Rosai Ḇefnai fa Allah Myam Monda Pamarenta Nazi Myun Snonggaku Sibore?
Snonggaku ḇefuken radinema snaro karyer sesya simar ḇur si, iso eḇewar fa sifuken radirya. Sefandun kankarem monda ḇa, boi sneprei kako. Eḇesesya skara mamun ḇeba ine, roḇaido sap ḇe Holocaust ine, ḇye mamamun ḇeḇye ḇa kaku snonggaku sya sifrur na, inja samswen fa sikyar faro Allah.
Kakara ḇesasar ro snonggaku sya ḇekur Allah ma Holocaust
Roi ḇekaku ḇa: Kofuken awer sai ḇefnai fa Allah myam monda Holocaust ine.
Roi ḇekaku: Snonggaku ḇena kakyar ḇesambraḇ sya sifakfuken rosai ḇefnai fa Allah myam monda bo sifrur roi ḇeḇarḇor na. Imnis raris, nabi Habakuk ifuken, ”Rosai ḇefnai fa mam monda yamam roi ḇeḇarḇor nabor kaku? . . . Moḇ risai monda farmakakok ya, rarmomen, mamamun ma rakrok naisya.” (Habakuk 1:3, Bahasa Indonesia Masa Kini [BIMK]) Allah imsor Habakuk i ḇa. Imbape ḇye fakfuken ḇyanine isya pdef ro Refo insama snonggaku syakam bisa siwasya na.
Roi ḇekaku ḇa: Allah myam monda snonggaku sya sekandera.
Roi ḇekaku: Allah dayin kaku kandera ma mamamun. (Amsal 6:16-19) Ro Nuh fafisu ḇyedi, ”[Allah] sneri duf kaku” snar mamamun na neryewen ro supswan ḇesiper. (Kejadian 6:5, 6) Inja kokyar, Holocaust kako nafrur fa Allah sne ḇyedi iduf.—Maleakhi 3:6.
Roi ḇekaku ḇa: Holocaust ima samamyai ro Allah faro snonggaku Yahudi diri.
Roi ḇekaku: Allah byuk ijin faro snonggaku Romawi sya fa sfarmakakok Yerusalem ro abad randak ya. (Matius 23:37–24:2) Boi ro fafisu anya beri, Allah myam keret oso ipyum syadi ro ḇesesya ḇa ḇaido byuk samamyai faro keret oso ḇa. Ro mamam Allah Ḇyena, ”rarwas oso isyaḇa fandu kawasa Yahudi ma kawasa er ḇesesyaḇa”.—Roma 10:12.
Roi ḇekaku ḇa: Allah ima isawarwar ma nya papoik ḇeba kaku ido, nari idwarek Holocaust ine fa nejadi awer.
Roi ḇekaku: Allah iso ḇefnai kandera ḇaḇeri raryano, fafisu ono byuk swaf fa kandera na naisya.—Yakobus 1:13; 5:11.
Rosai ḇefnai fa Allah myam monda Holocaust nejadi?
Roi ḇefnai ine nejadi kofawi na kako ro roi ḇefrur Allah myam monda snonggaku sya sekandera: infa nekarem sengketa ḇejadi ro fafisu naiwara ḇefrur fa dunya ine ḇepoik ya iso Ibiris, mboi Allah ḇa. Roi nane nefasnaibos ro Refo ya. (Lukas 4:1, 2, 6; Yohanes 12:31) Fasfas ḇefesepen kuker roi ine ikofenḇadir rosai ḇefnai fa Allah myam monda koḇekandera ri. Mboi, mgorama komam fawar ḇekaku ri suru ro Refo bisa nfasnaḇair ḇeko rosai ḇefnai fa Allah myam monda Holocaust ine.
Rosai ḇefnai fa Holocaust isya? Allah ikofen faro snonggaku ḇerandak, Adam ma Eva su, rosai dor ro su fa suso na, ḇape idif su ḇa. Suḇe sukinfir ro manggunsu rosai ḇepyum ma ḇeḇye ḇa, ma snemuk ḇesasar suḇenane, raris snonggaku ḇebor ḇesesya snemuk sun na, nun roi ḇeḇye ḇa faro snonggaku sya. (Kejadian 2:17; 3:6; Roma 5:12) Raris ḇeḇekofen ro syap Statement of Principles of Conservative Judaism, ”Kandera ḇebor ḇero dunya inena nasya snar kobuk sasar ḇaḇemkei sbuk ḇe ko fa kokinfir.” Ḇape, Allah dun ḇaḇemkei koḇena ḇa. Imboi byuk swaf faro snonggaku sya fa sifrur roi ḇebor kuker farfnoḇek Ḇyena ḇa.
Allah ima syambraḇ ma nari ipyos roi ḇeḇye ḇa Holocaust ine ifnai na. Allah ḇyeasas nari byuk kabakḇok faro snonggaku ri yuta ḇemar kwar sya, ine kako faro ḇemar snar Holocaust. I kako nari ipyos snonggaku sya roi siswarepen na snar simkeiburo mamamun ḇeḇye ḇa ine. (Yesaya 65:17; Kisah 24:15) Saswar beḇa Allah Ḇyena faro snonggaku sya nafrur fa kokyar asas Ḇyena nari ndarirya ḇesya kwar.—Yohanes 3:16.
Snonggaku ḇeḇor ḇekandera ro Holocaust suf nako ro kakyar sena ma sna mamam ḇemnis kuker kankenem ya snar sifawi kaku roi ḇewar fa Allah myam monda roi ḇeḇarḇor nejadi ma marisen Ḇyedi fa ipyos kandera na.