”Fandun fa Waḇeḇri . . . ma Wafararure”

1, 2. (a) Fararur ḇefandun rosai Salomo ismana? (b) Rosai ḇefnai fa Daud ikyar mankunḇa faro Salomo i?

SALOMO isma fararur ḇeba kaku. Yahwe kyinfir i fa ḇyebukor ro ḇaḇeḇawes bait ro Yerusalem. Ineiso fararur ḇaḇeḇawes ḇefandun kaku ro sarisa er ansi! Bait ani nari ’isnai ma ipyum’ ma nari sifawi snar padakduk ḇyena. Ḇefandun syadi yaiso bait ani nari ḇye ”Yahwe rum ḇyedi, Allah ḇenapes”.​—1 Tawarikh 22:1, 5, 9-11.

² Raja Daud ikyar Allah nari ifnoḇek Salomo i. Ḇape, ifawi Salomo ḇyabo kaker ma nya fawawi nabor ḇa. Nari Salomo ḇyeḇri fa ifrur fararur ani ke? Ḇaido, na pyampumna snar ḇyabo kaker ma fawawi ḇyena nabor ḇa ke? Insama bisa ifrur fararur ani, fandun fa ḇyeḇri ma ifrurḇeri fararur ani.

3. Rosai Salomo fyarkor ro kmari?

³ Kakuḇae, Salomo fyarkor nabor ḇaḇeḇri ro kmari, Daud i. Rofyor Daud ḇyesnonkbor kaker, myun aiwan ḇeyan ḇepek ḇeyarek kmari domba-domba ḇyesya. (1 Samuel 17:34, 35) I kako imkak ḇa rofyor myamunmun kuker raksasa ḇesambraḇ ma ḇefrur makakak kaku, Goliat i. Kuker fafnoḇek ro Allah ma karui oso, Daud myun Goliat i.​—1 Samuel 17:45, 49, 50.

4. Rosai ḇefnai fa Salomo fandun fa ḇyeḇri?

⁴ Daud ima snonkaku ḇemnis kaku fa ḇeḇuk samambraḇ faro Salomo i, insama ḇyeḇri fa ḇyawes bait. (Wasya 1 Tawarikh 28:20.) Rofyor Salomo imkak ido, fararur ani nari syambraḇ fa ifrurna ḇa. Makakak ḇyeja kako bisa nafrur fa iryarḇa. Makakak ḇyena naḇyeḇa syadi rofyor ifrurmnis fararur ḇyena ḇa.

5. Rosai ḇefnai fa kofandun ḇaḇeḇri?

⁵ Raris Salomo i, ko kako kofandun fafnoḇek ro Yahwe insama koḇeḇri. Inja, bisa kofrur fararur ḇyuk ḇeko na. Mkorama kofarkor farari ḇepyum ro snonkaku ḇeḇeso ḇeḇri rofafisu iwara. Ramnai, bisa kokara nyan rariso insama ko kako bisa kofasna ḇaḇeḇri ma kofrurmnis fararur koḇena.

FARARI ḆEPYUM RO ḆAḆEḆRI

6. Rosai ḇefrur fa wamanen kaku Yusuf ḇaḇeḇri ḇyeja?

⁶ Yusuf fyasna ḇaḇeḇri ḇyeja rofyor Potifar swari dembuki fa denfus i. Ifawi kwar nari isma samswen ro kankenem ḇyeja, rofyor pyampum Potifar swari marisen ḇyena. Ḇape, imkak ma isusuḇa. Kuker ḇri pyampum ḇerina.​—Kejadian 39:10, 12.

7. Rariso Rakhab fyasna ḇaḇeḇri? (Mam sonin ro randak artikel ine.)

⁷ Rakhab ima contoh ḇesewer. I kako bin ḇeḇri kaku. Rofyor manpaf Israel risuru ḇesun fasis ḇe Yerikho ḇerama ḇe rum ḇyedi, imbude na imkak ma imewer ifnoḇek sundi. Ḇape, snar ikyar faro Yahwe I, inja iyokef snon ansuya ma ifnoḇek su fa sufrarbur moḇ ani. (Yosua 2:4, 5, 9, 12-16) Rakhab ikyar Yahwe iso Allah ḇekaku. Ma ikyar Yahwe nari ḇyuk mnu ḇeba ani faro snonkaku Israel sya. Imewer makakak ḇyeja faro snonkaku, raja Yerikho fnoḇek sordade ḇyesya nafnai fa syambraḇ werḇa. Ḇape, ifrur roi nakam kuker ḇri, inja Rakhab fnoḇek kina ḇyesi sisma fasasparya.​—Yosua 6:22, 23.

8. Rosai fainda ro Yesus ḇaḇeḇri ḇyeja faro manwawan sya?

⁸ Yesus manwawan ḇesoasuser ḇyansi kako sifasna ḇaḇeḇri. Ine snaro smam Yesus fyasna ḇaḇeḇri, inja simarisen kako sifarari ḇaḇeḇri ḇyena. (Matius 8:28-32; Yohanes 2:13-17; 18:3-5) Rofyor snonkaku Saduki imbe sidwarek si, manwawan sya simewer sisusu fa sḇuk farkarkor kuker Yesus i.​—Kisah 5:17, 18, 27-29.

9. Rosai kofarkor ro 2 Timotius 1:7 kuker ḇaḇeḇri?

⁹ Yusuf, Rakhab, Yesus ma manwawan sya sun snemuk fa sifrur rosai ḇenapes. Sifasna ḇaḇeḇri snar sikyar mankunsi ḇa, ḇape snar sikyar faro Yahwe I. Rofyor kofandun ḇaḇeḇri, fandun fa kokyar faro Yahwe I, mboi faro mankunko awer. (Wasya 2 Timotius 1:7.) Mkorama kowawos rariso kofasna ḇaḇeḇri ro kina ma sidang.

FAFISU ḆEFANDUN ḆAḆEḆRI

10. Rosai ḇefnai fa romawa babo sya sifandun ḇaḇeḇri?

¹⁰ Romawa babo Kristen sya, sisma fafisu nabor ro kankenem sena ḇefrur fa sifandun ḇaḇeḇri. Bisa sifarkor ro Salomo ḇaḇeḇri ḇyena rofyor ifrur snemuk kuker fawawinanem fa ifrurmnai ḇaḇebawes bait ya. Kakuḇae, romawa babo sya sifandun fafnoḇek ro sinan sesya. Ḇape, snemuk ḇefandun syadi nasya sun ro mankunsi. (Amsal 27:11) Fandun fa sḇeḇri rofyor skinfir mansei bati seja, hiburan srower ma smamna, ma fafisu risai nari sḇebaptis. Si kako fandun fa sḇeḇri insama sisren ro moralna. Inja, fandun kaku sḇeḇri snaro snemuk nari sifrurna neḇese kuker marisen ro mankun ḇeyonef Allah, isoine Setan i.

11, 12. (a) Rariso Moses fyasna ḇaḇeḇri? (b) Rariso romawa babo bisa sifarari Moses i?

¹¹ Romawa babo sya fandun fa sifrur snemuk rofyor skinfir cita-cita sena. Ro sup ḇeḇeso, romawa babo sya sidif si fa sisewar farkarkor ḇekaki insama sisma fararur bena ḇaḇyak ḇekaki. Ro sup bondi ḇesena, samswen fa sisewar pipi ma roḇean. Inja, romawa babo sya imbude sḇaḇir fandun fa sisewar pipi fa sḇukifnoḇek sinan sesya. Mkosma fafisu ḇemnis radine ido, mkokarapan Moses farari ḇepyum ḇyena. Snaro Firaun inai ḇyedi duni fa fyani, inja bisa ḇyesnonkaku bena arasai nabor kaku ḇaido sifawi i ro mnu nakam. Mkokarapan kada dafdif isma ro kina ḇyesya, guru-guru, ma ḇeḇuk farkarkor ḇe i ro Masir! Isma dafdif rariryano, Moses fyasna imkak ḇa ma kyinfir fa ḇye Allah kawasa Ḇyesi. Rofyor ibur Masir ma arasai ḇyenakam, kuker sne ḇesiper ikyar faro Yahwe I. (Ibrani 11:24-26) Bonya, Yahwe ḇyuk barakas nabor ḇe i ma rofafisu iyama nari ḇyuk barakas nabor syadiwer.

¹² Rofyor romawa babo simkakḇa fa skinfir cita-cita sena fa sifarmyan ḇe Yahwe ma sefakapon Karajan Ḇyedi ido, Yahwe nari ḇyebarakas si. Nari fyasos fandandun sena ma kina sesya. Ro abad randak, snon oso ḇenirḇe Timotius ryir ro ḇarpon fararmyan faro Yahwe ro kankenem ḇyeja. Ma mko kako bisa mkakfrur rarirya.a (Mam fas-fas kasun ro sop.)—Wasya Filipi 2:19-22.

13. Rosai imbesrar oso ismana snaro fyasna ḇaḇeḇri?

¹³ Imbesrar ḇebabo oso ro Alabama, Amerika Serikat, fyandun ḇaḇeḇri fa kyinfir cita-cita rohani ḇyeja. Fyas, ”Rofyor yababa, ayama yamamyai. Yamai kaku fa yawos kuker snonkaku ḇesesya ro Balai Kerajaan, iba syadiwer yanuk kedwa ro snonkaku yafawi ḇaim sya.” Ḇape, kuker fafnoḇek ro sinan ḇyesuya ma naek srar ro sidang, inja bisa daksun ro fararur perintis biasa imnis roi imarisenna. Doḇe, ”Dunya Setan ine imarisen insama kosewar farkarkor ḇekaki, snonsnon, pipi, ma arasai nabore.” Ḇape, ifawi kako snonkaku ḇebor sya, jadi fa sisma roi nakamḇa ma roi anna bisa nafrur fa sḇestres ma sesanekar. Ikofenwer, ”Snaro yafarmyan ḇe Yahwe I, inja yasma aski ma sneprei kaku.”

14. Rofafisu rosai monda sinansya sifandun ḇaḇeḇri?

¹⁴ Sinan Kristen sya fandun fa sifasna ḇaḇeḇri kaku. Imnis raris, bos Bedi iwan Au fa wafararur syadiwer ro ras-ras fasos kwar faro ibadat ro kina, dinas, ma fananjur. Fandun ḇaḇeḇri fa pampum fararyor ro bos Bedi insama bisa buk farari ḇepyum ḇe romawa ḇesi. Ḇaido, wadwarek romawa ḇesi fa sifrur awer roi ḇeḇeso, ḇape sinan Kristen ḇesesya sidwarek romawa sesyaḇa fa sifrur roi ḇemnis. Rofyor romawa ḇesi sifuken rosai ḇefnai fa wadwarek si, bisa wakofenḇair pyum ḇesi ke?

15. Rariso Mazmur 37:25 ma Ibrani 13:5 nafnoḇek sinansya?

¹⁵ Kofandun ḇaḇeḇri fa kofnoḇek romawa koḇesya insa skinfir ma srir ro ḇarpon cita-cita rohani sena. Imnis raris, sinan ḇeḇeso imbude simewer romawa sesya saksun ro fararur perintis, sifarmyan ro moḇ ḇefandun fafnoḇek, sifarmyan ro Betel, ḇaido sifnoḇek fararur ḇaḇebawes Balai Kerajaan ma Balai Kebaktian. Imbude simkak romawa sesya na sifaduru si ḇa ḇaido mankunsi rofyor sḇesinan kwar. Ḇape, sinan ḇefawinanem nari ḇyeḇri ma ikyar Yahwe nari ifrur asas Ḇyena. (Wasya Mazmur 37:25; Ibrani 13:5.) Rofyor sinansya sifasna ḇaḇeḇri ma sikyar faro Yahwe ido, ine nari nafnoḇek romawa sesya sakfrur roi ḇeradirya.​—1 Samuel 1:27, 28; 2 Timotius 3:14, 15.

16. Rosai sinan ḇeḇeso sifrur insa sifnoḇek romawa sesya fa skinfir cita-cita rohani sena, ma rosai faindaya faro romawa sesya?

¹⁶ Imbeswa oso ro Amerika Serikat sufnoḇek romawa suḇesya fa srir ro ḇarpon fararmyan ḇe Yahwe I. Ḇeḇesnonya doḇe, ”Rofyor romawa nuḇesya sifawi simbran ḇaido sawos ḇaim, nufawar ḇesi kwar raryaḇ ro fararur perintis ma fafnoḇek nuḇuk ḇe sidangya. Kirine, iso roi skinfir ḇe cita-cita sena.” Ikofenwer snar romawa nuḇesya sisun kwar ro fararur perintis, bisa spampum farawrowes ro dunya Setan ma srir ro ḇarpon fararmyan ḇe Yahwe I. Naek oso bena romawa risuru ikofen, ”Sinan ḇebor sya sḇensewar insama romawa sesya bisa sisma roi ḇepyum syadi ro olahraga, farkarkor, ḇaido rosai romawa sesya simarisenna. Ḇape, ḇepyum syadi yaiso rofyor koḇensewar fa kofnoḇek romawa koḇesya sisma fasfesepen ḇepyum kuker Yahwe I. Numarisen kaku snar romawa nuḇesya sisma cita-cita rohani sena kwar, ḇesyadi yaiso snaro nufnoḇek si.” Sinan ḇefnoḇek romawa sesya fa skinfir ma sisma cita-cita rohani sena, nari nafrur Yahwe imarisen kaku.

ḆAḆEḆRI RO SIDANG

17. Rariso naek srar ro sidang sifasna ḇaḇeḇri?

¹⁷ Fandun fa kofasna ḇaḇeḇri ro sidang. Imnis raris, penatua sya fandun sḇeḇri fa sifrurmnis kasus ro sasar ḇeba ḇaido rofyor naek srar sya sro situasi medis ḇemarḇak kaku. Penatua ḇeḇeso srama ḇe bui fa sḇuk farkarkor Refo ḇe snonkaku ḇemarisen sya ḇaido sifrur fananjur. Naek srar ḇefarḇuk ḇaim sya, sisma swaf nabor fa sakfasna ḇaḇeḇri ro fararmyan sena ḇe Yahwe I. Bisa sakḇe perintis, sra ḇe moḇ ḇefandun fafnoḇek, sifnoḇek program Rancang/Bangun Setempat, ma sakḇe daftar ro Sekolah bagi Penginjil Kerajaan. Iba syadiwer, ḇeḇeso sya sor si fa sakso ro Sekolah Gilead.

18. Rariso imbesrar ḇeḇesinan kwar bisa sifasna ḇaḇeḇri?

¹⁸ Koswar imbesrar ḇeḇesinan kwar sya, ma komarisen kaku snar sisya kuker ko ro sidang! Kakuḇae, jadi fa sifrur roi nabor werḇa imnis ro fafisu iwara. Ḇape, bisa sifasna ḇaḇeḇri ma sifrur fararur sena. (Wasya Titus 2:3-5.) Imnis raris, imbesrar ḇeḇesinan kwar oso fandun fa ḇyeḇri rofyor penatua sori fa dawos ḇe imbesrar ḇebabo oso kuker nyan rariso isansun pyumi. Ipok imsor imbesrar aniḇa kuker nyan isansuni rai. Ḇape, kuker sne ḇenaḇye, ifnoḇeki fa kyara nyan isansuni bisa nawyaye snonkaku ḇesesya. (1 Timotius 2:9, 10) Rofyor imbesrar ḇeḇesinan ansya sifnoḇek sidang kuker saswar, sidang yakako nari syambraḇ syadi.

19. (a) Rariso naek ḇeḇebaptis kwar sya bisa sḇeḇri? (b) Rariso Filipi 2:13 ma 4:13 bisa nafnoḇek naek sya fa sḇeḇri?

¹⁹ Naek ḇeḇebaptis kwar sya sakfandun ḇaḇeḇri fa sifrur fararur sena. Rofyor simarisen sakfarmyan ḇe hamba pelayanan ḇaido penatua ido, sidang nari sisma fainda nabore. (1 Timotius 3:1) Ḇape, sino sisya sḇeḇirḇar fa suffarmyam fakamamar nane. Naek oso imbude ifrur sasar ro fafisu iwara, inja ḇyaḇir ḇyenaḇyeḇa fa ifarmyan ḇe hamba pelayanan ḇaido penatua. Ḇaido Naek oso imbude ḇyaḇir nya samambraḇ fa duf fararur ani ḇa. Rofyor ḇaḇir rarirya ido, Yahwe bisa ifnoḇek Au fa wamkakḇa. (Wasya Filipi 2:13; 4:13.) Mkoswarepen Moses farari ḇyena. I kako ḇyaḇir syambraḇ ḇa fa ifrur rosai Yahwe dor na. (Keluaran 3:11) Ḇape, kuker fafnoḇek ro Yahwe I, bisa ḇyeḇri ma ifrur fararur ḇyena. Rariso naek ḇeḇebaptis kwar sya bisa sḇeḇri raris Moses i? Fandun fa sḇenadi sor fafnoḇek ro Yahwe ma siwasya Refo ro ras ḇe ras. Fandun fa siwasenkara farari ḇepyum ro snonkaku ḇeḇri ḇeḇefas ro Refoya. Si kako kuker sneḇerun fandun fa sor farkarkor ro penatua sya ma simarisen sḇuk fafnoḇek rosai monda sidang fyandunna. Nkomarisen insama naek ḇeḇebaptis kwar sya sifasna ḇaḇeḇri ma fararur marḇak sena ro sidang!

”YAHWE . . . FYARKIN AU”

20, 21. (a) Daud ḇyuk swarapepen rosai ḇe Salomo i? (b) Rosai bisa kokyar rofyor koḇeḇri?

²⁰ Raja Daud ḇyuk swarapepen ḇe Salomo snar Yahwe nari fyarkin Salomo isof ḇaḇebawes bait imnai. (1 Tawarikh 28:20) Kakuḇae, Salomo iwasenkara wos anna, ifawi ḇyabo kaker ma nya fawawi nabor ḇa raryano, pyampum fararur Yahwe ḇyuk ḇe i na ḇa. Ḇape, fyasna ḇaḇeḇri kaku. Kuker fafnoḇek ro Yahwe I, bisa ḇyawes bait ḇepyum ma ḇesnai kaku ro swaf taun rifik paik riwonem.

²¹ Yahwe ifnoḇek Salomo ma I kako bisa ifnoḇek ko fa kofasna ḇaḇeḇri ma kofrur fararur koḇena ro kina ḇaido ro sidang. (Yesaya 41:10, 13) Rofyor koḇeḇri fa kofarmyan ḇe Yahwe ido, kokyar na ḇyebarakas ko ro kirine ma rofafisu iwama. Inja, fandun fa ’koḇeḇri . . . ma kofararure’.