafisu ḇerarirya. (Mazmur 26:4, 5; Amsal 22:3) Rofyor wasma fafrowes ani ido, wor Yahwe I fa ḇyuk fawawinanem ma ḇaḇefarmku mankun insama bisa pampum fafrowes anna.

10, 11. (a) Rosai romawa babo ḇebor sya sisma ro rumfarkor na? (b) Rosai na ḇefnoḇek romawa babo sya fa sipampum fafrowes?

¹⁰ Rosai Yusuf ismana, kirine romawa babo Kristen ḇeborsya kako saksmana. Contoh oser iso Kim i. Bati ro rumfarkor ḇyedi sfawarker snar sifrur fararur farḇuk rofyor sifarkor ḇa. Kim nya fawar ḇemnis rariryaḇa. Snar iḇese kuker si, inja nafrur fa ḇyaḇir ”kyain ro mankundi ma demir monda”. Snar dakḇe pacaranḇa, inja bati ḇyesya skoryaye i. Ḇape, Kim fyasna nya fawawinanem, snar ifawi fafrowes fa kofrur fararur farḇuk fyor koḇe romawa babo ima nsamḇraḇ kaku. (2 Timotius 2:22) Bati ḇesesya sifukeni ḇyeinsos kaker ke roḇa. Inja, nya swaf ḇepyum fa ikofenḇair ḇesi rosai ḇefnai fa dakfrur raris siḇa. Koḇesyowi kaku romawa babo Kristen ḇepampum fararur ḇeamoralna, ma Yahwe I kako nari imarisen faro snemuk sena!

¹¹ Ro Refo nasya kako contoh ro snonkaku ḇepampumḇa fafrowes ro fararur farḇuk. Contoh ine fyasnaḇair bon ḇeḇyeḇa snaro sfasna ḇaḇefarmku mankun ḇa. Rofyor mkosma fafisu ḇemnis Kim ido, mkokarapan contoh ro snonkbor ḇefawinanemḇa ḇeḇefas ro Amsal fasal 7. Mkokarapan kako kuker Amnon i ma roi ḇeḇyeḇa ismana. (2 Samuel 13:1, 2, 10-15, 28-32) Sinan sya bisa sifnoḇek romawa sesya fa sakfasna ḇaḇefarmku mankun ma fawawinanem kuker sfarkor contoh-contoh ḇeḇeyap kwar anna ro ibadat kina sedi.

12. (a) Rariso Yusuf iyokef sneḇaḇir ḇyeja ro ḇedar ḇyesya? (b) Rofafisu ḇemnis rariso fandun fa komkuepen sneḇaḇir koḇena?

¹² Rofafisu ḇesewer, Yusuf ḇyuk farari ḇepyum, isoine rofyor ḇedar ḇyesya srama skoḇes robean ro Masir. Yusuf ikofenḇairḇa manseiso i, insama ifawi rosai ḇero sne sena. Rofyor jadi fa ikofenḇair ima ḇedar kasun skoḇedirya, ibur ma syewar moḇ fa kyanes ro mankundi. (Kejadian 43:30, 31; 45:1) Fyorno ido, naek srar sifrur roi oso ḇefrur fa kofafayaf. Kuker koso farari ḇepyum Yusuf ḇyena fyor fyasna ḇaḇefarmku mankun, nari kawos ḇaido kofrur roi kofafko ro ḇarpurya ḇa. (Amsal 16:32; 17:27) Ḇaido imbude kona karyer sepecat kwar sya. Rarirya ido, komkuepen ko insama kawos awer ḇe i, rofyor kona fandandunḇa. Kakuḇae, ine napyanḇa. Ḇape, ine nari napyan, rofyor koswarepen kofarari Yahwe farari ḇepyum Ḇyena ma kofrur rosai dorna.

13. Farkarkor rosai kosma ro Daud farfyar ḇyeja?

¹³ Ko kako bisa kofarkor ro Raja Daud farari ḇepyum ḇyena. Rofyor Saul ma Syimei sunonef i, Daud imsorḇa ḇaido myunsu su ḇa. (1 Samuel 26:9-11; 2 Samuel 16:5-10) Ḇape, fafisu oso fyasna ḇaḇefarmku mankun ḇa. Imnis raris, rofyor iyokef sasar ifrur kuker Bat-syeba i ma rosai ifrurna faro fabri mankun Nabal fyasnana. (1 Samuel 25:10-13; 2 Samuel 11:2-4) Farkarkor ḇefandun rosai kosmana? Oserya, manfarkin ro sidang fandun fa sifasna ḇaḇefarmku mankun insama sḇuk sasar awer fakamamar sena. Ḇesuruya, kokara awer na kosapi ro fafrowes ya ḇa.​—1 Korintus 10:12.

NYAN ḆEPYAN BISA WAFRURNA

14. Rosai ḇeḇejadi kuker Luigi i, ma rosai ḇefnai fa kofarari i?

¹⁴ Rosai bisa kofrur insama kofasna ḇaḇefarmku mankun ḇepyum syadiwer? Mkorama komam roi ḇekur Luigi i. Oto oso ifrarpum oto ḇyedi. Kakuya, ḇesasarya iso ḇeyun oto ro ḇarpur ḇyedi, ḇape iyuw naba Luigi i ma ḇyensewar fa imbe myuni. Luigi ḇyenadi ḇe Yahwe insama iknon pdef. Ramnai, ḇyensewar fa dawos pyum ḇe sopir ani. Ḇape, snon ani iyuw keri. Inja, Luigi fyas nomor plat ro snon ani oto ḇyedi, ramnai ifrar ibur snon ḇeyuwker ani. Minggu oser ramnai, Luigi ryama kaḇer ḇe bin oso. Ma ikandor snar swari iso sopir ani! Snon ani imai kaku ma dor maf ḇe Luigi snar rosai ifrur kwarna. Doḇe iso na ḇekonfenḇair ḇe perusahaan asuransi Luigi ḇyeja insama sifrurmnis kaḇer Luigi oto ḇyedi. Ma ḇarpurya, snon ani iso farkarkor Refo fnoḇek swari ma imarisen kaku. Snar rosai ḇeḇejadi ine, nafrur fa Luigi ifawi kaku snar iknon pdef ima roi ḇepyum kaku. Ifawi kako rofyor dakmsor ido, nari nun ḇe roi ḇeḇyeḇa kaku.​—Wasya 2 Korintus 6:3, 4.

15, 16. Rariso farkarkor Refo nafnoḇek ko ma kina koḇedi fa kofasna ḇaḇefarmku mankun?

¹⁵ Rofyor kofarkor Refo ro ras ḇe ras ido, nari bisa kofasna ḇaḇefarmku mankun. Koswarepen rosai Allah ikofen faro Yosua i, ”Iḇye kada syap sasoser ine isya pdef ro sḇadon bedi, ma fandun fa wawasya kuker sne ḇerun ro ras ma roḇ, insama ḇefnder awer fa wafrur roi nakam ḇeḇefas kwar ro donna; snar wafrur rarirya ido nari nafnai fa nyan bena imnis ma nari wafararur kuker fawawinanem.” (Yosua 1:8) Ḇape, rariso farkarkor Refo bisa nafnoḇek ko fa kofasna pdef ḇaḇefarmku mankun?

¹⁶ Kofarkor kwar contoh-contoh ro Refo ḇefasnaḇair fainda rosai kosmana snar kofasna ḇaḇefarmku mankun ma roi ḇeḇyeḇa rosai kosmana rofyor kofasnana ḇa. Yahwe iwan sfas contoh-contoh nane ro Refoya faro payamyum koḇedi. (Roma 15:4) Inja, fandun fa kowasya, kofarkor, ma kokarauser farari ḇepyum sena. Kokarapan rosai fainda faro ko ma kina koḇesya. Kor fafnoḇek ro Yahwe insama bisa kofrur anun ḇero Wos Ḇyena. Kankar awer mankunko. Rofyor kofawi kosya kofasna ḇaḇefarmku mankun ḇa ido, koḇenadi ma koḇensewar kaku fa kofrurmnis kaḇerna. (Yakobus 1:5) Kosewar saran-saran ḇefainda ro publikasi koḇena.

17. Rariso sinan sya sifnoḇek romawa sesya fa sakfasna ḇaḇefarmku mankun?

¹⁷ Rariso sinan sya sifnoḇek romawa sesya fa sakfasna ḇaḇefarmku mankun? Sinan sya sifawi romawa sesya sḇeaḇen kuker rari ineḇa. Inja, fandun fa sifarkor romawa sesya rari ine ro farari ḇepyum sena. (Efesus 6:4) Rofyor mam romawa Bedi fyasna ḇaḇefarmku mankun ḇa ido, bisa wafuken mankundaw fasna contoh ḇepyum kwar ke roḇa. Buk farari ḇepyum rofyor ḇedinas ro ras ḇe ras, waso fananjurya pdef, ma farkin ibadat ro kina. Wamkak awer fa pampun rosai sor na! Yahwe I monda ryir batas faro Adam ma Eva su. Batasan ani kakuya bisa nafnoḇek su fa suḇesyowi Yahwe papoik Ḇyena. Rarirya kako, rofyor sinan sya sḇuk disiplin ḇe romawa sesya ma sḇuk farari ḇepyum ido, na nfarkor si fa sakḇesyowi papoik ro sinan sesya, inja napyan ḇesi fa sakfasna ḇaḇefarmku mankun. Ḇaḇesyowi faro Allah papoik Ḇyena ma saswar faro sasoser Ḇyena ima roi ḇemaeja bisa wafarkorna ḇe romawa ḇesi.​—Wasya Amsal 1:5, 7, 8.

18. Rosai ḇefnai fa kokinfir bati ḇepyum?

¹⁸ Koinema sinan ke roḇa, kokame fandun fa kokinfir bati ḇepyum. Rofyor bati koḇedi iswar Yahwe ido, nari sifnoḇek ko fa kona cita-cita ḇepyum ma koḇinkwanbur roi ḇesamswenna. (Amsal 13:20) Farari ḇepyum sena bisa nadif ko fa kofarari ḇaḇefarmku mankun sena. Ma farari ḇepyum koḇedi bisa nadif si kako. Faindaya, nari nafnoḇek ko fa kofasna ḇaḇefarmku mankun, inja kosma ḇaḇeaski ro kankenem koḇena ma kosma kyaremso ro Allah I.