Kakfrur Raris Yahwe I Allah Ḇeḇuk Samambraḇ ro Sne

1. Rariso Yahwe ḇyuk samambraḇ ma saneraro faro snonkaku sya rofyor Adam ma Eva sumbroḇ I?

YAHWE iso Allah ḇeḇuk samambraḇ ro sne. Ḇyuk na fyoro kaku kwar rofyor snonkaku sya sisapi ro sasar ma sḇe snonkaku ḇenapes ḇa. Adam ma Eva sumbroḇ fa supampum Allah, ḇape ḇyuk ḇardadi oso ḇeḇuk samamḇraḇ ma saneraro faro up suḇesya. Ḇardadi anna naisya ro Kejadian 3:15, ḇekofenḇair Setan roḇa Ibiris ma fararur ḇeḇarḇor ḇyena nari napromes.​—1 Yohanes 3:8; Fasasna 12:9.

YAHWE SYAMBRAḆSER MANFAMYAN ḆYESYA RO FAFISU NAIWARA

2. Rariso Yahwe syambraḇser Nuh i rai?

² Kokarapan rariso Yahwe syambraḇser manfamyan Ḇyedi, Nuh i. Snonkaku ḇekenem ro fafisuya sirarmomen ma siḇarḇor. Ḇape, Nuh kina ḇyesi serer monda ḇesyom faro Yahwe I. Roi nane bisa nafrur fa Nuh ḇyesanekar. (Kejadian 6:4, 5, 11; Yudas 6) Ḇape, Yahwe syambraḇser Nuh i fa isyom pdef faro I ma ifrur roi ḇeḇye. (Kejadian 6:9) Yahwe ikofenḇair ḇe Nuh i snar nari imkok dunya ḇeḇarḇor ani ma ikofenḇair rosai fandun fa Nuh ifrur insama kina ḇyesi sismai fasaspar ya. (Kejadian 6:13-18) Yahwe iso Allah ḇeḇuk samambraḇ sne faro Nuh i. 

3. Rariso Yahwe syambraḇser Yosua i rai? (Mam sonin ro randak artikel ine.)

³ Ḇarpur mura, Yahwe syambraḇser manfamyan Ḇyedi Yosua i. Iso nari ḇekif fararur ḇesamswen. Fandun fa fyarkin Allah kawasa Ḇyesi ḇe Sup Ḇaḇeasas ma myunpres sordade ḇesambraḇ kaku ro er ḇero diansya. Yahwe ifawi Yosua nari imkak, inja ikofen ḇe Moses i, ”Kwanow Yosua i ḇe manfarkin, wafrur i fa iryaḇ, ma swambraḇser i, snaro iso na ḇeyores ro ḇarpon rofyor er ansine simbranuk, ma iso nari ḇefarkin si fa sewaris sup nari wamam ani.” (Ulangan 3:28) Ramnai Yahwe syambraḇser Yosua i ḇo doḇe, ”Yakofen wer ḇe au, fandun fa waḇri ma swambraḇ. Wamkak awer ḇaido waradai awer, snar Yahwe Allah bedi isya ryous au ḇe mob risai monda rwayoḇ na.” (Yosua 1:1, 9) Kwara rariso, rosai Yosua na ḇyaḇir rofyor ryower wos nane?

4, 5. (a) Rariso Yahwe syambraḇser kawasa Ḇyesi ro fafisu iwara? (b) Rariso Yahwe syambraḇser Roma Ḇyedi rai?

⁴ Yahwe I kako syambraḇser kawasa Ḇyesi ḇe raryur oser. Imnis raris, Yahwe ifawi snonkaku Yahudi sima sfandun wos ḇeḇuk samambraḇ fafisu sḇewomen ro Babilon ani, ma ḇyuk wos ḇesambraḇser si kuker doḇe, ”Wamkak awer, snar yarous au. Wamkakwarek awer, snar Aya iso Allah bedi. Nari yakadaunwarek au, nari yafnoḇek au. Nari yufepen nako au kuker bramin raku ḇenapes yedi.” (Yesaya 41:10) Yahwe syambraḇser snonkaku Kristen ro awar randak sya ma nari syambraḇser ko ro fafisu ine kako.​—Wasya 2 Korintus 1:3, 4.

⁵ Yahwe syambraḇser Roma Ḇyedi kako. Rofyor Yesus ḇyebaptis raposa, imnaf mkaren oso ro nanki ḇekofen, ”Inekada Romawa Yaswar kaku, faro I Ya ḇeḇare.” (Matius 3:17) Kwarapan kada, wos nane na nsambraḇser Yesus i ro fafisu ifarmyan ro supswan ine.

YESUS SYAMBRAḆSER SNONKAKU ḆESESYA

6. Rariso Yesus wos sarḇer ḇyena ḇekur ḇe talenta nsambraḇser ko rai?

⁶ Raris Kmari, Yesus i kako syamḇraḇser snonkaku ḇesesya fa sisouser. Rofyor ḇyuk wos sarḇer ḇekur ḇe talenta, Yesus dapḇair tuan ro sarḇer ani ḇe manfamyan ḇesouser ḇyesi oser-oser, ”Fararur bedi ipyum kaku, ne, manfamyan ḇeḇye ma ḇeḇesyowi yedi; fasnai kwar ḇesyowi roi kasun, nari yaḇuk fa mamwarek roi ḇeba. Swun ma wakun aski ro tuan bedi.” (Matius 25:21, 23) Wos anane nsambraḇser Yesus manfamyan ḇyansi fa suf farmyan pdef ḇe Yahwe I!

7. Rariso Yesus syambraḇser manfamyan ḇyansi, iḇye syadi ḇe Petrus i?

⁷ Yesus kyaḇaḇ faro manfamyan ḇyansi rofyor sfamfaḇri ker kuker mansei ḇeba syadi rofandu si. Danun ḇe si fa sfasnai sne ḇerun ma siwaf awer snonkaku sya srama sfarmyan ḇe si mboi siso ḇera ḇepon fa ḇeyuf farmyan si. (Lukas 22:24-26) Kali ḇeḇeso Petrus ifrur sasar ma ifrur fa Yesus fyafko. (Matius 16:21-23; 26:31-35, 75) Ḇape, Yesus pyampum Petrus i ḇa. Mboi syambraḇser Petrus i ma ḇyuk fararur ḇe i fa daksambraḇser snonkaku ḇesesya.​—Yohanes 21:16.

SNONKAKU ḆEḆUK WOS SAMAMBRAḆ RO FAFISU NAIWARA

8. Rariso Hizkia syambraḇser ḇebukor ro sordade ma kawasa ḇyesi rai?

⁸ Rofyor Yesus fyasnai nyan ḇaim, Yahwe manfamyan Ḇyesi sifawi fandun fa sisambraḇser snonkaku ḇesesya. Imnis raris Hizkia i. Fafisu er Asiria imbe smun Yerusalem, Hizkia iryur ḇebukor ro sordade sya ma kawasa ḇyesi fa syambraḇser si. Bon ya iso, sismai samambraḇ ro Hizkia wos ḇyena.​—Wasya 2 Tawarikh 32:6-8.

9. Rosai kofarkor ro Ayub rofyor koḇuk wos ḇeḇuk samambraḇ?

⁹ Ko kako bisa kofarkor ro Ayub i, moḇsa na kosambraḇser snonkaku ḇesesya rai. Ayub mankundi fyandun wos ḇeḇuk samambraḇ, ḇape imarisen fyarkor snonkaku ḇesesya rariso saksambraḇser snonkaku ḇesesya. Rofyor snon ḇeḇeso srama fa sisambraḇser Ayub i, ikofen faro si ḇo doḇe rofyor iso ḇeḇuk wos samambraḇ ido, nari ifnoḇek si fa sisambraḇ ma ifrur fa sesanekar ḇa. (Ayub 16:1-5) Ḇarpur mura, Ayub ismai samambraḇ ḇerama ro Elihu ma Yahwe mankundi.​—Ayub 33:24, 25; 36:1, 11; 42:7, 10.

10, 11. (a) Rosai ḇefnai fa Yefta inai ḇyani fyandun wos ḇeḇuk samambraḇ? (b) Manseiso bisa koḇuk wos ḇeḇuk samambraḇ yoḇ si ro fafisu ine?

¹⁰ Yefta inai ḇyani dakfandun wos ḇeḇuk samambraḇ. Kmari Hakim Yefta i, imbe myamunmun kuker snonkaku Amon sya. Ḇyeasas rofyor Yahwe ifnoḇek i fa kyafyo snonkaku Amon sya ido, snonkaku ḇesae randak fa ḇesrow i rofyor ibur kaḇer ḇe rum ḇyedi, nari ḇyuk fa ifarmyan ḇe Yahwe I ro tabernakel. Israel skaḇer kuker payamyum, ma snonkaku ḇesae randak iso inai ḇyani, inai binjos ḇyedi. Yefta ḇyesneso fafayaḇa. Ḇape, ifrur raris asas ḇyedi kuker ḇyuk inai ḇyani fa ifarmyan ro tabernakel ro kankenem ḇyedi ḇesiper.​—Hakim-Hakim 11:30-35.

¹¹ Roi ine syamswen ḇe Yefta i, ma samswen ḇe inai ḇyedi kako. Ḇape, imarisen ifrur rosai kmari ḇyeasas kwar na. (Hakim-Hakim 11:36, 37) Na fyarḇuk ḇa ḇaido nya romawa ḇa. Inja, up ḇyesya nari namnai rodia monda. Yefta inai ḇyani fyandun kaku wos ḇeḇuk samambraḇ. Refoya doḇe, ”Ro Israel sasoser naisya kwar: Ro taun ḇe taun, inai inkbor Israel sya sramura sḇuk wos sandik ḇe Yefta inai inkbor ḇyedi, snonkaku Gilead ani ro swaf ras rifyak.” (Hakim-Hakim 11:39, 40) Yefta inai ḇyani ifrur imnis raris snonkaku Kristen ḇero fafisu ine ḇekinfir fa ḇefarḇuk ḇa insama bisa sḇuk oras nabor faro Yahwe I. Bisa kaksambraḇser si ke?​—1 Korintus 7:32-35.

MANWAWAN SYA SISAMBRAḆSER NAEK SRAR SESYA

12, 13. Rariso Petrus syambraḇser naek srar ḇyesya rai?

¹² Ro roḇ rofyor Yesus imar ḇaim, ikofen ḇe manwawan Petrus i, ”Simon, Simon, mame, Ibirisya imarisen ryas mko imnis fasibu, ḇape yaḇenadi kuker aw kwar, insa kakyar bedi isapi awer. Ma aw, rofyor mambir kwarido, swambraḇser naek besi.”​—Lukas 22:31, 32.

¹³ Petrus ima dakḇe snonkaku ḇefarkin sidang Kristen ro awar randak siwara. (Galatia 2:9) Syambraḇser naek srar sya kuker makakak ḇa ro ras Pentakosta ma rofyor ras ani imnai. Rofyor ifarmyan taun ḇe taun kwar, fyas syapram ḇe naek srar sya, ”Yafas syap ḇeknampu yedine faro mko . . . . Yamarisen yadif ma yaḇuk snekin faro mko mboi ine kada fakamaman Allah ḇenapes. Inja mkufepen fakamaman ani nadworen.” (1 Petrus 5:12) Petrus syapram ḇyenane nsambraḇser snonkaku Kristen ḇero fafisu ḇyedi. Ma, syapram ine kako nsambraḇser ko ro fafisu ine rofyor kowaf Yahwe asas Ḇyena ndarirya!​—2 Petrus 3:13.

14, 15. Rariso syapram Yohanes fyas anna nsambraḇser ko rai?

¹⁴ Manwawan Yohanes kako dakḇe snonkaku ḇefarkin sidang Kristen ro awar randak siwara. Fyas fasfas Injil ḇepyum kaku kuker Yesus fararmyan ḇyena. Syap fyas anane nsambraḇser snonkaku Kristen sya ro taun utin ḇe utin naiwara ma nsambraḇser ko ro fafisu ine kako. Imnis raris, syap Yohanes monda iso ḇefasḇair Yesus wos ḇyena ḇekur ḇe saswar ḇe aḇyair faro manfamyan ḇyedi.​—Wasya Yohanes 13:34, 35.

¹⁵ Syapram rikyor Yohanes fyas anna kako naser napnapes ḇesyowi kaku. Rofyor koḇesanekar snar sasar kofrur na, nari kosmai sneprei kaku rofyor kowasya Yesus farsarser fasaspar ḇyedi ”nfasren sasar ḇeḇor koḇena kam.”(1 Yohanes 1:7) Ḇape rofyor koḇaḇir kosasar, nari kosmai samambraḇ rofyor kowasya snar ”Allah ibasyadi ro kosnesna”. (1 Yohanes 3:20) Yohanes iso manfasfas Refo ḇefasḇair snar ”Allah ikada isaswar.” (1 Yohanes 4:8, 16) Syapram ḇesuru ma ḇekyor ḇyana nfasnaiḇair myanen kaku snonkaku Kristen ’ḇeso napnapes ro Allah’.​—2 Yohanes 4; 3 Yohanes 3, 4.

16, 17. Rariso manwawan Paulus syambraḇser snonkaku Kristen ro awar randak sya?

¹⁶ Manwawan Paulus iso ḇefasnai nyan ḇepyum ḇeḇuk wos samambraḇ ḇe snonkaku ḇesesya. Rofyor Yesus imar kwar, manwawan ḇebor sya sḇarek ro Yerusalem, moḇ badan pimpinan siryur rona. (Farfyar ro Manwawansya [Kisah] 8:14; 15:2) Snonkaku Kristen ro Yudea sḇaryas ankinem ḇekur ḇe Kristus faro snonkaku ḇekyar faro Allah oser monda. Ḇape, Allah rur ḇesren Ḇyedi fyarkin Paulus fa ḇyaryas ḇe snonkaku Yunani, Roma, ma snonkaku ḇese ḇeyaksyom faro allah ḇebor sya.​—Galatia 2:7-9; 1 Timotius 2:7.

¹⁷ Paulus dakḇaryas ro moḇ kirine sap ḇe Turki, ro Yunani ma Italia kako. Ḇyaryas faro snonkaku ḇeḇe Yahudi ḇa ḇeḇarek ro moḇ anna, ma ifrur sidang Kristen rodiwa. Kankenem sena ḇe snonkaku Kristen ḇebabo ima roi ḇepyan risyaḇa. Snonkaku ḇeramaker er sena kako siso ḇewayam si, inja sima sfandun wos ḇeḇuk samambraḇ. (1 Tesalonika 2:14) Ro swaf taun ri 50, Paulus fyas syapram ḇesambraḇser sidang ḇebabo ro Tesalonika. Doḇe, ”Nkokofen kasumasa faro Allah ḇesyakwar snar nko kam ma nkap mko ronadi nkoḇena ḇesyakwar. Snar nkoswarepen fararur kakyar mkoḇena ḇeaya kwar, fararur saswar mkoḇena ma ḇaḇesaneraro ḇedworen mkoḇena”. (1 Tesalonika 1:2, 3) Paulus dor kako si fa sisambraḇyae si ma fyas, ”Rarirya mkanunyae mko ma mkosonemyae mko”.​—1 Tesalonika 5:11.

BADAN PIMPINAN SISAMBRAḆSER KO

18. Rariso badan pimpinan ro awar randak sya sisambraḇser Filipus i rai?

¹⁸ Ro abad randak naiwara, Yahwe ḇyuk badan pimpinan sya fa sisambraḇser snonkaku Kristen syakam ma snon ḇefarkin sidang sya kako. Rofyor Filipus ḇyaryas ankinem ro Kristus ḇe snonkaku Samaria sya, badan pimpinan sisaramper i. Siwan Petrus ma Yohanes fa suḇenadiwarek snonkaku Kristen ḇebabo ḇesmai rur ḇesren sya. (Farfyar 8:5, 14-17) Filipus ma naek srar Kristen ḇebabo sya sismai samambraḇ snar fafnoḇek ḇerama ro badan pimpinan sya!

19. Snonkaku Kristen ro awar randak sya moḇsa sḇaḇir rai rofyor srower syapram ḇeramaker badan pimpinan sya?

¹⁹ Ḇarpur mura, fandun fa badan pimpinan sun wos snemuk ḇefandun kaku. Ro Sasoser Moses ya, fandun fa snonkaku Yahudi sismai sofakfuk. Inja, snonkaku Kristen ḇeḇe Yahudi ḇa sya fandun fa sisofuk si ke? (Farfyar 15:1, 2) Rofyor badan pimpinan senadi fa sor fafnoḇek ro rur ḇesren ma sisewar akurfasna ro Refo, sun wos snemuk snar sasoser kuker sofakfuk ima ḇyefandun werḇa. Ramnai, sfas syapram ḇekofenḇair wos snemuk sun kwar anya ma siwan naek sya fa sikofenḇadir na ḇe sidang-sidang. Rofyor snonkaku Kristen srower syapram ani siwasya na, ”simarisen kaku snar rakrok ya ḇyuk sneprei.”​—Farfyar 15:27-32.

20. (a) Rariso Badan Pimpinan ḇero baboine sisambraḇser ko rai? (b) Fakfuken rosai nari kawos ro artikel ḇerama ya?

²⁰ Baboine, Badan Pimpinan ro Saksi-Saksi Yahwe sḇuk wos ḇeḇuk samambraḇ ḇe naek srar ḇefararur ro Betel, perintis ḇefarmyan ro moḇ ḇaḇeḇaryas, ma kokame. Raris naek srar ro abad randak siwara, koryaḇ kaku snar wos ḇeḇuk samambraḇ ine! Sanun kako ḇe snonkaku ḇebur napnapes sya fa skaḇer wer. Inja ro 2015, Badan Pimpinan sḇuk syap Kembalilah kepada Yehuwa. Ḇape, na naek ḇefarkin sidang sya monda ḇesambraḇser snonkaku ḇesesya ke kokame bisa kaksambraḇser si? Nari kawos fakfuken ine ro artikel ḇerama ya.