Munara Swarapepen Nun Ḇaḇeoser faro Allah Kawasa Ḇyesya

1, 2. Ro 2018, munara rosai ḇeyun ḇaḇeoser faro ko kuker nyan ḇepyum kaku, ma rosai ḇefnai ya? (Mam sonin ro randak artikel ine.)

RO 31 Maret 2018, snonkaku syaran ma syaran srama ro munara ḇeḇefrur ro taun oser kali oser. Rofyor orisyun kwar, Saksi Yahwe ma snonkaku ḇesesya siryur kayam fa siswarepen farsarser Yesus ḇyuk ḇe snonkaku sya. Ro taun ḇe taun Swarapepen Marmar Kristus iryur snonkaku sya sḇeoser kuker nyan ḇepyum kaku. Ine iḇesebur munara sariryakam!

² Yahwe ma Yesus na sumarisen kaku rofyor sumam snonkaku syaran ma syaran ro supswan ḇesiper sakso ro munara ḇefandun kaku ine. Refoya fyasnaḇair, ”snonkaku sibor syadi wer — isof snon oso nari kyor dandonek sejaḇa! Sikada snonkaku ro ersya kam, keret, kawasa ma wosna,” sibras, ”Korer koḇeja ryama ro Allah koḇedi, ḇekain ro karapesa ḇaḇesasoser ḇyedi, ma ro Rumkun Domba ani.” (Wahyu 7:9, 10) Munara Swarapepen ro taun ḇe taun ima ipyum kaku snaro snonkaku ḇebor sya sḇesyowi Yahwe ma Yesus su faro roi ḇeba sufrur kwarna!

3. Fakfuken rosai monda nari kokarem ro artikel ine?

³ Ro artikel ine, nari kosmai kankarem faro fakfuken rifiak ḇeuser nane: (1) Rariso kofasos mankunko faro munara Swarapepen insama kosma fainda ro munara ani? (2) Rariso munara Swarapepen nun ḇaḇeoser faro Allah kawasa Ḇyesyakam? (3) Rosai na yafrurya insama yafaduru ḇaḇeoser ro fandu Allah kawasa Ḇyesya? (4) Fafisu oso nari kofrur munara Swarapepen werḇa ke? Rarirya ido, fafisu risai?

KOFASOS MANKUNKO ROFYOR MUNARA SWARAPEPENYA ḆAIM

4. Rosai ḇefnai fandun kaku koso munara Swarapepen?

⁴ Rosai ḇefnai fa fandun kaku koso munara Swarapepen ine? Snar munara ine fyasnaḇair kosyom faro Yahwe I kako. Na kokyar Yahwe ma Yesus sumam kaku rosai snonkaku sya sifrurna insama sakso ro munara ḇefandun kaku ro taun ine. Komarisen Yahwe ma Yesus sumam koso ro munara Swarapepen ani. Ḇape jadi fa koso ḇa snar koduf ḇaido roi ḇesena. Rosai kofrurna nfasnaḇair munara ani ḇyefandun kaku ḇeko, koḇuk sano ḇe Yahwe I fa fyas snonsnon koḇena ro ”syap swarapepen” Ḇyedi. Syap ani kako sap i ḇe ”syap kankenemya”. Ro syap ani naser snonsnon ro snonkaku nari ḇesma kankenem fyoroya.​—Maleakhi 3:16; Wahyu 20:15.

5. Ro minggu munara Swarapepen yaḇaim, rariso ’Kokukeḇ kaku ḇeri koisya kokenem imnis kankarem kakyar koḇena’?

⁵ Ro minggu munara Swarapepen yaḇaim, bisa koḇenadi ma kowasenkara fasfesepen koḇena kuker Yahwe I syambraḇ ke roḇa. (Wasya 2 Korintus 13:5.) Rasul Paulus ikofen faro snonkaku Kristen, ”Mkokukeḇ kaku ḇeri naek srar mkoisya mkokenem imnis kankarem kakyar mkoḇena.” Rariso kofrurna rai? Bisa kofuken mankunko, ’Yakyar kaku snar Yahwe iso ḇekinfir organisasi ine fa ifrur marisen Ḇyedi ke? Yafrur roi ḇepyum syadi ro ḇaḇeḇaryas ma rofyor yaḇuk farkarkor kuker ankankinem ḇeḇyeya ke? Ro rosai yafrurna, yakyar kaku snar kokenem ro ras-ras ḇepupes ma papupes Setan dunya ḇyeja fyanam kwar ke? Kakakyar yedi faro Yahwe ma Yesus syambraḇ kaker imnis randak yafarmyan ḇe Yahwe I ke?’ (Matius 24:14; 2 Timotius 3:1; Ibrani 3:14) Kokara kankarem ro fakfuken-fakfuken anna ido, nari nafnoḇek ko fa ’kokukeḇ’ manseiso ko.

6. (a) Nyan oser rosai fa kosma kankenem fyoroya? (b) Rariso penatua oso ifrur fasasos faro munara Swarapepen taun ḇe taun, ma rariso kakfrur rarirya?

⁶ Nyan oser kofasos mankunko faro munara Swarapepen ine iso kuker kowasya ma kokarauser artikel ḇefasnaḇair rosai ḇefnai fa munara ine ḇyefandun kaku. (Wasya Yohanes 3:16; 17:3.) Nyan oser fa kosma kankenem fyoro yaiso kuker komamḇir Yahwe I ma kona kakyar faro Rumkun Ḇyedi, Yesus i. Ro fafisu munara Swarapepen ani fyanam, bisa kokinfir farkarkor Refo ḇefnoḇek ko fa kofanam syadi ḇe Yahwe ma Yesus su. Ineiso roi naek oso ḇefarmyan ḇe penatua fyoro kwar ifrurna. Ro taun ḇe taun kwar iryur artikel Ḇaryas ḇewawos kuker Swarapepen marmar Kristus ma saswar Yahwe ma Yesus sufasnai ḇeko na. Ro minggu-minggu munara Swarapepen yaḇaim, iwasya kaḇer artikel anna ma kyarauser kaku rosai ḇefnai fa munara ine fyandun kaku. Fyorno ido, iryur wer oser ḇaido suru artikel ḇebabo ismana. I kako iwasya ma kyarauser ḇaḇewasya Refo faro munara Swarapepen. Penatua ani ikofen, kuker ifrur rarirya, ifarkor roi ḇebabo ro taun ḇe taun. Ḇefandun syadiya, farkarkor anna nafnoḇek i fa iswar syadi Yahwe ma Yesus su. Rofyor kakfrur rarirya ido, nari ko kako koswar syadi Yahwe ma Yesus su. Nari kokofen kasumasa kako faro rosai Yahwe ma Yesus sufrurna ma nari kosma fainda ḇebor ro munara Swarapepen ya.

MUNARA SWARAPEPEN NAFNOḆEK KO FA KOḆEOSER

7. (a) Rosai Yesus nadi ḇyeja ro Anan Roḇ Tuan ḇerandakya? (b) Rosai ḇefasnaḇair Yahwe kyarem Yesus nadi ḇyeja?

⁷ Rofyor sifrur randak Anan Roḇ Tuan, Yesus ḇyenadi kuker kakaku. Ḇyenadiwarek fasfesepen ḇyena kuker Kmari. Yesus ḇyenadi kako insama manfamyan ḇyesya sakḇeoser. (Wasya Yohanes 17:20, 21.) Yahwe kyarem nadi ro Rumkun iswar kaku ani. Iḇesebur kuker munara ḇesena, Swarapepen ine fyasnaḇair snaro Saksi-Saksi Yahwe sya sḇeoser. Ro ras ani, snonkaku syaran ma syaran ḇerama ro er, ma kif ḇesnai ḇese siryur kayam fa sifasnaḇair sikyar Yahwe iso ḇewan Rumkun Ḇyedi. Ro moḇ ḇeḇeso, snonkaku ḇerama ro er ḇeḇese sakfrur munara ḇaḇeari kayamyame, ḇape snonkaku ḇesesya skara ima roi ḇemnis ḇa. Ḇape, Yahwe ma Yesus sukara rarirya ḇa. Faro suma, ḇaḇeoser koḇena ro munara Swarapepen ipyum syadi.

8. Anun rosai Yahwe ikofen ḇe Yehezkiel i?

⁸ Snar koine Yahwe kawasa Ḇyesya, inja kokandor ḇaḇeri snar koḇeoser kuker nyan ḇeradirya. Yahwe ḇyardi ḇaḇeoser ine ro wos Ḇyena faro Yehezkiel i. Ikofen ḇe Yehezkiel insama dun ankyon risuru, oserya ”faro Yehuda” ma oserya ”faro Yusuf”, ramnai ankyon risuru ansuya ḇyesufa suḇeoser. (Wasya Yehezkiel 37:15-17.) ”Pertanyaan Pembaca” ro Menara Pengawal Juli 2016 fyasnaḇair, ”Roro nabi Yehezkiel i, Yahwe ḇyardi nari kawasa Ḇyesya skaḇer ḇe Sup Ḇaḇeasas ma nari siryur ḇe er oser. Ḇardadi ani ikofen kako si ḇesyom faro Allah ro ras-ras ḇepupes ine nari siryur ḇe kawasa oser.”

9. Ro swaf munara Swarapepen, rariso komam ḇaḇeoser Yehezkiel ḇyardina?

⁹ Ro randak taun 1919, Yahwe ḇyeorganisasi ma iryur snonkaku bena ramrem syakam ḇeriḇa. Sima raris ankyon ”faro Yehuda”. Ramnai, snonkaku bena saneraro ḇekenem fyoro ro supswan sḇeoser kuker bena ramrem sya. Snonkaku bena saneraro ḇekenem ro supswan sima raris ankyon ”faro Yusuf”. Yahwe ḇyeasas nari ”ifrur su fa suḇe ankyon oser” ro ḇramin Ḇyeja. (Yehezkiel 37:19) Ifrur snonkaku bena ramrem sya ma ’domba-domba ḇese’ sḇe ’nai oser’. (Yohanes 10:16; Zakharia 8:23) Kirine, raryur risuru suine suḇeoser ma sufarmyan kayam ḇe Yahwe I. Ma suna Raja oser, isoine Yesus Kristus ḇeḇeyap ro bardadi Yehezkiel ḇe ”manfamyan Daud”. (Yehezkiel 37:24, 25) Taun ḇe taun ro munara Swarapepen ya, koryur kayam fa koswarepen Yesus marmar ḇyeja ma komam ḇaḇeoser ro raryur risuru suine imnis raris Yehezkiel ḇyardina. Ḇape, rosai bisa kofrurya insama kofaduru ḇaḇeoser rofandu Allah kawasa Ḇyesya?

ROSAI KOFRURYA INSAMA KOFADURU ḆAḆEOSERYA?

10. Rariso kofaduru ḇaḇeoser rofandu Allah kawasa Ḇyesya?

¹⁰ Rosai nyan ḇerandak bisa kofrurna insama kofaduru ḇaḇeoser rofandu Allah kawasa Ḇyesya? Koḇensewar kaku fa kofasna sne ḇerun. Rofyor Yesus isya ro supswan, ikofen ḇe manfamyan ḇyesya insama sifasna sne ḇerun. (Matius 23:12) Snonkaku ḇero supswan ine smam mankunsi sisyadi ro ḇesesya. Ḇape, rofyor kona sne ḇerun ido, nari koḇesyowi naek ḇefarkin ro sidang sya ma nari kosouser ananun sḇukna. Kuker rarirya sidang nari ḇyeoser. Ḇefandun syadiya, rofyor kofasna sne ḇerun pdef nari kofrur Allah imarisen, snaro ”isampum ḇemararessya, ḇape iswar ḇerun snesya”.​—1 Petrus 5:5.

11. Rofyor kowasenkara knam ro roti ma anggur ḇero munara Swarapepen, rariso nafnoḇek ko fa kofaduru ḇaḇeoserya?

¹¹ Rosai nyan ḇesuru fa kofaduru ḇaḇeoserya? Kuker kowasenkara knam ro mamami ma anggur. Fandun fa kofrur roi ine rofafisu munara Swarapepenya ḇaim ma iba syadiwer ro roḇ Swarapepen Marmar Kristus. (1 Korintus 11:23-25) Roti tidak beragi ḇaido mamami ḇepisenḇa fyasnaḇair Yesus kankenem ḇenapes fyarser kwarna. Anggur ḇerik fyasnaḇair Yesus rik ḇyedi. Fandun fa kowasen kaku kuker roti ma anggurna. Fandun fa koswarepen farsarser Yesus ḇyedi nfasnaḇair fasasna saswar risuru ḇeba kaku. Yahwe ḇyuk Rumkun Ḇyedi faro ko, ma Yesus ḇyuk kankenem ḇyeja faro ko. Rofyor kowasenkara saswar suḇena ido, ine nari nafnoḇek ko fa koswar syadi su. Ma saswar koḇena faro Yahwe nari nsambraḇser ḇaḇeoser koḇena.

12. Ro farfyar kuker raja ma women ḇyesya, rariso Yesus fyasnaḇair Yahwe ima imarisen koḇuk ampun ḇe ḇesesya?

¹² Nyan ḇekior rosai ḇefnoḇek ko fa kofaduru ḇaḇeoserya? Kuker komarisen koḇuk ampun faro ḇesesya. Kofrur rarirya ido, kofasnai kasumasa koḇena faro Yahwe snar ḇyuk ampun ḇeko snar sasar koḇena roro farsarser Yesus ḇyedi. Insama fyasnai ḇaḇeampun ima roi ḇefandun kaku, Yesus fyawar raja oso ma women ḇyesya. Kowasya ro Matius 18:23-34 ma kofuken mankunko, ’Yamarisen yafrur rosai Yesus fyarkor na ke? Yaḇekaḇaḇaḇ ma yafawi mnis naek srar ayesya ke? Yamarisen yaḇuk ampun faro snonkaku ḇefrur dosam ayake?’ Sasar ḇeḇeso iba syadibur ḇesena. Ma sasar ḇeḇeso samswen kaku faro snonkaku ḇenapesḇa koine fa koḇuk ampun. Ḇape, Yesus farfyar ḇyedi nfarkor ko rosai Yahwe imarisen insa kofrurna. (Wasya Matius 18:35.) Yesus fyasnabos kaku snar Yahwe nari ḇyuk ampun ḇeko ḇa rofyor koḇuk ampun ḇa faro naek srar ḇembror kwar sya. Ineiso roi ḇefandun kaku fa kowasen pyumna. Insama kofaduru ma kokadaunwarek ḇaḇeoser ḇemaeja koḇena, fandun fa koḇuk ampun ḇe snonkaku ḇesesya raris Yesus fyarkor ḇeko na.

13. Rariso kofaduru ḇaḇeoserya rofyor koḇedame kuker snonkaku ḇesesya?

¹³ Rofyor koḇuk ampun faro ḇesesya, kofaduru ḇaḇeaski kuker naek srar koḇesya. Manwawan Paulus ikofen fandun fa kofararur marḇak insama kofaduru ḇaḇeoser ma ḇaḇeaski kuker snonkaku ḇesesya. (Efesus 4:3) Inja, fafisu munara Swarapepen ya, iba syadiwer ro roḇ munara ani ḇyerak, kokara pyum kaku rariso kofrur pyum snonkaku ḇesesya. Kofuken faro mankunko, ’Snonkaku ḇefawi ayansya na smam yamsor werḇa faro snonkaku ḇefrur dosam sne ayedi ke? Na snonkaku sya smam yaḇensewar fa yafaduru ḇaḇeoser ma aski ya ke?’ Ine fakfuken ḇefandun kaku fa kokarana.

14. Rariso kofasnai snar ’Kokḇaḇyae ko ro saswar’?

¹⁴ Nyan ḇefiak rosai ḇefnoḇek ko fa kofaduru ḇaḇeaski ya? Isoine kuker kofarari Yahwe I rofyor kofasna saswar ya. (1 Yohanes 4:8) Na kokofen ḇaḇeri, ”Na yakaḇaḇaḇ faro naek srar sya, ḇape fandunḇa yaswar si.” Rofyor kokara radirya, kyurfasna koso ḇa Paulus ananun ḇyeja fa ’Kokḇaḇyae ko ro saswar.’ (Efesus 4:2) Paulus ikofen monda ḇa fandun fa ’kokḇaḇyae ko’ ḇape fandun fa kofrurna ’ro saswar’. Wos risuru suine suḇeseyae. Ro sidang snonkaku sya srama ro moḇ ḇeḇeseyae, ḇape Yahwe dunsi faro I. (Yohanes 6:44) Inja, Yahwe myam alasan ḇepyum nabor fa iswar si. Rofyor naek srar koḇesi Allah iswar si, rariso na kokofen sima fandun ḇa fa koswar si? Fandun fa koswar si, imnis raris Yahwe dor ro kona.​—1 Yohanes 4:20, 21.

FAFISU RISAI NA KOFRUR MUNARA SWARAPEPEN ḆEPUPES YA?

15. Rariso kofawi na kofrur munara Swarapepen ḇepupesya?

¹⁵ Fafisu oso nari koso munara Swarapepen ḇepupesya. Rariso kofawina? Paulus ikofen ḇe snonkaku Kristen ḇesma ramremsya siswarepen Yesus marmar ḇyeja taun ḇe taun, kuker ’siḇaryas [Tuan] marmar ḇyedi isof iwerma’. (1 Korintus 11:26) Ro ḇardadi ḇyedi kuker ras ḇepupes dunya ine, Yesus dawos kako kuker ’raramuma’ ḇyeja. Kuker ḇaḇekandera nari ḇeramaya, doḇe, ”Rofyor ani nari aḇyair Rumkun Snonkaku fyasnai ro nanki ma kawasa kam ro supswan ine nari skanes ma nari smam Rumkun Snonkaku ryama ro mandif ro nanki kuker papoik ma payamyum ḇyena. Ma nari Iwan malaikat-malaikat ḇyesi fa sisasyar ma siwuf sonker ḇerok naba kaku ma nari siryur snonkaku Allah kyimfir kwar sya ro supswan ḇesiper.” (Matius 24:29-31) Yesus nari ’iryur snonkaku’ rofyor dun snonkaku Kristen ḇesma ramrem syakam ro supswan ḇe nanki. Ine nari ḇeḇejadi rofyor ḇaḇekandera ḇebaya fyor Harmagedon ryama ḇaim. Yesus fnoḇek 144.000 sya nari smamunmun kuker raja-raja ḇero supswan ma nari sikafyo si. (Wahyu 17:12-14) Na koso munara Swarapepen ḇepupesya rofyor Yesus ’ryama’ ḇaim fa iryur snonkaku ḇesma ramrem sya.

16. Rosai ḇefnai fa komarisen fa koso munara Swarapepen ro taun ine?

¹⁶ Wamarisen fa warama ro munara Swarapepen ro 31 Maret 2018. Wor ḇe Yahwe insama ifnoḇek Au fa wafaduru ḇaḇeoser kuker naek srar sya. (Wasya Mazmur 133:1.) Ro ras oso, nari koso munara Swarapepen ḇepupes ya. Inja, komarisen kofasnai snar koḇesyowi kaku ḇaḇeoser kosma ro taun ḇe taun roro munara Swarapepen ya.