Yahwe Iswar Snonkaku Ḇefarmku ro Fararur Ḇaḇeḇaryas

1, 2. (a) Rariso fawar ro naek srar ḇeḇaryas ro moḇ snonkaku sibor sya simewer fa srower, nsambraḇser ko rai? (Mam sonin ro randak artikel ine.) (b) Rosai Yesus ikofen kuker ḇaḇeḇaryas ro ”mnu ḇyedi”? (Mam fasfas kasun ro sop.)

SERGIO MA OLINDA suma imbeswa oso ḇeḇe perintis ro Amerika Serikat. Suḇeumur fanam taun ri 80 kwar. Ḇarpur ine, samswen fa sumbrane, snar suwemna naduf ker. Ḇape, ro arwo oras fik ya suraḇe moḇ snonkaku sibor sisya rona. Sufrur rarirya kwar ro taun ḇe taun. Suyores fanam ro terminal bis ma suḇuk publikasi ḇe snonkaku ḇembran mura-muma sya. Snonkaku ḇebor sya sfandun su ḇa. Ḇape, Sergio ma Olinda suyores pdef ro moḇ anya ma sufasnai marisen ro sumkasna ḇe snonkaku ḇemam su. Ro arkok ya, sumbran fawas fa subur ḇe rum. Meser arwo ya, oras fik sukaḇer wer ḇe terminal bis anya. Ras riwonem ro minggu oser sufrur roi ine ḇesya kwar ro swaf taun ḇe taun.

² Naek srar sibor sisya sisouser raris Sergio ma Olinda su. Sḇaryas ro moḇ sedi ro swaf taun ḇe taun, ḇape snonkaku sya simewer srowerndi. Imbude ro moḇ wakḇaryas rona ryarirya kako. Rarirya ido, nkomarisen nkosandik Au snar wamku ma ḇaryas pdef ro fafisu ḇesamswen.a (Mam fasfas kasun ro sop.) Fararur ḇepyum Bena nsambraḇser naek srar ḇesesya, ma ḇefarmyan ro taun ḇe taun kwar sya kako. Wakrowerpan pengawas wilayah ḇeḇeso rosai sakkofen na, ”Rofyor yafararur kayam ro ḇaḇeḇaryas kuker naek srar ḇesouser sine, fararur ḇepyum sena nsambraḇser aya.” ”Soasuser sena nsambraḇser aya fa yamkuepen ma yamkak ḇa fyor yemir yaḇaryas.” ”Fararur ḇepyum sena nbuk sneprei ḇe aya.”

3. Fakfuken rikyor risai na kokarem na, ma rosai ḇefnai ya?

³ Ro artikel ine, nari kokarem fakfuken rikyor anskoine: Rosai ḇefnai fa fafisu ono na kofafardun? Koḇuk bon ima kyur ḇe rosairiri? Rosai nari ḇefnoḇek ko fa koḇuk bon ro ḇaḇefarmku ya? Kofawi kankarem faro fakfuken anskoya ido, na nafnoḇek ko fa kofrur fararur Yesus ḇyuk ḇe ko isoine ḇaḇeḇaryas ya.

ROSAI ḆEFNAI FA NA KOFAFARDUN?

4. (a) Moḇsa Paulus ḇyaḇir rai rofyor snonkaku Yahudi ḇebor sya simewer srower i? (b) Rosai ḇefnai fa ḇyaḇir rarirya?

⁴ Fafisu oso wafafardun snar snonkaku ro moḇ Bedi simewer srower ankinem Karajan wun anna ke? Rarirya ido, nari wakḇaḇir raris manwawan Paulus moḇ ḇyaḇir raya. Ima ḇyaryas ro swaf taun ri 30, ma ifnoḇek snonkaku ḇebor sya kwar fa sakḇe snonkaku Kristen. (Farfyar ro Manwawansya 14:21; 2 Korintus 3:2, 3) Ḇape, imbe ifnoḇek snonkaku Yahudi ḇebor sya fa sakḇe snonkaku Kristen fama, jadi ḇa. Ḇebor sya simewer srower i, ma sino sisya sewayam i. (Farfyar 14:19; 17:1, 4, 5, 13) Moḇsa Paulus ḇyaḇir rai rofyor snonkaku sya simewer srower i? Ikofen ḇo doḇe, ”Sneri fyafardun ma yaḇe kandera”. (Roma 9:1-3) Rosai ḇefnai fa ḇyaḇir rarirya? Snar iswar faro fararur ḇaḇeḇaryas ma snonkaku sya. Paulus iswar kaku snonkaku Yahudi sya ma fyafardun snar snonkaku sya spampum Allah sawarwar Ḇyena.

5. (a) Rosai ḇedif ko fa koḇaryas? (b) Rosai ḇefnai fa fafisu ono na koisya kofafardun?

⁵ Raris Paulus i, koḇaryas ḇe snonkaku sya snar koswar si ma komarisen kofnoḇek si. (Matius 22:39; 1 Korintus 11:1) Kofawi kwar kofarmyan ḇe Yahwe iso nyan ḇepyum syadi ro kankenem koḇena. Ma komarisen kofnoḇek snonkaku ḇesesya fa sakna kakara ḇemnis rarirya! Iso ḇefnai fa kofnoḇek si ḇesya kwar fa sakfarkor napnapes kuker Yahwe I ma marisen Ḇyena. Ine imnis ra kun sasuref ḇepyum ḇe si ma koḇe, ’Wun ine mura.’ Inja, rofyor simewer sun sasuref ine ido, nari ’kosnesna nfafardun’ raris Paulus i ḇae. Kofafardun inema fyasnaiḇair ḇa snar koma kona kakyar ḇa, ḇape snar koswar kaku snonkaku sya. Inja, imbude koisya kofafardun, mboi na koḇaryas pdef. Na kona kakara raris Elena i, ḇye perintis syadi ro taun ri 25, doḇe, ”Yafawi fararur ḇaḇeḇaryas ima fararur ḇesamswen nairi. Ḇape, fararur osoḇaḇeri ḇepyum syadi ro fararur ine.”

KOḆUK BON IMA KYUR ḆE ROSAIRIRI?

6. Fakfuken risai nari kokarem ya?

⁶ Rosai ḇefnai fa kokyar kaku na kosmai bon ḇepyum ro ḇaḇeḇaryas koḇena ro moḇ risai monda koḇaryas ya? Insama kokarem fakfuken ḇefandun ine, rwama kawos Yesus wos sarḇer ḇesuru ḇyena rofyor ikofenḇair fandun ro koḇuk bon. (Matius 13:23) Sarḇer ḇerandak iso anggur knam.

7. (a) Ro Yesus wos sarḇer ḇyana, manseiso ḇeḇeḇair ḇe ”ḇefrur yaf” ya, ”anggur knam”, ma ”snaw” ḇyena? (b) Fakfuken rosai fandun fa kokarem ya?

⁷ Wasya Yohanes 15:1-5, 8. Ro wos sarḇer ine, Yesus fyasnaiḇair Yahwe iso ”ḇefrur yaf” ya, Yesus mankundi iso ”anggur knam” ani, ma manfamyan ḇyansi siso ”snaw” ḇyena.b (Mam fasfas kasun ro sop.) Ramnai Yesus ikofen ḇe manwawan ḇyesi, ”Rofyor mkoḇuk bon nabor, Mami isma baba, rarirya mko fasna mkoḇe manfamyan ḇeaya.” Inja, koḇuk bon ima kyur ḇe rosairiri? Ro wos sarḇer ine, Yesus dap mnis bon rosairirya ḇa. Ḇape, ḇyuk akurfasna ḇefnoḇek ko fa kokarem fakfuken ine.

8. (a) Ro Yesus wos sarḇer ḇyana, rosai ḇefnai fa ’koḇuk bon’ ima kyurfasna ḇa kofrur snonkaku sya fa sḇe manfamyan ḇebabo? (b) Ḇekaku ya, rosai Yahwe dor ro ko fa kofrur ya?

⁸ Yesus ikofenḇair rosai na Kmari ifrurya, ”Snaw ayena ḇeḇuk bon ḇana kyaruk na”. Ine fyasnaiḇair rofyor koḇuk bon ya mande insape na Yahwe nya ko ḇe manfamyan Ḇyesi. (Matius 13:23; 21:43) Inja ro wos sarḇer ine, koḇuk bon ima kyurfasna kofrur snonkaku sya fa sḇe manfamyan ḇebabo ke? (Matius 28:19) Roḇa, snaro fakfuken ine nkaku rarirya ido, na Saksi ḇesouser fa ḇefnoḇek snonkaku oso fa dakḇe manfamyan ḇe Yesus i ḇaim, nari simnis snaw ḇeḇuk bon ḇa. Ḇape, ine rarirya ḇa! Rosai ḇefnai ya? Snaro koma kodif snonkaku sya ḇa insama sakḇe manfamyan. Yahwe ima Allah ḇesaswar diri. Imewer dor ko fa kofrur roi oso kopok fa kofrur ḇa na. Dor monda rosai kosambraḇ fa kofrur na.​—Ulangan 30:11-14.

9. (a) Moḇsa koḇuk bon ya rai? (b) Wos sarḇer rosai wer nari kawos ya?

⁹ Inja, koḇuk bon ima kyur ḇe rosairiri? Inema roi na bisa kokam kosambraḇ fa kofrur na. Fararur rosai Yahwe ḇyuk ḇe manfamyan Ḇyesi kam? Isoine fararur ḇaḇeḇaryas ankankinem ḇeḇye Karajan Allah.c (Mam fasfas kasun ro sop.) (Matius 24:14) Ine nasnai kaku ro Yesus wos sarḇer ḇyena ḇekur ḇe snon oso ḇekekef mor. Rwama komam wos sarḇer ḇeuser ine.

10. (a) Ro Yesus wos sarḇer ḇyana, mor ma saprop nkur ḇe rosairiri? (b) Mamarem gandum na isasyar bon risai?

¹⁰ Wasya Lukas 8:5-8, 11-15. Ro wos sarḇer ḇekur ḇe snon ḇekekef mor, Yesus fyasnaiḇair mor kyekef anna nkur ḇe ”Allah wos ḇyena”, ḇaido anun kuker Karajan Allah. Saprop ima kyur ḇe snonkaku sya sisnesna. Mor ḇesapi ro saprop ḇeḇyeya nari ḇyerares, isur pyum, ma ḇye rokaker. Mura, rokaker ani ’imarem ḇe rarwan utin oser’. Rokaker ani iso gandum rirya ido, bon risai na isasyar na? Gandum kasun ke? Roḇa, ḇape bon ya iso mor ḇyena, na fawawas mura nasur ma nḇe gandum. Ro wos sarḇer ine, mor oser ine nari ḇyemor ri 100. Farkarkor rosai kun ro wos sarḇer ine faro fararur ḇaḇeḇaryas koḇena?

11. (a) Farkarkor rosai kun ro wos sarḇer ḇekur ḇe snon ḇekekef mor ine faro fararur ḇaḇeḇaryas koḇena? (b) Rariso insama koḇuk mor Karajan ḇebabo na rai?

¹¹ Rofyor sinan koḇesi ḇaido Saksi ḇesesya sfarkor ko kuker Karajan Allah ido, ine imnis ra skekef mor ro saprop ḇeḇye. Simarisen kaku rofyor smam koso mnis farkarkor anna. Mor ani isur rawo ḇye bon. Raris gandum ḇeḇeyap ḇepon ani, na ḇye gandum ḇebabo ḇa, mboi mor ḇebabo. Rarirya kako, na kofrur snonkaku sya fa sakḇe manfamyan ḇebabo ḇa, mboi mor Karajan ḇebabo.d (Mam fasfas kasun ro sop.) Moḇsa kofrur na rai? Fafisu kofawar ḇe snonkaku ḇesesya kuker Karajan Allah, ine imnis raris kofrur na fa nabor ma kokekef mor ḇesur pyum kwar ro kosnesna. (Lukas 6:45; 8:1) Rofyor koḇaryas pdef anun kuker Karajan Allah ido, koisya ”koḇuk bon ro ḇaḇefarmkuya”.

12. (a) Farkarkor rosai kun ro Yesus wos sarḇer ḇyena ḇekur ḇe anggur knam ma snon ḇekekef mor anya? (b) Moḇsa ḇaḇir rai snar wafawi farkarkor ine?

¹² Farkarkor rosai kun ro Yesus wos sarḇer ḇyena ḇekur ḇe anggur knam ma snon ḇekekef mor anya? Kofarkor snar snonkaku sya srower ke roḇa, iso na ḇefasnaiḇair ’koḇuk bon’ ke roḇa. Paulus doḇe snonkaku ”oser-oser nari isma sasuref imnis [fararur] ḇyedi.” (1 Korintus 3:8) Yahwe nari ḇyebarakas fararur koḇena, mboi bon ro fararur koḇena ḇa. Matilda, ḇye perintis ro swaf taun ri 20 kwar, doḇe, ”Yamarisen kaku snar yafawi Yahwe ḇyebarakas fararur koḇena.”

RARISO NA KOFARMKU RO KOḆUK BON?

13, 14. Raris wos ḇero Roma 10:1, 2 ya, rosai ḇefnai fa Paulus ḇyaryas pdef?

¹³ Rosai na ḇefnobek ko fa ’koḇuk bon ro ḇaḇefarmku’ ya? Rwama komam farkarkor ḇepyum kun ro Paulus i. Kofawi Paulus fyafardun snar snonkaku Yahudi sya simewer srower ankinem Karajan. Ḇape, Paulus ipok imnai ḇa fa ḇyaryas faro si. Fyasnaiḇair rosai ḇyaḇir ro sneri faro snonkaku Yahudi ansi ḇo doḇe, ”Marisen ro sneri ma fararyor ayena faro Allah naiso insama sismai fasaspar. Na Yakofen kaku snar sima simyaren sfarmyan ḇe Allah, ḇape imnis kuker fawawi ḇekaku ḇerama ro Allah ḇa.” (Roma 10:1, 2, nwt) Inja, rosai ḇefnai fa Paulus ḇyaryas pdef?

¹⁴ Oser ya, Paulus doḇe roi ḇedif i fa ḇyaryas ḇe snonkaku Yahudi sya isoine snar ”marisen ro sneri”. Imarisen insama saksmai fasaspar ya. (Roma 11:13, 14) Ḇesuru ya, snar iso ’fararyor ḇyena faro Allah’ nairi. Paulus dor ḇe Yahwe I fa ifnoḇek snonkaku Yahudi oser-oser insama simarisen srower ankankinem Karajan ya. Ḇekyor ya, Paulus doḇe ”simyaren sfarmyan ḇe Allah”. Paulus myam roi ḇepyum ro snonkaku sya naisya, ma ikyar si kako sakna samambraḇ fa sfarmyan ḇe Yahwe I. Paulus ifawi snar snonkaku Yahudi ḇemyaren ansi na sakḇe Yesus manfamyan ḇyesi, ḇemyaren raris i kako.

15. Rariso kakfrur raris Paulus i rai? Fasnaiḇair na.

¹⁵ Rariso kakfrur raris Paulus i rai? Oser ya, fandun fa komarisen kosewar snonkaku ḇenaḇye fa ”ḇesma kankenem ḇemnaiḇa sya”. Ḇesuru ya, kor ḇe Yahwe I fa ifnoḇek snonkaku ḇena sne ḇemarisen sya fa srower rofyor koḇaryas ḇe si. (Farfyar 13:48; 16:14) Silvana ḇeḇe perintis ro swaf fanam taun ri 30, ifrur radiri. Doḇe, ”Rofyor yaḇaryas ro moḇ ayedi ḇaime, yaḇenadi ḇe Yahwe I, yor insama ḇyuk swaruser ḇepyum ḇe aya.” Na kakḇenadi insama malaikat sya sifnoḇek ko fa kosrow kuker snonkaku ḇemarisen ḇerower sya. (Matius 10:11-13; Fasasna faro Yohanes 14:6) Robert, ḇye perintis ro swaf taun ri 30 syadi kwar, doḇe, ”Yamarisen kaku fa yafararur kayam kuker malaikat sya snar sifawi mnis kaku samswen rosai ḇekur ḇena rum sya.” Ḇekyor ya, kosewar fa komam roi ḇepyum ro snonkaku sya ma kokyar si kako sakna samambraḇ fa sfarmyan ḇe Yahwe I. Penatua oso ḇebaptis swaf taun ri 50 kwar ḇenir ḇe Carl, doḇe, ”Yamamepen roi kasun na nfasnaiḇair snonkaku oso nya sne ḇemarisen, raris imarafrif, ifrur pyum, ḇaido ifuken snar imarisen fa dakfawi.” Kofrur rarirya ido, na ”koḇuk bon ro ḇaḇefarmkuya” raris Paulus i. 

”MAM MONDA AWER BRAMIN BEDI IMNAISU”

16, 17. (a) Farkarkor rosai kun ro Pengkhotbah 11:6 ya? (b) Rariso fararur ḇaḇeḇaryas koḇena nawyae snonkaku ḇemam konsya rai?

¹⁶ Kopok fa koḇefnder awer snar komam rya snonkaku sya simewer srower, mboi ḇaḇeḇaryas koḇena nawyae kaku si. (Wasya Pengkhotbah 11:6.) Snonkaku sya smamepen ko. Smam moḇsa kosansun pyum ko, kawos myaren, ma kofrur pyum raya. Ine nafrur fa sesyowi ko, iḇye syadi snonkaku ḇena kakara ḇesasar kuker konsya kako na sfadwer kakara sena. Sergio ma Olinda sumam ro mankunsu roi nane nkaku.

¹⁷ Sergio doḇe, ”Snar nudafdufe, inja ro swaf ḇeḇeso nuraḇe moḇ ras-ras nuḇaryas rona ḇa. Rofyor nukaḇer wer, snonkaku oso ryama ifuken nu, ’Muraḇeryo? Insape nkomam mu wer.’” Olinda imarafrif ḇo doḇe, ”Ḇeyun bis sya skanow bramin ḇe nu ma ono sisya sor nu ro oto yadori ḇo soḇe, ’Fararur ḇepyum nairi!’ Ma sia sor syap koḇena kako.” Sergio ma Olinda sukandor kaku rofyor snon oso ryama fyanam ḇe gerai suḇedi, ḇyuk pampen bos oser ḇe su, ma ikofen kasumasa faro fararur sufrur kwar na.

18. Rosai ḇefnai fa wun snemuk fa ’buk bon ro ḇaḇefarmku’ ya?

¹⁸ Fafisu ”mam monda awer bramin bedi imnaisu” fa ḇaryas Karajan Allah ḇe snonkaku ḇesesya ido, na waksowarpu ro fararur ḇefandun kaku fa buk kesaksian faro er syakam. (Matius 24:14) Ḇesyadi ya, na wasmai marasrisen ḇeba kaku snar wafawi wafrur Yahwe imarisen. Iswar snonkaku syakam ’ḇeḇuk bon ro ḇaḇefarmku’ ya!