Kokyar faro Yahwe I Insama Kokenem!

1. Rosai ḇefnai fa kokame kofandun saneprei ya?

KOKAME kofandun saneprei ya. Imbude kenem koḇena nafo kuker ḇaḇeḇirḇar, fafafko, ma makakwarek. Na koḇekandera snar kosmai dafduf, koḇe mansar binsar kwar, ḇaido snonkaku koswar sya srobur ko. Sino sifrur pyum si ḇa. Oso wer ido, snonkaku ḇero ris koḇesi srarmomen syadi wer. Kaku ya, kandera nabor nane nefasnaibos kokenem ro ”ras ḇepupesna” ma ras ḇe ras kofanam syadi ḇe dunya babo. (2 Timotius 3:1) Mboi, imbude kowaf kawan kwar Yahwe asas Ḇyena fa ndarirya, ma kosmai samswen nabor syadi wer. Inja, rodiso na kosmai saneprei ya?

2, 3. (a) Rosai kofawi ro Habakuk i? (b) Rosai ḇefnai fa kofarkor ro syap Habakuk?

² Mkorama kofarkor ro syap Habakuk fa kosmai kankarem faro fakfuken ani. Refo ya ikofenḇair pyum kaku Habakuk kankenem ḇyeja ḇa, mboi syap fyas anya syambraḇser kaku ko. Snonsnon Habakuk imbude knam ya iso ”Forepen Ḇeḇuk Sneprei”. Ine kyur ḇe Yahwe forepen Ḇyena ḇeḇuk sneprei faro ḇesyom faro I sya. Ḇaido ine kyur kako ḇe ḇesyom faro Yahwe I sya moḇsa sufepen nako I raya. Habakuk dawos ma ifuken fakfuken riḇeso ḇe Allah. Yahwe fyarkin Habakuk fa fyas awawos suḇena kukro ifawi nari kosmai fainda ro na.​—Habakuk 2:2.

³ Nabi ḇesmai samswen ine ma Yahwe awawos suḇenane, naiso monda fasfas ro Refo ḇefawarḇair Habakuk i. Mboi syap ine oser ro ”fas-fas ro Refoya kam” ḇeḇefas ro ḇeponiwara insama ”farkarkor kosma ro Refoya nafrur fa kodworen ma kosambraḇ isof kokyar faro Allah”. (Roma 15:4) Moḇsa syap Habakuk na ifnoḇek ko oser-oser rai? Nari ifnoḇek ko fa kofawi knam ro kokyar faro Yahwe I. Ma Habakuk ḇardadi ḇyena nbuk kakyar ḇe ko snar nari kona aski ro swaruser fafisu kosmai samswen ḇaido farawrowes na.

KOḆENADI KOR FARO YAHWE I

4. Rosai ḇefnai fa Habakuk ḇyesneso?

⁴ Wasya Habakuk 1:2, 3. Habakuk ikenem ro fafisu ḇesamswen kaku. Snonkaku ḇero ris ḇyedi siḇarḇor ma sirarmomen, ma naine nafrur fa ḇyesneso fafayaḇa. Myam mboi snonkaku Israel sifrur pyum ma siswaryae si ḇa. Habakuk kyara ḇo ifuken, ’Fafisu risai roi ḇeḇarḇor ine ipromes? Rosai ḇefnai fa kawan kaku insape Yahwe ifrur na fa namnai?’ Ḇyaḇir iḇor iḇerari. Inja dor kaku ḇe Yahwe fa ifrur roi oso. Imbude Habakuk kyara Yahwe iswar kawasa Ḇyesi ḇa kwar ḇaido na ifrur roi ono ḇa. Ras oso ḇaḇir rarirya kako ke?

5. Farkarkor rosai kun ro syap Habakuk? (Mam sonin ro randak artikel ine.)

⁵ Habakuk ifuken fakfuken nane snar ikyar faro Yahwe ma asas Ḇyena werḇa ke? Oroḇaḇeri! Habakuk dor faro Yahwe I fa ifnoḇek i ro makakwarek ma samswen ḇyena. Ine kyurfasnai Habakuk isusu ḇa mboi ikyar pdef faro Yahwe I. Kakuḇae, Habakuk ḇyeḇirḇar ma ikmome. Ifawi mnis ḇa roi ḇewar fa Yahwe iwaf kaker fa ifrur roi oso ma myam monda ḇyekandera kaku. Yahwe fyarkin Habakuk i fa fyasepen makakwarek ḇyena snar imbe fyarkor ko farkarkor ḇefandun kaku. Komkak awer fa kokofenḇair ḇaḇeḇirḇar ma makakwarek koḇena ḇe Yahwe I. Kaku ya, kuker myaren dor ko fa koḇenadi ma kokofenḇair rosai koḇaḇir kaku raya. (Mazmur 50:15; 62:8) Amsal 3:5 danun ḇe kokame, ”Wakyar faro Yahwe I kuker snembri ḇesiper, ma wakyar awer faro fawawi mankun bena.” Habakuk iso pyum wos nane ro kenem ḇyedi.

6. Rosai ḇefnai fandun fa koḇenadi ya?

⁶ Habakuk ikyar faro Bati ma Kmari, Yahwe I, ma syewar fa fyanam ḇe I. Habakuk kyain ḇo ḇyeḇirḇar faro samswen ḇyena monda ḇa, ma syewar nyan ḇesae ro mankundi ḇa. Imbape, ḇyenadi ḇe Yahwe I fa ikofenḇair roi ḇyaḇir ma makakwarek ḇyena. Ine iso nyan ḇepyum fa kakso na. Yahwe, Manḇerower nadi, dor ko fa kofasnai kokyar faro I kuker koḇenadi ma kokofenḇair makakwarek koḇena. (Mazmur 65:2) Kofrur roi ine ido, nari komam rariso Yahwe kyarem nadi koḇena. Nari ḇyuk sneprei ma fyarkin ko, imnis ra fyorepen myaren ko. (Mazmur 73:23, 24) Nari ifnoḇek ko fa kofawi moḇsa myam samswen sairirya monda ḇekur ko raya. Nyan ḇepyum oser fa kofasnai kokyar faro Yahwe I iso, koḇenadi faro I.

KOROWER YAHWE I

7. Moḇsa Yahwe myam Habakuk i rai fafisu ikofenḇair ḇaḇeḇirḇar ḇyena?

⁷ Wasya Habakuk 1:5-7. Fafisu Habakuk ikofenḇair ḇaḇeḇirḇar ḇyena faro Yahwe I raposa, imbude ifuken moḇsa Yahwe myam i rai. Yahwe ima Kma ḇesaswar, inja ifawi moḇsa Habakuk ḇyaḇir raya. Ifawi Habakuk ḇyekandera ma fyandun fafnoḇek. Inja, Yahwe isonek Habakuk i ḇa, mboi ikofenḇair ḇe i rosai nari ifrur faro snonkaku Yahudi ḇesoasuser ḇa sya. Kaku ya, Habakuk iso snonkaku Yahwe ikofenḇair randak ḇe i samamyai nari kero wer ḇekur si.

8. Rosai ḇefnai fa Yahwe kankarem Ḇyena namnis kuker rosai Habakuk kyara na ḇa?

⁸ Yahwe fyasnaiḇair ḇe Habakuk i, isya fyasos kwar fa ḇyuk samamyai. Nari myun snonkaku ḇerarmomen ma ḇeḇarḇor ḇero Yehuda ansya. Yahwe ikofen roi ḇeḇesya nane na ndarirya ’ro fafisu sedi’. Ine kyurfasnai samamyai na nkur si ro fafisu Habakuk ḇaido snonkaku Israel ḇero ris ḇyedi sikenem kaker. Yahwe kankarem Ḇyena namnis kuker rosai Habakuk kyara na ḇaḇeri. Snonkaku Khaldea, ḇaido Babilon, sima sirarmomen kaku. Sirarmomen syadi ro snonkaku Israel si, ḇefawi Yahwe sasoser Ḇyena. Inja, rosai ḇefnai fa Yahwe kyinfir er ḇesyom I ḇa ansya fa siso ḇeḇuk samamyai ḇe kawasa Ḇyesya? Ine nari nun kandera nabor syadi faro Yehuda. Auso Habakuk ido, na moḇsa ḇaḇir rai?

9. Habakuk ifuken fakfuken rosai wer?

⁹ Wasya Habakuk 1:12-14, 17. Habakuk ifawi kwar Yahwe nari ḇye snonkaku Babilon sya fa myunpres snonkaku ḇeḇarḇor ḇero ris ḇyedi, mboi ikmom kaker. Imbape nya sne ḇerun ma dun snemuk fa ikyar pdef faro Yahwe I. Ikofen Yahwe na ḇye ”Karui” ḇyedi pdef. (Ulangan 32:4; Yesaya 26:4) Habakuk ikyar kaku Allah ima isaswar ma ifrur pyum. Inja, ipok imkak ḇa fa ifuken fakfuken ḇeḇeso wer faro Yahwe I, raris: Rosai ḇefnai fa Yahwe myam monda roi ḇeḇesya ro Yehuda naḇyeḇa syadi wer, ma kawasa Ḇyesya sekandera fafayaḇa? Rosai ḇefnai fa ifrur roi nane fa namnai fasaw ḇa? Rosai ḇefnai fa Ḇepoik Syadi ya, ’fyasis monda’ ma imarisen faro roi ḇeḇarḇor ḇeḇesya ro moḇ nakam? Iba syadi wer, Yahwe ima ’Isren Syadi’ ma ’mkasi isren kaku fa myam roi ḇeḇyeḇa na’.

10. Rosai ḇefnai fa fyorno ido koḇaḇir raris Habakuk ḇyaḇir rai?

¹⁰ Fyorno ido koḇaḇir raris Habakuk ḇyaḇir rai. Korower rosai Yahwe ikofen na. Kokyar faro I ma kofarkor Wos Ḇyena, ḇesambraḇser saneraro koḇena. Kofawi asas Ḇyena kako fafisu korower rosai organisasi fyarkor ḇe ko. Mboi na kofuken kaker, ’Fafisu risai nari kandera koḇena napromes?’ Na kofarkor ro rosai Habakuk ifrur ya.

KOWAF YAHWE FA IFNOḆEK KO

11. Habakuk nya snemuk fa ifrur rosairi?

¹¹ Wasya Habakuk 2:1. Habakuk awawos ḇyena faro Yahwe I nbuk aski ro swaruser ḇe i. Ine ifrur fa nya snemuk fa iwaf Yahwe ifnoḇek i. Habakuk dap kaḇer snerimuk ḇyenane fyor ikofen, ”Yakain fasis fa yawaf ras ḇefo kandera ani.” (Habakuk 3:16) Allah manfamyan ḇesoasuser ḇesesya kako sikḇaḇ fa siwaf fasaspar ro Yahwe I. Farari ḇepyum sena nsambraḇser ko snar nfasnai kopok kofrur rarirya kako.​—Mikha 7:7; Yakobus 5:7, 8.

12. Farkarkor rosai kun ro Habakuk i?

¹² Farkarkor rosai kun ro Habakuk snemuk ḇyena? Randak ya, kopok komnai awer fa koḇenadi kor ḇe Yahwe I ma kokofenḇair samswen koḇena. Ḇesuru, fandun fa korower rosai Yahwe ikofen ro Refo ma organisasi Ḇyedi. Ḇekyor ya, fandun fa kokḇaḇ kowaf fasaspar ro Yahwe I ma kokyar nari ipyos kandera koḇena ro fafisu ḇesrow ya. Kakfrur raris Habakuk ido, nari kosmai aski ro swaruser ma kosambraḇ fa komkuepen. Samswen rosai monda nkur ko, mboi saneraro koḇena nafnoḇek ko fa kokḇaḇ ma kosmai aski.​—Roma 12:12.

13. Moḇsa Yahwe ḇyuk saneprei ḇe Habakuk i rai?

¹³ Wasya Habakuk 2:3. Na kokyar kaku Yahwe imarisen faro Habakuk kukro nya snemuk fa iwaf Yahwe ifnoḇek i. Allah Ḇepoik Syadi ifawi pyum kandera rosai ḇekur Habakuk i. Inja ḇyuk saneprei ḇe Nabi ani ma kuker saswar ḇyuk kakyar ḇe i nari kyarem fakfuken ḇyena. Kero wer Habakuk na imkei ro makakwarek ḇyena kam. Rya Yahwe ikofen ḇe Habakuk i, ”Ḇekaḇaḇaḇ monda ma wakyar Aya. Rya kawan kaku mboi nari yakarem nadi bena.” Yahwe ikofen kaku ḇe Habakuk i snar nya snemuk kwar fa ifrur asas Ḇyena fa namnis. Inja Yahwe syambraḇser Habakuk fa iwaf pdef. Ḇarpur ya, nabi ine nari fyafko ḇa.

14. Samswen risai monda ḇekur ko, kona snemuk fa kofrur rosairi?

¹⁴ Fandun kako fa kowaf Yahwe fa ifnoḇek ko. Fandun fa korower pyum kako rosai ikofen faro ko na. Rarirya, samswen risai monda nkur ko nari kona kakakyar ma aski ro swaruser. Yesus danun ḇe ko insama kokara monda awer faro ’fafisu ma oras’ Yahwe ikofenḇair ḇe ko na ḇa. (Farfyar 1:7) Fandun fa kokyar Yahwe iso ḇefawi pyum fafisu ḇepyum fa ifnoḇek ko. Inja, kopok kosusu awer mboi fandun fa kona sne ḇerun, kaḇaḇaḇ, ma kokyar faro Allah. Fafisu kowafe, fandun fa koḇuk pyum oras koḇena ma kosewar fa kofarmyan ḇe Yahwe I.​—Markus 13:35-37; Galatia 6:9.

YAHWE ḆYUK KANKENEM FARO SNONKAKU ḆEKYAR I SYA

15, 16. (a) Asas rosai na kosmai ro syap Habakuk? (b) Rosai kosmai ro asas nane?

¹⁵ Yahwe ḇyeasas, ”Snonkaku ḇenapes nari ikenem snar soasuser ḇyena” ma ”supswan ya nari ifo kuker fawawi ro Yahwe baba Ḇyedi”. (Habakuk 2:4, 14) Kaku, Yahwe ḇyeasas fa ḇyuk kankenem fyoro faro snonkaku ḇekaḇaḇaḇ ma ḇekyar I sya.

¹⁶ Asas ḇefas ro Habakuk 2:4 nefandun kaku, inja manwawan Paulus dap kaḇer na rarwan rikyor ro syapram ḇyedi! (Roma 1:17; Galatia 3:11; Ibrani 10:38) Na kokyar kaku, samswen risai monda nkur ko, mboi kokyar faro Yahwe I ido, nari komam ifrur asas Ḇyena fa ndarirya. Yahwe imarisen komam monda faro saneraro koḇena ro ras ḇarpon nayama.

17. Yahwe ḇyeasas rosai nari ifrur ya rofyor kokyar faro I?

¹⁷ Syap Habakuk iser farkarkor ḇesambraḇser kokam ḇekenem ro rasras ḇepupes ine. Yahwe ḇyeasas na ḇyuk kankenem fyoro faro snonkaku ḇenapes, ḇekyar faro I sya. Inja, samswen ma makakwarek risai monda kosmai na, iḇye kada kosambraḇser kakyar koḇena faro Allah. Rosai Yahwe ikofen ḇe Habakuk I, nbuk kakakyar ḇe ko nari ifnoḇek ma fyaspar ko. Kuker ḇaḇye, dor ko fa kokyar I ma kokḇaḇ kowaf fafisu Karajan Ḇyedi ḇyepoik supswan. Fafisu ani, supswan ifo kuker snonkaku ḇeaski ma ḇeoser fa ḇesyom faro Yahwe I.​—Matius 5:5; Ibrani 10:36-39.

KOKYAR FARO YAHWE MA KORYAḆ SYADI

18. Rariso Yahwe wos Ḇyena nasambraḇser kaku Habakuk i?

¹⁸ Wasya Habakuk 3:16-19. Rosai Yahwe ikofen ḇe Habakuk nasambraḇser kaku i. Habakuk kyara muraḇe roi ḇeba Yahwe ifrur kwar faro kawasa Ḇyesi ro fafisu naiwara. Kirine kakyar ḇyena faro Yahwe nasambraḇ syadi wer. Ikyar kaku kero wer Yahwe na ifnoḇek i! Habakuk ifawi nari ismai kandera ro swaf riḇeso mboi Yahwe wos Ḇyena nbuk saneprei ḇe i. Habakuk ḇyeḇirḇar werḇa. Mboi, ikyar kaku Yahwe na fyaspar i. Kaku ya, rosai Habakuk ikofen ro mnuk ḇe 18, inema mnuk oser ḇero Refo ḇefasḇair kakyar ḇeba. Sarjana ḇeḇeso sikyar knam kaku ro wos ine iso, ”Nari yapoper snar raryaḇ ro Allah; nari yafyer yaryar snar marasrisen ḇeba ro Allah.” Farkarkor ḇesambraḇser kaku ḇe kokame! Yahwe ḇyeasas nari ḇyuk roi ḇepyum ro fafisu iyama monda ḇa. Mboi ḇyuk kakakyar ḇe ko, kero wer nari ifrur asas Ḇyenane fa namnis.

19. Rariso Yahwe na ḇyuk saneprei ḇe ko, raris ifrur ḇe Habakuk i?

¹⁹ Farkarkor ḇefandun kaku kosmai ro syap Habakuk iso kokyar faro Yahwe I. (Habakuk 2:4) Insama kokyar pdef faro Yahwe I, fandun fa kosambraḇser ḇaḇebati koḇena kuker I. Inja fandun fa kofrur roi ḇeuser nane. (1) Koḇenadi ḇesya kwar, kokofenḇair ḇe Yahwe I ḇaḇeḇirḇar ma makakwarek koḇena kam. (2) Korower pyum rosai Yahwe ikofen ro Refo na, ma kosouser farkankin ḇyuk ḇe ko ro organisasi Ḇyedi. (3) Kosoasuser ma kokḇaḇ kowaf Yahwe ifrur asas Ḇyena fa ndarirya. Naiso roi Habakuk ifrur na. Ḇyekandera fafayaḇa fyor dawawos kuker Yahwe I, mboi syambraḇ ma iryaḇ syadi isof papupes ya! Kakfrur ra Habakuk ido, nari kosmai saneprei ro Yahwe I, Kma koḇedi. Inja, na kosmai saneprei ḇeba ro dunya ḇeḇarḇor ine ke?