Rosai Ḇefnai fa Saksi-Saksi Yahwe Sakfrur Ras Ulang Taun ya Ḇa?
Saksi-Saksi Yahwe nggoine nggakfrur ras ulang taun ya ḇa kukro nggofawi Allah imarisen faro na ḇa. Kaku beri, mnuk ro Refo naisya ḇa ḇekofen bos kofrur ras ulang taun ima syasar. Imbape, Refo ifnoḇek ko fa kokarauser roi ḇeḇeso ḇefandun kaku ro ras ulang taun anine ma ifnoḇek ko fa komam na imnis moḇ Allah myam na raya. Kwarapan roi ri fyak ma wos farkin ro Refo ḇeuser nane.
Munara ras ulang taun ryamuma ro snonggaku ḇekyar Allah ḇa sya. Syap Funk & Wagnalls Standard Dictionary of Folklore, Mythology, and Legend, ikofen munara ras ulang taun ḇyeknam ro kakakyar ḇekofen rofyor snonggaku oso ifrur ras ulang taun ḇyedi, ”rur ḇeḇarḇor sya ma awyae ḇeḇye ḇa sena na nakyaren snonggaku oso ro ras ulang taun ḇyedi”. Syap The Lore of Birthdays ikofen, ro fafisu iwara, tanggal snonggaku oso ḇyeaḇen ya ima roi ḇefandun kaku insama sifawi epon moḇsa kenem ḇyedi ro ras iyama imnis ilmu perbintangan. Syap ani kako ikofen snonggaku ḇero fafisu iwara sya sikyar, lilin ulang taun nya samambraḇ fa sbuk fararyor sena.
Imbape, Refo dayin kaku fararur manwen na, kinsor, ḇaido roi ḇeradirya na. (Ulangan 18:14; Galatia 5:19-21) Ḇesyadi wer, sano oso ḇefrur fa Allah byuk samamyai faro Babilon ḇepon iwara ani iso kukro kawasa ḇyesya sbuk ilmu perbintangan ro sasewar sena fa sfawi rosai sifawi ḇaim na ḇaido roi na ḇejadi ya. (Yesaya 47:11-15) Saksi-Saksi Yahwe nggoine na nggokukeḇ ker ḇaḇeḇarpur ro munara oser-oser ḇa. Ḇape, rosai Refo ikofen na nasnai kwar ido, nggokyar kaku na.
Snonggaku Kristen ḇero abad randak sya sifrur ras ulang taun ya ḇa. The World Book Encyclopedia ikofen ”smam munara ras ulang taun ḇe rari ḇerama ro snonggaku ḇekyar Allah ḇa sya”. Refo fyasnaiḇair manwawan ma manfamyan ro Yesus ḇerower beri farkarkor byuk na sfasnai nyan faro snonggaku Kristen syakam fa siso na.—2 Tesalonika 3:6.
Munara oser monda snonggaku Kristen sifrur ya iso Yesus marmar ḇyedi, mboi ras ḇyeaḇen ya risya ḇa. (Lukas 22:17-20) Refo ikofen kwar ”ras marmar ipyum syadi ro ras ḇaḇeaḇen ya”. (Pengkhotbah 7:1) Ro ras Yesus imar ya, nya snonsnon ḇepyum ro barpon Allah kwar. Ine efrur fa ras marmar ḇyedi ipyum syadi ro ras ḇyeaḇen ya.—Ibrani 1:4.
Refo ikofen ḇa Allah kawasa Ḇyesi sakfrur ras ulang taun. Imbape, Refo fyasepen fawar ri suru ḇekur ras ulang taun mboi ḇefrur ya iso snonggaku ḇeyaksyom ḇe Yahwe I ḇa. Ma fawar suine naser roi ḇeḇye ḇa.—Kejadian 40:20-22; Markus 6:21-29.
Romawa kasun ro Saksi-Saksi Yahwe sya na sfafko snar sifrur ras ulang taun ya ḇa ke?
Raris sinan ḇebor sya, sinan ḇeḇe Saksi Yahwe kako siswar romawa sesi bae. Sbuk hadiah ḇe si ma sna swaf nabor fa skain kayamyam ma simarisen. Sifrur roi ḇeradine ro ras oser monda ḇa. Sisewar fa siso Allah nyan Ḇyena ḇebuk roi ḇepyum faro kawasa Ḇyesya ro fafisu nakam. (Matius 7:11) Inja romawa ro Saksi-Saksi Yahwe sya sipok sfafko ḇa. Rwama komam roi sikofen na:
”Yamarisen syadi yasmai hadiah ro fafisu yakara ḇa na.”—Tammy, ḇyeumur taun ri 12.
”Snar yafrur ras ulang taun ya ḇa, yasmai hadiah ro ras ani ḇa. Ḇape, sinan ayesu subuk hadiah ḇe aya ro ras ḇesena. Yamarisen snar ine ifrur fa yakandor kaku.”—Gregory, ḇyeumur taun ri 11.
”Kwara ido kukis kermgun ma sidisen dow ima festa dirya ke? Ibye ya rwama ma mam moḇsa yafrur festa ro rum yedi rai!”—Eric, ḇyeumur taun ri 6.