Mansei Kaku Yohanes Ḇeḇebaptis I?

Kankarem ro Refo

Yohanes Ḇeḇebaptis ima Allah manfamyan Ḇyedi oso. (Lukas 1:76) Ḇyeḇeaḇen ḇepon paik riḇeso ro Yesus i. Allah byuk fararur ḇe i fa ’fyasos nyan’ faro Mesias, ḇaido Kristus. Iso ḇewar fa Yohanes byaryas anun ro Allah faro kawasa Yahudi sya insama skaḇer ma sfarmyan Manseren Allah kuker nyan ḇekaku ya.​—Markus 1:1-4; Lukas 1:13, 16, 17.

Fafisu srower anun Yohanes byaryas na, snonggaku ḇena sne ḇenapes sya sfawi kaku Yesus ḇeraker Nazaret ima Mesias sḇeasas kwar dirya. (Matius 11:10) Yohanes dor kaku insama simbror mura sḇebaptis fa nḇairo marandor sena. (Lukas 3:3-6) Snar Yohanes ḇyebaptis snonggaku sibor, sor i ḇe Yohanes Ḇeḇebaptis. Yohanes ḇyebaptis Yesus i kako, inema ḇaḇebaptis ḇefandun kaku dirya.a—Markus 1:9.

Fawar ine na kyarem fakfuken:

• Rosai ḇefrur fa Yohanes Ḇeḇebaptis kankenem ḇyedi iḇese kero?

• Mansei Yohanes Ḇeḇebaptis sinan ḇyesuya?

• Mansei ḇemun Yohanes Ḇeḇebaptis fa imar?

• Yohanes Ḇeḇebaptis ma Yesus sufamfabri ro fararmyan suḇena ke?

• Ḇena snonsnon Yohanes sfas ro Refo sefis?

Rosai ḇefrur fa Yohanes Ḇeḇebaptis kankenem ḇyedi iḇese kero?

Yohanes fararmyan ḇyena neḇeḇardi kwar. Yahwe ḇyardi kwar nari iwan manwawan oso. Yohanes ikofenḇair anun ḇerama ro Allah. Inja nasnai kaku iso manwawan Yahwe iwan ani. (Maleakhi 3:1; Matius 3:1-3) Imnis ḇardadi ya, Yohanes ifnoḇek snonggaku Yahudi fa ”fyasos sasrai ḇepyum oso faro Manseren”. Isoine ifnoḇek snonggaku Yahudi fa simarisen srower anun Yahwe ikofen roro manfaker ḇepon kaku Ḇyedi, Yesus Kristus i.​—Lukas 1:17.

Yohanes duf fararur ḇefandun ono. Yesus ikofen snar ”rofandu snonkaku bin sya saḇen si oso ḇanim ikḇawes fa iba syadi Yohanes [Ḇeḇebaptis], ḇape ḇebaḇa syadi ro Ḇaḇesasoser Boiyaswa ikada iba syadi Yohanes”. (Matius 11:11) Ro manfamyan Allah ḇyesikam ḇekenem ro fafisu Yohanes ḇaim, bisa kokofen Yohanes ”iba syadi” kukro ima nabi dirya, ma i kako manwawan Allah ḇyardi ḇepon kwar. Yesus wos ḇyena nfasnai kako Yohanes na dek ḇe nanggi fa ḇyepoik ro Karajan Allah ḇa.b Yohanes imar kwar insape Yesus ḇyas nyan faro snonggaku sya fa sikenem ro nanggi. (Ibrani 10:19, 20) Inja, Yohanes nari ikenem ro Firdaus ro supswan ma dakḇe kawasa ro Karajan Allah.​—Mazmur 37:29; Lukas 23:43.

Mansei Yohanes Ḇeḇebaptis sinan ḇyesuya?

Yohanes sinan ḇyesu iso Zakharia ma Elisabet. Zakharia ima imam Yahudi diri. Yohanes ḇaḇeaḇen ḇyena mujisat nairi kukro Zakharia ma Elisabet ”suḇe insar mansar kwar” ma Elisabet pyansnasem.​—Lukas 1:5-7, 13.

Mansei ḇemun Yohanes Ḇeḇebaptis fa imar?

Raja Herodes Antipas iwan fa speremuk Yohanes ḇruri. Ifrur rarirya imnis swari, Herodias, fararyor ḇyena. Herodias imarisen ḇa kaku faro Yohanes i kukro Yohanes ikofen ḇe Herodes, ḇekarem i ḇe snon Yahudi, bo doḇe farḇakḇuk ḇyedi kuker Herodias ima isrow ḇa kaku ro mamam sasoser snonggaku Yahudi.​—Matius 14:1-12; Markus 6:16-19.

Yohanes Ḇeḇebaptis ma Yesus sufamfabri ro fararmyan suḇena ke?

Kakara ḇeradirya imnis roi Refo ikofen ya ḇa. (Yohanes 3:25-30) Fama, Yohanes ikofen kaku iso na ḇefasos nyan faro Mesias i. Yohanes ikofen bo doḇe, ”Yaḇuk [baptis] kuker war, insa ḇyeḇeḇadir faro Israel.” Mura ikofen wer, ”Inekada Allah Rumkun ḇyedirya.” (Yohanes 1:26-34) Inja, Yohanes imarisen kaku fafisu ifawi snonggaku sibor sḇe manfamyan faro Yesus i.