”Rarirya Isnai Ḇedi Isak ma Isnaiyar” Insa Nun Sanandik ḇe Yahwe I

1. Rosai ḇefrur fa komarisen kaku?

KOMARISEN kaku snar kofawi rariso Yahwe manfamyan Ḇyesya sananai sena nasnaiyar! Taun aniwara, Yahwe kawasa Ḇyesya sḇuk farkarkor Refo faro snonkaku sisyadi ro 10.000.000. Oso wer ido, snonkaku seyuta simarisen sakrama ro munara Swarapepen ma sfarkor roi ḇepyum kaku Yahwe ḇyuk kwar isoine farsarser fasaspar ya.​—1 Yohanes 4:9.

2, 3. (a) Rosai na ḇedwarek ko ḇa insa kosnaiyar supswan ine? (b) Rosai nari kofarkor ro artikel ine?

² Saksi Yahwe ḇero supswan ḇesiper ine sawos ro wos ḇebor ḇesisyeyae. Ḇape, ine nadwarek ko ḇa insa kosandik Yahwe I ḇe kina oser. (Fasasna 7:9) Wos risai koḇukidawos ḇaido moḇ risai koḇarek ya, nadwarek ko ḇa insa kosnaiyar supswan ine.​—Filipi 2:15.

³ Ro fararmyan, ḇaḇeoser Kristen koḇena, ma kuker kowaren pdef, nari nun sanandik faro Yahwe I. Ro artikel ine, nari kofarkor nyan rikyor rariso kofrur na rai.​—Wasya Matius 5:14-16.

KOFNOḆEK ḆESESYA FA SAKSYOM YAHWE I

4, 5. (a) Rofyor koḇaryas, rosai na kofrur wer insama sananai koḇena nasnaiyar? (b) Bon ḇepyum rosai na kosmai rofyor kofrur pyum ma kawos myaren yoḇ snonkaku sya? (Mam sonin ro randak artikel ine.)

⁴ Nyan oser fa kosnaiyar supswan ine iso koḇaryas ma kofarkor snonkaku sya fa sakḇe manfamyan. (Matius 28:19, 20) Ro taun 1925 ya, artikel ”Terang yang Menembus Kegelapan” ikofenḇair ro rasras ḇepupes, fandun fa ”sananai koḇena nasnaiyar” insama kosouser faro Tuan i. Artikel ani ikofen wer, ”Kosnaiyar kuker koḇaryas ankankinem ḇeḇye faro snonkaku syakam ma kokenem imnis Yahwe marisen Ḇyena.” (The Watch Tower, 1 Juni 1925) Ḇaḇeḇaryas ma kenem koḇena na nun sanandik faro Yahwe I. Snonkaku sibor sya smamepen ko rofyor koḇaryas. Kofasnai marisen ro komkasna yoḇ si ma kokofen aroo yoḇ si ido, nari skara pyum ko ma Allah kosyom ya.

⁵ Yesus dawos ḇe manfamyan ḇyansi, ”Rofyor mkosun ro rum ono, mkokofen aroo faro si.” (Matius 10:12) Ro moḇ Yesus ḇyaryas ro fafisu naiwara, snonkaku sifawi ḇaim sya srama ro rum sena ido, na sor si fa sisun. Ḇape, baboine ro moḇ ḇebor, nyan ḇeradine sakfrur na werḇa. Snonkaku sya na simkak ḇaido simewer rofyor snonkaku sifawi ḇaim sya srama yoḇ si. Ḇape, kawos myaren ma kofrur pyum si ido na simkak ḇa. Rofyor wakḇaryas ro moḇ kawasa kam ido, fafisu fasnai marisen ro mkasi ma wakofen aroo yoḇ si, sisya simarisen sun publikasi ke? Na rarirya ḇae, iba syadi wer sino sisya sawos ḇepon yoḇ ko!

6. Rosai imbeswa ḇesinan kwar sufrur insama sumyaren fa suḇaryas pdef?

⁶ Imbeswa oso ḇesinan kwar ro Inggris, jadi fa suḇaryas ro rum ḇe rum werḇa raris moḇ sufrur ro ḇepon iwara snaro sudafduf ker. Inja, surir publikasi na ro meja yabori ru sum suḇedi bandiri. Imbesrar perintis oso daksowarpu su. Imbeswa ḇesinan kwar suine suḇarek fanam ro rumfarkor, inja surir publikasi ḇemnis faro sinan ḇerama fa ḇeyun romawa sesi. Sinan ḇeḇeso sun publikasi ma syap Pertanyaan Kaum Muda—Jawaban yang Praktis, Jilid 1 ma 2. Snar skawos myaren yoḇ si, inja sinan ono sisya simarisen sfarkor Refo.

7. Moḇsa na wafnoḇek snonkaku ḇemandaman ḇero moḇ Bedi rai?

⁷ Baboine, snonkaku sibor sisya sibur moḇ sena fa sra ma sḇarek ro sup ḇese ḇe snonkaku mandaman. Rosai na wafrur insama wafnoḇek si fa sakfarkor ma sakfawi Yahwe I? Randak ya, farkor fa wafawi wakofen aroo ro wos sena. Ḇesuru ya, buk aplikasi JW Language fa wakfarkor wos ḇeḇeso ro wos sena insama simarisen sawos yoḇ Au. Ḇekyor ya, fasnai vidio ma syap-syap ro wos sena ḇero situs web jw.org.​—Ulangan 10:19.

8, 9. (a) Fainda rosai kosmai snar koso fananjur minggu fadu ya? (b) Rariso sinan sya sifnoḇek romawa sesya insama nyan sḇuk kankarem ya ipyum syadi wer?

⁸ Yahwe fyasos fafnoḇek kofandun na insama kokir syadi ro ḇaḇeḇaryas ya. Imnis raris, Farkarkor Kankenem ma Fararmyan Kristen nafnoḇek ko fa kofawi mnis moḇsariso na korama kaḇer ma kofarkor Refo kuker snonkaku sya rai.

⁹ Rofyor snonkaku ḇerama randak ro fananjur koḇena smam romawa sya sḇuk kankarem, skandor fafayaḇa. Auma sinan ḇena romawa risau ido, farkor romawa Bansi fa sḇuk kankarem kuker wos mankun sena. Sino sisya simarisen sfarkor napnapes snar srower romawa sya sḇuk kankarem ḇepyandam ma kuker sne ḇesiper.​—1 Korintus 14:25.

KOSAMBRAḆSER ḆAḆEOSER KOḆENA

10. Rariso nadi ro kina na nsambraḇser ḇaḇeoser ro kina yadori?

¹⁰ Nyan ḇese wer fa kosandik Yahwe iso komamwarek kina koḇesya insa skain payamyum ma sḇeoser. Imnis ra, sinan sya fandun fa sifrur Nadi ro Kina sesya pdef. Kina sibor sya smam kayam JW Broadcasting, ramnai sawawos nyan rariso sifrur rosai smam kwar anna. Sinan sya fandun fa siswarepen snar romawa kasun sya fandandun sena neḇesisye ro eḇe snonkbor ma binkbor kwar sya. Inja, fandun fa sfasos mnis farkarkor na insama oser-oser ḇero kina yadori sismai fainda kaku ro nadi ro kina.​—Mazmur 148:12, 13.

11-13. Rariso kosambraḇser ḇaḇeoser ro sidang koḇedi?

¹¹ Roma inai babo mkoya, bisa mkakfnoḇek snonkaku oser-oser ro sidang insama sḇaḇir mkoswar si. Imnis ra, mkoḇebati kuker naek srar ḇesinan kwar sya. Mkor si fa sfawar rosai ḇefnoḇek si kwar fa sfarmyan ḇe Yahwe ro swaf taun ḇe taun. Mkun farkarkor ḇepyum ro si, ma naine nbuk swaf fa mkosambraḇseryae mko. Oso wer ido, koma roma ḇaido inai babo si ko ke, koḇesinan kwar ke, fandun fa koser snonkaku ḇerama ro Balai Karajan syakam. Bisa mkokofen aroo yoḇ si, mkofasnai marisen yoḇ si, mkofnoḇek si fa sisewar moḇ fa skain ro na, ma mkofasnaiḇair si ḇe ḇesesya. Mkofrur rarirya ido, na sḇaḇir mkoḇesyowi si.

¹² Skur Au fa wakfarkin fananjur faro ḇaḇeḇaryas ido, wafnoḇek ḇesinan kwar sya fa sakfasnai sananai sena insama nasnaiyar pdef. Mam pyum samande sna moḇ ḇemnis fa sḇaryas ro na. Fasos fa ḇebabo sya sfararur kayam kuker si. Naek srar ḇesinan kwar sya imbude sra ker fa sḇaryas werḇa raris moḇ sifrur ro ḇepon iwara snar sidafduf ker. Ḇape, nari sismai sneprei rofyor sifawi koswar si ma kosewar fa kofawi pyum samswen sena. Kofawi mnis umur sena ke roḇa ḇaido sro napnapes ya fyoro kwar ke roḇa, frur pyum koḇena na nafnoḇek si fa siryaḇ pdef fa sḇaryas.​—Imamat 19:32.

¹³ Snonkaku Israel simarisen sfarmyan kayamyam ḇe Yahwe I. Manḇefas mazmur doḇe, ”Napyum kaku ma nafrur marisen rofyor naek srar sḇarek kayam ro ḇaḇeoser!” (Wasya Mazmur 133:1, 2.) Doḇe ḇaḇeoser ine imnis raris mani ḇediref pyum fa sḇukiramrem. Rarirya kako, fyor kofrur pyum ma kofasnai ḇaḇenaḇye faro naek srar koḇesya, nari sismai sneprei. Sidang ya nari ḇyeoser pdef. Ausya mambir pyum naek srar ḇero sidang Bedi ke?​—2 Korintus 6:11-13.

14. Rariso sananai koḇena na nasnaiyar moḇ koḇarek ya?

¹⁴ Ro moḇ risai monda koḇarek ya, bisa kofrur sananai koḇena fa nasnaiyar. Rofyor kofasnai ḇaḇenabye faro snonkaku ḇeḇarek fanam kuker konsya, na simarisen sakfarkor fa sakfawi Yahwe I. Wafuken ro mankundaw: ’Moḇsa na skara aya rai? Rum yedi isren ma yamamwarek pyum i fa isnai pyum ke? Yamarisen fa yafnoḇek snonkaku ḇeḇarek fanam kuker aya ke?’ Wafukenpan Saksi ḇesesya rariso kina, snonkaku ḇeḇarek fanam kuker si, bati ro moḇ sifararur, ḇaido bati ro rumfarkor smam ḇaḇenaḇye ma kenem ḇepyum sena rai.​—Efesus 5:9.

KOWAREN PDEF

15. Rosai ḇefnai fandun fa kowaren pdef?

¹⁵ Nyan ḇese wer kofrur fa sananai koḇena nasnaiyar iso kowaren pdef. Yesus ikofen ker ḇe manfamyan ḇyesya, ”Rarirya mkowaren pdef”. (Matius 24:42; 25:13; 26:41, nwt) Rofyor kokara kandera ḇeba na ryama fyoro kaker, nari komewer koḇuk swaf koḇena fa kofnoḇek snonkaku sya insa sakfawi Yahwe I. (Matius 24:21) Ine nari nafrur fa sananai koḇena nasnai mnis ḇa rawo nambrer.

16, 17. Rosai nari kofrur insama kowaren pdef?

¹⁶ Fafisu ine fandun fa kowaren pdef snar fafisu dunya ine iḇyeḇa syadi wer. Ḇape, kofawi papupes dunya ine na ryama ro fafisu Yahwe dap kwar. (Matius 24:42-44) Inja ras ani ryama ḇaime, fandun fa kokaḇaḇaḇ ma kokara mura ḇe saneraro koḇena ro fafisu iwama. Kowasya Refo ro ras ḇe ras, ma koḇenadi ḇe Yahwe I ḇesya kwar. (1 Petrus 4:7) Kofarkor ro naek srar ḇefarmyan ḇe Yahwe fyoro kwar sya. Imnis raris, na kowasya farfyar ro kankenem sena, raris artikel ”Tujuh Puluh Tahun Memegang Punca Baju Seorang Yahudi”, ro Menara Pengawal 15 April 2012, ram 18-21.

¹⁷ Komyaren pdef fa kofarmyan ḇe Yahwe I. Koḇuk oras koḇena fa kofrur roi ḇepyum ma koḇebati kuker naek srar sya. Kofrur rarirya ido, nari komarisen syadi ma kokandor monda ras ani fyanam kwar. (Efesus 5:16) Ro swaf taun utin kwar, Yahwe manfamyan Ḇyesya sifrur roi nabor kwar. Ma baboine, kofararur pdef snar fararur ro Yahwe organisasi Ḇyedi nabor kaku, nasyadi ro rosai kokara na. Sananai kosnaiyar na nasnai syadi wer!

18, 19. Rariso penatua sya na sifnoḇek ko fa kofarmyan ḇe Yahwe I kuker raryaḇ? Fasnaiḇairpan fawar oso.

¹⁸ Kofrur sasar nabor, mboi Yahwe ḇyuk swaf ḇe ko fa kofarmyan ḇe I. Ifnoḇek ko kuker ḇyuk naek ḇeyuf fararur ḇe penatua ro sidang sya. (Wasya Efesus 4:8, 11, 12.) Inja, rofyor penatua srama smamfar ko ido, koḇuk swaf ani fa kofarkor ro fawawinanem ma wos anun sena.

¹⁹ Imnis raris, imbeswa oso ro Inggris susmai samswen ro farḇakḇuk suḇena. Suyor fafnoḇek ro penatua ro sidang. Eḇe bin ya ḇyaḇir swari myam pyum fandandun rur ro kina suḇedi ḇa. Mboi eḇe snon ya ḇyaḇir ima guru ḇepyum risyaḇa inja imewer ifrur nadi ro kina. Penatua sya sḇuk Yesus fawar ḇepyum ḇyena fa sḇukifarkor su. Sor eḇe snon ya fa dakfrur raris Yesus ḇemamfaduru manfamyan ḇyesya. Sanun ḇe bin ya fa ḇyekaḇaḇaḇ syadi faro swari. Penatua sya sikofenḇair kako nyan ḇepyum insama imbeswa ani sufrur nadi ro kina kuker romawa suḇesuya pdef. (Efesus 5:21-29) Ḇarpur mura, penatua sya sḇuk wos sandik ḇe snon ya snar ḇyesewar kwar fa fyarkin pyum kina ḇyesi. Sanun ḇe i insama ifrur na pdef ma ikyar faro Yahwe rur ḇesren Ḇyedi. Fafnoḇek ma ḇaḇenaḇye penatua sya sfasnai anna nafnoḇek kaku kina ine!

20. Fainda rosai na kosmai rofyor kofrur sananai koḇena nasnaiyar snonkaku sya?

²⁰ ”Aski faro snonkaku ḇesyowi Yahwe I, ḇembran ro nyan-nyan Ḇyena.” (Mazmur 128:1) Rofyor kofrur sananai koḇena nasnaiyar ido, na kosmai aski ḇeba. Inja, kofarkor snonkaku ḇesesya fa sakfawi Yahwe I, kosewar kaku fa kosambraḇser kina koḇesi ma sidang koḇedi insama ḇyeoser pdef, ma kowaren pdef. Snonkaku ḇesesya na smamepen kenem ḇepyum koḇena ma simarisen kako fa sisandik Kma koḇedi, Yahwe I.​—Matius 5:16.